Timoti Tasoo
6 Wanaa cho chiaa wa nɔ ma hiou lachi a wanaa ndaa banaa bɛɛle yiŋgoloŋndeŋ kioo,+ yɔŋii waŋnda dimi sɔɔŋ wɔɔŋndoŋ a diola Mɛlɛkalaŋ, ɔɔ a pɛɛkula ndɔlaŋ okɔɔ.+ 2 Wanaa cho o chɛleŋ niŋ wanaa laalaŋnda o ba bɛŋgu wa, a nɔ ma kɛɛ wanaa ndaa banaa bɛɛleŋ kioo le mɛɛ nda cho puaapiliaa yɛ le. Kɛ a nɔ ma tosal nda wali kɛndɔɔ, kanifuule chaaŋaa ndaa wanaa laalaŋaa nda kaala wa, nda cho tɔnɔɔ sɔla o wali koŋ niŋ ni.
Hiou lachi a waŋnda sɔɔŋ muŋ pɛɛkoo, a nda silaa a muŋ okɔɔ. 3 Wana o wana pɛɛku pɛ waŋnda pɛɛku cheleŋ, mbo ve o chɛlaŋ a pɛɛku fula Masanɔ naa Chiisu Kiliti o ba wo le,+ ɔɔ pɛɛku naŋ sɔla mɛɛ naŋ nɔ miŋ piɛi Mɛlɛka yɛ le,+ 4 mɛɛ wana koŋ luɛi yoŋgaa, nduyɛ o bii nyɛ o nyɛ bila le.+ Wana waa nuaa nɔ yeemɛi le sɛɛŋgiaŋndaŋ, a diomndaŋ hiŋaŋndo o sɔɔŋ choo.+ Sɔɔŋ waa lende yɛ, muŋ huŋ a paŋaliaŋndaŋ, sɛɛŋgiaŋndaŋ, tɔɔlaŋ tɛɛmbaŋndo,* sɔɔŋ wɔɔŋndoŋ tuunɔŋndo o kɔl, 5 a sɛɛŋgiaŋndaŋ lɔɔlɔɔ o sɔɔŋ taaniŋndoŋ choo nda wanaa nɔ yiyaŋnda wɔɔŋndaŋ nda.+ Waŋnda haa sina lɛ tonyaa le, nduyɛ a yiyaŋ maa te a yɔŋguŋ pɛ o Mɛlɛka lo, a cho nyɛ sɔla.+ 6 I cho tonya maa te waŋndo yɔŋguŋ pɛ o Mɛlɛka lo,+ nduyɛ mbo hini kɔl a nyɛ o nɔ o ba wo, sullo pila o sɔla ni. 7 Kanifuule, ŋ hiŋ a nyɛ o nyɛ o ba o chieeŋndo hoo niŋ te, nduyɛ ŋ kue niŋ vɛlɛ a nyɛ o nyɛ o ba le.+ 8 Lelaŋ, te ŋ nɔ pɛ nyɛdiaa a nyɛ chuɛɛnaŋndo,* ŋ nɔ miŋ hini kɔl a muŋ.+
9 Kɛ wanaa nɔ haa yeemɛi le sullo wa cho delɔɔ o tɔɔndaŋndo niŋ, nduyɛ ma hau o yaŋɔɔleŋ.+ Sɔɔŋ ŋdiɔm bɔɔbɔɔ yaa wana o yeemaŋ wɔɔŋndoŋ niŋ, a o tambei niŋndoŋ cho nda komal.+ 10 Kanifuule, kaala ŋkanioo cho puundule sɔɔŋ wɔɔŋuŋ suu o suu ni. Nduyɛ kaalaa hoo tosa niŋ mi wanaa bɔɔbɔɔ mal laalaŋ ndaa nɔ wo. Okoŋ, ma luei ndapila o saŋgaa niŋ.+
11 Lelaŋ, num cho hoo buɛi Mɛlɛkaa wo, fafaŋ sɔɔŋ muŋ. Kɛ kindiŋ le ma wa sakpo, ma yɔŋguŋ o Mɛlɛka lo, ma nɔ laalaŋndo, kaalaa, biuwɔŋndo, a kaa mɔɔsɔlɔɔ wo.+ 12 Chɔulaba kpeekpei o nɛi kɛndɔɔ choo le laalaŋndo. Kindiŋ ma bii yoomu fafɛɛŋndo kpiŋ. Le ma sɔla yoomoo hoo Mɛlɛka veelu num ni, nduyɛ a dimul niŋ wanaa bɔɔbɔɔ a yoomoo hoo okɔɔ.
13 I cho num silalaŋ ndaŋ kioo Mɛlɛka o hɔl, o tosa mi nyaa yoomaa kpou wa yoomoo wo, a Chiisu Kiliti, o timbi seile kɛndɛleŋ Pɔŋtiɔɔ Paile o hɔl+ kpendekele wo. 14 Bii sawalaŋ ndaŋ o nɛi diandaa niŋ. Tɔɔyaŋ o tɔɔyaŋ wa num choo le, haaa mbo lo okoŋ mi boondii Masanɔ naa Chiisu Kiliti cho chɔɔmɔŋnde fuuluu.+ 15 Hei cho hunɔɔ tosaŋ a boondii Masa kɔl nyuloo, Masa Kpaaya bɛndoo pila kɛɛsiaa ve. Ndu hiou a masaa kpou, nduyɛ ndu cho Masaa le masaa cho o masaleŋ choo wa kpou ni.+ 16 Ndupilɛ kpe nɔ yoomu vi le wo ni.+ Nduyɛ nyɛ teŋgaa o cho niŋndo, wana o wana nɔla ma sɔɔŋguu ndu ikɛi le.+ Wana o wana chi wɔ ndu le, nduyɛ wana o wana nɔla ma che ndu le.+ Maa o sɔla bɛɛleŋ a kpaaya fafɛɛŋndo fɔ! Amiina.*
17 Sila wanaa sulaa o chieeŋndo hoo niŋ maa a heeluŋ te, nduyɛ maa a duau tiindaŋ ndaa o sulta cho hunɔɔ tambu laŋ niŋ te.+ Kɛ a dɔu tiindaŋ ndaa o Mɛlɛka niŋ, o yɔŋgu naa nyɔɔŋ tau tau le miŋ de muŋ tɔnɔ wo.+ 18 Dimul nda le ma tosa nyɛ cho o kɛndɔɔ wo, ma tosa walta kɛndɛlaŋ, ma nɔ kɛndɛi, nduyɛ ma wa a bɛɛndiaŋ le nyɔɔŋ keŋnaŋndo.+ 19 Te a tosa hei pɛ, a cho Mɛlɛka sultaŋ sɔla o ba, ma kila chiyii kala kalɛi le chilaŋ,+ le halikpeŋ ma huŋ sɔla yoomu kpeekpeiyo.+
20 Timoti, manda nyɛ ŋ sɔla wo nyɛkɛndɛi.+ Sɔɔŋ fondoŋ ke Mɛlɛka lebɛɛ le woŋ, a kɔl kalu lachoowa simul tonyaa wo, wou sondoo o muŋ niŋ te.+ 21 Le mɛɛ apum cho pɛɛlɔŋndo a kɔl kaloo hoo yɛ, a mal niŋ hau pɛɛku tonyaa.
Maa Mɛlɛka tosal nya kɛndɛi nduɛi bɛnduei fɔ!