Maatiu
16 Mi Falisiiya a Sadusiiya kua naa Chiisu chua le ndu tɔɔndaŋndo. Ma nyuna ndu le mbo tosa kaamaa le chɔmndo maa Mɛlɛka vem ndu ni.+ 2 Kɛ mbo mulul nda aa: “Te paaleŋ le del pɛ mi la che mi choo yɔŋnuŋ o siaŋa, la dimi aa, ‘Waloo cho wa siɔdii.’ 3 Nduyɛ, te la che pɛ mi choo yɔŋnuŋ o siaŋa idii puŋ, mbo wa yisimaa, la dimi aa, ‘Piɔɔ cho hau sia.’ La nɔla mi la tofa choo mi la sina te piɔɔ sia niŋ, ɔɔ te waloo wa niŋ pɛ. Kɛ, la nɔla mi la sina sɔɔŋ cho yɔŋnɔŋndo teleŋndo hoo woŋ pɛŋgu le. 4 Wanaa dɛnɛ wɔɔŋnda a wanaa sendu a Mɛlɛka le wa, kaamaa nda cho nuuviaa ni. Kɛ kaama cheleŋ tosaŋ lɛ niŋ kposoŋ te,+ mɛɛ kaama yɔŋnuŋ a Chona wo.”+ Okoŋ, mbo mɛi nda loŋ mbo kuaŋnuŋ.
5 Mi buɛiyaa Chiisu wa taŋ o kɔŋgɔɔ pilɔɔ, kɛ ma puɛɛnuŋ le beediiyo* chuaa.+ 6 Mi Chiisu dimul nda aa: “La mandaŋ a yiisii* Falisiiya a Sadusiiya.”+ 7 Okoŋ ma kandu nyiimu nyiimoo ndapila tɛɛŋ aa: “Naapum le mɛɛ naŋ hiŋ a beedii le yɛ.” 8 Mɛɛ Chiisu sina nyɛ nda wa dimioo wo, mbo dimul nda aa: “Le yɛɛnɛ nya cho yɛ suukaŋndo maa la hiŋ a beedii le? Baa la nɔ laalaŋ bɔɔ le? 9 Mɛɛ la sina wɔ suɛi hei pɛŋgu le? La loonuŋ pa mɛɛ ya tosa mi waŋ piaanduaa 5,000 dia beedii kpuŋgbaŋ ŋuɛɛnoo yɛ? Vɛɛnɛ o nda dema wo wa yɛ kambɛilaŋ?+ 10 Beedii kpuŋgbaŋ ŋɔmmɛu waŋ piaanduaa 4,000 de wo yɛ? Vɛɛnɛ o nda dema wo wa yɛ kambɛila bɛndulaŋ?*+ 11 Mɛɛ la biiyɔ bila maa o cho a beedii okɔɔ le ya wa suɛi le le? Kɛ, la mandaŋ a yiisii Falisiiya a Sadusiiya.”+ 12 Okoŋ, ma sina maa o cho a yiisii nda wou o beediiyo niŋndo le nda nɔ ma mandaŋ te, kɛ a pɛɛkula Falisiiya a Sadusiiya.
13 Mɛɛ Chiisu fuuluu o tanda Sisaliaa wo niŋ Filipai, mbo nyuna buɛiyaa nduaa aa: “Yɛɛ waŋnda cho yɛ dimioo a Po wanachioo okɔɔ?”+ 14 Ma mulul ndu aa: “Apum cho dimioo aa Chɔŋ Wana Yiŋaa ŋ cho ni.+ Apum aa Ilaicha.+ Apum aa Chɛluimaya ɔɔ wana suaa le Mɛlɛka wo opum.” 15 Mbo nyuna nda aa: “Kɛ nya yɛ, vɛɛ nya dimi yɛ? Wana maavɛɛ ya cho yɛ?” 16 Mi Saimɔŋ Pitɛ muli aa: “Num cho Kiliti ni,+ Po Mɛlɛka cho yoomu wo.”+ 17 Mi Chiisu dimul ndu aa: “Kɔl kɛndɔɔ cho le num Saimɔŋ, po Chona wo. Kanifuule, o cho wanachiee le chɔm num suɛi hei le, kɛ Finya nuu o choo choo niŋ chɔm num ndi ni.+ 18 Mi dimul num vɛlɛ: Num cho Pitɛ ni,+ nduyɛ o pouwo hoo choo+ ya cho kunda nuu taŋgul ni, Sɛiyo* nɔla mbo tɛɛmbuu ndu le. 19 I cho num ke kiiyoŋ le Masale Mɛlɛkaleŋ o choo choo niŋ. Nyɛ o nyɛ ŋ yii pɛ o lɛŋndeŋ choo, o cho niŋ wa o yiyaa o choo choo niŋ. Nduyɛ nyɛ o nyɛ ŋ timbi pɛ o lɛŋndeŋ choo, o cho niŋ wa o timbiaa o choo choo niŋ.” 20 Okoŋ mbo sila buɛiyaa nduaa o kala kala maa a dimul wana o wana maa ndu le cho Kiliti le.+
21 Chɔŋ niŋ a boondii keŋ, mi Chiisu kandu buɛiyaa nduaa tɛɛsiallo maa o nɔ mbo kuɛ Chulusalɛm mi laŋgbaa kalla, masaa wanaa soliaa lasalaa, a wanaa pɛɛku waŋnda sawala Mɛlɛkalaŋ nda saaŋgiaa ndu, okoŋ ma dii ndu. Kɛ mbo miiŋgu yoomu o paale yaa ndɔleŋ choo.+ 22 Mɛɛ Pitɛ tuei hei, mbo veelu ndu o lesɔŋgi, mbo kpaa ndu aa: “Pɛŋgi sɔɔŋ waa lende dimioo Masanɔɔ. I waa lende nɔ mi i yɔŋnuŋ a num kposoŋ te.”+ 23 Kɛ mi Chiisu mulul Pitɛ kɔɔ, mbo dimul ndu aa: “Faŋaŋ ya nanuŋ,* Setana! Pou boŋaa ŋ cho le ya ni. Kanifuule, o cho yiyaŋnda Mɛlɛka le ŋ nɔ le, kɛ yiyaŋnda waŋnda chieeya.”+
24 Okoŋ mi Chiisu dimul buɛiyaa nduaa aa: “Wana o wana yeema pɛ mbo simnuŋ buɛi ni, o nɔ mbo kɛɛ ndupila,* nduyɛ mbo chua yɔm ndɔ imɔnɔɔ,* mbo hiou lachi a ya tolɔɔ kɔɔli.+ 25 Wana o wana kindiŋ pɛ le yoomu ndɔɔ piŋioo, o cho ndu hiɔlɔŋ. Kɛ wana o wana chɛl pɛ mi yoomu ndɔɔ hɛluŋ ndu le sabu nuu, o cho ndu miŋgi sɔla.+ 26 Te waŋndo sɔla pɛ nyɔɔŋ o chieeŋndo niŋ kpou, kɛ nduyɛ mi yoomu ndɔɔ hɛluŋ ndu o muŋ nuuviaa niŋ,+ tɔnɔ yɛɛ wa yɛ o keŋ niŋ? Yɛɛ kpeekpei waŋndo yɔŋgu yɛ le yoomu ndɔɔ baŋaa?+ 27 Kanifuule, Po wanachioo cho hunɔɔ o biilu Finya ndɔ wo niŋ a maalikɛiyaa nduaa, nduyɛ mbo paawa* wana o wana a mɛɛ kela ndɔɔ cho yɛ.+ 28 A tonya mi dimul nya, waŋnda apum cho nya tɛɛŋ, a vi niŋ kposoŋ te haaa ma che Po wanachioo hunɔɔ o Masale ndɔleŋ niŋ.”+