Lɛvitikɔɔ

8 Mi Chɛhowa dimul vɛlɛ Muuse aa: 2 “Chua Elɔŋ nda puaa nduaa,+ domala ndalaŋ,+ chuɛiyaŋ le pɔyaa,+ nau cho le sala hakioo wo, saa konduaa a ŋiɔɔŋ, beedii nɔ yiisii* leniŋ te wo+ kambɛiyo cha, 3 ma dimul Isɔluɛiya kpou le ma chuuŋgiaŋ o tɛndii bɔŋaŋndo hɔlndɔ.”

4 Okoŋ, mi Muuse tosa mi Isɔluɛiya kpou chuuŋgiaŋ o tɛndii bɔŋaŋndo hɔlndɔ, mɛɛ Chɛhowa dimul ndu yɛ. 5 Mi Muuse dimul nda aa: “Nyɛ Chɛhowa dimul naa le tosaa wo cho hoo ni.” 6 Mbo dimul Elɔŋ nda puaa nduaa ma sɔɔŋguu kpɛɛluŋ, mbo pulu nda a mɛŋndaŋ.+ 7 Okoŋ kɔɔli, mi Muuse wou Elɔŋ doma vilɛiyo,+ mbo yii ndu kola ipɛŋgɔɔ,+ mbo wou ndu doma bala biŋgioo,+ mbo wou ndu vɛlɛ doma biŋgioo+ lechoo, nduyɛ mbo yii ndu yaule doma biŋgi nda womul teŋ+ o chaŋ, le mi domaa bii ndu nyɛkɛndɛi. 8 Mbo handu ndu vɛlɛ nyɛ wa ndu o takpa wo,+ mbo wou Yuluim a Tumim+ o nyɛ koŋ niŋ. 9 Okoŋ mbo wou ndu mɔsillo+ o lebol, mbo handu ndu nyɛ nda toosiaa a kooliiye mbo wa wolioo ŋɛlɛŋgi ŋɛlɛŋgi wo o mɔsillo hɔlndɔ, tamasi chɔm maa o cho o yɔŋgaŋ o Mɛlɛka lo wo,+ mɛɛ Chɛhowa ndoo dimul Muuse yɛ.

10 Okoŋ mi Muuse chua chuɛiyaŋ le pɔyaa, mbo pɔya tɛndii Mɛlɛkaa a nyɛ o nyɛ wa leniŋ,+ nduyɛ mbo dindi ndu. 11 Okoŋ kɔɔli, mi Muuse chua chuɛima maŋ ma tiŋ, mbo fasaŋiaa maŋ bɛmbɔɔ le ŋɔmmɛu o bandu luamaa lasalaa choo mbo pɔya ndu, nyɛm ndɔŋ laandoŋ kpou, hɛŋgɛiyo a nyɛ nda kɛsi hɛŋgɛiyo lechoo wo, le laŋ dindioo. 12 O mɛɛlulaŋ kpɔŋ, mbo tala chuɛima nda pɔya waŋ ma tiŋ Elɔŋ o lebol, mbo pɔya ndu le ndu dindioo.+

13 Okoŋ, mi Muuse dimul puaa Elɔŋ nda le ma sɔɔŋguu ndu ikɛi, mbo wou nda domalaŋ, mbo yii nda kolala ŋpɛŋgɛlaŋ o chaŋ, nduyɛ mbo wou nda mɔsiltaŋ,+ a mɛɛ Chɛhowa dimul ndu yɛ.

14 Mi Muuse huŋ a nau sala hakioo, nduyɛ mi Elɔŋ nda puaa nduaa handu nau sala haki+ koŋ balaŋ o lebol. 15 Mi Muuse dii nau koŋ, mbo wou suei o kooma+ maŋ niŋ, mbo duau maŋ o leela wa o bandu luamaa lasalaa choo laŋ kpou, nduyɛ mbo dindi bandu luamaa lasalaa. Kɛ mbo chua kooma tuaŋ kpou, mbo hulu maŋ o bandu luamaa lasalaa bɛŋgu le ndu dindioo, le mbo nyuna le malɔɔ hakioo lechoo. 16 Okoŋ kɔɔli, mi Muuse chua chuɛima balu puloŋ ndaŋ kpou, yemii hɔlle, kɔl keluŋ muuŋ ndoŋ, a chuɛima balu muŋ ndaŋ, mbo luam maŋ o bandu luamaa lasalaa choo.+ 17 Mi Muuse chua nau tɔ lo wo, yau ndɔɔ, visiŋ ndɔŋ a poola ndɔlaŋ, mbo soli o dɔɔŋgɔɔ niŋ+ mbo kɔ lom, mɛɛ Chɛhowa dimul ndu yɛ.

18 Mbo huŋ vɛlɛ a saa kondo cho le sala luamaa wo, mi Elɔŋ nda puaa nduaa handu saa koŋ balaŋ o lebol.+ 19 Mi Muuse dii ndu, nduyɛ mbo fasaŋiaa kooma nduaŋ o bandu luamaa lasalaa kpeŋgoŋ kpou. 20 Mi Muuse kili kili saa koŋ a buŋgaŋ, okoŋ mbo chua bolleŋ, buŋgaŋ muŋ a chuɛiyaŋ, mbo luam. 21 Mbo chua puloŋ a peloŋ mbo tuaa, nduyɛ mbo luam saa kondoo kpou o bandu luamaa lasalaa choo. Sala luamaa o wa ni, o nda luam o Chɛhowa lo le mi chuŋ kɛndɔɔ komal ndu wo, mɛɛ Chɛhowa dimul Muuse yɛ.

22 Mi Muuse huŋ vɛlɛ a saa kondo diiŋ ndɔɔ, saa kondo nda soli salaa le wana soliaa lasalaa hɛlioo wo,+ okoŋ mi Elɔŋ nda puaa nduaa handu saa kondo koŋ balaŋ o lebol.+ 23 Mi Muuse dii saa kondo koŋ, okoŋ mbo chua kooma nduaŋ mbo sui Elɔŋ o nile ba kɛndɛleŋ, suei bɛnduii ba kɛndɛi, a o suei bɛnduii pelii ba kɛndɛi. 24 Okoŋ kɔɔli, mi Muuse dimul puaa Elɔŋ nda ma sɔɔŋguu. Mbo sui o kɛ kɛ koowaŋ o nile ba kɛndɛleŋ, suei bɛnduii ba kɛndɛi a o suei bɛnduii pelii ba kɛndɛi. Kɛ mbo fasaŋiaa kooma tuaŋ o bandu luamaa lasalaa+ kpeŋgoŋ kpou.

25 Okoŋ mbo chua chuɛiyaŋ, chuɛima cho o puiileŋ ndaŋ, chuɛima balu puloŋ ndaŋ kpou, yemii hɔlle, kɔl keluŋ muuŋ ndoŋ a chuɛima balu muŋ ndaŋ, a lɔlu ba kɛndɔɔ.+ 26 Mbo chua beedii tiu tiu nda toosiaa maa ikela wo o pilɛ+ o kambɛi beedii nɔ yiisii leniŋ te wo niŋ, o wa Chɛhowa lachi wo, beedii tiu tiu nda muuliaŋ kolo ndɔɔ a chuɛiyaŋ ndo,+ a beedii fɛɛdɛɛ wo. Mbo hɛɛnduu laŋ o buŋgaŋ machuɛiyoŋ a o lɔlu ba kɛndɔɔ choo. 27 Okoŋ kɔɔli, mbo handu laŋ o bala kɔlta Elɔŋ ndaŋ a o bala kɔlta puaa Elɔŋ nda. Mbo kandu laŋ keeliaa maa sala keeliaa Chɛhowa lachi. 28 Mi Muuse faŋa nda laŋ o ba, mbo handu laŋ o sala luamaa wa o bandu luamaa lasalaa choo wo, mbo luam. Sala nda hɛli waŋndo le waa wana soliaa lasalaa wo o wa ni, o nda luam o Chɛhowa lo, le mi chuŋ kɛndɔɔ komal ndu wo.

29 Okoŋ mi Muuse chua takpaa, mbo keeliaa ndu maa sala keeliaa Chɛhowa lachi.+ Nyɛ Muuse sɔla o sala nda soli le waŋndo hɛlioo le waa wana soliaa lasalaa wo o cho ni, a mɛɛ Chɛhowa dimul ndu yɛ.+

30 Mi Muuse chua chuɛiyaŋ le pɔyaa+ a kooma wa o bandu luamaa lasalaa choo waŋ ma tiŋ, mbo fasaŋiaa maŋ Elɔŋ choo a o domala ndɔlaŋ. Nduyɛ puaa nduaa wa a ndu latulu wa bɛɛ, mbo fasaŋiaa nda maŋ choo a o domala ndalaŋ. Okoŋ mbo dindi Elɔŋ, domala ndɔlaŋ, puaa nduaa,+ a domala ndalaŋ.+

31 Mi Muuse dimul Elɔŋ a puaa nduaa aa: “La yau+ visiŋ muŋ o tɛndii bɔŋaŋndo hɔlndɔ, mi la de muŋ loŋ a beedii cho o kambɛiyo niŋ le wana soliaa lasalaa hɛlioo wo, mɛɛ Mɛlɛka dimul la yɛ. Mbo dimul la aa, ‘Elɔŋ nda puaa nduaa nɔ ni ma de muŋ.’+ 32 Visiŋ cho lo woŋ a beedii cho lo wo, la nɔ mi la lom muŋ.+ 33 La nɔ mi la faŋaŋ o tɛndii bɔŋaŋndo hɔlndɔ le haaa mi palɛi hiou i ŋɔmmɛu. Kanifuule, mɛɛ mi palɛi hiou i ŋɔmmɛu malaŋ nya suliŋ le waa wanaa soliaa lasalaa.+ 34 Chɛhowa dimi ni maa naŋ tosa nyɛ naŋ tosa hoo hau wo, le miŋ soli sala malɔɔ lahakioo le nya.+ 35 La nɔ mi la wa o tɛndii bɔŋaŋndo hɔlndɔ idii a ichɔl haaa palɛi i ŋɔmmɛu,+ nduyɛ mi la tosa nyɛ o nyɛ Chɛhowa dimul nya le tosaa,+ yɔŋii nya wu. Kanifuule, lende Mɛlɛka dimul la ni.”

36 Mi Elɔŋ nda puaa nduaa tosa nyɛ o nyɛ Chɛhowa dimul nda sanaa a Muuse.