Kɔliŋtiaŋ Diiŋ Ndɔɔ
5 Ŋ sina maa te tɛndii naŋ cho hoo leniŋ o chieeŋndo choo wo tambu pɛ,+ Mɛlɛka cho naa chiɛiyo ke. O cho chiɛi wanachiee taŋgul te,+ nduyɛ o cho wa le fɛɛŋ a fɛɛŋ o choo choo niŋ. 2 O tɛndii naŋ cho hoo niŋndo, ŋ cho kuŋndaŋ o kɔlta naalaŋ niŋ, nduyɛ yeemɛi cho naa kpeekpei le miŋ wounuŋ chiɛi cho le naa o choo choo niŋndo.+ 3 Okoŋ te ŋ wounuŋ ndu pɛ, ŋ ve lɛ kɔɔle fondo le. 4 Naŋ cho o tɛndiiyo hoo niŋnda cho kuŋndaŋ, nduyɛ miŋ wa o buulaŋ bɛndoo niŋ. Kanifuule, ŋ yeema miŋ soli o cho naa lekɔɔ wo le, kɛ ŋ yeema miŋ wounuŋ o pilɔɔ,+ le mi yoomoo mel dialuŋ wu woŋ.+ 5 Mɛlɛka pila bɛɛndiaa naa ni le yoomu waa nuaa,+ nduyɛ mbo ke naa nyina ndɔɔ maa tamasi le nyɛ cho hunɔɔ wo.+
6 Lelaŋ, teleŋ o teleŋ kɔlta naalaŋ la cho la simulaa yi. Nduyɛ te ŋ cho wɔ pɛ o dialuŋ naŋ muŋ niŋ, mɛɛ ŋ cho landaŋ a Masanɔɔ.+ 7 Kanifuule, o laalaŋndo choo yoomu naa tɔlnuŋ ni, kɛ o cho o nyɛm naŋ cha woŋ choo le. 8 Kɔlta naalaŋ la cho la simulaa yi. Nduyɛ ŋ yeema miŋ wa o dialloŋ muŋ niŋ te, le miŋ huŋ wa a Masanɔɔ latulu.+ 9 Lelaŋ, ŋ wa latulu a ndu, ɔɔ ŋ wa landaŋ a ndu, ŋ hiounuŋ lachi a kindiŋndo le mbo chɛl naa. 10 Kanifuule, naa kpou cho hunɔɔ lasisi kpeŋgbei* lemasa Kiliti wo lachi. Okoŋ, mi wana o wana sɔla fandaa a mɛɛ o wa sɔɔŋ tosaa boondii o wa o dialloŋ niŋnde yɛ, o wa suɛi kɛndɛ, ɔɔ suɛi wɔɔŋ.+
11 Lelaŋ, mɛɛ naŋ sina maa ŋ nɔ siooŋii Masanɔɔ yɛ, ŋ cho kindiŋndo o nɛi o nɛi niŋ le waŋnda kɔltaŋ mulioo. Naa kpou Mɛlɛka sina naa nyɛkɛndɛi. Nduyɛ I laalaŋ maa nya bɛɛ la sina o kɔlta nyalaŋ niŋ wanaa suu naŋ cho wa. 12 Ŋ cho lɛ nya chɔm wanaa suu naŋ cho wa le, kɛ ŋ cho nya sɔɔŋ muŋ kpou dimullo le nya dɛɛniaa mi la kelu yoŋgaa o naa niŋ. Okoŋ, la nɔla mi la mulul wanaa kialu yoŋgaa a nyɛ nda cha a lehɔl lo wa,+ kɛ o cho a nyɛ cho o kɔllo niŋndo le. 13 Te wanaa seemɛiya naŋ cho lekɛndɛi ni,+ mɛɛ le Mɛlɛka naŋ seema ni. Kɛ te ŋ wa pɛ wanaa kɔl kaluaa, mɛɛ le nya naŋ cho wanaa kɔl kaluaa ni. 14 Kaala Kiliti kaala naa wo cho wallo a naa ni. Kanifuule, ŋ sina maa wana pilɛ vi le ŋwaŋnda chiee kpou ni,+ okoŋ mi ŋwaŋnda chiee kpou wu. 15 Mbo wu le ŋwaŋnda chiee kpou, le halikpeŋ wanaa cho yoomu wa ve lɛ yoomu le ndapila le,+ kɛ le wana vi le nda, nduyɛ mbo miiŋgu yoomu wo.
16 Lelaŋ, chɔŋ a hau mbo kuɛ kɛ, ŋ nue lɛ wana o wana o yiyaŋ iwana chieeyaa niŋ te.+ A yɔŋ bɛɛ maa naŋ sina niŋ Kiliti o nɛi iwana chieeyaa choo, suŋ suŋ niŋ, ŋ sina lɛ ndu o nɛi koŋ choo le.+ 17 Wana o wana wa pɛ o diompilɔɔ niŋ a Kiliti, wana koŋ simnuŋ o sɛnɛi.+ Wana chieeyɛi nduɛi paanduei i cho faŋaŋ, mbo sɔla wana chieeyɛi sɛnɛiye. 18 Mɛlɛka o ba muŋ kpou ŋ fula ni. Ndu tosa ni miŋ miiŋgu o diompilɔɔ niŋ a ndu o sabu Kiliti wo niŋ.+ Nduyɛ mbo ke naa wallo le acheleŋnda malaa ma miiŋgu o diompilɔɔ niŋ a ndu.+ 19 O wallo hoo niŋ, Mɛlɛka cho tosa o sabu Kiliti wo niŋ, mi waŋnda chieeya miiŋgu o diompilɔɔ niŋ a ndu.+ O bii lɛ nda tɔɔyaŋ le yɔŋnda ndala wɔɔŋndaŋ te.+ Ndu Mɛlɛka ke naa wallo hoo ni le waŋnda miŋgioo o diompilɔɔ niŋ a ndu.+
20 Lelaŋ, naŋ cho wanaa Kiliti vem+ hɔlte* ndɔ wa ni.+ Nduyɛ i cho ko maa Mɛlɛka pila cho nya dɛɛniaa ni o sabu naa niŋ. Naŋ cho sɔŋgɔ Kiliti wo wa, ŋ cho nya nyɔɔloo: “La miiŋgu o diompilɔɔ niŋ a Mɛlɛka.” 21 Ndu tosa haki le.+ Kɛ mi Mɛlɛka soli ndu sala le hakila naalaŋ. O tosa hei le miŋ simnuŋ wanaa sakpuaa Mɛlɛka o hɔl sanaa o ndu niŋ.+