Polowaa
6 Po nuu, te a chua pɛ wana nya chiɛɛliaŋndo bɔŋ,+
Mi la chɛlaŋ o isɔɔ choo nya miallo,+
2 Te a dema pɛ le buŋgɛi ŋ chua ve peeloo,
Nduyɛ ma tosa nyɛ ŋ dimi wo le,+
3 Po nuu, nyɛ ŋ nɔ ma tosa le ma fula leniŋ ndo cho hoo ni:
Kɔ chɔ chɔ ma tusiŋ ndu o labɛŋguniŋ, nduyɛ ma nyɔɔlu ndu,
Kanifuule a del wana nya chiɛɛliaŋ ndo o ba.+
4 Chɛl mi luaŋ ma hiŋ num o hɔl te,
Kɛlɛŋgaa niŋ te ma kinda hɔlteŋ, haaa ma tosa nyɛ ya dimul num ndo.
5 Kindiŋ ma fula leniŋ mɛɛ puuwɔɔ hialuŋ nuaa doosunɔɔ o ba yɛ,
Vɛlɛ a mɛɛ youwo hialuŋ nuaa wana hendul ndu yaŋɔɔleŋ ndo o ba yɛ.
6 Num wana siɛlɛiyo, kɔ ma kɔ pɛɛku sisiŋnda o ba.+
Mɛɛndaŋ mɛɛ nda tosa sɔɔŋ yɛ, okoŋ ma simnuŋ wana taasi.
7 Mi che bɛɛ a nɔ simlachinɔ, wana bana, ɔɔ masa le,
8 Kɛ ma nuuviaa nyɛdiaa a wɔɔleŋ,+
Nduyɛ ma chuuŋgiaa ndu a teleŋ chiɔɔŋ kuauwaa.
9 Num wana siɛlɛiyo, vɛɛ kpɛ ŋ cho yɛ viouwɔɔ ihini?
Teleŋ kuɛɛ ŋ cho yɛ tiondɔɔ o luaŋ ma chɛŋ?
10 Hiniŋ ma siɛndiŋ nyɛɛmbɔ,
Nduyɛ ma kafala balaŋ le pɛŋgioo nyɛɛmbɔ.+
11 Lende koni bala fondolaŋ la cho num komal ni maa viinɔ,
Nduyɛ mi kuɛi tol num choo mɛɛ wana yekpandioo tual nuaa waŋndo choo yɛ.+
12 Wana fondoo a wana dɛnɛ wɔɔŋndo balu choolaŋ dimioo ni.+
13 Te o wa suɛi pɛ, mbo kinda hɔlteŋ,+ mbo tuuliaa a ipelu vɛlɛ a sooŋ ndɔŋ labaŋ.
15 Le hei, kpundɔɔ cho ndu tolɔɔ choo o lepilɛ niŋ kpe.
Nduyɛ o teleŋ biŋgi bɛŋgu, kuɛi cho ndu tolɔɔ choo ve siŋgu niŋ te.+
16 Sɔɔŋ ŋɔmpum Chɛhowa tul leyɛ ni.
Nduyɛ pɛŋ, ŋ cho muŋ ŋɔmmɛu.
17 Tofa yoŋgaa,+ choolaŋ dimioo,+ wana tɛɛmbuu isɔɔ le wo diyɔɔ,+
18 Sɔɔŋ wɔɔŋndoŋ tuunɔŋndo o kɔl le waŋndo,+ wana nyaanuŋ hoo chɔ chɔ le dɛnɛ wɔɔŋndo tosaa wo,
19 Sei lachoowa yoomu fuu mi choolaŋ la fula ndu o sondo wo,+
Vɛlɛ a wana o wana kei sɔŋgɔlaŋ mɛlioo puaapiliaa tɛɛŋ.+
20 Po nuu, tosa nyɛ finya num cho num dimullo wo.
Nduyɛ, kɛɛ sila* kala num ndo le.+
21 Teleŋ o teleŋ la wa num o kɔl,
Nduyɛ ma yiinuŋ ndaŋ o labolo.
22 Te a wa kɔlaŋ pɛ, la cho num nɛiyo chɔm.
Te a hini pɛ, la cho num manda.
Nduyɛ te a chɛŋ pɛ, la soo naa num chua.*
23 Lambuiyo nɛi chɔmaa cho ni.+
Nduyɛ sila miŋgi wana o nɛiyo ke wana yoomoo ni.+
24 Sawalaŋ ndaŋ la cho num manda a tul wana lanɔ kaa wɔɔŋndo kɔɔli le,+
25 Chɛl mi naŋɔɔ ndɔɔ luɛi num o kɔl te,+
Kɛlɛŋgaa niŋ te ma chɛl mi hɔlta ndɔlaŋ la yusa num kɔllo.
26 Kanifuule mi wana lanɔ suundɛiyo tosa mi poo lo o kuɛi niŋ, beediiyo* kpuŋgbɛi i pilɛ kinɛi o nɔla niŋ sɔlaa le dioo ni.+
Kɛ te a suunda pɛ a lanɔ pilaa, mi yoomu numndo luɛi o kpundɔɔ niŋ.
27 Baa waŋndo nɔla pa mbo bii dɛŋgultaŋ o takpa doma ndɔɔ ŋue le?+
28 Ɔɔ waŋndo nɔla pa mbo kuɛ o dɛŋgultaŋ choo peluŋ ndɔŋ ŋue le?
29 Nyɛ pilɛ koŋ kpe yɔŋnuŋ a wana hini a lanɔɔ wana nda chiɛɛliaŋ ndo ni.
Wana o wana tosa keŋ pɛ, nyɛpalaa tual ndu choo ni.+
30 Te yiaaŋ ma wa pɛ viinɔɔ nɛiyo mbo chiimbuu nyɛ le dioo,
Waŋnda pɛɛsa ndu le keŋ te.
31 Kɛ te a bii ndu pɛ, o cho paawa bɛmbɔɔ le ŋɔmmɛu le viile leŋ,
Mbo yɔŋgu nyɛ o nyɛ sɔvɛ cho o ndu lo chiɛiniŋ.+
32 Wana o wana suunda pɛ a wana lanɔɔ, mɛɛ o nɔ kɔl kalu le.*
Nduyɛ wana tosa lende pɛ, mɛɛ o luei ndupila o kpundɔɔ niŋ.+
33 Pauve a bɛɛla tambɛilaŋ koni o cho sɔla ni.+
Nduyɛ, bɛɛla ndɔla tambɛilaŋ la feŋaŋ ndu choo le.+
34 Kanifuule pɔnɔ paŋalɛiyo, kɔllo pila o tuulu ni.
Nduyɛ te o wa maa miŋgioo pɛ, nyiɛɛyii bɛɛ bii ndu le.+
35 O chɛl nyɛ o nyɛ sɔŋgɔ koŋ te.*
Nduyɛ o chɛl nyɔɔlu le, ke ndu bɛɛ nyɔɔŋ miŋ wa ŋ hɔbɛi.