Walta Kiilaa
19 Boondii Apɔlɔɔ+ wa Kɔliŋ nde, Pɔɔl lo balɔɔ o fondaŋnda ŋpembu laŋ, mbo huŋ Ɛfisɔɔ.+ Mbo komal wanaa laalaŋnda apum loŋ. 2 Mbo nyuna nda aa: “Boondii nya simnuŋ wanaa laalaŋnda ve, mi nyaa sɔla pa nyina diandaa?”+ Ma mulul ndu aa: “Lepilɛ bɛɛ ŋ tuiyɔ maa nyina diandaa cho le.” 3 Mbo nyuna nda aa: “Yiŋɔɔ suu kuɛɛ nya sɔla yɛ?” Ma muli aa: “Yiŋɔɔ Chɔŋ ndo.”+ 4 Mi Pɔɔl dimi aa: “Wanaa wookuŋ nda Chɔŋ yiŋ ni.+ Nduyɛ mbo dimul nda le ma laalaŋ o wana cho ndu hunɔɔ kɔɔli wo niŋ,+ Chiisu.” 5 Mɛɛ nda tuei hei, ma sɔla yiŋɔɔ o diola Masanɔɔ Chiisu laŋ niŋ. 6 Nduyɛ mɛɛ Pɔɔl handu nda balaŋ choo, ma sɔla nyina diandaa.+ Okoŋ ma kandu yooŋgu Mɛlɛkaa dimioo o sɔɔŋ maŋgalaŋ cheleŋ niŋ.+ 7 Waŋ piaanduaa wa ŋwaŋ 12.
8 Le paŋgoŋ ŋgaa Pɔɔl wa kɔlaŋ waŋnda pɛɛkoo o chiɛi Chuuwa piɛi Mɛlɛka wo niŋ+ a dialuŋ fulaa. O wa sɔɔŋ yɔŋgoo, mbo wa kindiŋndo le nda kɔltaŋ mulioo ma laalaŋ a Masale Mɛlɛkaleŋ.+ 9 Kɛ mɛɛ apum kɛɛ le laalaŋndo, ma kandu sɔɔŋ wɔɔŋndoŋ dimioo a Nɛi Tonyaa+ okɔɔ faŋgaa o hɔl. Mi Pɔɔl faŋaŋ nda tɛɛŋ, mbo kuaŋnuŋ a wanaa laalaŋnda. Mbo hiau lachi a sɔɔŋ yɔŋgoo lepaa o lepaa o chiɛi sukuu Tiluanɔɔ wo niŋ.+ 10 Le wɔsilaŋ la tiɔɔŋ o wa hei tosaa. Okoŋ mi wanaa wa o tanda Eesiaa wo niŋnda kpou, Chuuwa ni, Kilikiiya ni, tuɛi yooŋgoo a Masanɔɔ okɔɔ.
11 Mi Mɛlɛka tosa mi Pɔɔl wa walta kɔndɔfiltaŋ tosaa.+ 12 Kolala ŋpɛŋgɛlaŋ a yuulula laa pilaŋ Pɔɔl dialloŋ ndaŋ bɛɛ, waŋnda wa kɔlaŋ a laŋ, ma handu wanaa+ lanaa choo ma siaŋgu, nduyɛ mi nyinaa wɔɔŋnda faŋaŋ nda kɔɔli.+ 13 Chuuwa apum wa balɔɔ nyinaa wɔɔŋnda touwɔɔ waŋnda kɔɔli. Nda bɛɛ ma kindiŋ le diola Masanɔɔ Chiisu laŋ soliŋndo kpeku le nyinaa wɔɔŋnda touwɔɔ. Ma wa dimioo aa: “Mi dimul num o diola Chiisu laŋ niŋ, o Pɔɔl cho hoo suɛi a ndu okɔɔ wo, fula.”+ 14 Chuunɔ pilɛ wa diolaŋ aa Siiva. Masa wanaa soliaa lasalaa o wa ni. Puaa nduaa nda ŋɔmmɛu wa hei tosaa. 15 Kɛ mi nyina wɔɔŋndo mulul nda aa: “I sina Chiisu+ nda Pɔɔl.+ Kɛ nya wanaa maavɛɛ nya cho yɛ?” 16 Okoŋ mi po nyina wɔɔŋndo wa kɔɔli wo del nda choo a sɔŋgɔɔ mɛɛ nda cho fau. Mbo tiu nda kpou ba. Mbo booluu nda ma fuuliaa chiɛiniŋ a kiltaŋ kɔɔle fondo. 17 Mi Chuuwa a Kilikiiyaa wa o Ɛfisɔɔ niŋnda kpou tuɛi suɛi hei. Okoŋ mi siooŋnde bii nda kpou, nduyɛ mi diola Masanɔɔ Chiisu laŋ la hiau lachi a pɛŋgɛlaŋndo. 18 Mi wanaa simnuŋ wanaa laalaŋnda wa a bɔɔbɔɔ huŋ ma chɔɔmuu kaala ndalaŋ o luŋ kpendekele. 19 Mi wanaa ndaa tosa maŋgaliaalaŋ nda a bɔɔbɔɔ chuuŋgiaa yaula ndalaŋ kpou naapilɛ, ma luam ndaŋ chilikɔ waŋnda o hɔl.+ Mɛɛ nda dɔu baa yaulaŋ ndaŋ kpou naapilɛ, o wa kaniŋ humboŋ 50,000. 20 A kpaaya Chɛhowa* wo, mi diom ndɔɔ hiau lachi a pɛŋgɛlaŋndo ba o ba fee, nduyɛ mbo chɔɔlu kpaayaa sɔla.+
21 Mɛɛ sɔɔŋ muŋ chuu yɔŋnɔŋ, mi Pɔɔl kɛɛsiaa maa te o chɛŋ pɛ Masidooniaa+ a Akeya, o cho lakɔ Chulusalɛm.+ Mbo dimi aa: “Te I fula loŋ pɛ, I nɔ mi kuɛ vɛlɛ Luom.”+ 22 Okoŋ mbo viam wanaa ŋiɔɔŋaa mala ndu wa Masidooniaa, Timoti+ nda Iluatɔsi,+ kɛ mi ndupila lo kɔɔli o buŋgɛi Eesiaa ve niŋ le teleŋ tiŋ.
23 A boondii keŋ, mi sɛɛŋgiaŋndo del waŋnda tɛɛŋ+ a Nɛi Chiisu chɔm waŋnda le waa lechoo wo okɔɔ.+ 24 Po pilɛ wa diolaŋ aa Dɛmituluisi. A kaniŋ humboŋ ndoo tosa wallo ni. Maaŋ waŋnda ndaa sooluu mɛlɛka ndaa Atɛmii wo, velaŋ ndɔɔ ndoo tuuliaa a kaniŋ humboŋ ni. Nduyɛ nyɛsɔlaa pila wanaa nduaa walla ndaa sɔla ni.+ 25 Mbo chuuŋgiaa wanaa nduaa walla a wanaa cheleŋaa ndaa toosiaa nyɛm waa lende wa naapilɛ. Mbo dimul nda aa: “Chaaŋaa niaa, nyapila sina kɛsɛ maa nyɛsɔlaa pila naŋ sɔla o wallo hoo niŋ ni. 26 La cho chɔɔ, nduyɛ mi la wa tueiyɔɔ maa o cho ko o Ɛfisɔɔ niŋ te,+ kɛ o buŋgɛi Eesiaa ve niŋ kpou, Pɔɔl chii wanaa bɔɔbɔɔ kɔltaŋ muli. Nduyɛ ma laalaŋ nyɛ o dimi wo maa mɛlɛkaa waŋnda toosiaa a laba wa, a cho mɛlɛkaa kpeekpei le.+ 27 Hei cho tosa mi waŋnda pɛɛsa wali naa hoo, nduyɛ ma chua maaŋ mɛlɛka naa laandu bɛndoo Atɛmii nyɛ fondoo fuu. Nduyɛ waŋnda o buŋgɛi Eesiaa ve niŋ a o lɛŋndeŋ choo kpou cho Atɛmii sooluuwo. Kɛ le nyɛ Pɔɔl dimi hoo wo, a cho lɛ ndu wa sooluu le.” 28 Mɛɛ nda tuei hei, ma tuulu kɔl tau. Ma kandu dimioo choo choo aa: “A cho bɔɔ o bɛndu Atɛmii, mɛlɛka Ɛfisiaŋnda!”
29 Okoŋ, mi chioo kpou yɔŋnuŋ wooluŋ wooluŋ. Mi nda kpou kua sululu o lau bɛndu waŋnda chuuŋgiaŋndo, ma kɔ bii Kayɔɔ nda Aluitakɔɔ+ a kaka. Masidooniaŋnda nda wa ni, nduyɛ nda Pɔɔl waa ndaa balu ni. 30 Pɔɔl ndoo yeema mbo kɔ soo naa waŋnda chua, kɛ mi wanaa laalaŋnda kuuna ndu. 31 Mi Pɔɔl chaaŋaa nduaa apum, a wa wanaa bɛnduaa kɛɛsiaa sɔɔŋ lapisulloŋ nda, yɔŋ diomndeŋ naa ndu chua. Ma nyɔɔlu ndu maa o luei yoomu ndɔɔ o kpundɔɔ niŋ mbo kuɛ o lau koŋ te. 32 Wanaa wa o chuuŋgiaŋndo hoo wa wa bɔɔluuwo kpeekpei. Haa dimi pɛ hei, haa dimi nyɛ cheleŋ. Nduyɛ a bɔɔbɔɔ ndaa sina le sabu nda chuuŋgiaŋndo le. 33 Okoŋ ma soli Alɛkisanda faŋgaa o hɔl. Chuuwa wa ndu nyindɔɔ le mbo sim faŋgaa lachi. Mi Alɛkisanda heelu baa le waŋnda kpaa. Ndoo yeema mbo soo naa nda chua. 34 Kɛ mɛɛ nda sina maa Chuunɔɔ o cho ni, mi nda kpou kandu deŋioo choo choo diompilɛ aa: “A cho bɔɔ o bɛndu Atɛmii, mɛlɛka Ɛfisiaŋnda!” Le hawɛilaŋ* la tiɔɔŋ a wa deŋioo.
35 Mɛɛ wana bɛndu pilɛ o chioo niŋ kpaa faŋga bɛndu koŋ, mbo dimi aa: “Waŋnda Ɛfisɔɔ, nɛɛnɛ kpeekpei cho yɛ o sina maa chiee bɛndu Ɛfisiaŋnda le nɔ maaŋ mɛlɛka naa bɛndoo Atɛmii, a velaŋ ndɔ fula choo choo mbo dello le? 36 Mɛɛ nya sina nuaa maa wana sɛɛŋgiaa hei le yɛ, la kɛsi kɔltaŋ. La lau a sɔɔŋ te. 37 La hiŋ a puaa haa nanuŋ fondo fuu. A cho wanaa yɔŋ levii o maaŋndaŋ niŋ, ɔɔ ma dimi sɔɔŋ wɔɔŋ a mɛlɛka naa laandoo okɔɔ le. 38 Lelaŋ, te Dɛmituluisi+ nda chaaŋaa nduaa walla nɔ pɛ isɔɔ a wana, palɛi naŋ dimi sɔɔŋ nde cho. Nduyɛ ŋ nɔ wanaa bɛnduaa. A kɔ a suɛi ndɛi loŋ. 39 Te la nɔ yɛ pɛ suɛi cheleŋ o hei kɔɔli, la nɔ mi la dimi ndi lɔɔ waŋ bɛnduaa chieeya cho bɔŋaŋndo veelu wo. 40 Suɛi yɔŋnuŋ hei hau ve luei naa o kpundɔɔ niŋ. Waŋnda nɔla ma dimi maa naŋ tosa ni mi wooluŋ wooluŋ bɛndoo hoo del, kanifuule ŋ nɔ sabu o sabu naŋ chɔm, o tosa mi bɔɔluu bɛndoo hoo wa wo le.” 41 Mɛɛ o chii sɔɔŋ muŋ dimi, mbo pial faŋgaa.