Luomaŋnda

7 Puaapiliaa niaa, (o nya wanaa sina sawaa* wa lo ya cho suɛi ni) la sina nuaa maa te waŋndo cho wɔ pɛ yoomu, maa Sawaa nɔ ndu kpaayaa choo le? 2 Le tamaseliiyo, sawaa dimi maa wana lanɔ cho o nɔɔ wo, te pɔnɔ ndɔ cho wɔ yoomu pɛ, o cho wɔ o sawa pɔnɔ ndɔ wo bɛŋgu. Kɛ te pɔnɔ ndɔ vi pɛ, mɛɛ o cho lɛ o sawa koŋ bɛŋgu le.+ 3 Te pɔnɔ ndɔ wa wɔ yoomu pɛ, mbo chal wana pɔnɔ cheleŋ o ba o nɔɔ niŋ, mɛɛ o suunda.+ Kɛ te pɔnɔ ndɔ vi pɛ, o cho lɛ o sawa ndɔɔ bɛŋgu le. Lelaŋ, o chal bɛɛ wana pɔnɔ cheleŋ o ba o nɔɔ niŋ, o suunda le.+

4 O nɛi pilɛ koŋ choo puaapiliaa niaa, dialuŋ Kiliti woŋ baŋa nya Sawaa* o ba bɛŋgu. Hei yɔŋnuŋ le mi la wa le wana cheleŋ,+ o miiŋgu yoomu wo.+ Okoŋ miŋ tosa wallo le Mɛlɛka.+ 5 Teleŋ naŋ wa hakioo o ba bɛŋgu wo, mi Sawaa kpeeŋiaa yeemaŋ wɔɔŋ wa naa o dialloŋ niŋndoŋ, le halikpeŋ miŋ tosa walta yaa wana o piɔmndo niŋndaŋ.+ 6 Kɛ suŋ suŋ niŋ, ŋ cho lɛ Sawaa o ba bɛŋgu le,+ kanifuule ŋ sɔla piɔmndo nyɛ ndoo bii naa o chɛleŋ niŋndo o ba. Chiaa naŋ cho niŋ le Mɛlɛka o nɛi sɛnɛiyo choo ni o sabu nyina diandaa niŋ,+ kɛ o cho lɛ maa paandu mɛɛ sawa cho o poonyiaa wo dimi yɛ le.+

7 O yɛɛnɛ naŋ nɔ yɛ niko miŋ dimi? Mbo wa maa hakioo Sawaa cho ni? Sako bɛɛ! Te Sawaa ndoo hiŋ te, I ve sina nyɛ kpeekpei hakioo cho wo le.+ Le tamaseliiyo, te Sawaa ndoo dimi nuaa aa: “A nɔ ma luɛi lehɔl o nyɛ pila le” le,+ I ve sina maa hɔlteŋ luɛiyɔɔ o nyɛ pilaa wɔu le. 8 Kɛ mɛɛ hakioo sɔla fondaa o sawaa niŋ, mbo kpeeŋiaa ya yeemaŋ wɔɔŋ suu o suu le hɔlteŋ luɛiyɔɔ o nyɛ pilaa. Nduyɛ te sawaa ndoo ve le, hakioo ndoo nɔ niŋ kpaaya le.+ 9 I wa yoomu tuupa mi sawaa huŋ. Kɛ mɛɛ sawaa hiŋ, mi hakioo sɔla kpaayaa, okoŋ mi wu.+ 10 Mi sawa ndoo nɔ mbo ke ya yoomoo wo+ ke ya piɔmndo. 11 Mɛɛ hakioo sɔla fondaa o sawaa niŋ, mbo hui ya, okoŋ mbo dii ya. 12 A koŋ kpou, Sawaa choŋnuŋ o diandaa. Nyɛ dimiŋ leniŋndo bɛɛ choŋnuŋ o diandaa, o cho sakpo, nduyɛ o cho o kɛndɛ.+

13 Baa koŋ sim ni maa nyɛ cho o kɛndɛ wo tosa ni mi wu? Sako bɛɛ! Hakioo tosa ni mi wu. Sawaa cho nyɛ kɛndɛ, nduyɛ o chɔm kpendekele maa hakioo tosa ni mi wu.+ Lelaŋ, sawaa chɔm mɛɛ hakioo cho nyɛ wɔɔŋ bɛndu yɛ.+ 14 Ŋ sina maa Mɛlɛka o ba Sawaa fula ni o sabu nyina diandaa niŋ. Kɛ ya, o dialloŋ niŋ ya cho ni, nduyɛ mi wa o pisiaa hakioo o ba.+ 15 Sɔɔŋ ya cho tosaa woŋ, I biiyɔ bila le sabu ya tosa muŋ ndo le, kanifuule sɔɔŋ ya yeema tosaa woŋ, o cho muŋ te ya tosa le. Kɛ sɔɔŋ ya tul leyɛ woŋ ya tosa ni. 16 I chɛl maa Sawaa cho nyɛ kɛndɛ. Kɛ a koŋ kpou, mi tosa sɔɔŋ ya yeema tosa le woŋ. 17 O kpeekpei niŋ, o cho yapila le cho sɔɔŋ muŋ tosaa le, kɛ haki cho ya o dialloŋ niŋndo.+ 18 I sina maa nyɛ o nyɛ kɛndɛ cho o dialuŋ nuŋ niŋ te. Mi che bɛɛ I nɔ yeemɛi le sɔɔŋ kɛndɔŋ tosaa, kɛ I nɔla mi tosa muŋ te.+ 19 Kanifuule sɔɔŋ ya yeema tosaa woŋ, o cho muŋ te ya tosa le. Kɛ sɔɔŋ wɔɔŋ ya tul leyɛ woŋ, muŋ ya tosa ni. 20 Te o yɔŋ yɛ pɛ mi tosa sɔɔŋ ya yeema tosa le woŋ, mɛɛ o cho yapila le cho muŋ tosaa le, kɛ haki cho ya o dialloŋ niŋndo.

21 Lelaŋ, sawa ya saaluŋ o dialuŋ nuŋ niŋndo cho hoo ni: Te I yeema pɛ le nyɛ cho o kɛndɔɔ wo tosaa, nyɛ cho o wɔɔŋndo wo huŋ ya o kɔl ni.+ 22 I nɔ kaalaa tau o kɔl nuu niŋ le sawa Mɛlɛkaa.+ 23 Kɛ I saaluŋ maa sawa cheleŋ cho o dialuŋ nuŋ niŋ mbo wa chɔulabaa a sawa cho ya o kɔl lo.+ Nduyɛ mbo siiŋguu ya chiɔɔ le haki+ cho ya o dialloŋ niŋndo. 24 Nyɛpalaa cho ya bɔɔ choo fɔ! Nɛɛnɛ cho yɛ ya baŋa dialuŋ cho muŋ tosa mi sɔla piɔmndo woŋ o ba? 25 I mel Mɛlɛka balikaa, kanifuule o soli ya leniŋ o sabu Masanɔ naa Chiisu Kiliti niŋ. Lelaŋ, o kɔl nuu niŋ, chiɔɔ ya cho sawa Mɛlɛkaa o ba bɛŋgu ni. Kɛ o dialuŋ nuŋ niŋ, chiɔɔ ya cho hakioo o ba bɛŋgu ni.+