Maatiu
3 Okoŋ kɔɔli, mi Chɔŋ+ Wana Yiŋaa wa yooŋgoo dimioo+ o pollo niŋ Chudiaa. 2 O wa dimioo aa: “La wookuŋ, kanifuule Masale Mɛlɛkaleŋ le cho niŋ kpɛɛluŋ.”+ 3 A Chɔŋ ndo hoo okɔɔ Aisaya, wana ndoo suaa le Mɛlɛka wo+ dimi ni aa: “Waŋndo cho yondaa o pollo niŋ aa: ‘La bɛɛndiaa nɛi Chɛhowa* wo! La toosiaa ndu nyɛkɛndɛi.’”+ 4 Doma wa Chɔŋ lekɔɔ wo, a yiiŋii nyɔɔmiaa ndaa toosiaa ndu ni. Nduyɛ yaule wa ndu o chaŋ ndeŋ, a yau visioo nda toosiaa leŋ ni.+ Nyɛdiaa ndɔɔ wa soonuaa a liaaŋ ni.+ 5 Okoŋ, waŋnda wa chɔnɔŋndo Chulusalɛm, Chudiaa, a tanda balu Pioo Chɔɔdaŋ ndo kpou, ma wa hunɔɔ naa Chɔŋ chua.+ 6 A wa yɔŋnda ndala wɔɔŋndaŋ chɔɔmuuwo kpendekele, mi Chɔŋ yiŋ* nda o Pioo Chɔɔdaŋ niŋ.+
7 Mɛɛ Chɔŋ che Falisiiya a Sadusiiyaa+ bɔɔbɔɔ hunɔɔ naa o wa waŋnda yiŋɔɔ wa, mbo dimul nda aa: “Nya kɛuwaa wɔɔŋ wɔɔŋnda haa,+ nɛɛnɛ dimul lɛ nya le mi la nyaanuŋ kɔl tuu Mɛlɛka cho hunɔɔ wo?+ 8 Lelaŋ, la tosa sɔɔŋ chɔm maa la wookuŋ ndoŋ. 9 I del nya pɛŋ o lakɔl mi la dimi aa: ‘Ebilaham cho finya naa ni’ le.+ Mi dimul nya maa, Mɛlɛka nɔla mbo siiŋguu poutaŋ ndaŋ chuauwa le Ebilaham. 10 Chuei cho niŋ i kɛsiaa o yɔmnde bɛŋgu le ndi kioŋndo. Lelaŋ, yɔm o yɔm kum komɔɔ kɛndɛ le, a cho ndu kioŋ ma lom ndu.+ 11 Ya ya, o mɛŋndaŋ niŋ ya cho nya yiŋɔɔ ni le mɛɛ nya wookuŋ yɛ.+ Kɛ wana cho hunɔɔ ya kɔɔli wo hiou ya poloŋ.+ I suliŋ bɛɛ pɛŋ le kɔwɛila* ndɔlaŋ solioo le. Ndu ndu, a nyina diandaa+ vɛlɛ a yiŋndeŋ o cho nya yiŋɔɔ ni.+ 12 Fɛlɛ ndɔ hɛyaa cho ndu o ba. Nduyɛ o cho yasaba ndɔ luaa ŋwitiiyo bɛɛsuu fo fo, okoŋ mbo wou witiiŋ ndɔŋ o konda. Kɛ tɛfɛlaŋ ndaŋ, mbo lom ndaŋ o yiŋnde+ nyum te leŋ niŋ.”
13 Okoŋ kɔɔli, mi Chiisu chaŋ Kalili mbo kua Chɔɔdaŋ naa Chɔŋ chua le mbo yiŋ ndu.+ 14 Kɛ mi Chɔŋ wa kiɔɔ le ndu yiŋɔɔ. Mbo dimul ndu aa: “Num nɔ ma yiŋ ya wo, a miiŋgu hunɔɔ naa ya chua le mi yiŋ num?” 15 Mi Chiisu mulul ndu aa: “I yɔŋnuŋ lende a teleŋndo hoo. Kanifuule, te i yɔŋnuŋ lende pɛ, mɛɛ nyɛ bɛnda wo naŋ cho koŋ tosaa ni.” Okoŋ mi Chɔŋ chɛl le ndu yiŋɔɔ. 16 Mɛɛ Chɔŋ chii Chiisu yiŋɔɔ, dimioo nuaa o fula o mɛŋndaŋ bɛŋgu, mi choo choo kumbiŋ.+ Mbo cha nyina Mɛlɛkaa ndu tolɔɔ choo maa kaŋgbo.+ 17 Mi diomndo suaa vɛlɛ o choo choo niŋ+ aa: “Po nuu cho hoo ni.+ I kaala ndu, nduyɛ I hini kɔl a ndu.”+