Chɔŋ

16 “I dimul nya sɔɔŋ muŋ yɔŋii nya mal laalaŋ nya nɔ o ya niŋndo. 2 Waŋnda cho nya touwɔɔ o chiɛila Chuuwa piɛi Mɛlɛka laŋ niŋ.+ Nduyɛ, teleŋ cho fuuluu mi waŋndo dii nya,+ mbo yiyaŋ maa wali Mɛlɛkaa o tosa koŋ ni. 3 A cho sɔɔŋ muŋ tosa le mɛɛ nda sina ya a Finya nuu le yɛ.+ 4 Kɛ I dimul nya sɔɔŋ muŋ le halikpeŋ te teleŋ ŋ nɔ le yɔŋnɔŋndo wo fuuluu pɛ, la loonuŋ dɔɔ maa mi dimul nya muŋ.+

“I dimul nya sɔɔŋ muŋ o tasela ndɔ le, kanifuule I wa latulu a nya. 5 Suŋ suŋ niŋ, I cho kɔlaŋ naa wana vem ya wo chua.+ Kɛ wana pilɛ bɛɛ nya tɛɛŋ nyuna ya le naa ya cho kɔlaŋ nda le. 6 Le mɛɛ ya dimul nya sɔɔŋ muŋ yɛ, kɔlta nyalaŋ la cho o saŋgaa niŋ.+ 7 A tonya mi dimul nya, le tɔnɔ nyaa ya cho kɔlaŋ ni. Te o cho mi kuɛ le, la sɔla wana malaa le.+ Kɛ te I kuɛ pɛ, I cho nya ndu yɔŋ. 8 Nduyɛ te wana malaa koŋ hiŋ pɛ, o cho chieeŋndo kpou chɔm nyɛ cho hakioo wo. O cho chɔm maa nyɛ cho sakpo wo ya tosa ni, nduyɛ mbo chɔm vɛlɛ wanaa Mɛlɛka cho yamɛi kilul la. 9 O cho fɛlɛŋ chɔm haki chieeŋndo tosa wo,+ kanifuule chieeŋndo cho laalaŋndo dɔwɔɔ o ya niŋ te.+ 10 O cho chieeŋndo chɔm maa nyɛ cho sakpo wo ya tosa ni, kanifuule I cho kɔlaŋ o Finya nuu lo. Nduyɛ la chi lɛ niŋ ya le. 11 O cho vɛlɛ chieeŋndo chɔm wanaa Mɛlɛka cho yamɛi kilul la, kanifuule o chii niŋ masa chieeŋndo hoo yamɛi kilul.+

12 “I nɔ wɔ sɔɔŋ tau le nya dimullo, kɛ la nɔla mi la bii muŋ bila suŋ suŋ te. 13 Kɛ te wana malaa hiŋ pɛ, ndu yɔŋnuŋ maa nyina tonyaa ni,+ o cho nya mala mi la bii tonyaa bila nyɛkɛndɛi, kanifuule o suu niŋ a ba ndɔ le. Nyɛ o cho wa tueiyɔɔ wo, ndu o cho wa dimioo ni. Nduyɛ, o cho nya chɔm sɔɔŋ nɔ le hunɔɔ yɔŋnɔŋndo woŋ.+ 14 O cho ya saŋgala,+ kanifuule nyɛ o tuei ya o sondo wo, ndu o cho nya dimul ni.+ 15 Nyɛ o nyɛ Finya nuu nɔ, ya nɔ ni.+ Lelaŋ ya dimi ni maa nyɛ o tuei ya o sondo wo, ndu o cho nya dimul ni. 16 Teleŋ biŋgi koni lo niŋ ni, la chi lɛ niŋ ya le.+ Kɛ te teleŋ biŋgi hiou vɛlɛ pɛ, la cho ya chɔ.”

17 Okoŋ mi buɛiyaa nduaa apum dimulaŋ aa: “Yɛɛnɛ o yiyaŋ yɛ a nyɛ o dimi hoo wo aa, ‘Teleŋ biŋgi koni lo niŋ ni, la chi lɛ niŋ ya le, kɛ te teleŋ biŋgi hiou vɛlɛ pɛ, la cho ya chɔ,’ nduyɛ maa, ‘te I huŋ kɔ pɛ o Finya nuu lo’?” 18 A wa dimioo aa: “Yɛɛnɛ o yiyaŋ yɛ a nyɛ o dimi hoo wo aa, ‘Teleŋ biŋgi koni?’ Ŋ sina nyɛ o cho suɛi a ndu okɔɔ wo le.” 19 Mi Chiisu sina maa a yeema ma nyuna ndu. Le hei, mbo nyuna nda aa: “Baa le mɛɛ ya dimi aa: ‘Teleŋ biŋgi koni lo niŋ ni, la chi lɛ niŋ ya le, kɛ te teleŋ biŋgi hiou vɛlɛ pɛ, la cho ya chɔ’ yɛ nya cho nyuuniaŋndo ni? 20 A tonya mi dimul nya, la cho chaŋ mi la koŋul, kɛ mi chieeŋndo dɔɔnuŋ nyaale. La cho kɔllo tambu, kɛ mi kɔl nya tambɛiyo simnuŋ nyaaloo.+ 21 Te wana lanɔɔ wa pɛ violɔɔ, nyɛ nɛiyaa pila wa ndu choo ni, kanifuule teleŋ ndɔ vialaa fuuluu ni. Kɛ te o velu pɛ, o puɛɛnuŋ nyɛ nɛiyaa wa ndu choo wo, kanifuule o cho wa a nyaale le hɔɔ o velu o chieeŋndo choo wo. 22 Nya bɛɛ, la cho a kɔlta tambɛilaŋ suŋ suŋ. Kɛ la cho ya vɛlɛ chɔ, okoŋ mi la wa a nyaale.+ Nduyɛ wana o wana nɔla nyaale koŋ nya poonda o ba le. 23 O paale leŋ choo, la nɔ niŋ nyuna o nyuna le ya le. A tonya mi dimul nya, nyɛ o nyɛ nya nyuna pɛ Finya nuu o diola nilaŋ niŋ,+ o cho nya ndu ke.+ 24 Haaa mbo fuuluu a boondei hei, la nyuna wɔ le nyɛ o nyɛ o diola nilaŋ niŋ te. La nyuna, nduyɛ la cho sɔla. Okoŋ mi nyaale nyaa fuuluu mɛɛ.

25 “O talelaŋ niŋ ya dimul nya sɔɔŋ muŋ ni. Teleŋ cho fuuluu I suu lɛ niŋ o nya lo o latale niŋ kposoŋ te. Kɛ I cho nya dimul kpendekele a Finya nuu okɔɔ. 26 O paale leŋ choo, la cho Finya nuu nyuna le nyɛ o diola nilaŋ niŋ. O cho dimi le ya cho maa I cho ndu nyuna le nya le. 27 Kanifuule, Finya nuu pila kaala nya le mɛɛ nya kaala ya,+ nduyɛ mi la laalaŋ maa ndu vem ya hɔlte ndɔ ni yɛ.+ 28 Finya nuu vem ya, nduyɛ mi huŋ o chieeŋndo niŋ. I cho suŋ faŋaŋ o chieeŋndo choo mi miiŋgu naa Finya nuu chua.”+

29 Mi buɛiyaa nduaa dimi aa: “Ɛɛ hɛɛŋ! A cho niŋ suɛi nyɛkɛndɛ walaŋ, nduyɛ a cho lɛ isɔɔ o latale niŋ te. 30 Ŋ sina niŋ walaŋ maa a sina nyɛ o nyɛ, nduyɛ wana o wana nɔ lɛ mbo nyuna num te. Hei tosa miŋ laalaŋ maa o Mɛlɛka lo ŋ fula ni.” 31 Mi Chiisu nyuna nda aa: “La laalaŋ niŋ? 32 Teleŋ cho fuuluu, nduyɛ o chuu niŋ bɛɛ fuuluu, mi nya kpou saŋnuŋ, okoŋ mi la kuɛŋnuŋ o la nya lo, mi la mɛi ya yapilɛ kpeele.+ Kɛ I cho yapilɛ le, kanifuule Finya nuu cho a ya latulu.+ 33 I dimul nya sɔɔŋ muŋ le mi la sɔla kɔl nyuloo o sabu nuu niŋ.+ La sɔla niŋ nyɛpalaa o chieeŋndo hoo niŋ, kɛ la simul kɔltaŋ! I chii chieeŋndo yomɔɔ.”+