Hibuluiya

12 Lelaŋ, mɛɛ naŋ nɔ nuaa seiyaa faŋga bɛnduaa haa naa a balaa silɔ yɛ, la ŋ malnuŋ yɔŋ wɔɔŋ yiu yiu naa wo,+ a nyɛ o nyɛ kuuna naa kɔlaŋ. Okoŋ miŋ biunuŋ nyaanɔŋndo haaa o mɛɛlulaŋ,+ 2 nduyɛ miŋ wa Chiisu tofaa chiŋ, o cho Masaa le laalaŋ naa wo.+ Ndu mala naa ni miŋ nɔ laalaŋ kpeekpeiyo. Le nyaale wa ndu lachi wo, mbo chɛl mbo wu le naa o yɔm imɔnɔɔ* choo, siɔmbula bii ndu le. O cho niŋ ichali o ba kɛndɛ Mɛlɛkaa choo o kpeŋgbei ndɔ lemasaa ikɛi.+ 3 Mɛɛ wanaa lahakiaa dimi sɔɔŋ wɔɔŋndoŋ a ndu okɔɔ, mbo biunuŋ.+ Waŋnda haa yiyaŋ ndapila choo le. La yiyaŋndɔ nyɛkɛndɛi a ndu okɔɔ, yɔŋii nya wu ŋdial mi la mal.+

4 Haki nya cho hoo chɔulabaa wo, la lo wɔ ndu chɔulabaa haaa mi la sɔla piɔm te. 5 Nduyɛ la puɛɛnuŋ pɔli a sila Mɛlɛka ke nya maa chuauwaa ndɔ wo. Mbo dimi aa: “Po nuu, te Chɛhowa* sila num pɛ, pɛɛsa sila koŋ te. Nduyɛ te o miŋgi num o nɛi pɛ, wu ŋdial te. 6 Kanifuule wanaa Chɛhowa* kaala wa, nda o sila ni. Nduyɛ wana o chua maa chua ndɔɔ wo, ndu o sila a sioŋndeŋ ni.”+

7 Lelaŋ, te Mɛlɛka sila nya pɛ, la biunuŋ. Kanifuule, nuaa o bii chuauwaa nduaa ni.+ Finya kuɛɛ cho yɛ o sila chua ndɔɔ le?+ 8 Te o sila nya mɛɛ o sila a tuaa yɛ le, mɛɛ chuauwaa samaa nya cho ni. La cho chuauwaa ndɔ kpeekpei le. 9 Te finyaa naa chieeŋ naŋ sila naa pɛ, bɛɛleŋ pila naŋ ke nda ni. Finya naa o choo choo niŋ cho naa nɛiyo chɔmndo a nyina ndɔ diandaa ni. Baa o bɛnda miŋ tuei ndu diom mbo hiou haa chieeŋ naŋ, le halikpeŋ miŋ wa yoomu le?+ 10 Mi finyaa naa chieeŋ naŋ sila naa le teleŋ biŋgi, nduyɛ mɛɛ nda yeema yɛ nda sila naa ni. Kɛ Mɛlɛka ndu, le tɔnɔ naa o sila naa ni, nduyɛ le miŋ wa a diandaa maa ndu.+ 11 Te a sila pɛ waŋndo, o niŋ kɔl o foofo koŋ choo le. Palaa pila sila koŋ pala ndu ni. Kɛ te teleŋ tiŋ hiou pɛ, mi wanaa dɔu sila koŋ o wali niŋnda sɔla kɔl nyuloo. Koŋ cho ni, ma wa sakpo.

12 Bala cho la vilɛi doŋ ndaŋ, la tosa mi la simul. Nduyɛ, mi la kindi wula cho nyiiyaa laŋ.+ 13 La hiou lachi a nɛiyo toosiaa le peluŋ nyaŋ.+ Hei tosa mi wana cho tindaa wo seŋgu, o kpekesiaŋ te. 14 La kindiŋ mi la wa o kɔl nyulu niŋ a wana o wana,+ nduyɛ mi la wa a diandaa.+ Te o cho koŋ te, wana o wana chi niŋ Masanɔɔ le. 15 La mandaŋ, yɔŋii waŋndo o pilɛ bɛɛ fulaŋ o kɛndɛi bɛnduii Mɛlɛkɛi bɛŋgu. Nduyɛ la mandaŋ yɔŋii puundule lolɛileŋ le wul nya tɛɛŋ, mi lol ndɔ koŋ tiu wanaa bɔɔbɔɔ.+ 16 La wa yekeŋ, yɔŋii wana wa nya tɛɛŋ mbo luei baa o kaa ihini nɔɔlɛiyo* niŋ, ɔɔ mi wana wa nya tɛɛŋ mbo pɛɛsa sɔɔŋ Mɛlɛkaŋ maa Iisɔ. Mi Iisɔ pisi di ndoo nɔ maa po tase wo le nyɛdiaa dio le pilɔɔ.+ 17 Nyapila sina maa o mɛɛlulaŋ kpɔŋ, mɛɛ o yeema le ma dɔu ndu sala, ma tuŋ ndu sala koŋ. Mbo chaŋ fee le mi finya ndɔ yiyaŋ ndu choo,+ kɛ o sɔla fonda le.

18 Pembii nya sɔɔŋguu ikɛiye, i cho pembii nya pilaŋ,+ mi i wa sandei,+ mi yumbu yumboo kumbu ndi, mi nyumndaŋ ma wa lechoo kpiŋgbi, nduyɛ mi hueiyii fuku fukuei wa hɔŋndo le.+ 19 I cho vɛlɛ pembii bulu bɛndoo+ wa suɛi lechoo,+ okoŋ mi waŋnda tuɛi diomndo suɛi, ma dimi maa diom koŋ suaa lɛ naa nda chua le wo le.+ 20 Kanifuule, mi siooŋnde bii nda mɛɛ nda tuei aa: “O yɔŋ bɛɛ aa chɔloo pila pelei o pembei hei ni, la vii vii ndu a poutaŋ.”+ 21 Mi nyɛ nda che wo luei nda siooŋnde tau tau. Mi Muuse dimi aa: “Siooŋnde cho ya bɔɔ. I cho nyiiyaa kpa kpa.”+ 22 Kɛ nya, Pembii Saayɔŋ Nde+ nya sɔɔŋguu ikɛi ni, Mɛlɛka cho yoomu wo chiee ndɔɔ, Chulusalɛm o choo choo niŋ,+ a maalikɛiyaa cho a chuuŋgiaŋnda o waalaŋ niŋnda. 23 Nduyɛ, kunda+ chuauwaa tasiaa Mɛlɛkaa o choo choo niŋ nya sɔɔŋguu ikɛi ni, a Mɛlɛka, o cho yamanɔɔ le wana o wana wo,+ a wanaa Mɛlɛka siiŋguu wanaa sakpuaa,+ nduyɛ ma wa o inyinaya wa.+ 24 La sɔɔŋguu vɛlɛ Chiisu ikɛi, o tosa mi kpema sɛnɛiyo+ luɛi Mɛlɛka tɛɛŋ+ nda ŋwaŋnda chiee wo, a kooma o fasaŋiaa naa choo waŋ. Maŋ ma hiou bɛnda a kooma Ebɛl laŋ.+

25 La mandaŋ, yɔŋii nya kɛɛ wana cho suɛi naa nya chua wo diomndo tueiyɔɔ. Kanifuule, wanaa kɛɛ wana dimul waŋnda diom Mɛlɛkaa o lɛŋndeŋ choo wo diomndo tueiyɔɔ wa, a chinda le. Naa i yɔŋnuŋ ndɔ a nda lende, ɔɔ niŋ te ŋ kɛɛ pɛ wana cho suɛi o naa lo o choo choo niŋndo diomndo tueiyɔɔ?+ 26 A boondii keŋ, mi diom ndɔɔ hiiluu lɛŋndeŋ.+ Kɛ o mɛi vɛlɛ lediom aa: “I cho vɛlɛ chɔɔlu lɛŋndeŋ hiiluu, nduyɛ mi hiiluu vɛlɛ choo choo.”+ 27 Te o dimi pɛ aa “I cho vɛlɛ chɔɔlu,” hoo chɔm ni maa o cho nyɛm o hiiluu woŋ kpou faŋa. Koŋ cho ni, nyɛm o toosiaa woŋ, le mi nyɛm hiiluŋ te woŋ lo. 28 Lelaŋ, mɛɛ naŋ nɔ le hunɔɔ Masale hiiluŋ te leŋ sɔlaa yɛ, la ŋ kindiŋ kpoke le mi kɛndɛi bɛnduii Mɛlɛkɛi hiou lachi a naa waa choo. Hei tosa miŋ piɛi ndu mɛɛ o hɛnaŋ yɛ, miŋ ke ndu bɛɛleŋ, nduyɛ miŋ nɔ siooŋii nduɛi. 29 Kanifuule, Mɛlɛka naa cho ko maa yiŋnde luam nyɛ o nyɛ leŋ.+