Maatiu

12 A boondii keŋ, mi Chiisu nda buɛiyaa nduaa wa keekoo o chiɛi ipum niŋ o Paale Pɛŋgiaaleŋ choo. Yiaaŋ ma wa buɛiyaa nduaa nɛiyo, okoŋ ma kandu tɔlɔɔ soondiaa o chiɛi keŋ niŋ ma dia.+ 2 Mɛɛ Falisiiya che hei, ma dimul ndu aa: “Tofawɔ! Buɛiyaa numnda cho tosaa nyɛ wana nɔ ma tosa o Paale Pɛŋgiaaleŋ choo le wo.”+ 3 Mi Chiisu nyuna nda aa: “Baa la chi wɔ o Yau Mɛlɛkaa niŋ a nyɛ Deeve nda puaa wa ndu kɔɔli wa tosa wo, boondii yiaaŋ ma wa nda nɛiyo ve le?+ 4 Baa la tui maa mbo luɛi o chiɛi Mɛlɛkaa niŋ, okoŋ ma dia beedii* wa o yɔŋgaŋ o Mɛlɛka lo wo+ nda puaa wa ndu kɔɔli wa le? Ndaa nɔ di kposoŋ ma de ndu le, mɛɛ wanaa soliaa lasalaa kinɛi.+ 5 Ɔɔ, la chi wɔ nyɛ cho o Sawaa* niŋ maa o Palɛi Pɛŋgiɛi choo, mi wanaa soliaa lasalaa tosa wallo o chiɛi Mɛlɛkaa niŋ, kɛ o ve sawa tɛɛmbaa le le?+ 6 Mi dimul nya, wana hiou chiɛi Mɛlɛkaa wo cho nanuŋ.+ 7 Kɛ, te nyaa sina pɛ nyɛ diomndaŋ ndaŋ la sim ndo, la ve wanaa tɛɛmbuu haa sawa le wa pɛɛsa le. Laŋ la cho ni, ‘Nyiɛɛye ya yeema ni,+ o cho salalaŋ solioo le.’+ 8 Po wanachioo cho Masanɔɔ le Paale Pɛŋgiaaleŋ ni.”+

9 Okoŋ kɔɔli, mbo faŋaŋ loŋ mbo kua o chiɛi Chuuwa piɛi Mɛlɛka wo niŋ. 10 Po pilɛ wa loŋ, baa wa ndu o vesɛi.*+ Ma nyuna Chiisu aa: “Baa o bɛnda pa le waŋndo siŋgioo o Paale Pɛŋgiaaleŋ choo?” Suɛi ndaa yeema le ndu holɔɔ ni.+ 11 Mbo dimul nda aa: “Te wana pilɛ o nya tɛɛŋ nɔ pɛ saa, nduyɛ mi saa koŋ del o sooŋndo niŋ o Paale Pɛŋgiaaleŋ choo, baa wana koŋ soli ndu o sooŋ koŋ niŋ te?+ 12 Wanachioo hiou saa poloŋ! O bɛnda mi wana tosa suɛi kɛndɛi o Paale Pɛŋgiaaleŋ choo.” 13 Okoŋ mbo dimul poo aa: “Siɛndi ba numndo.” Mbo siɛndi baa, nduyɛ mi ba ndɔɔ miiŋgu nyɛkɛndɛi maa baa o pilɔɔ. 14 Kɛ mi Falisiiya fula ma kɔ naŋgu le mɛɛ nda looku ma dii Chiisu yɛ. 15 Mɛɛ Chiisu sina hei, mbo faŋaŋ loŋ. Mi wanaa bɔɔbɔɔ tual ndu kɔɔli,+ nduyɛ mbo siŋgi nda kpou. 16 Kɛ mbo sila nda o kala kala maa a dimul waŋnda a ndu okɔɔ le,+ 17 le halikpeŋ mi nyɛ Aisaya, wana ndoo suaa le Mɛlɛka wo dimi wo peeluŋ. Mbo dimi aa:

18 “Mi che buɛi nuu,+ o ya hɛli wo! I kaala ndu,+ nduyɛ I hini kɔl a ndu!+ I cho ndu nyina nuu tusi choo, nduyɛ mbo chɔm lɛŋndeŋ nyɛ cho sandeiyo. 19 O ve niŋ wana lasɛɛŋgiaŋ te.+ O deŋi niŋ choo choo le, kɛlɛŋgaa niŋ te mi waŋnda tuei diom ndɔɔ o nɛila bɛndulaŋ choo. 20 O kendi niŋ bilte hiŋ le kendiŋndo leŋ te, nduyɛ o nyumi niŋ yiŋnde hiŋ le nyumndo leŋ te,+ haaa mbo tosa mi sandei tiu silɔ. 21 O diola ndɔlaŋ niŋ kaalaŋ kpou la cho tiindaŋndo dɔwɔɔ ni.”+

22 Okoŋ kɔɔli, ma chuu ndu po bobonɔɔ. O wa vɛlɛ o sumɛi, nduyɛ nyina wɔɔŋndo wa ndu kɔɔli, mbo siŋgi ndu. Okoŋ, mi poo kandu suɛi nduyɛ mbo cha. 23 Mi kɔndɔfillo bii waŋnda, ma kandu dimioo aa: “Baa o cho Po Deeve wo le cho hoo le?” 24 Mɛɛ Falisiiya tuei hei, ma dimi aa: “A kpaaya Bɛɛsibɔɔ* wo, masa nyinaa wɔɔŋnda poo hoo cho nyinaa wɔɔŋnda touwɔɔ ni.”+ 25 Mɛɛ Chiisu sina yiyaŋ ndaa, mbo dimul nda aa: “Masale kɛ kɛ piɔuwaŋ pɛ ma kandu sɔŋgɔɔ ndapila tɛɛŋ, le sim te. Nduyɛ, chiee kɛ kɛ ɔɔ chiɛi o chiɛi piɔuwaŋ pɛ ma kandu sɔŋgɔɔ ndapila tɛɛŋ, piɔllo o piɔl ni. 26 O nɛi pilɛ koŋ choo, te Setana tou pɛ Setana, mɛɛ ndupila piɔuwaŋ tɛɛŋ ni. Vɛɛ masale ndɔleŋ le nɔla niko mi le sim? 27 Lelaŋ, te a kpaaya Bɛɛsibɔɔ wo ya cho nyinaa wɔɔŋnda touwɔɔ ni, mɛɛ a kpaaya nɛɛnɛ chuauwaa nyaa tuau yɛ nda? Le sabu koŋ chuauwaa nyaa kilul niŋ nya yamɛi ni. 28 Kɛ te o wa pɛ maa a kpaaya nyina Mɛlɛkaa ya cho nyinaa wɔɔŋnda touwɔɔ ni, mɛɛ Masale Mɛlɛkaleŋ le woolu nya fɔ.+ 29 Le mi wana luɛi o wana dialuŋ kalaa lo chiɛiniŋ ma chua nyɛm ndɔŋ, mɛɛ ma bii ndu fɛlɛŋ ma yii ndu poŋ. Te o cho koŋ te, wana nɔla ma luɛi ma chua nyɛm ndɔŋ te. 30 Wana o wana ve kumbuii nii le, mɛɛ yaamɔɔnɔ nuu o cho ni. Nduyɛ, wana o wana mala ya waŋnda chuuŋgiaa le, mɛɛ touwɔɔ o cho nda ni.+

31 “Lelaŋ mi dimul nya, haki kɛ kɛ waŋndo tosa pɛ ɔɔ diom wɔɔŋ kɛ kɛ o dimi pɛ, mbo sɔla malɔɔ hakioo. Kɛ te waŋndo dimi pɛ suɛi wɔɔŋnde a nyina Mɛlɛkaa okɔɔ, o sɔla malɔɔ haki le.+ 32 Le tamaseliiyo, te waŋndo dimi pɛ suɛi wɔɔŋnde a Po wanachioo okɔɔ, o cho malɔɔ hakioo sɔla.+ Kɛ te waŋndo dimi pɛ suɛi wɔɔŋnde a nyina diandaa okɔɔ, o sɔla malɔɔ haki o teleŋndo hoo* niŋ te, kɛlɛŋgaa niŋ te o chilaŋ niŋ.+

33 “Te yɔm kɛndɔɔ nya cho ni, komɔɔ nyaa cho wa o kɛndɛ. Kɛ te yɔm wɔɔŋndo nya cho ni, komɔɔ nyaa bɛɛ cho wa o wɔɔŋ. Kanifuule, a komɔɔ wana sina yɔmndo ni.+ 34 Nya kɛuwaa wɔɔŋ wɔɔŋnda haa,+ vɛɛ nya nɔla yɛ mi la dimi sɔɔŋ kɛndɔŋ te la cho pɛ wanaa wɔɔŋ? Kanifuule, nyɛ wa waŋndo o piaa o kɔl lo, ndu o suaa ni.+ 35 Sɔɔŋ kɛndɛŋ cho ŋ kɛsiaa wana kɛndɔɔ o kɔl loŋ, muŋ o soli ni. Nduyɛ sɔɔŋ wɔɔŋ cho ŋ kɛsiaa wana wɔɔŋndo o kɔl loŋ, muŋ koni o soli ni.+ 36 Mi dimul nya, wana o wana cho hunɔɔ konaa dɔɔnɔŋ+ a diomnda fondola o dimi laŋ okɔɔ o Paale Kɔɔsɔleŋ choo. 37 Kanifuule, diomnda nya dimi laŋ la cho tosa ni mi la wa wanaa sakpo ɔɔ mi la sɔla yaalaa.”

38 Okoŋ, mi wanaa pɛɛku waŋnda sawala Mɛlɛkalaŋ nda a Falisiiya apum dimul Chiisu aa, “Wana pɛɛkaa, ŋ yeema ma tosa kaamaa miŋ che.”+ 39 Mbo dimul nda aa: “Wanaa dɛnɛ wɔɔŋnda a wanaa sendu a Mɛlɛka le wa, kaamaa nda cho nuuviaa ni. Kɛ kaama cheleŋ tosaŋ lɛ niŋ kposoŋ te, mɛɛ kaama yɔŋnuŋ a Chona wo, wana ndoo suaa le Mɛlɛka wo.+ 40 Kanifuule, mɛɛ Chona chii palɛi i yaa a nyumndaŋ ma yaa suu bɛndu bɛndoo o dembe yɛ, lende koni Po wanachioo cho chii palɛi i yaa a nyumndaŋ ma yaa+ o sɛiyo niŋ ni. 41 Waŋnda Ninivɛɛ a waŋnda teleŋndo hoo miiŋgu niŋ yoomu o paale kɔɔsɔleŋ choo, nduyɛ ma yaala waŋnda teleŋndo hoo. Kanifuule, mɛɛ nda tuei yooŋgu Chona dimi wo, ma wookuŋ. Kɛ wana hiou Chona wo cho nanuŋ.+ 42 Wana lanɔ masa chɛŋ ba tou wo wo nda waŋnda teleŋndo hoo miiŋgu niŋ yoomu o paale kɔɔsɔleŋ choo, okoŋ mbo yaala nda. Kanifuule, mbo chaŋ naa levil le mbo huŋ yaŋ nilaŋ o sɔɔŋ taasiŋ Sɔlɔmɔŋ ndoŋ.+ Kɛ wana hiou Sɔlɔmɔŋ ndo cho nanuŋ.+

43 “Te nyina wɔɔŋndo fula pɛ waŋndo niŋ, mbo kɔ nuuviaa naa chalaa o pollo niŋ mbo seeluŋ te,+ 44 mbo dimi aa, ‘I miiŋguŋ ndɔɔ o chiɛi ya wa wo niŋ.’ Te o miiŋgu pɛ, mbo komal ndu fondo, o basaa fo, nduyɛ o bɛɛndiaa nyɛkɛndɛi, 45 o kɔ chua nyinaa wɔɔŋaa cheleŋ a ŋɔmmɛu, a hiou ndu wɔuleŋ nda. Te a luɛi pɛ, a kɔ chal loŋ. Okoŋ, mɛɛlula wana koŋ la wɔu mbo hiou bɛɛ maa paandu.+ Lende i cho yɔŋnɔŋ a wanaa dɛnɛ wɔɔŋnda teleŋndo hoo ni.”

46 Teleŋ Chiisu wa suɛi o faŋgaa lo wo, mi kala ndɔ a pɔmbuaa nduaa+ huŋ sim o bɛɛ, nduyɛ ndaa yeema ma soo o ndu lo.+ 47 Okoŋ mi waŋndo dimul ndu aa: “Kala num a pɔmbuaa numnda cho isisi o bɛɛ, a yeema ma soo o numndo.” 48 Mi Chiisu nyuna ndu aa: “Nɛɛnɛ cho yɛ kala nuu, nduyɛ nɛɛ yaa cho yɛ pɔmbuaa niaa?” 49 Mɛɛ o yulu baa o buɛiyaa nduaa lo, mbo dimi aa: “Kala nuu a pɔmbuaa niaa cho haa ni!+ 50 Wana o wana tosa pɛ hɛnaŋ Finya nuu o choo choo niŋ, mɛɛ ndu cho pɔmbɔ nuu, kala nuu, a yema nuu ni.”+