Luomaŋnda

3 Tɔnɔ yɛɛnɛ cho yɛ le waa Chuunɔɔ? Ɔɔ tɔnɔ yɛɛnɛ hivi chiɛi kɔɔlioo nɔ yɛ? 2 Tɔnɔlaŋ la cho tau. O tasoo, Chuuwa Mɛlɛka ke sawala ndɔla diandaa laŋ ni.+ 3 Kɛ te o wa yɛ mi apum kɛɛ laalaŋndo chɔmndo? Baa laalaŋ nda kɛɛ koŋ chɔmndo wo sim ni maa Mɛlɛka lo o lediom te? 4 Pɛ pɛ bɛɛ! O yɔŋ bɛɛ mi wana o wana simnuŋ wana lachoowaa,+ nyɛ cho sakpo wo Mɛlɛka dimi ni.+ Mi Yau Mɛlɛkaa dimi aa: “A cho chɔm maa nyɛ cho sakpo wo ŋ dimi ni, nduyɛ ma sɔla dioo te a kɔɔsa pɛ a num.”+ 5 Sandii nɛi lepɛŋnde chɔm sandii Mɛlɛkɛi kpendekele. Kɛ te Mɛlɛka dɔɔnuŋ pɛ tumbe, baa koŋ chɔm ni maa o sendu le? (I cho suɛi o yiyaŋ iwana chieeyaa niŋ.) 6 Sako bɛɛ! Mɛlɛka nɔ di. Te o cho yɛ koŋ te, vɛɛ o cho yɛ chieeŋndo yamɛi kilul?+

7 Kɛ te I dimi pɛ choolaŋ, mi choola laŋ la chɔm maa nyɛ Mɛlɛka dimi wo cho tonya, nduyɛ mi waŋnda saŋgala ndu, le yɛɛnɛ Mɛlɛka cho yɛ ya veeloo aa wana hakioo? 8 Vɛ la dimi nuaa aa, “Ŋ tosaŋ sɔɔŋ wɔɔŋndoŋ le mi sɔɔŋ kɛndɔŋ hiŋ” te? Lende waŋnda apum cho keiyo choolaŋ dimioo a naa okɔɔ ni. Wanaa dimi sɔɔŋ muŋ nda, Mɛlɛka cho nda yamɛi kilul o sandei choo.+

9 Baa naa Chuuwa ŋ cho a sɔvɛ mbo hiau wanaa cheleŋnda? Sako bɛɛ! Kanifuule, ŋ chii chɔm kpendekele maa Chuuwa ni, Kilikiiya ni, naa kpou wanaa lahakiaa naŋ cho ni.+ 10 A mɛɛ Yau Mɛlɛkaa dimi yɛ aa: “Wana sandaa cho le, o pilɛ bɛɛ cho le.+ 11 Wana o wana cho mbo nɔ sinapɛŋgoo le. Wana o wana cho mbo wa Mɛlɛka nuuviaa le. 12 Waŋnda chieeya kpou mulul ndu kɔɔ. Nda kpou simnuŋ wanaa fondo fuu. Wana o wana cho mbo tosa suɛi kɛndɛ le, o pilɛ bɛɛ cho le.”+ 13 “Bolola ndalaŋ la cho ko maa sɛi cho o kumbiaa wo. Ma soliŋ diɔɔmuii ndɛi kpeku le choolaŋ dimioo.”+ “Nyɛ fula nda o lasondo wo cho ko maa lolo kɛu wɔɔŋ wɔɔŋndo.”+ 14 “Mɛɛniaalaŋ a diomnda kɔl tuulaŋ la cho nda la piaa o lasondo cha.”+ 15 “Peluŋ ndaŋ cho chɔ chɔ le kɔlaŋ wanachioo diyɔɔ.”*+ 16 “Tambei a kɔl tambɛiyo cho o nɛila ndalaŋ choo ni. 17 A sina nɛi kɔl nyuloo le.”+ 18 “Wana chi nda isiooŋ o lahɔl le Mɛlɛka le.”+

19 Ŋ sina maa nyɛ o nyɛ Sawaa* dimi, le wanaa cho o Sawaa bɛŋgu wa o cho ni. O cho le nda kɛɛloo kafɛilaŋ yɔŋgoo, nduyɛ mi waŋnda o chieeŋndo choo kpou sina maa a kɔndu hakioo a Mɛlɛka. Nduyɛ maa a nɔ ma sɔla nyɛpalaa.+ 20 Lelaŋ, wana o wana nɔla mbo simnuŋ wana sakpoo ndu o hɔl o nyɛ sawaa dimi wo tosaa niŋ te.+ O kpeekpei niŋ, sawaa tosa ni miŋ sina nyɛ cho hakioo wo nyɛkɛndɛi.+

21 Kɛ suŋ suŋ niŋ, o cho lɛ o lasawa niŋ te Mɛlɛka chɔm sandii nduɛi le,+ a mɛɛ Sawaa a wanaa ndaa suaa le ndu wa dimi yɛ.+ 22 Wana o wana dɔu pɛ laalaŋndo o Chiisu Kiliti niŋ, o nɔla mbo che sandii Mɛlɛkɛi. Kanifuule, lekaa o lekaa cho mi le bɛnda mi le hiou kaale cheleŋ te.+ 23 Waŋnda chieeya kpou tosa hakioo, ma fula o biilu Mɛlɛkaa bɛŋgu.+ 24 Mi Mɛlɛka tosal nda kɛndɛi nduɛi bɛnduei,+ mbo siiŋguu nda wanaa sakpo ndu o hɔl, a mɛɛ o yɔŋgu Chiisu Kiliti le nda baŋaa yɛ.+ A paawa* nyɛ o nyɛ le.+ 25 Mi Mɛlɛka yɔŋgu Chiisu maa sala le waŋnda chieeya baŋaa+ sanaa a laalaŋ nda dɔu o kooma nduaŋ niŋndo.+ O tosa hei le sandii nduɛi chɔmndo. Mbo biunuŋ naa, nduyɛ mbo mal naa haki le yɔŋnda wɔɔŋnda naŋ tosa paandu laŋ. 26 Mbo chɔm naa vɛlɛ sandii nduɛi+ a mɛɛ o siiŋguu wanaa dɔu laalaŋndo o Chiisu niŋnda wanaa sakpo ndu o hɔl lɛ.+

27 Sabu o sabu cho pa le miŋ kelu yoŋgaa? Pɛ pɛ bɛɛ. Baa ŋ nɔ pa miŋ kelu yoŋgaa le nyɛ sawaa dimi wo tolɔɔ kɔɔli?+ Sako bɛɛ. Mɛɛ le sawa cho a laalaŋndo okɔɔ wo. 28 Kanifuule, ŋ sina maa laalaŋndo chɔmndo tosa ni mi waŋndo simnuŋ wana sakpoo, kɛ o cho kindiŋ o wa le tosaa nyɛ sawaa dimi wo le.+ 29 Baa le Chuuwa kinɛi Mɛlɛka cho ni?+ Wanaa cho ŋChuu le wa yɛ, o cho Mɛlɛka nda le?+ A tonya, ndu cho Mɛlɛka le kaalaŋ kpou ni.+ 30 Mɛlɛka ndupilɛ kpe cho ni.+ Le hei, o cho wanaa sɔla hivi chiɛi kɔɔlioo wa siiŋguu wanaa sakpuaa,+ mbo siiŋguu vɛlɛ wanaa sɔla hivi chiɛi kɔɔli le wa kpou wanaa sakpuaa+ le laalaŋ ndaa. 31 Baa ŋ nɔ pa miŋ che sawaa nyɛ fondoo le laalaŋ naa? Pɛ pɛ bɛɛ! Kɛ ŋ nɔ miŋ bii sawaa.+