Walta Kiilaa
17 Mi Pɔɔl nda Sailaa keeku Amfipolii a Apoloniaa ma fuuluu Tɛsalonaika.+ Chiɛi Chuuwa ndaa piɛi Mɛlɛka wo wa loŋ. 2 Mi Pɔɔl luɛi o chiɛi koŋ niŋ a mɛɛ ndoo tosa yɛ.+ Le palɛi pɛŋgiɛi i yaa, o wa kindiŋndo le nda malaa ma bii bila nyɛ cho o Yau Mɛlɛkaa niŋndo.+ 3 O wa nda tɛɛsiallo nduyɛ mbo chɔm nda o Yau Mɛlɛkaa niŋ maa Kiliti nɔ le saŋgaa sɔlaa,+ mbo vi, nduyɛ mbo miiŋgu yoomu.+ Mbo dimul nda aa: “A Chiisu Kiliti koŋ okɔɔ ya cho nya hoo dimullo ni.” 4 Mi hei tosa mi waŋnda apum simnuŋ wanaa laalaŋnda, okoŋ ma tual Pɔɔl nda Sailaa kɔɔli.+ Mi Kilikiiyaa bɔɔbɔɔ ndaa piɛi Mɛlɛka wa, a waŋ laanduaa tɔɔ wa apum bɛɛ tual nda kɔɔli.
5 Kɛ mi paŋalaa luɛi Chuuwa o kɔl.+ Le hei, ma nuuviaa puaa dɛnɛ wɔɔŋaa baluŋ o chioo choo wa, ma yiinuŋ kunda, okoŋ ma mal wooluŋ wooluŋndo o chioo niŋ. Ma kɔ luɛi o chiɛi Cheesiŋ ndo niŋ wolo wolo. A wa Pɔɔl nda Sailaa nuuviaa le mi ndaa soli nda faŋgaa o hɔl. 6 Kɛ a seeluŋ nda le. Okoŋ, ma bii Cheesiŋ a puaapiliaa apum ma kua a nda a kaka o waŋ bɛnduaa chieeya lo. Ma dimi aa: “Puaa cho haa keiyo kpundɛlaŋ mɛlioo ba o ba fee wa hiŋ nanuŋ.+ 7 Nduyɛ Cheesiŋ yiya nda o ndu lo chiɛiniŋ ni. Puaa haa kpou cho sawala Siisa dɔu laŋ simullo, ma wa dimioo maa masa cheleŋ cho diolaŋ aa Chiisu.”+ 8 Mɛɛ waŋnda a waŋ bɛnduaa chieeya tuei sɔɔŋ muŋ, ma tuulu kɔl tau. 9 Ma bii Cheesiŋ nda puaapiliaa tuaa kaniŋ* ndaa yeema woŋ o ba tau, okoŋ ma mal nda ma kuaŋnuŋ.
10 Mɛɛ nyumndaŋ ma tol dɔɔ, mi puaapiliaa tosa mi Pɔɔl nda Sailaa kua Bɛluiya. Mɛɛ nda fuuluu, ma luɛi o chiɛi Chuuwa piɛi Mɛlɛka wo niŋ. 11 Waŋnda Bɛluiya ndaa nɔ yeemɛi le suɛi Mɛlɛkɛi chɛlɔɔ mbo hiau waŋnda Tɛsalonaika. Ma chɛl suɛi Mɛlɛkɛi a kɔl ndaa kpou. Lepaa o lepaa, a wa Yau Mɛlɛkaa yaasiaa nyɛkɛndɛi le sinaa te tonya sɔɔŋ nda pɛɛku nda woŋ cho ni. 12 Mi wanaa bɔɔbɔɔ a waŋ laanduaa Kilikiiyaa bɔɔbɔɔ nɔ tɔɔ wa, nduyɛ a waŋ piaanduaa apum simnuŋ wanaa laalaŋnda. 13 Kɛ mɛɛ Chuuwa Tɛsalonaika tuei maa Pɔɔl cho vɛlɛ yooŋgu kɛndɛ Mɛlɛkaa dimioo Bɛluiya, ma huŋ loŋ le ma hiou faŋgaa kɔɔli ma mal wooluŋ wooluŋndo.+ 14 Okoŋ mi puaapiliaa liila Pɔɔl o pee mɛŋma ihɛllo kɔŋgɔ chɔ chɔ.+ Kɛ mi Sailaa nda Timoti lo loŋ. 15 Mi apum liila Pɔɔl haaa Atɛŋ. Mɛɛ Pɔɔl dimul nda maa Sailaa nda Timoti+ nɔ ma hiŋ naa ndu chua chɔ chɔ, ma miiŋgu.
16 Teleŋ Pɔɔl wa nda chumndo Atɛŋ ndo, mi kɔllo tambu ndu tau mɛɛ o che maa chioo cho o piaa cha a piɔmnda. 17 Le hei, mbo kandu suukaŋndo a Chuuwa, a wanaa cheleŋaa piɛi Mɛlɛka wa o chiɛi Chuuwa piɛi Mɛlɛka wo niŋ. Nduyɛ lepaa o lepaa mi ndoo suukaŋ a wanaa ndoo komal o lɔɔ niŋ nda. 18 Kɛ mi wanaa sinaa dɛniaa bɛnduaa apum o kunda Ɛpikulɔɔ wo niŋ a kunda Sitoki wo kandu ndu sɛɛŋgiaa. Haa wa dimioo aa: “Yɛɛnɛ po tombolɛiyo hoo yeema yɛ dimioo?” Apum aa: “Wana che pɛ maa a mɛlɛkaa cheleŋ okɔɔ o cho suɛi ni.” Le mɛɛ o wa yooŋgu kɛndɔɔ dimioo a Chiisu, vɛlɛ a miiŋgoo yoomu okɔɔ yɛ nda wa hei dimioo ni.+ 19 Ma bii ndu, ma kua a ndu Aliɔɔpakɔɔ. Ma dimi aa: “Ŋ hɛnaŋ miŋ sina a pɛɛku sɛnɛi ŋ cho hoo suɛiyo okɔɔ, 20 kanifuule a cho sɔɔŋ naŋ tuiyɔ paandu le woŋ dimioo. Nduyɛ ŋ yeema miŋ sina nyɛ sɔɔŋ muŋ sim ndo.” 21 Waŋnda Atɛŋ a mialaa ndaa huŋ loŋ nda kpou, mi ndaa soliŋ teleŋ nda pɛŋgiaa kpeku le sɔɔŋ sɛnɛi nda tueiyoŋ dimioo, a nilaŋ yaŋɔɔ o sɔɔŋ sɛnɛiyoŋ. 22 Mi Pɔɔl chaŋ mbo sim Aliɔɔpakɔɔ tɛɛŋ,+ mbo dimi aa:
“Waŋnda Atɛŋ, I che maa o nyɛ o nyɛ niŋ, la landuŋ kɔl le mɛlɛkaa nyaa sooluuwo mbo hiau wanaa cheleŋnda.+ 23 Kanifuule, mɛɛ ya wa balɔɔ o nya lo chiee nanuŋ, mi wa nyɛm nya sooluu woŋ mɛɛndaŋndo, mi cha maaŋndo a poonyiaa lechoo aa: ‘Le Mɛlɛka Naŋ Sina le Wo.’ Lelaŋ, Mɛlɛka nya cho hoo piɛiyo kɛ la sina ndu le wo, a ndu okɔɔ ya cho nya dimullo ni. 24 Mɛlɛka toosiaa chieeŋndo a nyɛ o nyɛ cho leniŋndo, ndu cho Masanɔɔ le choo choo a lɛŋndeŋ ni.+ O cho Mɛlɛka chal o chiɛila waŋnda chieeya taŋgul taŋ niŋ te.+ 25 Nduyɛ, o heu ba le mi waŋnda chieeya ke ndu nyɛ o nyɛ le,+ kanifuule ndu ke waŋnda chieeya kpou yoomoo+ a nyɛ o nyɛ fee ni. 26 O wanachiee tase o toosiaa wo niŋ+ o soli kaalaŋ kpou o lɛŋndeŋ choo ni.+ Tuupa mbo toosiaa ndu, o kɛɛsiaa fɛlɛŋ teleŋndaŋ, nduyɛ mbo hendul nda pɛŋgula nda nɔ le challe laŋ.+ 27 O tosa hei le ma nuuviaa ndu. Te a kindiŋ pɛ le ndu nuuviaa, a nɔla ma saaluŋ ndu.+ O kpeekpei niŋ, Mɛlɛka cho levil a wana o wana le. 28 Ndu ke naa yoomoo ni. Ndu tosa ni miŋ wa balɔɔ, nduyɛ miŋ wa achal. Mi wanaa nyaa poonyiaa apum dimi aa: ‘Naa bɛɛ chuauwaa nduaa naŋ cho ni.’
29 “Lelaŋ, mɛɛ naŋ cho chuauwaa Mɛlɛkaa yɛ,+ ŋ nɔ miŋ yiyaŋ maa Mɛlɛka cho maa ŋkoolii ɔɔ kaniŋ humbu ɔɔ maa pou le. Mɛlɛka cho maa nyɛ wanachioo toosiaa a ba ndɔ wo le.+ 30 A tonya, waŋnda wa paandu sɔɔŋ muŋ tosaa a ve o sina choo le.+ Nduyɛ Mɛlɛka bii nda tɔɔyaŋ te. Kɛ suŋ suŋ niŋ, o cho waŋnda ba o ba fee dimullo maa a wookuŋ, 31 kanifuule o kɛsi paaleŋ, nduyɛ mbo hɛli waŋndo le mbo huŋ kɔɔsa+ a wana o wana cho o lɛŋndeŋ choo o sandei choo. Mbo miŋgi wana koŋ yoomu, le waŋnda kpou chɔmndo maa suɛi hei nɔ le yɔŋnɔŋndo.”+
32 Mɛɛ wanaa wa Pɔɔl nilaŋ yaŋɔɔ wa tuei maa wanaa vi wa cho miiŋgu yoomu, mi apum kandu ndu mamɔɔ.+ Mi apum dimi aa: “Ŋ yeema ma chɔɔlu naa ndi dimul a teleŋ cheleŋ.” 33 Okoŋ mi Pɔɔl faŋaŋ loŋ. 34 Kɛ mi puaa apum tual ndu kɔɔli ma simnuŋ wanaa laalaŋnda. Dioniisiɔɔ wa waŋndo o pilɛ o nda tɛɛŋ. Wana kialaa ŋyamaa o wa ni, o toŋgo kɔɔsɔ wa Aliɔɔpakɔɔ wo. Chua pilɛ diolaŋ aa Damalisi, a wanaa cheleŋ bɛɛ wa nda tɛɛŋ.