Walta Kiilaa

3 Pitɛ nda Chɔŋ wa kɔlaŋ o chiɛi Mɛlɛkaa niŋ a lɔɔ 3:00 ipalaa* le Mɛlɛka piɛiyo, 2 mi waŋnda huŋ a po nda velu o bɛvɛiyo wo, ma kɛsi ndu o dio chiɛi Mɛlɛkaa ikɛi. Lepaa o lepaa, mi ndaa kɛsi ndu o dioo ndaa veelu aa Dio Kɛndɔɔ wo. Loŋ ndoo chal wanaa ndaa luɛi o chiɛi Mɛlɛkaa niŋnda kanioŋ* piɛiyo ni. 3 Mɛɛ o che Pitɛ nda Chɔŋ luɛiyɔɔ o chiɛi Mɛlɛkaa niŋ, mbo piɛi nda kanioŋ. 4 Kɛ mi Pitɛ nda Chɔŋ nua ndu chiŋ, ma dimul ndu aa: “Tofawɔ naa.” 5 Mbo tofa nda. O wa kɔl maa a cho ndu nyɛ ke. 6 Mi Pitɛ dimul ndu aa: “I nɔ kanii humbu le, nduyɛ I nɔ ikoolii le. Kɛ nyɛ ya nɔ wo ya cho num ke ni. O diola Chiisu Kiliti fula Naasaluɛi yo niŋ, chɔŋ ma kuɛ!”+ 7 Okoŋ mi Pitɛ saa ndu ba kɛndɔɔ mbo simi ndu.+ O lepilɛ niŋ kpe, mi peluŋ ndɔŋ a boondoŋ simul.+ 8 Mbo huulu, mbo sim.+ Mbo kandu bɛɛ balɔŋndo. Mbo luɛi o chiɛi Mɛlɛkaa niŋ nda Pitɛ waa. O wa kɔlaŋ a huuloo mbo saŋgala Mɛlɛka. 9 Mi waŋnda kpou cha ndu balɔɔ a Mɛlɛka saŋgalaa. 10 Ma sina maa po ndoo chal waŋnda kanioŋ piɛiyo o Dio Kɛndɔɔ le luɛiyɔɔ o chiɛi Mɛlɛkaa niŋndo ni.+ Mi kɔndɔfillo bii nda tau a nyɛ yɔŋnuŋ ndu wo.

11 Boondii poo hoo wa wɔ Pitɛ nda Chɔŋ balaŋ saa ve, mi kɔndɔfillo bii waŋnda. Okoŋ mi nda kpou huŋ a kiltaŋ naa nda chua o fondaŋ nda veelu aa Toŋgo Sɔlɔmɔŋ Ndo wo.+ 12 Mɛɛ Pitɛ che hei, mbo nyuna waŋnda aa: “Waŋnda Isɔluɛi, le yɛɛ kɔndɔfillo cho yɛ nya biyɔɔ le suɛi hei? Le yɛɛ nya cho yɛ naa tofaa hoo, mɛɛ wana yɔŋ aa kpaaya naapilaa ɔɔ le mɛɛ naŋ yɔŋguŋ o Mɛlɛka lo yɛ tosa ni mi poo hoo kua? 13 Mɛlɛka finyaa naa mamaa Ebilaham, Aase, a Chekɔpu+ tosa mi buɛi ndɔɔ+ Chiisu+ sɔla biiloo. Ndu nya mal waŋnda o ba ni,+ mi la kɛɛ ndu Paile o hɔl, mi che bɛɛ ndoo yeema le ndu malɔɔ. 14 Mi la kɛɛ wana diandaa a wana sakpoo, okoŋ mi la dimi le ma mel nya wana diiyo.+ 15 La bii mi la dii Masa yɔŋgu yoomoo wo,+ kɛ mi Mɛlɛka miŋgi ndu yoomu. Miŋ cha ndi pɛɛŋ.+ 16 O diola ndɔlaŋ niŋ, a laalaŋ naŋ dɔu o diola ndɔlaŋ niŋndo tosa ni mi po nya cho hoo chɔɔ, nduyɛ mi la sina wo simul. Laalaŋ naŋ dɔu o ndu niŋndo tosa ni mi poo hoo siaŋgu kpɛlɛkɛ nya kpou o hɔl. 17 Lelaŋ puaapiliaa, I sina maa nya ni, wanaa nyaa banaa ni,+ la sina nyɛ nya wa tosaa wo le.+ 18 Kɛ nyɛ nya tosa koŋ ndo tosa ni mi nyɛ wanaa ndaa suaa le Mɛlɛka wa kpou dimi sindɛ wo peeluŋ. Ndu cho ni maa, Kiliti nɔ mbo sɔla saŋgaa.+

19 “La wookuŋ,+ nduyɛ mi la muliŋ.+ Koŋ cho tosa mi Chɛhowa* wɔɔsuu hakila nyalaŋ,+ okoŋ mbo ke nya boonduŋ pɛŋgiaŋ, 20 nduyɛ mbo yɔŋ Kiliti, wana o yulu iso le nya wo, ndu cho yɛ Chiisu ni. 21 O cho wa o choo choo niŋ haaa mi teleŋ Mɛlɛka cho nyɛ o nyɛ fee miŋgi toosiaa wo fuuluu, a mɛɛ wanaa ndaa suaa le Mɛlɛka wa dimi yɛ. 22 Mi Muuse dimi pɛŋ aa: ‘Chɛhowa* Mɛlɛka nyaa cho hɛli wana suaa le ndu wo puaapiliaa nyaa tɛɛŋ maa ya.+ Nyɛ o nyɛ o dimul nya pɛ, la nɔ mi la yaŋ ndu nilaŋ.+ 23 Wana o wana yeŋ ndu lani le, Mɛlɛka cho wana koŋ tɛɛmbuu.’+ 24 Wanaa ndaa suaa le Mɛlɛka wa kpou, kanduŋ a Saamiɛɛ mbo huŋ bii a wanaa hiŋ ndu kɔɔli wa, nda kpou ma suaa kpendekele a palɛi hei okɔɔ.+ 25 Nya cho chuauwaa wanaa ndaa suaa le Mɛlɛka wa ni. La cho o kpema Mɛlɛka ndoo yii a finyaa nyaa mamaa wo niŋ.+ Mbo dimul Ebilaham aa: ‘O sabu chuauwaa numnda* niŋ ya cho waŋnda kpou o lɛŋndeŋ choo dɔwɔɔ sala ni.’+ 26 Lelaŋ, mɛɛ Mɛlɛka hɛli buɛi ndɔɔ, o nya lo fɛlɛŋ o vem ndu ni,+ le mi nya pilɛŋ pilɛŋnda kpou mulul yɔŋnda nyala wɔɔŋndaŋ kɔɔ, okoŋ mbo dɔu nya sala.”