Koloniko Diiŋ Ndɔɔ

6 A teleŋ koŋ, mi Sɔlɔmɔŋ dimi aa: “Chɛhowa, a dimi maa o yumbu yumbu ikpuŋgba tiŋi bɛndoo niŋ ŋ cho wa ni.+ 2 Kɛ nduyɛ, I teŋgul num chiɛi tɔɔma bɛndoo, fondaŋ ŋ cho wa le fɛɛŋ a fɛɛŋ ndo.”+

3 Okoŋ, mi masaa muliŋ mbo kandu Isɔluɛiyaa wa isisi loŋ nda kpou salaa dɔwɔɔ.+ 4 Mbo dimi aa: “Maa Chɛhowa, Mɛlɛka Isɔluɛiya sɔla saŋgalaa, Mɛlɛka chuel Deeve finya ni buŋgɛi nduyɛ mbo peelu ndi a bala ndɔlaŋ ndo. Mbo dimi aa, 5 ‘Chɔŋ a paale ya soli wanaa niaa o lɛŋnde Ichipi leŋ niŋndeŋ, I hɛli chiee bɛndu kɛ kɛ o kaalaŋ Isɔluɛi tɛɛŋ kpou le ma beŋ ya chiɛiyo, le mi diola nilaŋ la wa loŋ te.+ Nduyɛ, I hɛli wana o wana le mbo wa simlachinɔɔ le wanaa niaa, Isɔluɛiya le. 6 Kɛ mi hɛli Chulusalɛm+ le mi diola nilaŋ la wa loŋ, nduyɛ mi hɛli Deeve le mbo wa wanaa niaa choo, Isɔluɛiya.’+ 7 Nduyɛ Deeve finya ni ndoo nɔ yeemɛi le mbo taŋgul chiɛiyo le diola Chɛhowa laŋ, Mɛlɛka Isɔluɛiya.+ 8 Kɛ mi Chɛhowa dimul Deeve finya ni aa, ‘I cho tonya maa yeemɛi numnde cho le ma taŋgul chiɛiyo le diola nilaŋ ni. Nduyɛ yiyaŋ kɛndɔɔ pila ŋ nɔ koŋ ni. 9 Kɛ nduyɛ, o cho num te cho ya chiɛiyo teŋgul te. Po ŋ cho hunɔɔ violɔɔ wo, ndu cho chiɛiyo taŋgul le diola nilaŋ ni.’+ 10 Chɛhowa tosa nyɛ o dimi wo, kanifuule I miiŋgu o foofo Deeve finya nuu, nduyɛ mi chal o kpeŋgbei* lemasaa choo Isɔluɛi,+ a mɛɛ ndu Chɛhowa chua buŋgɛi yɛ.+ Nduyɛ I taŋgul chiɛiyo le diola Chɛhowa laŋ, Mɛlɛka Isɔluɛiya. 11 O chiɛi koŋ niŋ ya kɛsi Kɔfu Chɛhowa yii kpemaa+ a wanaa nduaa Isɔluɛiya wo ni.”

12 Okoŋ, mbo sim o bandu luamaa lasala Chɛhowa wo hɔlndɔ, waŋnda Isɔluɛi kpou lachi, mbo heelu balaŋ choo choo.+ 13 (Kanifuule mi Sɔlɔmɔŋ toosiaa biŋndo a chiliŋii siaŋɛi,* mbo kɛsi ndu o luŋndo tɛɛŋ.+ O wa bandei nɛiyo le ŋɔmmɛu a tɛndaa tɛɛŋ, toŋgei nɛiyo le ŋɔmmɛu a tɛndaa tɛɛŋ, a helɔɔ nɛiyo le hiɔɔlu a tɛndaa tɛɛŋ. Nduyɛ mbo sim lechoo.) Okoŋ, mbo baŋ wulaŋ waŋnda Isɔluɛi kpou lachi, nduyɛ mbo heelu balaŋ choo choo,+ 14 mbo dimi aa: “Oo Chɛhowa, Mɛlɛka Isɔluɛiya, mɛlɛka kɛ kɛ cho o choo choo niŋ ɔɔ o lɛŋndeŋ choo maa num te. Ma lo o kpema numndo choo, nduyɛ ma chɔm buɛiyaa num aa cho kɔlaŋ o nɛi numndo choo a kɔl ndaa kpou wa kaala lo lechoo numndo.+ 15 Buŋgɛi ŋ chuel buɛi numndo Deeve finya ni ve, ma peelu ndi.+ Numpila chua buŋgɛi keŋ ni, nduyɛ ma peelu ndi hau a bala numndaŋ.+ 16 Lelaŋ Oo Chɛhowa, Mɛlɛka Isɔluɛiya, peelu buŋgɛi ŋ chuel buɛi numndo Deeve finya ni ve. Ma dimul ndu aa: ‘Te puaa numnda chaa pɛ kela nduyɛ ma bii sawala nilaŋ,+ a mɛɛ ŋ chaa kela ya o hɔl lɛ,+ le teleŋ o teleŋ, waŋndo cho wa o pulale numndeŋ choo le challe o kpeŋgbei lemasaa choo Isɔluɛi.’ 17 Lelaŋ Oo Chɛhowa, Mɛlɛka Isɔluɛiya, maa buŋgɛi ŋ chuel buɛi numndo Deeve finya ni ve peeluŋ fɔ.

18 “Kɛ baa num Mɛlɛka a huŋ niŋ pa ma chal o lɛŋndeŋ choo a waŋnda chieeya latulu?+ Kanifuule, choo choo cho bɛɛ o kuaŋnaŋ kɛ kɛ wo, o cho letuu a num te.+ Ɔɔ niŋ chiɛi taaniŋ ya taŋgul hoo wo?+ 19 Lelaŋ, Oo Chɛhowa Mɛlɛka nuu, yaŋ nilaŋ o piɛile ya buɛi numndo cho num, mi wa num nyunaa le ma tuiinuŋ ya inyiɛɛ yo. Yaŋ nilaŋ o chaŋ ya cho naa num chua le malaa wo, a piɛile ya cho num lachi leŋ. 20 Maa hɔlte numndeŋ le wa chiɛiyo hoo choo idii a ichɔl! Kanifuule, o fondaa hoo ŋ dimi ni maa diola numndaŋ la cho wa.+ Te buɛi numndo muliŋ pɛ kumbuii chiɛiyo hoo cho ve mbo piɛi naa num chua, maa yaŋ ndu nilaŋ. 21 A yandii, yaŋ nilaŋ o piɛile buɛi numndo cho num le malaa leŋ. Nduyɛ te wanaa numnda Isɔluɛi muliŋ pɛ kumbuii chiɛiyo hoo ma piɛi naa num chua,+ maa lo o fondaŋ num chalaa o choo choo niŋ+ ma yaŋ nilaŋ o piɛile ndaleŋ, nduyɛ ma mal nda haki fɔ.+

22 “Te waŋndo hol pɛ chaaŋ ndɔ suɛi maa o tosal ndu yɔŋ wɔɔŋndo, nduyɛ mbo baŋ ndu le mbo mɛnaŋ, okoŋ mbo wa o sendi koŋ bɛŋgu mbo hiŋ o bandu luamaa lasala numndo hɔlndɔ o chiɛiyo hoo niŋ,+ 23 maa tuei naa ŋ cho o choo choo niŋnda ma tosa isɔɔ, nduyɛ ma kelu buɛiyaa numnda haa yamɛi tɛɛŋ fɔ. Chɔɔmuu wana tosa dɛnɛ wɔɔŋndo wo, ma miŋgi ndu dɛnɛ wɔɔŋ ndɔɔ o lebol,+ okoŋ ma paawa* wana cho sakpo wo le dɛnɛ ndɔ kɛndɔɔ.+

24 “Te yaamɔɔwa kɔ yom pɛ wanaa numnda o chɔuwo le mɛɛ nda lambaŋ hakioo tosaa a num yɛ,+ okoŋ ma muliŋ o numndo ma saŋgala diola numndaŋ,+ ma piɛi naa num chua+ nduyɛ ma nyɔɔlu num o chiɛiyo hoo niŋ le ma tuiinuŋ nda inyiɛɛ,+ 25 maa tuei piɛile ndaleŋ naa ŋ cho o choo choo niŋnda+ ma mal nda haki, nduyɛ ma miŋgi nda o lɛŋnde ŋ ke nda a finyaa ndaa mamaa leŋ niŋ fɔ.+

26 “Te choo choo kindaŋ pɛ mi piɔɔ kɛɛ le siaa+ le mɛɛ wanaa numnda lambaŋ hakioo tosaa a num yɛ,+ okoŋ ma muliŋ kumbuii chiɛiyo hoo cho ve ma saŋgala diola numndaŋ nduyɛ ma mulul yɔŋ nda wɔɔŋndo kɔɔ le mɛɛ ŋ tusi nda nyɛpalaa choo yɛ,+ 27 maa tuei piɛile buɛiyaa numnda, Isɔluɛiya, naa ŋ cho o choo choo niŋnda, nduyɛ ma mal nda haki. Okoŋ, ma tosa mi piɔɔ sia+ o lɛŋnde ŋ ke nda maa nyɛm kɛŋ nda leŋ choo. Kanifuule, a cho nda pɛɛku nɛila kɛndɛla nda nɔ ma kuɛ choo laŋ.+

28 “Te yima bɛnduaŋ+ ɔɔ naa taŋ waŋnda wo+ del pɛ wanaa numnda choo o lɛŋndeŋ niŋ, ɔɔ mi haŋgul tuuwo a dɛluaa tɛɛmbuu tɔlɔɔla ndalaŋ,+ ɔɔ mi soonuaa kunda bɛnduaa ɔɔ mi soonuaa tɛɛmbuu tɔlɔɔlaŋ nda de laŋ paku,+ ɔɔ mi yaamɔɔwaa ndaa luei nda o piŋndo niŋ o chieeŋ ndaŋ i kɛ kɛ niŋ,+ ɔɔ mi kpundɛ cheleŋ ɔɔ naa kɛ kɛ cheleŋ del nda choo,+ 29 piɛile kɛ kɛ waŋndo+ ɔɔ wanaa numnda Isɔluɛi kpou piɛi pɛ kumbuii chiɛiyo hoo cho ve, ma heelu balaŋ choo choo+ ma nyuna num le malaa+ (kanifuule, wana o wana sina nyɛ nɛiyaa cho ndu o kɔl lo),+ 30 maa tuei piɛile ndaleŋ naa ŋ cho o choo choo niŋnda,+ ma mal nda haki,+ nduyɛ ma paawa wana o wana mɛɛ kelala ndɔlaŋ la cho yɛ fɔ. Kanifuule, num sina kɔl ndɔɔ ni, (numpilɛ kpe sina kɔl wanachiee kɛ kɛ ni).+ 31 Keŋ cho tosa ma nɔ siooŋii numnde, nduyɛ ma kuɛ o nɛila numndaŋ choo le teleŋ o teleŋ o lɛŋnde ŋ ke finyaa naa mamaa leŋ niŋ.

32 “Nduyɛ te miallo, o cho Isɔluɛinɔ le wo fula pɛ o lɛŋnde cheleŋ niŋ pɔ mbo hiŋ, le mɛɛ o tuei a diola numnda tɔɔmalaŋ,+ a ba num kpaaya bɛndoo okɔɔ yɛ, okoŋ mbo piɛi kumbuii chiɛiyo hoo cho ve,+ 33 maa yaŋ mial koŋ nilaŋ naa ŋ cho o choo choo niŋnda, nduyɛ ma tosa nyɛ o nyɛ o nyuna num le ndu. Hei cho tosa mi waŋnda o lɛŋndeŋ choo kpou sina diola numndaŋ,+ ma nɔ siooŋii numnde, mɛɛ wanaa numnda Isɔluɛiya nɔ siooŋnde le num yɛ. Nduyɛ, ma sina vɛlɛ maa diola numndaŋ la cho o chiɛi ya taŋgul hoo wo choo.

34 “Te a vem pɛ wanaa numnda ba o ba fee o chɔuwo le ma kɔ sɔŋga a yaamɔɔwaa ndaa,+ okoŋ ma muli hɔlla o chiee ŋ hɛli hoo wo vɛlɛ a chiɛi ya taŋgul hoo le diola numndaŋ ndo+ ma piɛi+ o numndo, 35 maa tuei piɛile ndaleŋ le malaa naa ŋ cho o choo choo niŋnda, okoŋ ma sɔŋga le nda.+

36 “Te a tosa pɛ hakioo a num (kanifuule wana o wana cho mbo kɛɛ hakioo tosa le),+ nduyɛ ma dɔɔnuŋ tumbe o kala kala a nda ma mal nda yaamɔɔwaa ndaa o ba, okoŋ ma kuɛ a nda o biyɔɔ niŋ o lɛŋnde yaamɔɔwaa ndaa niŋ, o wa lɛŋnde cho levil ɔɔ kpɛɛluŋ,+ 37 te a lo pɛ o lɛŋnde leŋ niŋ ma miiŋgu o ndapila niŋ, okoŋ ma muliŋ naa num chua ma nyɔɔlu num le ma tuiinuŋ nda inyiɛɛ, nduyɛ ma dimi aa, ‘Ŋ tosa hakioo. Ŋ tosa suɛi dɛnɛ wɔɔŋ bɛndu,’+ 38 te a miiŋgu pɛ num o ibuŋ a kɔlta ndalaŋ+ vɛlɛ a yoomula ndalaŋ kpou o lɛŋnde nda kuɛ a nda o biyɔɔ niŋndeŋ niŋ,+ okoŋ ma muli hɔlla kumbuii lɛŋnde ŋ ke finyaa ndaa mamaa leŋ, chiee ŋ hɛli wo,+ vɛlɛ a chiɛi ya taŋgul hoo le diola numndaŋ ndo, 39 maa tuei piɛile wanaa numnda, nduyɛ ma tuiinuŋ nda inyiɛɛ naa ŋ cho o choo choo niŋnda ma sɔŋga le nda,+ nduyɛ ma mal nda haki le mɛɛ nda tosa hakioo a num yɛ.

40 “Lelaŋ Oo Mɛlɛka nuu, yandii te ŋ piɛi num pɛ o fondaa hoo, maa hɔlte numndeŋ le wa naa choo, nduyɛ ma tuei naa diom fɔ.+ 41 Oo Chɛhowa Mɛlɛka, chɔŋ ma kuɛ latulu a Kɔfu num chɔm maa a nɔ kpaayaa wo o fondaŋ num pɛŋgiaa.+ Oo Chɛhowa Mɛlɛka, tosa mi wanaa num aa soliaa lasalaa chɔm maa num piŋi wanaa numnda ni, nduyɛ mi wanaa chɔm lo lechoo wo o numndo wa dɔɔnuŋ nyaale le nyɛ cho o kɛndɔɔ wo.+ 42 Oo Chɛhowa Mɛlɛka, kɛɛ wana ŋ pɔya wo le.+ Maa loonuŋ a kaala lo lechoo ŋ chɔm Deeve buɛi numndo wo fɔ.”+