Kaleesiaŋnda

4 Nyɛ ya cho dimioo wo cho ni maa, te wana cho nyɛm kiɔɔŋ loo wo cho wɔ pɛ chuaambɔ, mi che bɛɛ le ndu nyɛm muŋ cho ni, teŋgeŋ ve ndu tɛɛŋ nda chiɔɔ le. 2 Nduyɛ haaa mi boondii finya ndɔ kɛɛsiaa le ndu nyɛm kiɔɔŋ kioo ve i fuuluu, o nɔ mbo wa ŋwaŋ o ba bɛŋgu ma wa ndu hɔlteŋ choo. 3 Lende koni i cho a naa ni. Teleŋ naŋ wa wɔ chuaambuaa wo, ŋ wa o chɛleŋ niŋ sɔɔŋ ŋchuaambɔyaŋ o ba bɛŋgu.+ 4 Kɛ mɛɛ teleŋ Mɛlɛka pila kɛsi wo fuuluu, mbo viam Po ndɔɔ. Okoŋ mi wana lanɔɔ vialu ndu,+ mbo wa o sawaa* bɛŋgu,+ 5 le halikpeŋ mbo baŋa wanaa wa o sawaa bɛŋgu wa,+ le mbo tosa miŋ simnuŋ chuauwaa Mɛlɛkaa.+

6 Chuauwaa Mɛlɛkaa nya cho niŋ ni. Le hei, mi Mɛlɛka duau nyina diandaa+ o ke Po ndɔɔ wo naa o lakɔl.+ Nduyɛ nyina koŋ tosa ni miŋ veelu Mɛlɛka choo choo aa: “Aba,* Kɛkɛ!”+ 7 Lelaŋ, la cho lɛ ŋchɛ le, kɛ chuauwa nya cho niŋ ni. Te chuauwaa Mɛlɛkaa nya cho yɛ ni, mɛɛ la cho nyɛm kiɔɔŋ sɔla ndu o ba.+

8 Boondii nyaa sina wɔ Mɛlɛka le ve, la wa o chɛleŋ niŋ mɛlɛkaa lachoowaa o ba bɛŋgu. 9 Kɛ suŋ suŋ niŋ, la sina Mɛlɛka, nduyɛ Mɛlɛka bɛɛ sina nya. Lelaŋ, le yɛɛnɛ nya cho yɛ vɛlɛ miiŋgoo sɔɔŋ ŋchuaambɔyaŋ tosaa,+ mi la simnuŋ vɛlɛ chiaa le muŋ?+ 10 La yiyaŋ maa palɛi i pum i cho teŋgeŋ, nduyɛ mi la biilu ndi. Nyɛ pilɛ koŋ kpe nya tosa vɛlɛ a paŋgoŋ,+ boondoŋ, a wɔsilaŋ lapum ni. 11 Siooŋnde cho ya le nya, maa te o cho saŋga fondoo fuu le ya saŋga le nya le.

12 Puaapiliaa, I cho nya nyɔɔloo maa la simnuŋ maa ya. Kanifuule, mɛɛ nya cho yɛ, lende koni ya bɛɛ wa ni.+ Nduyɛ la tosal la suɛi wɔɔŋ te. 13 La sina maa boondii ya del a naa ve, mi sɔla fondaa le nya yooŋgu kɛndɔɔ dimullo a teleŋ tase koŋ. 14 Mi che bɛɛ mi naa nuu simnuŋ kalaŋ lusulɛi le nya, kɛ la bii ya biyɔɔ wɔɔŋ, okoŋ mi la kɛɛ ya le.* Mi la bii ya maa maalikɛinɔ Mɛlɛkaa, maa Chiisu Kiliti. 15 Kuɛɛnɛ kɔl kɛndɛ nyaa nɔ koŋ ndo hiou yɛ? Yapila cho lesei maa o teleŋ koŋ niŋ, la wa a bɛɛndiaŋ le hɔlta nyalaŋ kaaliaa mi la ke ya, te keŋ ndii mala ya pɛ.+ 16 Mbo wa maa le tonya ya cho nya dimullo wo ya simnuŋ yaamɔɔnɔ nyaa ni? 17 Waŋnda haa cho kindiŋndo o nɛi o nɛi niŋ le nya kɔltaŋ mulioo, kɛ o cho le sabu kɛndɛ le. A yeema ma faŋa nya ya o ibuŋ, le halikpeŋ mi la nɔ yeemɛi le nda tolɔɔ kɔɔli. 18 Te o wa pɛ le sabu kɛndɔɔ, o bɛnda teleŋ o teleŋ mi waŋndo wa kindiŋndo le nya kɔltaŋ mulioo, kɛ o wa ko boondii ya wa nya tɛɛŋnde le. 19 Chuauwaa niaa,+ I cho o nyɛ nɛiyaa niŋ le nya mɛɛ pulii vialɛi wa nuaa wana lanɔɔ nɛiyo yɛ. Nduyɛ I cho lo nyɛ nɛiyaa hoo biuwɔŋndo haaa mi la chua kaala Kiliti laŋ. 20 Suŋ suŋ, maa yaa wa ko nya tɛɛŋ le mi soo o nya lo o nɛi cheleŋ choo, kanifuule I sina mɛɛ ya yɔŋ a nya yɛ le.

21 Nya yeema waa o sawaa bɛŋgu wa, la sina nyɛ Sawaa dimi wo le? 22 Le tamaseliiyo, i cho i poonyiaa maa Ebilaham ndoo nɔ puaa a ŋiɔɔŋ. O velu o pilɛ nda wana lanɔ chiɔɔ,+ mbo vialu o pilɔɔ nda wana lanɔ ve chɛ le wo.+ 23 Po nda velu nda wana lanɔ chiɔɔ wo, mɛɛ nda vialu nuaa chuauwa yɛ koni nda velu ndu ni.+ Kɛ o nda velu nda wana lanɔ ve chɛ le wo ndu, Mɛlɛka chua buŋgɛi le violɔŋ ndɔɔ ni.+ 24 Sɔɔŋ yɔŋnuŋ muŋ ndoŋ sim lewundu le nyɛ cheleŋ. Waŋ laanduaa ŋiɔɔŋnda haa sim le kpemalaŋ la tiɔɔŋ. Hakaa sim le kpema nda yii o Pembii Saanai ve+ choo wo ni. Nduyɛ wanaa cho o kpema koŋ niŋnda kpou, chiaa nda cho ni. 25 Hakaa sim lewundu le Saanai ni,+ pembei o lɛŋnde Alueebiaaleŋ niŋ. Ndu sim vɛlɛ lewundu le Chulusalɛm o teleŋ naa hoo niŋ ni. Kanifuule, o cho o chɛleŋ niŋ nda chuauwaa nduaa. 26 Kɛ Chulusalɛm o choo choo niŋ, ndu cho o lechɛ niŋ te. Nduyɛ ndu cho kala naa ni.

27 Kanifuule, i cho i poonyiaa aa: “Num wana lanɔ vilu hoo le wo, wa a kɔl kɛndɛ. Num wana lanɔ pulii vialɛi nɛi hoo le wo, deŋi choo choo a nyaaloo. Kanifuule wana lanɔ nda kɛɛ hoo wo nɔ chuauwa tau mbo hiau wana nɔ pɔnɔɔ wo.”+ 28 Lelaŋ puaapiliaa, mɛɛ Mɛlɛka chua buŋgɛi le Aase yɛ, lende koni o chuel nya buŋgɛi ni le waa chuauwaa ndɔ.+ 29 O teleŋ koŋ niŋ, mi po Hakaa velu wo kandu po Sela velu a kpaaya nyina Mɛlɛkaa wo nyɛpalaa tusioo choo.+ Nduyɛ lende koni i cho hau ni.+ 30 Kɛ yɛɛnɛ Yau Mɛlɛkaa dimi yɛ? O dimi aa: “Tou chuaambɔ chiɔɔ nda po ndɔɔ. Kanifuule, o cho po ndɔɔ le cho nyɛm kiɔɔŋ lo le, kɛ po wana lanɔ cho chɛ le wo.”+ 31 Lelaŋ puaapiliaa, o cho chuauwaa wana lanɔ chiɔɔ le naŋ cho le, kɛ chuauwaa wana lanɔ cho chɛ le wo.