Sam
O wana sim lachi le chondei yo lo. Deeve buɛi Chɛhowa wo soli chondei hei o Chɛhowa lo ni, paale Chɛhowa chiindiaa ndu yaamɔɔwaa nduaa kpou vɛlɛ a Sɔɔ o ba leŋ. Mbo dimi aa:+
18 Oo Chɛhowa, I nɔ kaalaa le num, nduyɛ num cho kpaaya nuu ni.+
2 Chɛhowa cho pou kpoowa nuu a naa niaa viaŋnaŋnda ni, nduyɛ ndu cho wana piŋi ya wo ni.+
Mɛlɛka nuu cho pou kpoowa+ ya viaŋnuŋ ndo ni.
Ndu cho boo chɔu manda ya wo a lee* piŋi ya wo* ni, naa niaa viaŋnaŋaa kala kalaa.+
3 I nyuna Chɛhowa le ya malaa, wana bɛnda mbo sɔla saŋgalaa wo.
Nduyɛ, I cho pioŋɔɔ sɔla yaamɔɔwaa niaa o ba.+
4 Yuei piɔmndo pinda pindaŋ ya.+
Nduyɛ, puaa fonduaa cho maa mɛŋma hunaa wa luei ya siooŋnde.+
5 Mi yuei Sɛiyo* pinda pindaŋ ya.
Nduyɛ mi piɔmndo yeŋ ya yaŋɔɔleŋ.+
6 I wa o nyɛpalaa niŋ mi nyuna Chɛhowa le malaa,
I wa hiouwɔɔ lachi a chaŋndo o Mɛlɛka nuu lo le malaa.
7 Mi lɛŋndeŋ le kandu hiilɔŋndo woku woku.+
Mi chiiyuŋ pembuŋ bɛndoŋ sim choo woŋ bɛɛ nyiiya,
Miŋ nyiiya kpa kpa le mɛɛ o dɔɔnuŋ tumbe yɛ.+
8 Mi kumnde fula ndu o lamiliŋ,
Nduyɛ mi yiŋnde wule wule bɛndu leŋ le fula ndu o sondo.+
Dɛŋgultaŋ la wa ndu biyɔɔ lachi.
9 Mɛɛ o wa tolɔɔ, mbo tosa mi choo choo tunduŋ,+
Nduyɛ nyumma kpiŋgbima bɛnduaŋ ma wa ndu o peloŋ bɛŋgu.+
10 O wa ichali chɛlɔbiinɔɔ o kɔɔ, mbo wa hunɔɔ o hueiye niŋ.+
O wa hunɔɔ o kumbaŋnda maalikɛinɔɔ choo.+
11 Mbo tosa mi nyumndaŋ ma balu ndu,+
Mi ma balu ndu silɔ maa tɛndii.
O wa o mɛŋma piimiɛiyaŋ niŋ a yumbu yumbu ikpuŋgbaa.+
12 Taŋndaŋ ma wa ndu deŋioo lachi,
Nduyɛ mi looŋ kpuŋgbaŋ a dɛŋgultaŋ la wa fulaa o yumbu yumboo niŋ.
13 Mi Chɛhowa kandu deŋioo o choo choo niŋ maa letaŋ.+
Mi Mɛlɛka Hiou Kpou Wo tosa mi waŋnda tuɛi diom ndɔɔ,+
Nduyɛ mi dɛŋgultaŋ a looŋ kpuŋgbaŋ deli.
14 Mbo vii vii chiŋɔma nduaŋ, mi ma sɛŋi yaamɔɔwaa nduaa.+
Mbo tusi nyɛ ŋualalɛiyo, mi kɔltaŋ la laasiaŋ nda niŋ.+
15 Mi lɛŋndeŋ o pee mɛŋma ihɛllo bɛŋgu fula kpendekele.+
Oo Chɛhowa, mɛɛ ŋ dɔɔnuŋ tumbe, mi chiiyuŋ chieeŋndo chal choo woŋ fula kpendekele,
A hɔŋ bɛndu hueiyii fula num o lamiliŋ nde hɔŋ ndo.+
16 O lo o choo choo niŋ mbo siɛndi baa mbo saa ya,
Okoŋ mbo soli ya o mɛŋma yiŋgilɛiyaŋ niŋ.+
17 Mbo piŋi ya yaamɔɔnɔ ni dialuŋ kalaa o ba,+
Mbo piŋi ya wanaa ndaa tul la leyɛ, nduyɛ ma nɔ kpaayaa ma hiau ya wa o ba.+
18 Ma simul la o paale nyɛpalaa komal la leŋ choo,+
Kɛ Chɛhowa wa wana ni malaa ni.
19 Mbo kua a ya o fondaŋ nyɛ o nyɛ yɔŋnuŋ ya le wo.
Mbo piŋi ya le mɛɛ ndoo hini kɔl a ya yɛ.+
20 Chɛhowa fanda ya le mɛɛ ya tosa sɔɔŋ sakpo ndu o hɔl lɛ.+
O fanda ya le mɛɛ bala nila cho o suɛi wɔɔŋ niŋ te yɛ.*+
21 I cho hiouwɔɔ lachi a sawala Chɛhowa laŋ biyɔɔ,
I mel Mɛlɛka nuu le, I tosa wɔ suɛi wɔɔŋ waa lende le.
22 I kɛsiŋ yamaŋ ndɔŋ o kialu woŋ kpou o kɔl.
I feŋaŋ o sawala ndɔlaŋ choo le.
24 Maa Chɛhowa fanda ya, le mɛɛ ya tosa sɔɔŋ sakpo ndu o hɔl lɛ,+
Le mɛɛ bala nila cho o suɛi wɔɔŋ niŋ te yɛ.+
25 Wana chɔm num lo lechoo wo wo, ndu ŋ chɔm lo lechoo wo ni.+
Wana nɔ tɔɔyaŋ o tɔɔyaŋ te wo, a bii ndu tɔɔyaŋ te.+
27 Ma piŋi wanaa tusiaŋnda.+
Kɛ wanaa heelaŋnda, ma tusi nda siɔmbulaŋ.+
28 Oo Chɛhowa, num mɛndul lambui nuu ni.
Te I wa pɛ o nyumndaŋ niŋ, Mɛlɛka nuu tosa ni mi che nyɛ teŋgaa.+
29 A mala numndo, I nɔla mi sɔŋga a wanaa del waŋnda choo le nyɛm ndaŋ poondiaa wa.+
A kpaaya Mɛlɛkaa, I tiuba mi huulu kpakioo.+
30 Sɔɔŋ Mɛlɛka tonyaa tosa woŋ choŋnuŋ walaŋ.+
Nyɛ Chɛhowa dimi wo cho sakpo.*+
Boo chɔuwo o cho ni, le wana o wana nyaanuŋ o ndu lo le vioŋnɔŋndo.+
31 Mɛlɛka cheleŋ kuɛɛ cho yɛ o Chɛhowa kɔɔli?+
Nduyɛ pou kpoowa cheleŋ kuɛɛ cho yɛ o Mɛlɛka naa kɔɔli?+
32 Mɛlɛka tonyaa cho wana luei ya yoomuaŋ ndo ni.+
O cho tosa mi nɛi nuu wa sakpo.+
33 O tosa mi peluŋ nuŋ kiandu poŋ maa peluŋ kial.
O tosa mi sim o fondaŋnda filioŋndaŋ choo.+
34 O pɛɛku bala nilaŋ le chɔuwo.
Bala nilaŋ la nɔla mi la tundu chiɔule chiliŋii siaŋɛi.*
35 A ke ya boo num chɔu piŋi ya wo.+
Ba num kɛndɔɔ mala ya ni,
Nduyɛ tusiŋ numndo tosa ni mi fula tɔɔ.+
36 A kumbi nɛi ya kei choo wo wakpa,
Nduyɛ peluŋ nuŋ kpekesiaŋ te.+
37 I cho yaamɔɔwaa niaa tisa kɔɔli, mi kɔ kiolu nda lachi.
Te I chii nda basɔɔ tɛɛ le, I miiŋgu le.
38 I cho nda chuii, a nɔla lɛ ma chɛŋ te.+
A cho deli ya o peloŋ bɛŋgu.
39 A cho ya yoomuaŋ luei le sɔŋgɔɔ.
A cho tosa mi yaamɔɔwaa niaa deli o peluŋ nuŋ bɛŋgu.+
40 A cho tosa mi yaamɔɔwaa niaa muliŋ ma nyaanuŋ ya.*
I cho wanaa tul la leyɛ wa kpou chii.*+
41 Ma chaŋ le malaa, kɛ wana o wana piŋi nda le.
Ma chaŋ vɛlɛ pɛŋ o Chɛhowa lo, kɛ o mulul nda le.
42 I cho nda chuii ma simnuŋ mɛɛ chundoo wa nuaa o hueiye niŋ yɛ.
I cho nda viouwɔɔ mɛɛ loolioo wa nuaa o nɛilaŋ yɛ.
43 A cho ya piŋi wanaa nuuviaa ya biondɔŋndaŋ o ŋdial la o ba.+
A cho ya yulɔɔ iso le mi wa kaalaŋ kpou bolleŋ.+
Nduyɛ, wanaa ya sina bɛɛ le wa cho wa wallo le ya.+
44 Nyɛ nda cho tueiyɔɔ a ya okɔɔ wo cho tosa ma diikuŋ ya.
Wanaa lekaawa cho hunɔɔ nyiiya ya lachi a siooŋnde.+
45 Yoomuaŋ ma cho wanaa lekaawa fula po.
A cho wa fuuliaa o fondaŋnda ndala viaŋnaŋ ndaŋ ma huŋ a nyiiyaa.
46 Chɛhowa cho yoomu! Saŋgalaa cho le pou kpoowa nuu!+
Maa Mɛlɛka piŋi ya wo sɔla saŋgalaa fɔ!+
47 Mɛlɛka tonyaa cho wana miŋgi maa le ya wo ni.+
O tosa mi waŋnda kpou wa ya o ba bɛŋgu.
48 Mbo piŋi ya yaamɔɔwaa niaa kɔl tuuwa o ba.
Ma heelu ya choo choo pɔ, le wanaa chiŋalaŋ ya wa.+
Ma piŋi ya wana kaala sɔŋgɔlaŋ ndo o ba.
49 Oo Chɛhowa, le saboo hoo, I cho num balikaa mel kaalaŋ kpou tɛɛŋ,+
50 Mbo piŋi masa ndɔɔ o nɛila kɔndɔfilta bɛndu niŋ.+