Sam
118 La mel Chɛhowa balikaa kanifuule o cho wana kɛndɛ.+
Kaala lo lechoo ndɔɔ cho le fɛɛŋ a fɛɛŋ.
2 Maa Isɔluɛi dimi aa:
“Kaala lo lechoo ndɔɔ cho le fɛɛŋ a fɛɛŋ.”
3 Maa waŋnda o yuŋgu Elɔŋ ndo niŋ dimi aa:
“Kaala lo lechoo ndɔɔ cho le fɛɛŋ a fɛɛŋ.”
4 Maa wanaa nɔ siooŋii Chɛhowa ve wa dimi aa:
“Kaala lo lechoo ndɔɔ cho le fɛɛŋ a fɛɛŋ.”
5 I wa o nyɛpalaa niŋ mi veelu Chɛhowa.
Mi Chɛhowa muli ya diom nduyɛ mbo kua a ya o fondaŋ nyɛ o nyɛ yɔŋnuŋ ya le wo.+
6 Chɛhowa cho ya ikɛi, lelaŋ siooŋii bii ya le.+
Yɛɛnɛ wanachioo nɔla yɛ mbo tosal la?+
7 Chɛhowa cho ya ikɛi le ya malaa.+
I cho wanaa tul la leyɛ wa tofa o delioo nduyɛ mi dɔɔnuŋ nyaale.+
8 O bɛnda mi wana veŋnuŋ o Chɛhowa lo,
Mbo hiau tiindaŋndo dɔwɔɔ o wanachioo niŋ.+
9 O bɛnda mi wana veŋnuŋ o Chɛhowa lo,
Mbo hiau tiindaŋndo dɔwɔɔ o laŋgbaa kalla niŋ.+
10 Mi waŋnda o kaalaŋ niŋ kpou balu ya silɔ.
Kɛ mi tuau nda,
O diola Chɛhowa laŋ niŋ.+
11 Ma balu ya silɔ, yaa nɔla mi hɛluŋ te.
Kɛ mi tuau nda,
O diola Chɛhowa laŋ niŋ.
12 Ma balu ya silɔ naŋ chaa liaa ni,
Kɛ o lepilɛ niŋ kpe, ma lo pɛ mɛɛ yiŋndeŋ le keleŋa nuaa nyum o nyaandaŋ niŋ yɛ.
Mi tuau nda,
O diola Chɛhowa laŋ niŋ.+
13 A nyindu ya a kalaŋ* le mi del,
Kɛ mi Chɛhowa mala ya.
14 Chɛhowa cho naa niaa viaŋnaŋnda a yoomuma niaŋ ni.
Nduyɛ o simnuŋ wana ni piŋiaa.+
15 Bɔɔluu kɔl kɛndɔɔ cho o tɛndiila wanaa cho sakpo wa niŋ,
Le mɛɛ nda sɔla piŋioo* yɛ.
Ba kɛndɛ Chɛhowa wo cho chɔmndo mɛɛ o nɔ kpaayaa yɛ.+
16 Ba kɛndɛ Chɛhowa wo hel choo choo.
Ba kɛndɛ Chɛhowa wo cho chɔmndo mɛɛ o nɔ kpaayaa yɛ.+
17 I cho wu le, I cho wa yoomu,
Le halikpeŋ mi dimul waŋnda a walta Chɛhowa laŋ okɔɔ.+
19 La kumbul la diola kpakilaŋ naa sakpoyɛi cho wa,+
I cho luɛiyɔɔ mi saŋgala Chɛhowa.
20 Dio kpaki Chɛhowa wo cho hoo ni.
Wanaa cho sakpo wa cho luɛiyɔɔ loŋ.+
21 I cho num saŋgala kanifuule ma muli ya diom,+
Nduyɛ ma simnuŋ wana ni piŋiaa.
24 Paale Chɛhowa kɛɛsiaa leŋ le cho leŋ ni.
Ŋ cho wa a kɔl kɛndɛ nduyɛ miŋ dɔɔnuŋ nyaale o paale leŋ choo.
25 Yandii Chɛhowa, ŋ cho num nyɔɔloo le ma piŋi naa!
Chɛhowa, yandii mala naa miŋ sɔla batiuwaa!
26 Salaa cho wana hiŋ o diola Chɛhowa laŋ niŋndo choo.+
Ŋ piɛi o chiɛi Chɛhowa wo niŋ le mi salaa wa num choo.
27 Chɛhowa cho Mɛlɛka ni.
Ndu ke naa nyɛ teŋgaa ni.+
La bii siɔɔlaŋ o laba mi la sɔɔŋguu wanaa cho kɔlaŋ o bɔŋaŋndo wa choo,+
Haaa mi la fuuluu o leela bandu luamaa lasalaa ikɛi.+
28 Num cho Mɛlɛka nuu ni, nduyɛ I cho num saŋgala.
Mɛlɛka nuu, I cho tosa ma fula tɔɔ.+
29 La mel Chɛhowa balikaa,+ kanifuule o cho wana kɛndɛ.
Kaala lo lechoo ndɔɔ cho le fɛɛŋ a fɛɛŋ.+