Chɔŋ

6 Okoŋ kɔɔli, mi Chiisu taŋ Pioo Kalili ɔɔ Tabiliaa leeloo.+ 2 Mi faŋga bɛndoo tual ndu kɔɔli,+ kanifuule a wa chɔɔ walta kɔndɔfilta o wa tosaa, le waŋnda siŋgioo laŋ.+ 3 Okoŋ mi Chiisu nda buɛiyaa nduaa hel o pembei choo ma chal loŋ. 4 Nduyɛ, Bɔŋaŋ Hiouwɔɔ Choo Chuuwa+ wa niŋ kpɛɛluŋ. 5 Mɛɛ Chiisu chua hɔlla mbo cha faŋga bɛndoo hunɔɔ naa ndu chua, mbo nyuna Filipi aa: “Kuɛɛnɛ naŋ cho yɛ beediiyo* sɔla le piondɔɔ le mi waŋnda haa de?”+ 6 Kɛ le Filipi kɔllo tofaa o wa hei dimioo ni, kanifuule ndoo sina nyɛ o wa hunɔɔ tosa wo. 7 Mi Filipi muli aa: “Ŋ piondu bɛɛ beediiyo dinaluɛiyoŋ 200,* o ve letuu le mi wana o wana sɔla bɛɛ nyɛɛmbɔ le.” 8 Mi buɛiyaa nduaa o pilɛ diolaŋ Andulu, pɔmbɔɔ Saimɔŋ Pitɛ dimul ndu aa: 9 “Poombɔ pɔmbɔɔ cho nanuŋ, o nɔ beedii ŋbaliiyo kpuŋgbaŋ ŋuɛɛnu a suwaa pɔmbuaa a ŋiɔɔŋ. Kɛ yɛɛ nyɔɔŋ muŋ nɔla yɛ miŋ tosal faŋga kaakuuwo hoo?”+

10 Mi Chiisu dimi aa: “La dimul waŋnda ma chal.” Bil puiyaa wa o fondaŋ koŋ tau. Okoŋ mi puaa chal lechoo, ndaa wa le 5,000.+ 11 Mi Chiisu chua beediiyo, mbo piɛi, okoŋ mbo piɔu wanaa wa ichali loŋ nda. Mbo chua vɛlɛ suwaa pɔmbuaa kaŋ mbo tosa nyɛ pilɛ koŋ kpe. Okoŋ mi wana o wana dia mbo hini kɔl. 12 Mɛɛ nda kpou de ma pum cha, mbo dimul buɛiyaa nduaa aa: “La chuuŋgiaa o nda dema wo naapilɛ, yɔŋii o tambu.” 13 Beedii ŋbalii kpuŋgbaŋ ŋuɛɛnu nda de koŋ ndo, mɛɛ nda chuuŋgiaa o biŋgi biŋgi nda dema wo naapilɛ, mbo pia kambɛilaŋ 12.

14 Mɛɛ waŋnda che kaamaa o tosa hoo wo, ma dimi aa: “Wana suaa le Mɛlɛka wo kpeekpei cho hoo ni, o ndoo nɔ le hunɔɔ o chieeŋndo niŋndo.”+ 15 Kɛ mɛɛ Chiisu chiikuu maa waŋnda yeema ma siiŋguu ndu masaa a kaka, mbo faŋaŋ loŋ+ mbo kuaŋnuŋ vɛlɛ o pembei choo ndu pilɛ kpe.+

16 Mɛɛ paaleŋ le del, mi buɛiya kua o pee mɛŋma ihɛllo,+ 17 okoŋ ma luɛi o dɛndɔɔ niŋ le taŋɔɔ ma kuɛ Kepaaniɔm. Nyumndaŋ maa tol niŋ, nduyɛ Chiisu ndoo miiŋgu wɔ nda o ibuŋ te.+ 18 Mɛŋndaŋ ma wa vɛlɛ hiilɔŋndo kpeekpei, kanifuule hueiye wa hɔŋndo tau tau.+ 19 Kɛ mɛɛ buɛiyaa nduaa kuɛ a dɛndɔɔ le kilola ŋuɛɛnu ɔɔ la ŋɔmpum,* ma cha Chiisu hunɔɔ o mɛŋndaŋ choo, mbo sɔɔŋguu dɛndɔɔ ikɛi. Mi siooŋii bɛnduei bii nda. 20 Kɛ mbo dimul nda aa: “Ya ni, la yɔŋ isiooŋ te!”+ 21 Okoŋ ma luei ndu o dɛndɔɔ niŋ. Kɛ o viu bɛɛ le, mi dɛndɔɔ fuuluu o kɔŋgɔ nda wa kɔlaŋ ndo.+

22 Diimandɔɔ, mi faŋga ndoo lo o kɔŋgɔɔ leeloo wo cha maa dɛndɛ pɔmbɔɔ ndupilɛ kpe wa loŋ ni, nduyɛ Chiisu luei o dɛndɛ koŋ niŋ nda buɛiyaa nduaa latulu le, kɛ buɛiyaa nduaa kinɛi kuɛ leniŋ ni. 23 Kɛ mi dɛndɛla cheleŋ la fula Tabiliaa, mi la huŋ o fondaŋ Masanɔɔ piɛi o beediiyo choo, mbo ke waŋnda ma dia wo ikɛi. 24 Mɛɛ waŋnda che maa Chiisu nda buɛiyaa nduaa ve lɛ loŋ te, ma luɛi o dɛndɛla laŋ niŋ ma kua ndu nuuviaa Kepaaniɔm.

25 Mɛɛ nda saaluŋ ndu o kɔŋgɔɔ leeloo, ma nyuna ndu aa: “Luabai,+ lɔɔ kuɛɛnɛ ŋ hiŋ yɛ nanuŋ?” 26 Mi Chiisu mulul nda aa: “A tonya mi dimul nya, o cho le kaamaala nya che laŋ te nya cho ya nuuviaa le, kɛ le beedii nya de mi la pum ndo.+ 27 La fafala le nyɛdiaa tambu wo le, kɛ la fafala le nyɛdiaa ke wana yoomu fafɛɛŋndo wo,+ o Po wanachioo cho nya ke wo. Kanifuule, ndu Mɛlɛka Finyaa sui pondaleŋ ni le chɔmndo maa o hini kɔl a ndu.”+

28 Okoŋ ma nyuna ndu aa: “Walta kuɛɛ naŋ nɔ yɛ miŋ tosa le mi Mɛlɛka hini kɔl a naa?” 29 Mbo mulul nda aa: “Le wali Mɛlɛkaa tosaa, la nɔ mi la dɔu laalaŋndo o wana o vem ndo niŋ.”+ 30 Ma dimul ndu aa: “Tosa wɔ kaamaa miŋ che,+ okoŋ miŋ laalaŋ num. Wali yɛɛnɛ ŋ cho yɛ tosaa? 31 Mi finyaa naa mamaa dia manɛiyo o pollo niŋ+ a mɛɛ i cho ipoonyiaa yɛ aa, ‘Mbo ke nda nyɛdiaa fulaa o choo choo niŋ le ma de.’”+ 32 Mi Chiisu dimul nda aa: “A tonya mi dimul nya, o cho Muuse le ke nya nyɛdiaa fula o choo choo niŋndo le, kɛ Finya nuu ke nya nyɛdiaa kpeekpei fula o choo choo niŋndo ni. 33 Kanifuule, nyɛdiaa Mɛlɛkaa cho wana fula o choo choo niŋ, mbo yɔŋgu waŋnda chieeya o chieeŋndo choo yoomoo wo ni.” 34 Okoŋ ma dimul ndu aa: “Masanɔɔ, wa naa nyɛdiaa hoo kioo lɔɔlɔɔ.”

35 Mi Chiisu dimul nda aa: “Ya cho nyɛdiaa yɔŋgu yoomu kpeekpeiyo wo ni. Wana o wana hiŋ pɛ naa ya chua, pesiŋ bɛɛ yima nɛi lɛ ndu le. Nduyɛ wana o wana dɔu pɛ laalaŋndo o ya niŋ, fɛɛŋ bɛɛ kolɔɔ bii lɛ ndu le.+ 36 Kɛ a mɛɛ ya dimul nya yɛ, la che ya, kɛ la laalaŋ te.+ 37 Wanaa Finya nuu ke ya wa kpou, a cho hunɔɔ naa ya chua, nduyɛ wana hiŋ naa ya chua pɛ, fɛɛŋ bɛɛ I tuu ndu le.+ 38 Kanifuule, o cho le hɛnaŋ ni tosa le ya fula choo choo mi huŋ te,+ kɛ le hɛnaŋ wana vem ya wo tosaa.+ 39 Hɛnaŋ wana vem ya wo cho ni maa, wanaa o ke ya wa kpou, o pilɛ bɛɛ luusiaŋ te, kɛ mi tosa ma miiŋgu yoomu+ o paale mɛɛlaaleŋ choo. 40 Kanifuule, hɛnaŋ Finya nuu cho hoo ni maa, wana o wana sina pɛ Po ndɔɔ, mbo dɔu laalaŋndo o ndu niŋ, o sɔla yoomu fafɛɛŋndo.+ Nduyɛ I cho ndu miŋgi yoomu+ o paale mɛɛlaaleŋ choo.

41 Okoŋ mi Chuuwa kandu inyiimu nyiimuei a ndu okɔɔ, kanifuule o dimi aa: “Ya cho nyɛdiaa fula o choo choo niŋndo ni.”+ 42 Ma kandu dimioo aa: “O cho Chiisu, po Choosɛ wo le cho hoo le? Ŋ sina finya ndɔ a kala ndɔ.+ Le yɛɛnɛ o dimi yɛ niko aa, ‘O choo choo niŋ ya fula ni’?” 43 Mi Chiisu mulul nda aa: “La pɛŋgi inyiimu nyiimuei nyapila tɛɛŋ. 44 Wana o wana nɔla mbo hiŋ naa ya chua le, mɛɛ mi Finya nuu, o vem ya wo hiŋ a ndu.+ Nduyɛ, I cho ndu miŋgi yoomu o paale mɛɛlaaleŋ choo.+ 45 Mi wanaa ndaa suaa le Mɛlɛka wa poonyiaa aa, ‘Chɛhowa* cho nda kpou pɛɛku.’+ Wana o wana yaŋ pɛ Finya nuu nilaŋ, nduyɛ mbo sɔla ndu pɛɛkoo o ba, ndu huŋ o ya lo ni. 46 Kɛ a koŋ kpou waŋndo o pilɛ bɛɛ chi wɔ Finyaa le,+ mɛɛ wana fula o Mɛlɛka lo wo, kanifuule ndu che niŋ Finyaa.+ 47 A tonya mi dimul nya, wana o wana laalaŋ pɛ, o cho yoomu fafɛɛŋndo sɔla.+

48 “Ya cho nyɛdiaa yɔŋgu yoomoo wo ni.+ 49 Mi finyaa nyaa mamaa dia manɛiyo o pollo niŋ, kɛ a koŋ kpou ma wu.+ 50 Nyɛdiaa fula o choo choo niŋndo cho hoo ni. Wana o wana de ndu pɛ, o vi lɛ le. 51 Ya cho nyɛdiaa yɔŋgu yoomoo wo ni, o fula o choo choo niŋndo. Wana o wana de nyɛdiaa hoo pɛ, o cho wa yoomu lefafɛɛŋ. Nduyɛ, nyɛdiaa ya cho koŋ yɔŋgu wo cho dialuŋ nuŋ ni, le mi waŋnda chieeya* wa yoomu.”+

52 Okoŋ, mi Chuuwa kandu diomndaŋ hiŋaŋndo ndapila tɛɛŋ, ma wa dimioo aa: “Vɛɛ poo hoo ke yɛ naa dialuŋ ndɔŋ miŋ de muŋ?” 53 Mi Chiisu dimul nda aa: “A tonya mi dimul nya, te o cho mi la de dialuŋ Po wanachioo nduyɛ mi la kol kooma nduaŋ te, la sɔla yoomoo o nyapila niŋ te.+ 54 Wana o wana de pɛ dialuŋ nuŋ, nduyɛ mbo kol kooma niaŋ, o cho yoomu fafɛɛŋndo sɔla, nduyɛ mi miŋgi ndu yoomu+ o paale mɛɛlaaleŋ choo. 55 Kanifuule, dialuŋ nuŋ cho nyɛdiaa kpeekpeiyo ni, nduyɛ kooma niaŋ ma cho nyɛ kpeekpei wana kollo ni. 56 Wana o wana de pɛ dialuŋ nuŋ nduyɛ mbo kol kooma niaŋ, wana koŋ cho diompilɛ a ya, mi ya wa diompilɛ a ndu.+ 57 Mɛɛ Finya cho yoomu wo vem ya, nduyɛ mi wa yoomu o sabu ndɔɔ niŋ yɛ, lende koni wana cho dialuŋ nuŋ dio wo cho wa yoomu o sabu nuu niŋ ni.+ 58 Nyɛdiaa fula o choo choo niŋndo cho hoo ni. O cho maa o finyaa nyaa mamaa de, kɛ a koŋ kpou ma wu wo le. Wana o wana de pɛ nyɛdiaa hoo, o cho wa yoomu lefafɛɛŋ.”+ 59 Teleŋ Chiisu wa waŋnda pɛɛkoo o chiɛi Chuuwa piɛi Mɛlɛka wo niŋ Kepaaniɔm ndo o dimi sɔɔŋ muŋ ni.

60 Mɛɛ nda tuei hei, mi buɛiyaa nduaa a bɔɔbɔɔ dimi aa: “Tueiyɔ suɛi wɔɔŋ se! Nɛɛnɛ nɔla yɛ mbo yaŋ ndi nilaŋ?” 61 Kɛ mɛɛ Chiisu sina maa buɛiyaa nduaa wa inyiimu nyiimuei le nyɛ o dimi wo, mbo nyuna nda aa: “Baa nyɛ ya dimi hoo wo paaliaŋ nya? 62 Kɛ, te o wa yɛ niŋ mi la che Po wanachioo helnɔŋndo o fondaŋ o wa paandu wo?+ 63 Nyina Mɛlɛkaa ke wana yoomoo ni,+ kɛ dialloŋ muŋ nɔ kpeku o kpeku le. Nyina diandaa o ba sɔɔŋ ya dimul nya muŋ ndoŋ fula ni, nduyɛ muŋ yɔŋgu yoomoo ni.+ 64 Kɛ wanaa pum cho nya tɛɛŋ a laalaŋ te.” Kanifuule, chɔŋ o kandɔŋndo, Chiisu ndoo sina wanaa laalaŋ te wa, a wana ndoo pisi niŋ ndu wo.+ 65 Mbo dimi vɛlɛ aa: “Le saboo hoo ya dimul nya ni maa wana o wana nɔla mbo hiŋ naa ya chua le, mɛɛ mi Finya nuu chɛl ndu.”+

66 Le hei, mi buɛiyaa nduaa a bɔɔbɔɔ faŋaŋ ndu kɔɔli ma miiŋguŋ o nyɛm nda mɛi kɔɔli woŋ,+ nduyɛ a tul lɛ ndu kɔɔli le. 67 Okoŋ mi Chiisu nyuna kiilaa 12 nda aa: “Nya bɛɛ la yeema mi la kuɛŋnuŋ?” 68 Mi Saimɔŋ Pitɛ mulul ndu aa: “Masanɔɔ, mi o nɛɛnɛ lo naŋ kuɛ yɛ?+ Sɔɔŋ ŋ dimi woŋ tosa mi wana sɔla yoomu fafɛɛŋndo.+ 69 Ŋ laalaŋ, nduyɛ ŋ sina niŋ walaŋ maa num cho Buɛi Diandaa Mɛlɛkaa ni.”+ 70 Mi Chiisu dimul nda aa: “I hɛli nya ŋwaŋ 12, lende le?+ Kɛ nduyɛ, wana pilɛ cho nya tɛɛŋ, o cho ko maa Setana.”*+ 71 A Chuda, po Saimɔŋ Isikaliɔɔ wo okɔɔ o wa suɛi ni, kanifuule ndu wa ndu hunɔɔ pisi ni, mi che bɛɛ o wa wana pilɛ o kiilaa 12 nda tɛɛŋ.+