Timoti Tasoo
4 Diom Mɛlɛkaa* dimi kpendekele maa boondii fuuluu niŋ, mi waŋnda apum mal laalaŋ ndaa, ma muliŋ sɔɔŋ nyinaa wɔɔŋnda nilaŋ yaŋɔɔ+ a pɛɛkula ndalaŋ. 2 Nduyɛ ma yaŋ wanaa mulu muluaŋaa dimi choolaŋ nda nilaŋ.+ Waŋnda haa yɛ, kɔlta iyamala ndalaŋ la yɔŋnuŋ niŋ tindiŋ mɛɛ chiliŋii tuu ve kɛsi nuaa waŋndo tindioo yɛ. 3 Ma kuuna waŋnda nɔlaŋ chuaa,+ nduyɛ ma kɛɛlu nda nyɛdiaalaŋ lapum dioo.+ Kɛ Mɛlɛka toosiaa nyɛdiaalaŋ ndaŋ ni. O toosiaa laŋ le mi wanaa nɔ laalaŋndo,+ ma sina tonyaa wa de,+ okoŋ ma mel ndu balikaa. 4 Nyɛm Mɛlɛka toosiaa woŋ kpou, ŋ cho ŋ kɛndɛ.+ Nduyɛ te ŋ mel ndu pɛ balikaa le muŋ sɔlaa, ŋ nɔ miŋ kɛɛ o kɛ kɛ le.+ 5 Kanifuule, diom Mɛlɛkaa a piɛileŋ le tosa mi nyɛm muŋ simnuŋ ŋ diandaa.
6 Te a ke pɛ puaapiliaa silaa hoo, a cho wa wana wali kɛndɛ le Chiisu Kiliti. A cho chɔm maa wana sɔla pɛɛkoo a diomnda tonyalaŋ okɔɔ wo ŋ cho ni, nduyɛ ma wa pɛɛkula kɛndɛlaŋ tolɔɔ kɔɔli nyɛkɛndɛi.+ 7 Kɛɛ bundɔŋ lachoowaŋ,+ mɛɛ ŋ wɛɛŋaa yuuwa dimi woŋ cho nuaa yɛ. O baa pilɔɔ choo, kindi kindiŋ kpoke ma pɛɛku numpila le yɔŋgɔŋndo o Mɛlɛka lo. 8 Kanifuule, pɛɛkoo le dialloŋ hiiluuwo nɔ tɔnɔ bɔɔ le. Kɛ pɛɛkoo le yɔŋgɔŋndo o Mɛlɛka lo nɔ tɔnɔɔ o nyɛ o nyɛ niŋ. Nduyɛ, o mala mi waŋnda sɔla salala Mɛlɛka mɛi lediom le yoomu naŋ cho hoo suŋ suŋndo, a hoo o chilaŋ niŋ.+ 9 Diomndaŋ ndaŋ la cho diomnda tonya, nduyɛ wana o wana nɔ mbo chɛl taŋ. 10 Le saboo hoo naŋ cho wallo o kala kala, nduyɛ miŋ wa fafalaa ni,+ kanifuule o Mɛlɛka cho yoomu wo niŋ naŋ dɔu tiindaŋ naa ni. Ndu cho wana Piŋi+ waŋnda chieeya kpou wo ni,+ taama taama wanaa laalaŋnda.
11 Wa nda silalaŋ ndaŋ kioo, a nda laŋ pɛɛkoo. 12 Fɛɛŋ bɛɛ chɛl mi waŋndo chua num chɔdɔ le mɛɛ ŋ cho feleŋgɔnɔ yɛ le. Kɛ wa wana tamasi kɛndɛ le wanaa laalaŋnda a mɛɛ ŋ suaa yɛ, o kaa numndo niŋ, a mɛɛ ŋ chɔm kaalaa yɛ, o laalaŋ numndo niŋ, nduyɛ a mɛɛ yoomu numndo wa o diandaa yɛ. 13 Lɔɔ pa mi hiŋ, hiou lachi a sɛmbɔɔ dɔwɔɔ le diomndaŋ veeloo choo choo kpeleŋ,+ le waŋnda silaa, a nda pɛɛkoo. 14 Ke Mɛlɛka ke num, mi wanaa ndaa suaa le Mɛlɛka wa dimi yooŋgoo a num okɔɔ, okoŋ mi bɛnduaa kundaa handu num balaŋ choo wo,+ pɛɛsa ndu le. 15 Yiyaŋ yiŋgoloŋ o sɔɔŋ muŋ choo. Yɔŋguŋ o muŋ tosaa niŋ, le halikpeŋ mi waŋnda kpou che maa a cho hiouwɔɔ lachioo tosaa o Mɛlɛka piɛiyo niŋ. 16 Mandaŋ a kelala numndaŋ, nduyɛ ma mandaŋ a nyɛ ŋ cho waŋnda pɛɛkoo wo.+ Hiou lachi a sɔɔŋ muŋ tosaa. Okoŋ, a cho numpila piŋi, nduyɛ ma piŋi wanaa cho num nilaŋ yaŋɔɔ wa.+