Luomaŋnda

2 Lelaŋ, mɛɛ mɛɛ ŋ wa,+ te a kilul pɛ acheleŋnda yamɛi le sɔɔŋ nda cho tosaa woŋ, a nɔ mɛɛ ŋ fula leniŋ te, kanifuule num bɛɛ cho sɔɔŋ muŋ tosaa.+ Te a kilul nda pɛ yamɛi, mɛɛ numpila ŋ kilul yamɛi ni. 2 Ŋ sina maa te Mɛlɛka kilul pɛ wanaa tosa sɔɔŋ muŋ nda yamɛi, o tonyaa choo o kialu ndi ni.

3 Te a kilul pɛ waŋnda yamɛi le sɔɔŋ num bɛɛ cho tosaa woŋ, a yiyaŋ pa maa a cho hunɔɔ yamɛi Mɛlɛka cho num kilul le hiɔlɔŋ? 4 A sina nuaa maa kɛndɛi nduɛi bɛnduei le o cho num tosallo,+ mbo wa kɔl ndɔɔ kɛsioo,+ nduyɛ mbo wa num biuwɔŋndo le?+ A sina nuaa maa kindiŋndo le Mɛlɛka cho le num malaa ma wookuŋ te?+ 5 Kɛ te a tosa bolle kalaleŋ pɛ ma kɛɛ le yɔŋnda numnda wɔɔŋndaŋ malɔɔ, Mɛlɛka cho num nyɛpalaa tusi choo o paale ndɔle kɔl tuuleŋ choo, paale o kilul niŋ waŋnda yamɛi o sandei choo leŋ.+ 6 O cho wana o wana paawa* le nyɛ o tosa wo.+ 7 Wanaa cho hiouwɔɔ lachi a sɔɔŋ kɛndɔŋ tosaa wa, o cho nda yoomu fafɛɛŋndo ke.+ Waŋnda haa cho kindiŋndo le biilu ndɔɔ, bɛɛleŋ, a yoomu vi le wo sɔlaa. 8 Kɛ wanaa hɛnaŋ sɛɛŋgiaŋndaŋ, ma kɛɛ tonyaa diikɔŋndo nduyɛ ma diikuŋ dɛnɛ wɔɔŋndo wa, Mɛlɛka cho nda kɔl ndɔ tuuwo tusi choo.+ 9 Wana o wana tosa pɛ sɔɔŋ wɔɔŋndoŋ, o wa Chuunɔ ɔɔ Kilikiinɔ, nyɛpalaa cho wa le ndu ni. 10 Kɛ wana o wana tosa pɛ sɔɔŋ kɛndɔŋ, o wa Chuunɔ+ ɔɔ Kilikiinɔ,+ o cho sɔla biilu Mɛlɛkaa, bɛɛleŋ, a kɔl nyuloo. 11 Mɛlɛka hɛli ŋwaŋnda chiee le.+

12 Wanaa tosa hakioo, kɛ a sina sawaa* le wa cho wu, mi che bɛɛ a sina ndu le.+ Kɛ wanaa sina sawaa ma tosa hakioo wa, a cho nda yamɛi kilul a mɛɛ sawaa dimi yɛ.+ 13 O cho wanaa cho sawaa tueiyɔɔ wa le cho sakpo Mɛlɛka o hɔl te. Kɛ wanaa cho tosaa nyɛ sawaa dimi wo wa cho sakpo ndu o hɔl ni.+ 14 Wanaa cho ŋChuu le wa nɔ sawa Mɛlɛka le.+ Kɛ te waŋnda haa tosa pɛ nyɛ sawaa dimi wo, a chɔm maa sawaa cho nda o lakɔl. 15 Nda kpeekpei chɔm ni maa sawaa cho nda o poonyiaa o lakɔl, nduyɛ mi kɔlta iyamala ndalaŋ la tɛndal nda seileŋ. Mi yiyaŋnda ndalaŋ la yaala nda ɔɔ mi la ke nda dioo. 16 Lende i cho yɔŋnɔŋ ni, te Mɛlɛka huŋ wa pɛ waŋnda yamɛi kilullo o sabu Chiisu Kiliti wo niŋ le sɔɔŋ ndaŋ viaŋnaŋndoŋ.+ Muŋ kpou cho o yooŋgu kɛndɛ ya cho dimioo wo niŋ.

17 Nya pumnda dimi maa Chuuwa nya cho ni,+ nduyɛ maa la tiindaŋ o sawaa niŋ, mi la wa pɛɛlɔŋndo maa la sina Mɛlɛka. 18 La sina nyɛ Mɛlɛka hɛnaŋndo, mi la wa sɔɔŋ kɛndɔŋ tosaa, kanifuule a pɛɛku nya Sawaa.+ 19 La nɔ laalaŋndo maa la nɔla mi la chɔm wana sumɛiyo nɛiyo, nduyɛ mi la ke wanaa cho o nyumndaŋ niŋnda nyɛ teŋgaa. 20 La yiyaŋ maa la nɔla mi la sila diɔmnda, nduyɛ mi la pɛɛku chuaambuaa, kanifuule la nɔ sinapɛŋgoo a kɔl kalu cho o Sawaa niŋndo. 21 Kɛ num cho chaanda pɛɛkoo wo, numpila pɛɛkuŋ pa?+ A cho waŋnda pɛɛkoo aa, “La yɔŋ levii le,”+ kɛ ma yɔŋ pa viileŋ? 22 A cho dimioo aa, “La suunda le,”+ kɛ ma suunda pa? A dimi maa a tul piɔmnda leyɛ, kɛ ma chiimbuu pa nyɔɔŋ o maaŋndaŋ niŋ? 23 A cho pɛɛlɔŋndo maa a sina Sawa Mɛlɛkaa, kɛ a cho ndu pa biyɔɔ le Mɛlɛka bɛɛleŋ kioo? 24 Kanifuule, “nya tosa ni mi waŋnda o kaalaŋ niŋ wa diola Mɛlɛkalaŋ tɛɛmbuuwo,” a mɛɛ Yau Mɛlɛkaa dimi yɛ.+

25 Hivi chiɛi kɔɔlioo+ nɔ tɔnɔɔ, te o yɔŋ pɛ ma tol nyɛ sawaa dimi wo kɔɔli.+ Kɛ te a kɛɛ pɛ nyɛ sawaa dimi wo tolɔɔ kɔɔli, o wa ko maa a sɔla pɛŋ hivi chiɛi kɔɔli le. 26 Nduyɛ, te wana sɔla hivi chiɛi kɔɔli le wo+ tol pɛ Sawala diandaala Mɛlɛkalaŋ kɔɔli, baa Mɛlɛka chue ndu maa wana sɔla hivi chiɛi kɔɔlioo wo le?+ 27 La sɔla pɛɛkoo a hivi chiɛi kɔɔlioo vɛlɛ a Sawalaŋ okɔɔ, kɛ la cho laŋ tolɔɔ kɔɔli le. Lelaŋ, te wana sɔla hivi chiɛi kɔɔli le wo tol pɛ nyɛ sawaa dimi wo kɔɔli, o kilul nya yamɛi. 28 O cho kɔɔleŋ te le siiŋguu waŋndo Chuunɔ kpeekpeiyo le.+ Nduyɛ hivi chiɛi kɔɔli kpeekpeiyo cho ko hivi yɔŋaa hoo le.+ 29 Kɛ wana cho Chuunɔɔ o kɔllo niŋndo cho Chuunɔ kpeekpeiyo ni.+ Nduyɛ hivi chiɛi kɔɔli ndɔɔ cho a nyɛ sawaa dimi wo le,+ kɛ o kɔllo niŋ+ sanaa a nyina diandaa. Wana waa lende, Mɛlɛka chandu ndu ni, o cho waŋnda chieeya le.+