Ɛsodɔɔ

17 Mi Isɔluɛiya kpou mal naa nda wa o pollo niŋ Siŋ nda,+ ma wa kɔlaŋ o pɔmpɔmbɔ a mɛɛ Chɛhowa dimi yɛ.+ Ma kɔ kila dɔɔŋgɔɔ Luɛfidim.+ Kɛ nduyɛ, mɛŋma ve loŋ le mi waŋnda kol te.

2 Le hei, mi waŋnda chiŋalaŋ Muuse,+ ma dimul ndu aa: “Ke naa mɛŋndaŋ miŋ kol.” Kɛ mi Muuse dimul nda aa: “Le yɛɛnɛ nya cho yɛ ya chiŋalaŋndo? Le vɛɛ kpɛ nya cho yɛ hiouwɔɔ lachi a Chɛhowa tɔɔndaŋndo?”+ 3 Mɛɛ kolɔɔ hiu nda biyɔɔ tei, ma kandu ŋɔɔchiaŋndo a Muuse,+ ma dimul ndu aa: “Le yɛɛnɛ ŋ soli yɛ naa o lɛŋnde Ichipi leŋ niŋ? Baa le mi naa, chuauwaa naa, a chɔluaa naa kpou vi a bolola vesɛilaŋ?” 4 O mɛɛlulaŋ kpɔŋ, mi Muuse koŋul o Chɛhowa lo aa: “O yɛɛnɛ kpeekpei ya tosa yɛ a waŋnda haa? O lo niŋ chobe ma vii vii ya a poutaŋ!”

5 Okoŋ, mi Chɛhowa dimul Muuse aa: “Chua waŋ banaa Isɔluɛiya a tiŋ, a tinda ŋ lɔɔ mɛŋndaŋ o Pioo Nail wo,+ mi la hiou waŋnda lachi 6 le kɔlaŋ Holuɛɛbi. Nduyɛ, I cho wa nya isisi lachi loŋ o pouwo choo. Te a fuuluu pɛ loŋ, a lɔɔ pouwo. Okoŋ mɛŋndaŋ ma cho fula le mi waŋnda kol.”+ Mi Muuse tosa lende waŋ banaa Isɔluɛiya o hɔl. 7 Okoŋ, mbo ke fonda koŋ diolaŋ aa Maasa*+ a Mɛluiba.*+ Kanifuule, loŋ Isɔluɛiya chiŋalaŋ Muuse ni, nduyɛ ma tɔɔndaŋ Chɛhowa.+ Ma dimi aa: “Baa Chɛhowa cho pa naa tɛɛŋ ɔɔ o cho naa tɛɛŋ te?”

8 Okoŋ, mi Amalɛkaitiiya+ huŋ chiŋalaŋ Isɔluɛiya a sɔŋgɔɔ o Luɛfidim niŋ.+ 9 Le hei, mi Muuse dimul Chɔɔsuaa aa:+ “Hɛlul naa puaa mi la kɔ sɔŋga Amalɛkaitiiya. Siɔdii idii, I cho lakɔ isisi o pembei choo a tinda Mɛlɛka tonyaa o ba.” 10 Mi Chɔɔsuaa tosa mɛɛ Muuse dimul ndu yɛ.+ Mbo kua le mbo kɔ sɔŋga Amalɛkaitiiya. Nduyɛ mi Muuse, Elɔŋ, a Hɔɔ+ kɔ hel o pembei choo.

11 Okoŋ, mi Muuse heelu balaŋ choo choo. Mɛɛ o heelu balaŋ choo choo, mi Isɔluɛiya kandu Amalɛkaitiiya yomɔɔ. Kɛ dimioo nuaa mi Muuse kandu balaŋ tusioo, mi Amalɛkaitiiya kandu Isɔluɛiya yomɔɔ. 12 Mɛɛ balaŋ la saŋga Muuse yɔkɔɔ, ma kɛsul ndu pouwo, mbo chal lechoo. Okoŋ, mi Elɔŋ nda Hɔɔ saa Muuse balaŋ le ndu malaa. Mɛɛ hoo saa ba kɛndɔɔ, mi o pilɔɔ saa ba miallo. Nduyɛ balaŋ la lo ndu la heelaa lende haaa mi paaleŋ le del. 13 Okoŋ, mi Chɔɔsuaa yam Amalɛkaitiiya a muɛi faŋnde.+

14 Okoŋ kɔɔli, mi Chɛhowa dimul Muuse aa: “Poonyiaa hei o yauwo niŋ le loonɔŋndo, ‘I cho Amalɛkaitiiya basɔɔ tɛɛ o lɛŋndeŋ choo.’+ Nduyɛ, ma dimul Chɔɔsuaa nyɛpilɔɔ hoo kpe.” 15 Okoŋ, mi Muuse taŋgul bandu luamaa lasalaa, mbo ke ndu diolaŋ aa Chɛhowa-nisi.* 16 Mbo dimi aa: “Le mɛɛ Amalɛkaitiiya simul kpeŋgbei* lemasa Chɛhowa wo yɛ,+ Chɛhowa cho sɔŋga a nda, chuauwaa ndaa, vɛlɛ a chuauwaa ndaa mamaa.”+