Sam
YAU YAA NDƆƆ
(Sam 73-89)
Chondii Asafi+ ve.
73 Mɛlɛka cho wana kɛndɛ o Isɔluɛiya lo, wanaa cho a diandaa o kɔltaŋ niŋnda.+
2 Kɛ ya ya, ndoo lo niŋ chobe mi yaa faŋaŋ o nɛi sakpoo choo.
Nduyɛ ndoo lo niŋ chobe mi yaa siɛɛla.+
4 Haaa ma vi, a saŋga le,
Nduyɛ dialuŋ ndaŋ ŋ waŋnuŋ kɛndiaa.+
5 Nyɛkindilaa komal nda maa wanaa cheleŋ te,+
Kɛlɛŋgaa niŋ te ma saŋga maa nda.+
6 Heelɔŋndo cho yɔlɔŋ ndaŋ laboloŋ ni,+
Nduyɛ ma chuɛɛnuŋ sɔŋgɔlaŋ maa doma.
7 Sulta ndalaŋ la* tosa ma heelu hɔlla.
Nyɛ nda nɔ wo hiou pɛŋ nyɛ nda wa kɔllo.
8 A cho acheleŋnda mamɔɔ ma dimi sɔɔŋ wɔɔŋndoŋ.+
Ma kɔŋgɔliaŋ waŋnda o heelɔŋ bɛndoo niŋ, le nda nyɛpalaa tusioo choo.+
9 Ma soo naŋ chaa a cho filioŋ mɛɛ choo choo cho yɛ.
O chɔmnɔŋ bɛndoo niŋ nda kela o lɛŋndeŋ choo ni, nduyɛ ma dimi nyɛ o nyɛ nda yeema pɛ.
10 Lelaŋ wanaa nduaa muliŋ o nda lo ni,
Ma kol mɛŋma ndama cho ma hɔbɛi yaŋ.
11 Ma dimi aa: “Baa Mɛlɛka sina pa?+
Baa Mɛlɛka Hiou Kpou Wo sina pa sɔɔŋ naŋ cho muŋ tosaa woŋ?”
12 A tonya, nda cho yɛ wanaa dɛnɛ wɔɔŋaa choŋnuŋ hɛnɛkɛ wa ni.+
A cho hiouwɔɔ lachi a sulta ndalaŋ deŋgelaa.+
13 O kpeekpei niŋ, fondo fuu ya kɛsi kɔl nuu o diandaa ni,
Nduyɛ mi kɛɛ le balaŋ lueiyo o sɔɔŋ wɔɔŋndoŋ niŋ.+
14 Le paaleŋ kpɛŋ, I wa buulaŋndo.+
Nduyɛ idii o idii, Mɛlɛka wa ya miŋgioo o nɛi.+
15 Kɛ te yaa soo pɛ a sɔɔŋ muŋ okɔɔ,
I wa wanaa numnda hui.
16 I wa ya paaliaŋndo,
Mɛɛ ya kindiŋ le ndi biyɔɔ bila.
17 Mɛɛ mi luɛi o chiɛi diandaa bɛndu Mɛlɛkaa niŋ,
Malaŋ ya sina mɛɛ chila ndalaŋ la wa niŋ yɛ.
19 Nuawɔ se mɛɛ nda sɔla niŋ tambei o lepilɛ niŋ kpe yɛ!+
O lepilɛ niŋ kpe, a cho nda kpundɔɔ tusi choo, ma basu nda tɛɛ!
20 Oo Chɛhowa, a cho tosa ma lo num o hɔl pɛ,
Mɛɛ waŋndo sɔl nuaa luaŋ, te paaleŋ le sɛ pɛ o puɛɛnuŋ a maŋ okɔɔ yɛ.
22 Yaa nɔ sinapɛŋgu le, nduyɛ yaa yiyaŋ o sɔɔŋ choo nyɛkɛndɛi le.
I wa ko maa visi nɔ diɔmnde wo num o hɔl.
23 Kɛ suŋ suŋ niŋ, I cho hiouwɔɔ lachi a num tiindaŋndo le teleŋ o teleŋ.
Kanifuule, a saa ya a ba num kɛndɔɔ.+
24 A cho ya nɛiyo chɔmndo a silala numndaŋ.+
Nduyɛ, a cho tosa mi fula tɔɔ.+
25 O nɛɛnɛ cheleŋ ya nɔ yɛ o choo choo niŋ?
O faŋaŋ o num kɔɔli, I nɔ lɛ iyeema le nyɛ o nyɛ o lɛŋndeŋ choo le.+
26 Mi dialuŋ nuŋ a kɔl nuu saŋga.
Kɛ Mɛlɛka cho pou kpoowa manda kɔl nuu wo ni, vɛlɛ a nyɛm kɛŋ nuŋ le fɛɛŋ a fɛɛŋ.+
27 A tonya, wanaa kua num levil la cho tambei sɔla.
A cho wanaa luei balaŋ o kaa ihini nɔɔlɛiyo niŋ* ma mal num nda tɛɛmbuu.+
28 Kɛ le ya ndu, I cho suɛi kɛndɛ le mi sɔɔŋguu Mɛlɛka ikɛi.+
I siiŋguu Chɛhowa, Mɛlɛka Kpuluŋguma Bɛndoo naa niaa viaŋnaŋnda,
Le mi dimul waŋnda a walta ndɔlaŋ kpou okɔɔ.+