Nɔmbaa
16 Mi puaa apum chaŋ ma kua o Muuse lo. Puaa haa o pilɛ wa Kolua ni,+ po Isihaa wo.+ Nduyɛ po mama Kohati wo+ o wa ni, po Livai yo.+ Apiliaa wa Detaŋ a Abailuam ni, puaa Ɛliaabi wa,+ vɛlɛ a Ɔŋ, po Pɛlɛti wo, fulaa o kaale Lubɛŋ ndeŋ choo.+ 2 Okoŋ mi nda a puaa Isɔluɛiya 250 simul Muuse. Puaa haa wa yuŋgula leboltaŋ, wanaa silaa, a wanaa tɔɔ wa waŋnda tɛɛŋ ni. 3 Mi nda kpou chuuŋgiaŋ naapilɛ ma kuel+ Muuse nda Elɔŋ. Ma dimul nda aa: “La cho niŋ bɔɔ baa hiuwo! Wanaa tuaa kpou bɛɛ Mɛlɛka hɛli nda ni,+ nduyɛ Chɛhowa cho nda tɛɛŋ.+ Mɛɛ le yɛɛnɛ nya chuaŋnuŋ yɛ niŋ chuaŋnɔŋ bɛndoo hoo wanaa Chɛhowa wa choo?”
4 Mɛɛ Muuse tuei hei, o le pilɛ niŋ kpe, mbo baŋ wulaŋ mbo fuuluu hɔlla lɛŋ. 5 Okoŋ mbo dimul Kolua a wanaa wa ndu tooloo wa kpou aa: “Siɔdii idii, Chɛhowa cho chɔm wana cho le ndu wo,+ wana o hɛli wo, a wana nɔ mbo sɔɔŋguu ndu ikɛiyo.+ Nduyɛ wana o wana o hɛli pɛ,+ ndu cho ndu sɔɔŋguu ikɛi ni. 6 Nyɛ nya nɔ mi la tosa wo cho hoo ni: Num Kolua a wanaa cho num tooloo wa kpou,+ la chua nyɛla chuaa leyiŋndaŋ+ 7 mi la wou yiŋndeŋ leniŋ, a nyɛm chuŋ kɛndɔŋ lechoo, okoŋ siɔdii idii la sim Chɛhowa lachi. Wana Chɛhowa cho hɛli wo,+ mɛɛ ndu cho wana diandaa ni. Nya puaa Livai ya,+ la cho niŋ bɔɔ baa hiuwo!”
8 Mi Muuse dimul Kolua aa: “Nya puaa Livai ya, yandii, la yaŋ ndɔ nilaŋ. 9 Chɛhowa, Mɛlɛka Isɔluɛiya hɛli nya wanaa nduaa tɛɛŋ,+ mbo chɛl nya le mi la sɔɔŋguu ndu ikɛi le waltaŋ tosaa o tɛndii bɔŋaŋndo, nduyɛ mi la sim Isɔluɛiya lachi le waltaŋ tosaa le nda. Baa hei cho wɔ letuu le nya le?+ 10 Baa o cho ndu le hɛli num, bɛndaa numnda a pɔmbuaa numnda, nya puaa Livai ya le mi la sɔɔŋguu ndu ikɛi le? Baa la yeema vɛlɛ mi la luɛi foofo wanaa soliaa lasalaa hɔlteŋ?+ 11 Le saboo hoo, num a wanaa cho num tooloo wa kpou, la simul Chɛhowa. Kɛ Elɔŋ ndu, yɛɛnɛ kpeekpei o tosa yɛ le mi la ŋɔɔchiaŋ a ndu?”+
12 Okoŋ kɔɔli, mi Muuse yooŋgu le puaa Ɛliaabi wa, Detaŋ nda Abailuam.+ Kɛ ma dimi aa: “Ŋ cho lakɔ le! 13 A soli naa o lɛŋnde milikiiyaŋ* a liaaŋ ma cho taaliaa leniŋ ndeŋ, ma huŋ a naa o pollo niŋ le naa diyɔɔ.+ Baa keŋ cho wɔ letuu le num te? Baa a yeema vɛlɛ ma siiŋguu numpila masaa naa choo? 14 I cho kpendekele maa a hiŋ a naa o lɛŋnde milikiiyaŋ a liaaŋ ma cho taaliaa leniŋ ndeŋ te.+ Nduyɛ, a ke naa layondo ɔɔ kpelela makelepii le mi la wa nyɛm kɛŋ naa le. Baa a yeema mi puaa haa tol num kɔɔli maa wanaa sumɛi?* Ŋ cho lakɔ le!”
15 Le hei, mi Muuse tuulu kɔllo tau tau. Mbo dimul Chɛhowa aa: “Chɛl salala ndala ŋkul taŋ te. Sofɛliaa ndaa o pilɛ bɛɛ I bii wana o wana o ba le, nduyɛ wana pilɛ bɛɛ o nda tɛɛŋ I tosal suɛi wɔɔŋ te.”+
16 Mi Muuse dimul Kolua aa: “Num, Elɔŋ a wanaa cho num tooloo wa kpou, la fula siɔdii mi la kɔ sim Chɛhowa lachi. 17 Wana o wana chua nyɛ ndɔ chuaa leyiŋndo, mbo wou nyɛm chuŋ kɛndɔŋ lechoo, okoŋ mbo kɔ sim a ndu Chɛhowa lachi. Nyɛla chuaa leyiŋndaŋ kpou kpou 250. Nduyɛ num nya Elɔŋ bɛɛ, mi wana o wana sim a nyɛ ndɔ chuaa leyiŋndo.” 18 Okoŋ, mi nda kpou chua nyɛla ndala chuaa leyiŋndaŋ, ma wou yiŋndeŋ a nyɛm chuŋ kɛndɔŋ lechoo, ma kɔ sim o tɛndii bɔŋaŋndo sondoo latulu a Muuse nda Elɔŋ. 19 Mɛɛ Kolua a wanaa wa ndu tooloo wa kpou chuuŋgiaŋ naapilɛ+ o tɛndii bɔŋaŋndo sondoo le nda simullo, mi Isɔluɛiya kpou cha paŋgele Chɛhowa wo.+
20 Mi Chɛhowa dimul Muuse nda Elɔŋ aa: 21 “La faŋaŋ waŋnda haa ikɛi, le mi tɛɛmbuu nda o le pilɛ niŋ kpe.”+ 22 Le hei, ma baŋ wulaŋ, nduyɛ ma fuuluu hɔlla lɛŋ. Ma dimi aa: “Oo Mɛlɛka, num yɔŋgu wana o wana fee yoomoo ni.*+ Baa ma tuulu kɔllo a waŋnda kpou le haki wana pilɔɔ?”+
23 Okoŋ mi Chɛhowa dimul Muuse aa: 24 “Dimul waŋnda kpou aa, ‘La faŋaŋ o tɛndiila Kolua, Detaŋ, a Abailuam ndaŋ ikɛi!’”+
25 Okoŋ mi Muuse nda waŋ banaa+ o Isɔluɛi niŋ chaŋ ma kua naa Detaŋ nda Abailuam chua. 26 Mbo dimul waŋnda kpou aa: “A yandii, la faŋaŋ o tɛndiila wanaa dɛnɛ wɔɔŋnda haa ikɛi. Nduyɛ nyɛ o nyɛ nda nɔ, la pilaŋ te, yɔŋii nya sɔla tambei le haki ndaa.” 27 Ma faŋaŋ chɔ chɔ o tɛndiila Kolua, Detaŋ, a Abailuam ndaŋ ikɛi ba o ba nda wa. Nduyɛ mi Detaŋ nda Abailuam fula, ma sim o tɛndiila ndalaŋ sondoo latulu a laandaa ndaa, puaa ndaa, a chuauwaa ndaa pɔmbuaa.
28 Mi Muuse dimi aa: “Hei cho tosa ni mi la sina kpendekele maa Chɛhowa vem ya sɔɔŋ muŋ kpou tosaa ni, nduyɛ maa o cho kɔl nuu le nyindu ya muŋ tosaa le.* 29 Te waŋnda haa vi pɛ mɛɛ waŋnda chieeya a tuaa kpou wu yɛ, nduyɛ te nyɛpalaa cho nda komallo wa pɛ nyɛ pilɛ a o komal waŋnda chieeya kpou wo, mɛɛ o cho Chɛhowa le vem ya le.+ 30 Kɛ te Chɛhowa tosa pɛ suɛi kɔndɔfille a nda mi lɛŋndeŋ le kumbiŋ* mi le mel nda a nyɛ o nyɛ nda nɔ, okoŋ ma tol o Sɛiyo* niŋ yoomu, la cho sina kpendekele maa puaa haa ke Chɛhowa lebɛɛ kposoŋ te.”
31 Dimioo nuaa mi Muuse chii diomndaŋ ndaŋ kpou dimi, mi lɛŋnde nda wa isisi choo leŋ le tɛnda kpala.+ 32 Mi lɛŋndeŋ le kumbiŋ,* mi le mial nda, yuŋgula ndalaŋ, wana o wana wa Kolua tooloo,+ vɛlɛ a nyɛm ndaŋ kpou. 33 Nda kpou lo yoomu, ma tual o Sɛiyo* niŋ, nduyɛ mi lɛŋndeŋ le kumbu nda kpu. Le hei, mi nda kpou sɔla tambei kunda Isɔluɛiya tɛɛŋ.+ 34 Mɛɛ Isɔluɛiyaa wa loŋ nda tuei nda chaŋndo, mi siooŋnde bii nda ma nyaanuŋ. Ma wa dimioo aa: “Ŋ yeema mi lɛŋndeŋ le mel naa le!” 35 Okoŋ mi Chɛhowa yɔŋ yiŋndeŋ,+ mi le luam puaa 250 wa nyɛm chuŋ kɛndɔŋ lomɔɔ wa.+
36 Mi Chɛhowa dimul Muuse aa: 37 “Dimul Ɛlieesa, po Elɔŋ wana soliaa lasalaa, mbo sooluu nyɛla chuaa leyiŋndaŋ+ o yiŋ, kanifuule nyɛm cho ŋ diandaa woŋ ŋ cho ni. Dimul ndu vɛlɛ le mbo sɛŋi dɛŋgultaŋ tiŋ landaŋ. 38 La chua nyɛla chuaa leyiŋnda puaa sɔla haa piɔmndo le haki ndaa wa, mi la toosiaa laŋ kpaŋkpaŋndaŋ, nduyɛ mi la holi holi laŋ o bandu luamaa lasalaa.+ Kanifuule ya Chɛhowa nda ke muŋ ni, miŋ simnuŋ ŋ diandaa. Nyɔɔŋ muŋ cho wa maa tamasi le Isɔluɛiya.”+ 39 Okoŋ kɔɔli, mi Ɛlieesa wana soliaa lasalaa chua nyɛla chuaa leyiŋnda puaa vi o yiŋndeŋ niŋnda hiŋ ndaŋ, mbo toosiaa laŋ kpaŋkpaŋndaŋ le mbo holi holi o bandu luamaa lasalaa. Nduyɛ, a chiliŋii siaŋɛi* nda toosiaa laŋ ni. 40 Mbo tosa mɛɛ Chɛhowa dimul ndu sanaa a Muuse yɛ. Hei wa le Isɔluɛiya loonɔŋndo maa, te o cho mi waŋndo fula o pulale Elɔŋ ndeŋ choo le, wana o wana cheleŋ* nɔ mbo sɔɔŋguu mbo lom nyɛm chuŋ kɛndɔŋ Chɛhowa lachi le.+ Nduyɛ maa wana o wana nɔ mbo wa maa Kolua a wanaa wa ndu tooloo wa le.+
41 Dimioo nuaa paaleŋ le sɛ diimandɔɔ, mi Isɔluɛiya kpou huŋ chiŋalaŋ Muuse nda Elɔŋ.+ Ma wa dimioo aa: “Nya ŋiɔɔŋnda haa diu diu wanaa Chɛhowa wa ni.” 42 Mɛɛ Isɔluɛiya chuuŋgiaŋ naapilɛ le Muuse nda Elɔŋ chiŋalaŋndo, ma muliŋ o tɛndii bɔŋaŋndo. Okoŋ ma cha mi yumbu yumboo kumbu tɛndiiyo kpu, nduyɛ mi paŋgele Chɛhowa wo fula.+
43 Mi Muuse nda Elɔŋ sɔɔŋguu o tɛndii bɔŋaŋndo.+ 44 Okoŋ mi Chɛhowa dimul Muuse aa: 45 “La fula waŋnda haa tɛɛŋ le mi tɛɛmbuu nda o le pilɛ niŋ kpe.”+ Le hei, ma baŋ wulaŋ, nduyɛ ma fuuluu hɔlla lɛŋ.+ 46 Mi Muuse dimul Elɔŋ aa: “Chua nyɛ chuaa leyiŋndo, ma chua yiŋndeŋ o bandu luamaa lasalaa+ ma wou leniŋ, nduyɛ ma handu nyɛm chuŋ kɛndɔŋ lechoo. Okoŋ, ma kuɛ chɔ chɔ naa waŋnda cho wa, ma soli sala malɔɔ lahakioo le nda.+ Kanifuule, Chɛhowa dɔɔnuŋ tumbe o kala kala. Naa wɔɔŋndo kandu waŋnda diuwo!” 47 O le pilɛ niŋ kpe, mi Elɔŋ chua nyɛ chuaa leyiŋndo a mɛɛ Muuse dimul ndu yɛ, mbo nyaanuŋ kunda Isɔluɛiya tɛɛŋ. Nduyɛ, naa wɔɔŋndo ndoo kandu niŋ waŋnda diuwo. Okoŋ, mbo wou nyɛm chuŋ kɛndɔŋ o nyɛ chuaa leyiŋndo niŋ, mbo soli sala malɔɔ lahakioo le waŋnda. 48 O wa isisi waŋ vilɛiya a wanaa cho yoomu wa tɛɛŋ, okoŋ mi naa wɔɔŋndo pɔlul. 49 O faŋaŋndɔ o wanaa vi le haki Kolua wo wa kɔɔli, wanaa naa wɔɔŋndo dii ya, a wa kpou kpou 14,700. 50 Teleŋ Elɔŋ miiŋgu naa Muuse chua o tɛndii bɔŋaŋndo sondoo wo, naa wɔɔŋndo ndoo chuu niŋ.