Walta Kiilaa
22 “Puaapiliaa niaa, finyaa niaa, la yaŋ nilaŋ mi tɛɛsial nya nyɛ yɔŋnuŋndo.”+ 2 Mɛɛ nda tuei ndu suɛi o nda lo o Hibuluiye niŋ, mi nda kpou chɔɔlu mei doŋ doŋ. Mbo dimi aa: 3 “Chuunɔɔ ya cho ni.+ Nduyɛ Taasɔɔ ya veluŋ ni, o lɛŋnde Siliisiaa leŋ niŋ.+ Mi sɔla pɛɛkoo o chioo hoo niŋ Kameliɛɛ o ba.+ Mi pɛɛku le Sawala Mɛlɛka ke Muuse laŋ tolɔɔ kɔɔli nyɛkɛndɛi.+ Nduyɛ I nɔ sɛmbɔɔ le wali Mɛlɛkaa mɛɛ nya kpou nɔ ndu paale hauleŋ ndeŋ yɛ.+ 4 Wanaa tol Nɛi Tonyaa kɔɔli wa, mi tusi nda nyɛpalaa choo haaa mi apum sɔla piɔmndo. Wana pɔnɔ ni, wana lanɔ ni, yiiyo nda, mi kuɛ a nda o chiɛila manyumndaŋ niŋ.+ 5 Nduyɛ wana bɛndu wanaa soliaa lasalaa, a kunda laŋgbaa kalla kpou cho lesei. Mi sɔla yaulaŋ nda o ba le kɔlaŋ puaapiliaa Damasikɔɔ biyɔɔ, mi yii nda, mi hiŋ a nda Chulusalɛm le miŋ tusi nda nyɛpalaa choo.
6 “Kɛ mɛɛ ya wa kɔlaŋ mi sɔɔŋguu Damasikɔɔ ikɛi, a teleŋ paaleŋ le sim o bolleŋ choo wo, o lepilɛ niŋ kpe, mi paŋgele bɛndoo fula o choo choo niŋ, mbo tiu ya choo silɔ.+ 7 Mi del lɛŋ. Mi tuɛi mi diomndo suaa o ya lo aa: ‘Sɔɔ, Sɔɔ, le yɛɛnɛ ŋ cho yɛ ya nyɛpalaa tusioo choo?’ 8 Mi nyuna aa: ‘Num nɛɛnɛ?’ Mbo mulul la aa: ‘Ya ni, Chiisu fula Naasaluɛiyo, wana ŋ cho nyɛpalaa tusioo choo wo.’ 9 Mi puaa wa kɔlaŋ a ya latulu wa cha paŋgeloo, kɛ a tui diom wana wa suɛiyo le. 10 Okoŋ mi nyuna aa: ‘Yɛɛnɛ ya nɔ yɛ mi tosa Masanɔɔ?’ Mi Masanɔɔ dimul la aa: ‘Chɔŋ ma hel Damasikɔɔ. Loŋ nda cho num lakɔ dimul sɔɔŋ cho ŋ kɛɛsiaa le ma tosa woŋ ni.’+ 11 Kɛ mi paŋgele bɛndoo hoo tosa I ve lɛ nyɛ o nyɛ chɔ le. Mi wanaa wa a ya latulu wa saa ya baa miŋ fuuluu Damasikɔɔ.
12 “Po pilɛ wa loŋ diolaŋ aa Ananaaya. Ndoo nɔ siooŋii Mɛlɛkɛi, nduyɛ mi ndoo bii Sawala Mɛlɛka ke Muuse laŋ. Chuuwaa wa loŋ nda kpou mi ndaa dimi sɔɔŋ kɛndɔŋ a ndu okɔɔ. 13 Mbo huŋ naa ya chua, mbo sim ya ikɛi mbo dimi aa: ‘Sɔɔ, puaapilɛnɔ nuu, kandu vɛlɛ chɔɔ!’ O foofo koŋ choo, mi heelu hɔlla mi cha ndu.+ 14 Mbo dimi aa: ‘Mɛlɛka finyaa naa mamaa hɛli num le ma sina nyɛ cho hɛnaŋ ndɔɔ wo, ma che wana cho sakpo wo,+ nduyɛ ma tuei nyɛ o cho dimi wo. 15 Kanifuule, a cho waŋnda kpou dimul sɔɔŋ ŋ tuei a ndu okɔɔ, nduyɛ ma cha woŋ.+ 16 Yɛɛnɛ ŋ cho yɛ chumndo? Chɔŋ ma sɔla yiŋɔɔ, nduyɛ ma veelu diola Chiisu laŋ+ le ma sɔla malɔɔ hakioo le hakila numndaŋ.’+
17 “Kɛ mɛɛ ya miiŋgu Chulusalɛm,+ I wa piɛileŋ o chiɛi Mɛlɛkaa niŋ, mi cha yilaŋnde. 18 Mi cha Chiisu, mbo dimul la aa: ‘Faŋaŋ Chulusalɛm chɔ chɔ, kanifuule a chɛl niŋ nyɛ ŋ cho nda dimul a ya okɔɔ wo le.’+ 19 Mi dimi aa: ‘Masanɔɔ, ndapila sina walaŋ maa mi yaa dɔu wanaa laalaŋ o num niŋnda o chiɛi manyumndo niŋ, nduyɛ mi yaa lɔɔ nda o chiɛila Chuuwa piɛi Mɛlɛka laŋ niŋ.+ 20 Boondii nda wa buɛi numndo Stiiviŋ diyɔɔ ve, I wa isisi loŋ, mi chɛl o kɔl niŋ nduyɛ mi biilul wanaa wa ndu diyɔɔ wa domala ndalaŋ.’+ 21 Kɛ mbo dimul la aa: ‘Kɔ, kanifuule I cho num viomɔɔ landaŋ o wanaa cho ŋChuu le wa lo.’”+
22 Ma lo ndu nilaŋ yaŋɔɔ haaa mbo dimi diomndaŋ ndaŋ. Okoŋ ma deŋi choo choo aa: “La dii poo hoo. O bɛnda mbo wa yoomu le!” 23 Le mɛɛ nda wa deŋioo choo choo, ma sooluu domala ndalaŋ, nduyɛ ma wa chundoo wuuwo choo choo yɛ,+ 24 mi wana cho puaa chɔuwa bolleŋ ndo dimi maa a kɔ a Pɔɔl o fondaŋ puaa chɔuwa. Mbo dimi maa a lo ndu lɔɔ haaa mbo chɔm le sabu kpeekpei waŋnda cho ndu deŋioo choo wo. 25 Kɛ mɛɛ nda yii Pɔɔl ma soli ndu o bɛɛ le ndu lɔɔ, mbo nyuna wana cho puaa chɔuwa bolleŋ ndo, o wa isisi loŋ ndo aa: “A nɔ pa di ma lɔɔ Luomaŋnɔɔ,* o nda kilul lɔ iyama le wo?”+ 26 Mɛɛ wana bɛndu puaa chɔuwa tuei hei, mbo kua o wana cho puaa chɔuwa bolleŋ ndo lo, mbo dimul ndu aa: “Luomaŋnɔɔ poo hoo cho ni. Yɛɛnɛ ŋ cho yɛ niko tosa?” 27 Mi wana cho puaa chɔuwa bolleŋ ndo kua naa Pɔɔl chua mbo nyuna ndu aa: “Luomaŋnɔɔ ŋ cho ni?” Mbo muli aa: “Ei.” 28 Mi wana cho puaa chɔuwa bolleŋ ndo dimi aa: “Kanioŋ* pila ya pisi ni le mi simnuŋ pilachioo Luom.” Mi Pɔɔl dimi aa: “Kɛ ya Luomaŋnɔɔ ya veluŋ ni.”+
29 O lepilɛ niŋ kpe, mi puaa ndaa hiŋ le ma lo ndu lɔɔ haaa mi ndoo soo wa faŋaŋ ndu kɔɔli. Mɛɛ wana cho puaa chɔuwa bolleŋ ndo sina maa Luomaŋnɔɔ Pɔɔl cho ni, mi siooŋnde bii ndu le mɛɛ o yii ndu a yɔlɔŋ yɛ.+
30 Diimandɔɔ, le mɛɛ ndoo yeema sinaa kɛsɛ le sabu Chuuwa hɛɛnduu ndu sɔɔŋ choo wo yɛ, mbo timbi ndu. Mbo chuuŋgiaa masaa wanaa soliaa lasalaa, a Laŋgbaa Kalaa Kialu Yamaŋ Nda kpou naapilɛ. Okoŋ mbo soli Pɔɔl, mbo simi ndu nda tɛɛŋ.+