Timoti Tasoo

1 Ya Pɔɔl, kiilanɔɔ le Chiisu Kiliti cho yauwo hoo poonyiaa ni. Mɛlɛka Piŋi naa wo, nda Chiisu Kiliti tosa miŋ nɔ tiindaŋndo wo hɛli ya ni.+ 2 I cho ndu poonyiaa naa num Timoti*+ chua, po ni kpeekpeiyo+ o wali Masanɔ naa niŋ:

Maa Mɛlɛka Finya naa nda Masanɔɔ Chiisu Kiliti tuiinuŋ num inyiɛɛ, ma ke num kɔl nyuloo, nduyɛ ma tosal num kɛndɛi ndɛi bɛnduei fɔ!

3 Boondii ya wa kɔlaŋ Masidooniaa ve, mi dɛɛniaa num le ma lo Ɛfisɔɔ. Lelaŋ, I cho num vɛlɛ dimullo le ma lo loŋ, okoŋ ma kpaa wanaa cho pɛɛkula lachoowalaŋ nda. 4 Dimul nda maa a yaŋ lani o bundɔŋ lachoowaŋ,+ a wanaa chɔm diola wanaa masindiaa o lepula wa le. Tɔnɔ o tɔnɔ cho o sɔɔŋ waa lende niŋ te.+ Nduyɛ muŋ huŋ a diomnda hiŋaŋndaŋ ni. Ŋ cho o sɔɔŋ Mɛlɛka ke naa le laalaŋ naa kindioo woŋ tɛɛŋ te. 5 Sabu ya cho silalaŋ ndaŋ yɔŋgoo wo cho ni maa, le miŋ kaaliaŋ vellaa velle+ a kɔllo kpou, vɛlɛ a kɔl iyama walaŋndo. Kaalaa hoo nɔ mbo wa kaala mulu muluaŋ te, kɛ o nɔ mbo tɔlnuŋ o laalaŋndo choo.+ 6 Sɔɔŋ muŋ waŋnda apum mal tosaa ni, ma wou balaŋ o sɔɔŋ fondoŋ dimioo niŋ.+ 7 A yeema ma wa wanaa pɛɛku waŋnda sawala Mɛlɛkalaŋ nda,+ kɛ sɔɔŋ nda dimi woŋ, a sɔɔŋ nda baŋ maa a sina woŋ, a bii muŋ pɛŋ bila le.

8 Ŋ sina maa Sawaa* cho nyɛkɛndɛ, kɛ mɛɛ mi wana bii ndu nyɛkɛndɛi. 9 Ŋ sina vɛlɛ maa o cho le wanaa sandaa le sawaa cho le, kɛ le wanaa dɛnɛ wɔɔŋnda,+ wanaa nilakaluaa, wanaa sina Mɛlɛka le wa, wanaa lahakiaa, wanaa kɛɛ lo lechoo wo chɔmndo wa, wanaa tosa sɔɔŋ nɔɔlɛiyoŋ nda, wanaa diu finyaa ndaa ɔɔ kalaa ndaa wa, wanaa diu wanaa cheleŋnda wa, 10 wanaa kaa ihini nɔɔlɛiya,* waŋ piaanduaa hini a chaaŋaa ndaa waŋ piaanduaa wa, wanaa biyaa, wanaa lachoowaa, wanaa lo o lediom te wa, vɛlɛ a nyɛ o nyɛ cheleŋ simul pɛɛku tonyaa.+ 11 Pɛɛkoo hoo tɔlnuŋ o yooŋgu kɛndɛ bɛndu fula Mɛlɛka kɔl kɛndɔɔ o ba wo choo. Ndu ke ya yooŋgoo hoo ni le dimioo.+

12 I mel Masanɔ naa Chiisu Kiliti balikaa, o ke ya kpaayaa le wallo hoo tosaa wo. Kanifuule, o laalaŋ ya maa I nɔla mi tosa ndu.+ 13 Mi che bɛɛ I wa paandu diola Mɛlɛkalaŋ tɛɛmbuuwo, mi wa wanaa nduaa nyɛpalaa tusioo choo, nduyɛ mi wa suɛi o nda lo o yoŋgaa niŋ,+ kɛ mbo tuiinuŋ ya inyiɛɛ. Kanifuule, le sina lepɛŋndo a laalaŋ lepɛŋndo ya wa sɔɔŋ muŋ tosaa ni. 14 Kɛ mi Masanɔ naa tosal la kɛndɛi bɛnduii hiou kpou ve, mi Chiisu Kiliti chɔm ya kaalaa, okoŋ mi duau laalaŋndo o ndu niŋ. 15 Suɛi dimiŋ hei ve cho tonya, nduyɛ waŋnda kpou nɔ ma chɛl ndi: Chiisu Kiliti hiŋ o chieeŋndo niŋ le wanaa lahakiaa piŋioo.+ O waŋnda haa tɛɛŋ, ya hiou hakioo kɔndɔŋ.+ 16 Kɛ a koŋ kpou, mi Chiisu Kiliti biunuŋ ya. Nduyɛ mbo tuiinuŋ ya inyiɛɛ le mi wa maa tamasi, le wanaa dɔu laalaŋndo o ndu niŋ le hunɔɔ yoomu fafɛɛŋndo sɔlaa wa.+

17 Maa Masa cho le fɛɛŋ a fɛɛŋndo,+ o vi le wo,+ o wana chi le wo,+ Mɛlɛka tonyaa ndupilɛ kpe,+ o sɔla bɛɛleŋ a biiloo le fɛɛŋ a fɛɛŋ fɔ! Amiina.*

18 I cho num silaa po nuu Timoti. Silaa hoo chɛlaŋ a sɔɔŋ wanaa ndaa suaa le Mɛlɛka wa dimi paandu a num okɔɔ woŋ. Sɔɔŋ muŋ cho num mala le ma hiou lachi a chɔulabaa o nɛi bɛnda wo choo,+ 19 ma lo o laalaŋndo choo, nduyɛ ma nɔ kɔl iyama walaŋndo.+ Apum mal kɔl iyamaa hoo. Mi hei tosa mi laalaŋ ndaa lo pɛ mɛɛ dɛndɔɔ kɔɔlu nuaa yɛ. 20 Hamaniyɔɔsi+ nda Alɛkisanda cho waŋnda haa tɛɛŋ. Nduyɛ I mal nda Setana o ba+ le ma sɔla silaa yɔŋii nda tɛɛmbuu diola Mɛlɛkalaŋ.