Chemisi
3 Puaapiliaa niaa, o cho nya kpou le nɔ mi la simnuŋ wanaa pɛɛkaa le. Kanifuule, naŋ cho waŋnda pɛɛkoo wa Mɛlɛka hiau niŋ yamɛi kilul.+ 2 Naa kpou, miŋ benduŋ* teleŋnda bɔɔbɔɔ.+ Te wana o wana binduŋ a sondo le, mɛɛ wana walaŋndo o cho ni. Nduyɛ, o nɔla vɛlɛ mbo manda dialuŋ ndɔŋ kpou. 3 Te ŋ wou pɛ suaa chiliŋuŋ pɔmbɔŋ o lasondo le nda mulioo ba naŋ yeema wo, mɛɛ dialuŋ ndaŋ kpou naŋ cho mulioo ni. 4 La yiyaŋndɔ vɛlɛ a dɛndɛla mamɛŋndaŋ okɔɔ. Mi che bɛɛ la cho la bɛndu bɛndu, nduyɛ hueiyii fuku fukuei kua a laŋ nyindɔɔ ni, kɛ nyɛ pɔmbɔɔ opum kinɛi wanaa kua a laŋ nda soliŋ kpeku ni le laŋ yɔɔ naa nda yeema wa.
5 Lende koni i cho a diɔɔmuleŋ ni. Dialii pɔmbuɛi le cho o dialloŋ niŋ ni, kɛ yoŋgaa pila le kialu ni. Tɛŋgɛ tɛŋgɔɔ nɔla mbo lom yondo bɛndoo, lende le? 6 Diɔɔmuleŋ bɛɛ yiŋndeŋ le cho ni.+ O dialuŋ wanachioo niŋ kpou, diɔɔmuleŋ le hiou wɔu. Kanifuule, mi le nɔɔliaa dialloŋ kpou,+ nduyɛ mi le mal yoomu wanachioo kpou o yiŋ. Yiŋnde ndɔleŋ yɛ, Kɛhɛna* le fula ni. 7 Wanachioo nɔla mbo manda visi o visi, chɔŋ a visiaa yonduaa, youwa, nyaa yoomaa kua o demboo choo wa, mbo kɔ bii a nyaa yoomaa cho o peelo wa. 8 Kɛ wana o wana nɔla diɔɔmuleŋ manda le. Wana nɔla leŋ kpaandiaŋ te. Le cho nyɛ dɛnɛ wɔɔŋ bɛndu. Lolo ndɔɔ nɔla mbo dii wanachioo pɛ.+ 9 A leŋ naŋ saŋgala Finya naa Chɛhowa* ni. A leŋ koni naŋ mɛna vɛlɛ waŋnda chieeyaa “Mɛlɛka toosiaa o velaŋ ndɔɔ niŋnda” ni.+ 10 Sondo naŋ saŋgala Mɛlɛka wo, a ndu koni naŋ mɛna ni.
Puaapiliaa niaa, sɔɔŋ waa nuaa nɔ miŋ yɔŋnuŋ te.+ 11 Mɛŋma kɛndiaŋ, a ma wɔɔŋndaŋ ma fula o tɛɛŋgu pilɔɔ niŋ te, lende le? 12 Puaapiliaa niaa, yɔm mafikiiyo kum ɔlifiiyaŋ ɔɔ kilepiiyaŋ te, lende le?+ Nduyɛ, pee mɛŋma ihɛllo nɔla mbo soli mɛŋma kolaŋ te.
13 Nɛɛnɛ nɔ yɛ taasioo a sinapɛŋgoo nya tɛɛŋ? Wana koŋ chɔmndɔ a kaala ndɔla kɛndɛlaŋ maa o nɔ taasioo a tusiŋndo o sɔɔŋ o tosa woŋ niŋ. 14 Kɛ te paŋaliaŋndaŋ+ a sɛɛŋgiaŋndaŋ+ la wa nya pɛ o lakɔl, mɛɛ la nɔ mi la wa yoŋgaa kiolɔɔ,+ nduyɛ mi la dimi choolaŋ a tonyaa okɔɔ le. 15 O cho taasi chɛŋ o choo choo niŋndo le cho koŋ te. Kɛ taasi chieeŋndo,+ taasi ivisiyaa, a taasi nyinaa wɔɔŋnda o cho ni. 16 Kanifuule, naa paŋaliaŋndaŋ a sɛɛŋgiaŋndaŋ la wa pɛ, dɛnɛ laasiɛiyo a sɔɔŋ wɔɔŋndoŋ wa loŋ ni.+
17 Kɛ taasi chɛŋ o choo choo niŋndo tosa mi waŋndo wa o diandaa,+ mbo nɔ kɔl nyuloo,+ o kindu isɔɔ dimul te,+ mbo wa o bɛɛndiaŋ le diikɔŋndo, mbo nɔ nyiɛɛye tau, mbo tosa sɔɔŋ kɛndɔŋ,+ o hɛli le,+ nduyɛ o mulu muluŋ te.+ 18 Wanaa luei kɔl nyuloo waŋnda tɛɛŋ nda, kɔl nyuloo nda wa koŋ saŋɔɔ ni.+ Nduyɛ nyɛ cho sakpo wo nda cho koŋ tosaa ni.+