Luku

23 Mi waŋnda faŋga bɛndoo chaŋ ma kua a Chiisu o Paile lo.+ 2 Okoŋ ma kandu ndu sɔɔŋ hɛɛnduuwo choo+ aa: “Ŋ saaluŋ poo hoo sɔɔŋ mɛlioo o lɛŋnde naaleŋ niŋ, mbo kuuna waŋnda paawaa* malɔɔ le Siisa.+ Nduyɛ o dimi vɛlɛ maa ndu cho masaa Kiliti ni.”+ 3 Okoŋ mi Paile nyuna ndu aa: “Num cho Masa Chuuwa ni?” Mi Chiisu muli aa: “Numpila chii dimi.”+ 4 Okoŋ mi Paile dimul masaa wanaa soliaa lasalaa a faŋgaa aa: “I chi suɛi wɔɔŋ kɛ kɛ poo hoo tosa le.”+ 5 Kɛ ma lambaŋ dimioo aa: “O cho waŋnda bolle kindioo o Chudiaa niŋ kpou a sɔɔŋ o cho nda pɛɛkoo woŋ, chɔŋ Kalili haaa mbo fuuluu nanuŋ.” 6 Mɛɛ Paile tuei hei, mbo nyuna te Kaliliaŋnɔɔ Chiisu wa ni. 7 Mɛɛ o sina maa o tanda Hɛlɔɔ+ wa masaa choo wo niŋ Chiisu fula ni, mbo miŋgi ndu o Hɛlɔɔ lo. Nduyɛ Hɛlɔɔ bɛɛ wa Chulusalɛm a teleŋ koŋ.

8 Mɛɛ Hɛlɔɔ che Chiisu, mbo naŋ kɔl tau, kanifuule le teleŋ vilɛi o wa a yeemɛi le Chiisu chɔɔ. Ndoo tuei niŋ sɔɔŋ tau a ndu okɔɔ,+ nduyɛ ndoo yeema mi Chiisu tosa kaamaa ndu o hɔl. 9 Okoŋ mbo kandu ndu nyuuniaalaŋ. Kɛ Chiisu muli nyɛ o nyɛ le.+ 10 Mi masaa wanaa soliaa lasalaa, a wanaa pɛɛku waŋnda sawala Mɛlɛkalaŋ nda wa simndaŋ, nduyɛ ma wa ndu sɔɔŋ wɔɔŋndoŋ hɛɛnduuwo choo a tumboo. 11 Mi Hɛlɔɔ nda puaa nduaa chɔuwa tɛɛmbuu ndu labɛɛ,+ ma mam ndu,+ nduyɛ ma wou ndu doma kɛndɛ bɛndoo, okoŋ ma miŋgi ndu pila o Paile lo. 12 O paale leŋ choo, mi Hɛlɔɔ nda Paile naaŋaŋ, kanifuule yaamɔɔleŋ le wa nda paandu tɛɛŋ.

13 Okoŋ mi Paile veelu masaa wanaa soliaa lasalaa, masaa waa, vɛlɛ a waŋnda. 14 Mbo dimul nda aa: “La chuu ya poo hoo mi la dimi maa o cho waŋnda bolle kindioo. I nyuuniaa ndu nya o hɔl, kɛ sɔɔŋ nya hɛɛnduu ndu muŋ choo woŋ kinɛi, I chi suɛi wɔɔŋ kɛ kɛ o tosa le.+ 15 Hɛlɔɔ bɛɛ chi suɛi wɔɔŋ o tosa ve le, nyɛ koŋ pɛŋ o miŋgi ndu o naa lo ni. Lelaŋ, poo hoo tɛɛmbuu suɛi o sɔla piɔm te. 16 Le hei, I cho ndu lɔɔ,+ mi mal ndu.” 17* —— 18 Kɛ mi faŋgaa kpou deŋi choo choo aa: “Dii poo hoo, ma mel naa Baluabaa!”+ 19 (Le mɛɛ Baluabaa ndoo dii, nduyɛ mbo simul masaleŋ o chioo niŋ yɛ ndaa dɔu ndu o chiɛi manyumndo niŋ ni.) 20 Paile ndoo yeema mbo mal Chiisu. Le hei, mbo suaa vɛlɛ o nda lo.+ 21 Kɛ ma kandu vɛlɛ deŋioo aa: “Dii ndu o yɔmndo choo! Dii ndu o yɔmndo choo!”+ 22 Mi Paile nyuna nda vɛlɛ bɛmbɛ yaa ndɔɔ aa: “Le yɛɛ? Suɛi wɔɔŋ kuɛɛ poo hoo tosa yɛ? I chi suɛi wɔɔŋ o tosa le mbo sɔla piɔm le ndi le. Le hei, I cho ndu lɔɔ, mi mal ndu.” 23 Kɛ ma hiau lachi a deŋioo choo choo kpeleŋ maa o nɔ mbo sɔla piɔmndo o yɔmndo choo. A lo deŋioo haaa mi Paile chɛl nda diom.+ 24 Okoŋ mbo kɛɛsiaa le tosaa nyɛ nda yeema wo. 25 Mbo mal po nda yeema mbo mal lo, o nda dɔu o chiɛi manyumndo niŋ le mɛɛ ndoo dii, nduyɛ mbo simul masaleŋ yɛ. Okoŋ mbo mal Chiisu nda o ba le ma tosa hɛnaŋ ndaa.

26 Mɛɛ nda wa kɔlaŋ a ndu, ma bii po waa Sailuini diolaŋ aa Saimɔŋ. O wa fulaa o chiɔɔŋ niŋ. Ma ke ndu yɔm imɔnɔ* nda wa kɔlaŋ Chiisu diyɔɔ choo wo le mbo kuɛ a ndu Chiisu kɔɔli.+ 27 Waŋnda faŋga bɛndoo wa ndu kɔlaŋ kɔɔli. Waŋ laanduaa wa nda tɛɛŋ ma wa kɔlaŋ a yeelaŋ choo choo kpeleŋ a mɔnɛi biyɔɔ le ndu. 28 Mi Chiisu muliŋ naa waŋ laanduaa kaŋ chua, mbo dimul nda aa: “Waŋ laanduaa Chulusalɛm, la pɛŋgi chaŋndo le ya. La chaŋ le nyapila a chuauwaa nyaa.+ 29 Kanifuule, teleŋ cho fuuluu mi waŋnda dimi aa, ‘Kɔl kɛndɔɔ cho le waŋ laanduaa nɔ ŋchuau le wa, waŋ laanduaa vilu ŋchuau le wa, a waŋ laanduaa wɛsi le wa!’+ 30 Okoŋ ma kandu pembuŋ bɛndoŋ dimullo aa, ‘Del naa choo!’ Ma dimul vɛlɛ pembuŋ pɔmbɔŋ aa, ‘Kuumbuŋ naa choo!’+ 31 Te a tosa wɔ pɛ nuaa a yɔm kiyɛiyo, vɛɛ kpeekpei i wa yɛ niŋ te o huŋ vesa pɛ?”

32 A wa vɛlɛ kɔlaŋ a puaa viiya a ŋiɔɔŋ le ma kɔ dii nda latulu a Chiisu.+ 33 Mɛɛ nda fuuluu o fondaŋ nda veelu aa fondaŋ Lakpokpoo wo,+ ma baŋ ndu o yɔmndo choo loŋ viiyaa ŋiɔɔŋaa kaŋ tɛɛŋ. Hoo wa o ba ndɔ kɛndɔɔ choo, o pilɔɔ wa o ba ndɔ miallo choo.+ 34 Kɛ Chiisu wa dimioo aa: “Kɛkɛ, mal nda haki, kanifuule a sina nyɛ nda cho tosaa wo le.” Okoŋ, ma wuu kooŋ le ma piɔuviaŋ nyɛla ndɔlaŋ.+ 35 Nduyɛ mi waŋnda sim ndu tofaa. Kɛ masaa waa wa ndu mamɔɔ ma dimi aa: “Chaanda o nɔla piŋioo ni. Te ndu cho Kiliti, Wana Mɛlɛka Hɛli Wo ni, mɛɛ o piŋi wɔ niko ndupila.”+ 36 Puaa chɔuwa bɛɛ wa ndu mamɔɔ. Ma ke ndu muɛima waalɛiyaŋ,+ 37 ma dimi aa: “Te num cho Masa Chuuwa ni, mɛɛ piŋi wɔ numpila.” 38 Ma handu ndu poonyiaa o bolleŋ choo aa, “Masa Chuuwa cho hoo ni.”+

39 Mi viyaa nda baŋ kaŋ o yɔmndo choo wa o pilɛ kandu ndu yioulaŋ.+ Mbo wa dimioo aa: “Num cho Kiliti ni, lende le? Mɛɛ piŋi wɔ numpila, okoŋ ma piŋi naa!” 40 Mi o pilɔɔ kpaa ndu, mbo dimul ndu aa: “Baa a nɔ isiooŋ le Mɛlɛka le mɛɛ nda kilul num yamɛi pilɛi kpe nya poo hoo yɛ le? 41 Dɛnɛ wɔɔŋ naŋ tosa wo, paawa* ndɔɔ naŋ cho hoo sɔlaa ni. Kɛ poo hoo ndu tosa nyɛ o nyɛ wɔɔŋ te.” 42 Okoŋ mbo dimi aa: “Chiisu, loonuŋ a ya teleŋ ŋ cho hunɔɔ wa o masale numndeŋ niŋndo.”+ 43 Mi Chiisu dimul ndu aa: “A tonya mi dimul num hau, a cho hunɔɔ wa a ya latulu o Kpele Hɛnɛkiɔɔ niŋ.”+

44 O wa niŋ a lɔɔ 12:00 ipalaa,* mi nyumndaŋ ma tual kpiŋgbi o lɛŋnde leŋ niŋ kpou haaa a lɔɔ 3:00 ipalaa,*+ 45 kanifuule mi paaleŋ le kɛɛ le fulaa. Mi kola bɛndu wa o landaa o chiɛi Mɛlɛkaa niŋndo+ bɛɛ tɛnda tɛɛŋ kpala.+ 46 Okoŋ, mi Chiisu deŋi choo choo kpeleŋ aa: “Kɛkɛ, I mal num yoomu nuu* o ba.”+ Mɛɛ o dimi lende, mbo malnuŋ kɔl.*+ 47 Mɛɛ wana bɛndu puaa chɔuwa che nyɛ yɔŋnuŋ ndo, mbo kandu Mɛlɛka saŋgalaa. Mbo dimi aa: “A tonya, wana sakpoo poo hoo wa ni.”+ 48 Mɛɛ wanaa hiŋ loŋ le tofaa wa kpou che nyɛ yɔŋnuŋ ndo, ma miiŋgu o la nda lo ma luaa takpalaŋ a mɔnɛi. 49 Wanaa ndaa sina Chiisu wa kpou, a waŋ laanduaa ndaa fula Kalili ma tual ndu kɔɔli wa, a wa isisi kɔɔli kɔɔli ma cha nyɛ o nyɛ wa yɔŋnɔŋndo.+

50 Po pilɛ wa diolaŋ aa Choosɛ. O wa waŋndo o pilɛ o Kunda Kialaa Ŋyamaa choo. O wa wana kɛndɛ, nduyɛ o wa sakpo.+ 51 (Poo hoo toolu kɛɛsiaa nda wa tosaa le Chiisu diyɔɔ wo le.) Alimatiaa ndoo fula ni, chiee bɛndoo o Chudiaa niŋ. O wa chumndo le Masale Mɛlɛkaleŋ. 52 Mbo kɔ nyuna Paile le dialuŋ Chiisu woŋ. 53 Okoŋ mbo kɔ tusi dialuŋ ndɔŋ,+ mbo simbul muŋ o feŋgbɛ kɛndɛ kɛndɔɔ niŋ. Mbo kɔ yambu muŋ o sɛi* nda tou o pouwo niŋndo.+ Ndaa kumbu wɔ wana o wana leniŋ te. 54 Nduyɛ waŋnda wa bɛɛndiaŋndo+ le Paale Pɛŋgiaaleŋ+ diimandɔɔ. 55 Kɛ mi waŋ laanduaa ndaa fula Kalili ma tual ndu kɔɔli wa huŋ tofa o sɛiyo* niŋ, ma cha mɛɛ nda yambu dialuŋ ndɔŋ yɛ.+ 56 Okoŋ, ma miiŋgu ma kɔ bɛɛndiaa nyɛm chuŋ kɛndɔŋ a chuɛima chuŋ kɛndiaŋ. Kɛ ma pɛŋgi o Paale Pɛŋgiaaleŋ choo+ a mɛɛ sawaa dimi yɛ.