Sɔɔŋ Chɔɔmaŋndoŋ
20 Okoŋ kɔɔli, mi cha maalikɛinɔɔ fulaa o choo choo niŋ. Kiyii kumbi sooŋ yiŋgilɛi nɔ lamɛɛlu le wo,+ a yɔlɔŋ kala kalaŋ wa ndu o ba. 2 Mbo bii tambalakaa kpau,+ kɛu paandu paandoo,+ ndu cho Setana+ a Nyina Wɔɔŋndo ni.+ Mbo duau ndu o yɔlɔŋ le wɔsilaŋ 1,000. 3 Mbo wou tambalakaa hoo o sooŋ yiŋgilɛi koŋ niŋ.+ Mɛɛ o kinda, mbo handu tamasioo lechoo, le halikpeŋ o hui lɛ ŋwaŋnda chiee le, haaa mi wɔsila 1,000 laŋ la chuu. Te la chuu pɛ, a timbi ndu le teleŋ biŋgi.+
4 Mi cha vɛlɛ kpeŋgbeila* lemasalaŋ. Ma ke wanaa wa ichali lechoo wa kpaayaa le waŋnda kɔɔsaa. Okoŋ, mi cha wanaa nda dii* le suɛi a Chiisu nda Mɛlɛka okɔɔ wa. Nda kɛɛ le visi biyaa a velaŋ ndɔɔ sooluuwo ni. Nduyɛ, a chɛl le ma handu nda pondaleŋ o ŋtendu ɔɔ o laba le.+ Ma miiŋgu yoomu, okoŋ ma simnuŋ masaa a Kiliti latulu+ le wɔsilaŋ 1,000. 5 Wanaa tasiaa miiŋgu yoomu wa cho haa ni.+ (Waŋvilɛiya a tuaa kpou+ miiŋgu yoomu le haaa mi wɔsila 1,000 laŋ la chuu.) 6 Kɔl kɛndɔɔ cho le wanaa tasiaa miiŋgu haa yoomu wa,+ nduyɛ wanaa diandaa nda cho ni. Waŋnda haa yɛ, piɔm diiŋ ndɔɔ+ nɔ lɛ nda kpaaya choo le.+ A cho simnɔŋ wanaa soliaa lasalaa+ le Mɛlɛka a Kiliti, nduyɛ ma wa masaa nda Chiisu waa le wɔsilaŋ 1,000.+
7 Te wɔsila 1,000 laŋ la chuu dɔɔ pɛ, a cho Setana soli o chiɛi manyumndo niŋ. 8 Okoŋ, o cho lakɔ ba o ba fee o lɛŋndeŋ choo, mbo hui waŋnda. Mbo chuuŋgiaa nda kpou naapilɛ le chɔuwo, waŋnda Kɔɔki a haa Makɔɔki. Waŋnda haa wa niŋ faŋgaa mɛɛ siooŋnde wa nuaa o pee mɛŋma ihɛllo kɔŋgɔ yɛ. 9 A cho lakɔ ba o ba fee o lɛŋndeŋ choo. A cho fondaŋ wanaa diandaa balɔɔ silɔ, a chiee Mɛlɛka kaala wo. Kɛ mi yiŋndeŋ le fula choo choo mi le huŋ lom nda.+ 10 Okoŋ ma wuu Setana,* o wa nda huiyo wo, o fondaŋ yiŋnde wule wule bɛndoo niŋ, naa visi biyaa,+ a wana lachoowa dimi maa le Mɛlɛka o suaa ni wo cho wa.+ Idii a ichɔl, loŋ nda cho wa o saŋgaa* niŋ ni le fɛɛŋ a fɛɛŋ.
11 Mi cha kpeŋgbei lemasa humbu bɛndoo, a wana wa ichali lechoo wo.+ Mi lɛŋndeŋ a choo choo faŋaŋ ndu o hɔl,+ wana o wana chi lɛ laŋ te. 12 Mi cha wanaa vi wa, wana bɛndu ni, wana pɔmbɔ ni. A wa isisi o kpeŋgbei lemasaa hɔlndɔ. Mi Mɛlɛka kumbi yaula simbulaa laŋ. Okoŋ kɔɔli, mbo kumbi yau simbulaa cheleŋ, yau yoomoo wa koŋ ni.+ Ma kɔɔsa wanaa vi wa a sɔɔŋ wa ŋ poonyiaa o yau koŋ niŋndoŋ, a mɛɛ kuɛɛla ndalaŋ la wa yɛ.+ 13 Mi pee mɛŋma ihɛllo yɔŋgu waŋvilɛiyaa wa leniŋ nda. Mi piɔmndo a Sɛiyo* bɛɛ yɔŋgu waŋvilɛiyaa wa o nda niŋnda. Ma kɔɔsa nda a pilɛŋ pilɛŋnda a mɛɛ kuɛɛla ndalaŋ la wa yɛ.+ 14 Ma wuu piɔmndo a Sɛiyo* o fondaŋ yiŋnde wule wule bɛndoo niŋ.+ Fondaŋ yiŋnde wule wule bɛndoo hoo+ sim le piɔm diiŋ ndɔɔ ni.+ 15 Okoŋ kɔɔli, wanaa diola ndalaŋ la ve la poonyiaa o yau yoomoo+ niŋ te wa kinɛi, ma wuu nda o fondaŋ yiŋnde wule wule bɛndoo niŋ.+