Sɔɔŋ Chɔɔmaŋndoŋ
19 Okoŋ kɔɔli, mi tuɛi nyɔɔ o choo choo niŋ naŋ chaa bɔɔluu faŋga bɛndoo ni. Ma dimi aa: “La saŋgala Chɛhowa!*+ Mɛlɛka naa piŋi waŋnda ni. Biiloo a kpaayaa cho le ndu. 2 Yamaŋ o kialu woŋ cho sakpo, nduyɛ ŋ cho tonya.+ O kilul wana lanɔ suundɛi bɛndoo hoo yamɛi. Ndu cho wana lanɔ hiŋ lɛŋndeŋ hɔlla a kaa ihini nɔɔlɛiyo* wo ni. Mɛlɛka miŋgul ndu maa le kooma buɛiyaa nduaa o diu diu wa.”+ 3 O lepilɛ niŋ kpe, ma chɔɔlu dimi aa: “La saŋgala Chɛhowa!*+ Maa kumii cho fulaa naa chuaa hoo cho ŋɔɔ wa hiou lachi a helɔɔ le fɛɛŋ a fɛɛŋ.”+
4 Mi bɛnduaa 24,+ a nyaa yoomaa hiɔɔluaa+ beŋ Mɛlɛka cho ichali o kpeŋgbei* lemasaa choo wo wulaŋ, ma piɛi ndu. Okoŋ ma dimi aa: “Amiina!* La saŋgala Chɛhowa!”*+
5 Mi diomndo fula o kpeŋgbei lemasaa, mbo dimi aa: “Nya cho chiaa Mɛlɛkaa+ mi la nɔ siooŋii nduɛi ya kpou, wana bɛndu ni, wana pɔmbɔ ni,+ la wa Mɛlɛka naa saŋgalaa.”
6 Mi tuɛi vɛlɛ bɔɔluuwo naŋ chaa faŋga bɛndoo ni. Wanaa tuei pɛ aa bal bɛndoo wa suɛi ni, nduyɛ naŋ chaa taŋndaŋ ma wa deŋioo ni. Ma dimi aa: “La saŋgala Chɛhowa,*+ kanifuule Chɛhowa,* Mɛlɛka Kpaaya Kpou Kpou Wo+ kandu Masaleŋ!+ 7 La ŋ dɔɔnuŋ nyaale miŋ wuunuŋ kpeŋjoo, kanifuule nɔ kɛsiaa Saa Fɔŋndɔɔ fuuluu, nduyɛ lanɔ o cho chuaa wo bɛɛ cho o bɛɛndiaŋ. 8 A ke chuaa hoo nyɛla humbula fo fo laŋ le mbo wounuŋ. Nyɛla humbula kɛndɛ kɛndɛlaŋ ndaŋ la sim le sɔɔŋ sakpoŋ wanaa diandaa tosa woŋ.”+
9 Mbo dimul la aa, “Poonyiaa: Kɔl kɛndɔɔ cho le wanaa nda veelu le nyɛdiaa ichɔllo dioo o nɔ kɛsiaa Saa Fɔŋndɔɔ wa.”+ Mbo dimul la vɛlɛ aa: “Diomnda tonyala Mɛlɛka laŋ la cho laŋ ni.” 10 Okoŋ, mi beŋ maalikɛinɔɔ hoo wulaŋ le ndu piɛiyo. Kɛ mbo dimul la aa: “Ɛ ɛ! Tosa keŋ te!+ Mɛlɛka ŋ nɔ ni ma piɛi!+ Mɛɛ num a puaapiliaa numnda cho chiaa, ma wa yooŋgu kɛndɔɔ dimioo a Chiisu okɔɔ yɛ,+ lende koni ya bɛɛ cho ni. Nyɛ o nyɛ wanaa suaa le Mɛlɛka wa dimi, le seileŋ timbioo a Chiisu okɔɔ o cho ni.”+
11 Mi cha mi choo choo kumbiŋ! Okoŋ, mi cha so humboo.+ Wana wa ichali lechoo wo ndoo nɔ diolaŋ aa Wana Sakpoo+ a Wana Tonyaa.+ Mbo kelu yamaŋ, nduyɛ mbo chɔulaba o nɛi sakpoo choo.+ 12 Hɔltaŋ la wa ndu naŋ chaa yeleŋ yeleŋ leyiŋndo ni.+ Mɔsilta lemasalaŋ la wa ndu o lebol tau. Diolaŋ la wa ndu la poonyiaa lekɔɔ, kɛ wana o wana ndoo sina laŋ te, mɛɛ ndupila. 13 Koowaŋ ma wa ma suwaa* o doma wa ndu lekɔɔ wo choo. Mi ndaa veelu ndu aa Diom+ Mɛlɛkaa. 14 Nduyɛ, puaa chɔuwaa cho o choo choo niŋnda wa ndu tolɔɔ kɔɔli o suaa humbuaa choo. Nda bɛɛ wa o nyɛla humbula fo fola kɛndɛ kɛndɛlaŋ niŋ. 15 Muɛi faŋii luɛiyɛi vilɛiye+ wa ndu fulaa o sondo, le mbo tɛɛmbuu kaalaŋ a ndi, nduyɛ mbo manda nda a tinda ichiliŋndo.+ Okoŋ, mbo waayiaa kilepiiyaŋ o doola kɔl tuu Mɛlɛka Kpaaya Kpou Kpou Wo niŋ.+ 16 Diolaŋ la wa la poonyiaa o doma ndɔɔ, o lɔlu ndɔɔ choo kpeekpei aa, Masa hiou masaa, a Masanɔ hiou kpaayaa kpou wo.+
17 Mi cha vɛlɛ maalikɛinɔɔ isisi o paaleŋ niŋ. Mbo veelu youwaa wa balɔɔ o choo choo niŋnda kpeleŋ aa: “La huŋ chuuŋgiaŋ le nyɛdiaa ichɔl bɛndu Mɛlɛka bɛɛndiaa wo.+ 18 La huŋ dio dialuŋ masaa, a ŋ wanaa cho puaa chɔuwa bolle wa, a ŋ laŋgbaa kalla,+ a dialuŋ suaa, a ŋ wanaa chal o nda choo wa,+ a dialuŋ wana o wana, ŋ chiaa a wanaa baŋaŋnda, wana pɔmbɔ ni, wana bɛndu ni.”
19 Okoŋ mi cha visi biyaa. Mi Masaa o lɛŋndeŋ choo, a puaa ndaa chɔuwa chuuŋgiaŋ naapilɛ le chɔulabaa a wana cho ichali o soo choo wo, a puaa nduaa chɔuwa.+ 20 Ma bii visi biyaa, a wana lachoowa dimi maa le Mɛlɛka o suaa ni wo.+ Ndu wa walta kɔndɔfiltaŋ tosaa visi biyaa o hɔl ni, mbo hui wanaa nda handu pondale visi biyaa,+ a wanaa sooluu velaŋ visioo hoo wa.+ A lo yoomu lende, ma wuu nda o fondaŋ yiŋnde wule wule bɛndoo niŋ.+ 21 Kɛ a tuaa nda, ma diu diu nda a muɛi faŋii vilɛi wa fulaa wana wa ichali o soo choo wo o sondo ve.+ Okoŋ mi youwa kpou huŋ dio dialuŋ ndaŋ, ma pum cha.+