Masaa Tasiaa

15 O wɔsi 18 Chɛlobowam,+ po Nebati wo wa o masaleŋ choo wo niŋ, Abaicham simnuŋ masaa le Chuda ni.+ 2 Wɔsilaŋ la yaa o chii o masaleŋ choo Chulusalɛm ni. Kala ndɔ ndoo nɔ diolaŋ ni aa Maaka,+ chua mama Abisialɔm ndo. 3 Sɔɔŋ wɔɔŋ finya ndɔ ndoo tosa woŋ kpou, mbo tual ndu kɔɔli le muŋ tosaa. Nduyɛ, o piɛi Chɛhowa Mɛlɛka ndɔɔ a kɔllo kpou* maa Deeve finya ndɔ mama le. 4 Kɛ le sabu Deeve wo,+ mi Chɛhowa Mɛlɛka ndɔɔ ke ndu lambuiyo Chulusalɛm,+ mɛɛ o tosa mi po ndɔɔ miiŋgu o masaleŋ choo, nduyɛ mbo manda Chulusalɛm. 5 Kanifuule, mi Deeve tosa nyɛ wa sakpo Chɛhowa o hɔl lo. Nyɛ o nyɛ o dimul ndu, o pilɛ bɛɛ o feŋaŋ lechoo le haaa a yoomu ndɔɔ mɛɛlulaŋ, mɛɛ le nyɛ o tosa a Yuulaya Hitaitiinɔɔ wo.+ 6 Nduyɛ haaa mi Luihobowam wu,+ chɔuwo wa nda tɛɛŋ nda Chɛlobowam.

7 Sɔɔŋ cheleŋ cho a Abaicham okɔɔ woŋ, nyɛ o nyɛ o tosa, ŋ cho o yau nda poonyiaa konaa a masaa keeku Chuda wa okɔɔ wo niŋ.+ Chɔuwo wa vɛlɛ Abaicham tɛɛŋ nda Chɛlobowam.+ 8 Okoŋ mi Abaicham wu,* ma kumbu ndu o Chiee Deeve Wo niŋ. Nduyɛ, mi Esa po ndɔ+ miiŋgu o masaleŋ choo o foofo ndɔɔ.+

9 O wɔsi 20 Masaa Chɛlobowam wa o masaleŋ choo Isɔluɛiyo niŋ, Esa kandu masaleŋ Chuda ni. 10 Wɔsilaŋ 41 o chii o masaleŋ choo Chulusalɛm ni. Mama ndɔ ndoo nɔ diolaŋ ni aa Maaka,+ chua mama Abisialɔm ndo. 11 Mi Esa tosa nyɛ cho sakpo Chɛhowa o hɔl lo,+ maa Deeve finya ndɔ mama. 12 Waŋ piaanduaa ndaa hini a chaaŋaa ndaa waŋ piaanduaa o maaŋndaŋ niŋnda, mbo soli nda o lɛŋndeŋ niŋ.+ Nduyɛ, mbo faaŋiaa piɔmaa nɔɔlɛiyaa* finyaa nduaa mamaa ndaa toosiaa wa kpou.+ 13 Mbo faŋa pɛŋ Maaka+ mama ndɔ o foofo ndoo nɔ maa kalaa masaa wo. Kanifuule, mbo toosiaa suŋgbule iyɔm* wɔɔŋ wɔɔŋndeŋ le leŋ sooluuwo. Mi Esa kili kili piɔm ndɔ koŋ,+ nduyɛ mbo luam ndu chilikɔ o Kpoloŋndo Kidilɔŋ.+ 14 Kɛ nduyɛ, fondaŋnda filioŋndaŋ la feŋaŋ te.+ A koŋ kpou, mi Esa piɛi Chɛhowa a kɔl ndɔɔ kpou haaa a yoomu ndɔɔ* mɛɛlulaŋ. 15 Nduyɛ, nyɛm nda dindi nda finya ndɔ woŋ, mbo huŋ a muŋ o chiɛi Chɛhowa wo niŋ. Muŋ cho ni, kaniŋ humboŋ, kooliiyoŋ, a nyɛm laanduŋ yɛ yiɔɔŋ.+

16 Le teleŋ o teleŋ, chɔuwo wa Esa tɛɛŋ nda Baasia,+ masaa le Isɔluɛi. 17 Le hei, mi Masaa Baasia chaŋ Isɔluɛi mbo huŋ del Chuda choo, okoŋ mbo kandu Luama taŋgullo+ le mbo kuuna waŋnda luɛiyɔɔ a fulaa* Chuda, o tanda Esa wa o Masaleŋ choo wo niŋ.+ 18 Okoŋ, mi Esa chua kaniŋ humboŋ a kooliŋ lo o fondaŋ nda kɛsi nyɛm baa kalaŋ o chiɛi Chɛhowa wo niŋndoŋ kpou, a ŋ wa o fondaŋ nda kɛsi nyɛm baa kalaŋ o chiɛi lemasaa niŋndoŋ, mbo ke buɛiyaa nduaa. Mi Masaa Esa viam nda o Bɛŋ-hedadi lo masaa le Siiliaa,+ o wa ichali Damasikɔɔ wo. Bɛŋ-hedadi yɛ, Tabilimɔŋ velu ndu ni, po Hɛsiɔŋ ndo. Mbo dimul ndu aa: 19 “Kpemaa cho naa tɛɛŋ naa num, nduyɛ kpemaa cho vɛlɛ finya nuu tɛɛŋ nda finya num. I cho kaniŋ humboŋ a kooliiyoŋ yɔŋndo le ma kɔ ke num. Lelaŋ, kpema ŋ yii nya Baasia masaa le Isɔluɛi yo, huŋ ma tɛɛmbuu ndu le mbo keluŋ ya kɔɔli.” 20 Okoŋ, mi Bɛŋ-hedadi tosa nyɛ Masaa Esa dimul ndu wo. Mbo yɔŋ masaa wa puaa chɔuwa bolleŋ nda, ma huŋ del chiooŋ Isɔluɛi choo. Ma yam Ichɔŋ,+ Daŋ,+ Ebɛl-bɛti-maaka, tanda Kinɛluɛti wo, a lɛŋnde Nafitalii leŋ kpou. 21 Mɛɛ Baasia tuei hei, o lepilɛ niŋ kpe mbo mal Luama taŋgullo,* mbo hiau lachi a challe Tiɛsa.+ 22 Okoŋ, mi Masaa Esa viam waŋnda Chuda kpou, wana pilɛ bɛɛ o feŋa lechoo le. Ma chua poutaŋ a yɔmii Baasia wa Luama taŋgullo ve, mi Masaa Esa soliŋ nyɔɔŋ muŋ kpeku le Kiba,+ chiee wa o buŋgɛi Bɛŋjamiŋ nde niŋndo taŋgullo a Misipa.+

23 Sɔɔŋ cheleŋ cho a Esa okɔɔ woŋ, kpaaya ndɔɔ, nyɛ o nyɛ o tosa, a chieeŋ bɛnduŋ o taŋgul loŋ, ŋ cho o yau nda poonyiaa konaa a masaa keeku Chuda wa okɔɔ wo niŋ. Kɛ o yuuwɛi nduɛi niŋ, mbo saŋga tau a naa wa ndu o peloŋ ndo.+ 24 Okoŋ kɔɔli, mi Esa wu, ma kumbu ndu nda finyaa nduaa mamaa* o Chiee Deeve finya ndɔ mama wo niŋ. Nduyɛ, mi Chɛhosiafati po ndɔ+ miiŋgu o masaleŋ choo o foofo ndɔɔ.

25 Mi Nadabi,+ po Chɛlobowam ndo simnuŋ masaa le Isɔluɛi, o wɔsi diiŋ ndɔ Esa, masaa le Chuda wa o masaleŋ choo wo niŋ. Nduyɛ, wɔsilaŋ la tiɔɔŋ o chii o masaleŋ choo Isɔluɛi ni. 26 Mbo hiau lachi a sɔɔŋ bɛnda Chɛhowa o hɔl te woŋ tosaa. Nduyɛ mbo tual nɛila finya ndɔ laŋ kɔɔli.+ Hakila finya ndɔ tosa mi waŋnda Isɔluɛi luei balaŋ leniŋ ndaŋ, mi ndu bɛɛ tosa laŋ.+ 27 Mi Baasia, po Ahicha wo, fulaa o yuŋgu Isaka wo choo yii Nadabi dumbu.* Okoŋ mɛɛ Nadabi nda waŋnda Isɔluɛi dɔu Kibɛtɔŋ,+ chiee Filitiaŋnda o piŋndo niŋ, mi Baasia kua mbo kɔ dii Nadabi loŋ. 28 O wɔsi yaa ndɔ Esa, masaa le Chuda wa o masaleŋ choo wo niŋ Baasia dii ndu ni, mbo miiŋgu o masaleŋ choo o foofo ndɔɔ. 29 Nduyɛ dimioo nuaa o simnuŋ masaa, mbo dii wana o wana wa o yuŋgu Chɛlobowam ndo niŋ. Wana pilɛ bɛɛ o mɛi yoomu le. Mbo chii nda paku, a mɛɛ Chɛhowa dimul buɛi ndɔɔ Ahicha, Silɔnaitiinɔɔ yɛ.+ 30 Le hakila Chɛlobowam tosa laŋ, a le mɛɛ o tosa mi waŋnda Isɔluɛi luei balaŋ o hakila ndɔlaŋ niŋ yɛ hei yɔŋnuŋ ni. Kanifuule, mbo tɛɛmbuu Chɛhowa, Mɛlɛka Isɔluɛiya kɔllo tau tau. 31 Sɔɔŋ cheleŋ cho a Nadabi okɔɔ woŋ, nyɛ o nyɛ o tosa, ŋ cho o yau nda poonyiaa konaa a masaa keeku Isɔluɛi ya okɔɔ wo niŋ. 32 Nduyɛ le teleŋ o teleŋ, chɔuwo wa Esa tɛɛŋ nda Baasia masaa le Isɔluɛi.+

33 O wɔsi yaa ndɔ Esa, masaa le Chuda wa o masaleŋ choo wo niŋ, Baasia po Ahicha wo simnuŋ masaa Tiɛsa ni. Nduyɛ, mbo chii wɔsilaŋ 24 o masaleŋ choo Isɔluɛi.+ 34 Kɛ mi ndu bɛɛ hiau lachi a sɔɔŋ bɛnda Chɛhowa o hɔl+ te woŋ tosaa, nduyɛ mbo kua o nɛila Chɛlobowam ndaŋ choo a o haki o tosa mi Isɔluɛiya luei balaŋ leniŋ ndo niŋ.+