Koloniko Tasoo

29 Okoŋ, mi Masaa Deeve dimul Isɔluɛiyaa chuuŋgiaŋ ndu lachi wa kpou aa: “Sɔlɔmɔŋ po ni, wana Mɛlɛka hɛli+ le wali ndɔɔ tosaa wo cho wɔ o bɔɔ le, nduyɛ o nɔ taasi le.+ Wali o nɔ le tosaa wo cho wali bɛɛŋ bɛɛŋ te. Kanifuule, o cho chiɛi wanachiee le o nɔ le taŋgullo le, kɛ chiɛi Chɛhowa Mɛlɛka wo.+ 2 Lelaŋ, I doonuŋ tamala le bɛɛndiaŋndo le chiɛi Mɛlɛka nuu taŋgullo le. Mi yɔŋgu kooliiyoŋ, le wali cho a kooliiye okɔɔ wo tosaa, kaniŋ humboŋ, le wali cho a kanii humbuei okɔɔ wo tosaa, chiliŋuŋ siaŋaŋ,* le wali cho a chiliŋii siaŋɛi okɔɔ wo tosaa, chiliŋndoŋ, le wali cho a chiliŋndoŋ+ okɔɔ wo tosaa, yɔmii taŋgulɛi,+ le wali cho a yɔmnde okɔɔ wo tosaa, pouta ɔnisi laŋ, poutaŋ le hɛɛnduuwo a siimɛndiiyo, pouta kpɔlɔkɛila nɔ kɔɔle yɛ yɛleŋ ndaŋ, pouta baa kalala suu o suu, a pouta alabasita laŋ tau tau. 3 Nduyɛ le mɛɛ ya nɔ yeemɛi le chiɛi Mɛlɛka nuu yɛ,+ I cho vɛlɛ nyɛ ni sɔlaa chua,+ kooliiyoŋ a kaniŋ humboŋ mi yɔŋgu le chiɛi Mɛlɛka nuu, latulu a nyɛ o nyɛ ya chuuŋgiaa le chiɛi diandaa hoo. 4 Nyɛsɔlaa ya cho yɔŋgu wo cho hoo ni: kooliŋ waa Ofii talɛŋndoŋ 3,000,*+ kaniŋ humbuŋ kɛndɛ kɛndɔŋ talɛŋndoŋ 7,000 le chiɛiyo yikpaa, 5 kooliiyoŋ le wali cho a kooliiye okɔɔ wo tosaa, kaniŋ humboŋ le wali cho a kanii humbuei okɔɔ wo tosaa, vɛlɛ a wali o wali wanaa chaa nyɛ a laba wa nɔ le tosaa wo. Lelaŋ, wana o wana kɛɛsiaŋ pɛ o kɔl le mbo hiŋ a ke ndɔɔ o Chɛhowa lo, mɛɛ o huŋ a ndu.”+

6 Le hei, mi waŋ banaa o yuŋgula leboltaŋ niŋ, waŋ banaa le kaalaŋ o Isɔluɛi niŋ, masaa waŋnda waapilɛ wa o ba bɛŋgu wa, masaa waŋnda kɛmɛ wa o ba bɛŋgu wa,+ vɛlɛ a masaa wa walta masaa bolle wa+ kpou huŋ a kela ndalaŋ. 7 Nyɛm nda yɔŋgu le wallo tosaa o chiɛi Mɛlɛka tonyaa woŋ cho muŋ ni: kooliiyoŋ talɛŋndoŋ 5,000, dalikiiyoŋ 10,000,* kaniŋ humboŋ talɛŋndoŋ 10,000, chiliŋii siaŋɛi talɛŋndoŋ 18,000, a chiliŋndoŋ talɛŋndoŋ 100,000. 8 Wana o wana ndoo nɔ pouta baa kalalaŋ, mbo yɔŋgu laŋ ma kɛsi o fondaŋ nda kɛsi nyɛm baa kalaŋ o chiɛi Chɛhowa wo niŋndo. Nduyɛ Chɛhayɛɛ,+ Kɛɛsiɔnaitiinɔɔ wa laŋ hɔlteŋ ni.+ 9 Mi waŋnda duaunuŋ nyaale le kelaŋ ndaŋ yɔŋgoo, kanifuule ndapila kɛɛsiaŋ o kɔl ni le Chɛhowa kelaŋ ndaŋ yɔŋgoo.+ Mi masaa Deeve bɛɛ duaunuŋ nyaale tau.

10 Okoŋ, mi Deeve saŋgala Chɛhowa waŋnda Isɔluɛi kpou o hɔl, mbo dimi aa: “Oo Chɛhowa, Mɛlɛka Isɔluɛi finya naa, maa sɔla saŋgalaa le fɛɛŋ a fɛɛŋ fɔ! 11 Oo Chɛhowa, a cho Mɛlɛka kpaaya bɛndu.+ A nɔ tɔɔ, bɛɛleŋ,+ nduyɛ naŋɔɔ numndo cho bɔɔ.+ Kanifuule, nyɛ o nyɛ cho o choo choo niŋ a o lɛŋndeŋ choo,+ le num ŋ cho ni. Oo Chɛhowa,+ le num masaleŋ le cho ni. Num cho masaa nyɛ o nyɛ fee choo ni. 12 Sultaŋ a bɛɛleŋ num o ba ŋ fula ni,+ nduyɛ num cho masaa nyɛ o nyɛ fee choo ni.+ Num o ba kpaayaa+ a tɔɔ fula ni.+ Ba numndo nɔla mbo tosa mi waŋndo simnuŋ wana tɔɔ,+ nduyɛ mbo ke wana o wana fee kpaayaa.+ 13 Oo Mɛlɛka naa, lelaŋ naŋ cho num balikaa mello ni, nduyɛ miŋ saŋgala diola numnda kɔndɔfiltaŋ.

14 Wanaa maavɛɛ ya a yuŋgu nuu cho yɛ le miŋ yɔŋgu num kela waa nuaa? Kanifuule num o ba nyɛ o nyɛ fula ni. Nyɛ o nyɛ naŋ ke num pɛ, num o ba o fula ni. 15 Mialla a wanaa kelaŋnda naŋ cho num o hɔl ni maa finyaa naa mamaa.+ Kanifuule, palɛi naŋ cho yoomu o lɛŋndeŋ choo ve i cho ko maa lewundu,+ nduyɛ tiindaŋ bɛɛ ŋ nɔ le. 16 Oo Chɛhowa Mɛlɛka naa, nyɛm sulaŋ naŋ chuuŋgiaa muŋ kpou le num chiɛiyo teŋgullo le diola numnda diandaa laŋ ndoŋ, num o ba ŋ fula ni, nduyɛ le num ŋ cho kpou ni. 17 Oo Mɛlɛka nuu, I sina kɛsɛ maa num yaasiaa kɔl wanachioo ni,+ nduyɛ ma naŋ kɔl te o chɔm pɛ lo lechoo wo o num ndo.+ A kɔl nuu kpou ya kɛɛsiaa ni le num nyɔɔŋ muŋ kioo. Nduyɛ, I cho bɔɔ a kɔl kɛndɛ le chɔɔ wanaa numnda haa hunɔɔ a kela ndalaŋ le num yɔŋgoo. 18 Oo Chɛhowa, Mɛlɛka finyaa naa mamaa Ebilaham, Aase, a Isɔluɛi, tosa mi wanaa numnda hiou lachi a yiyaŋnda waa nuaa nɔɔ o lakɔl le fɛɛŋ a fɛɛŋ, nduyɛ ma piɛi num a kɔlta ndalaŋ kpou.+ 19 Tosa a sabu mi Sɔlɔmɔŋ po ni yɔŋguŋ a kɔl ndɔɔ kpou+ le sawala numndaŋ biyɔɔ,+ loonɔŋnda numndaŋ, vɛlɛ a nɛila numnda chɔmaalaŋ. Nduyɛ, mbo tosa sɔɔŋ muŋ kpou le mbo taŋgul chiɛi ya bɛɛndiaŋ hoo le ndu taŋgullo wo.”+

20 Okoŋ, mi Deeve dimul waŋnda kpou aa: “La saŋgala Chɛhowa Mɛlɛka nyaa.” Nduyɛ, mi nda kpou saŋgala Chɛhowa, Mɛlɛka finyaa ndaa mamaa, ma baŋ wulaŋ Chɛhowa a masaa lachi, nduyɛ ma fuuluu hɔlla lɛŋ. 21 Ma hiau lachi a salalaŋ vɛlɛ a salala luamaa laŋ solioo+ o Chɛhowa lo haaa diimandɔɔ. Salala nda soli o Chɛhowa lo laŋ la cho laŋ ni: nauwaa fɔŋnduaa piaanduaa 1,000, saa konduaa 1,000, saa piaanduaa fɔŋnduaa 1,000, latulu a salala ndala mamuɛi laŋ.+ Ma soli salalaŋ tau tau le Isɔluɛiya kpou.+ 22 Ma hiau lachi a diolaŋ vɛlɛ a kolɔɔlaŋ Chɛhowa lachi o paale leŋ choo, nduyɛ a wa a nyaale tau tau.+ Ma yonda vɛlɛ maa Sɔlɔmɔŋ, po Deeve wo simnuŋ masaa, nduyɛ ma pɔya ndu Chɛhowa lachi le mbo wa simlachinɔɔ.+ Ma siiŋguu vɛlɛ Sadɔki wana soliaa lasalaa.+ 23 Okoŋ, mi Sɔlɔmɔŋ chal o kpeŋgbei lemasa Chɛhowa wo choo,+ o foofo Deeve finya ndɔ wo, nduyɛ mbo sɔla batiuwaa. Isɔluɛiya kpou wa ndu diikɔŋndo. 24 Mi laŋgbaa kalla kpou,+ kuubaa chɔuwa,+ vɛlɛ a puaa Masaa Deeve wa kpou+ yɔŋguŋ masaa Sɔlɔmɔŋ o ba bɛŋgu. 25 Mi Chɛhowa tosa mi Isɔluɛiya kpou ke Sɔlɔmɔŋ bɛɛleŋ tau tau. Nduyɛ, mbo tosa mi Sɔlɔmɔŋ sɔla kpaayaa o masale ndɔleŋ niŋ mbo hiau masa kɛ kɛ keeku o masaleŋ choo Isɔluɛi.+

26 Deeve, po Chɛɛse wo wa o masaleŋ choo o Isɔluɛi niŋ kpou. 27 Wɔsilaŋ 40 o chii o masaleŋ choo o Isɔluɛi niŋ ni. O Hɛbulɔŋ niŋ, wɔsilaŋ la 7 o chii o masaleŋ choo ni,+ nduyɛ mbo chii wɔsilaŋ 33 o masaleŋ choo Chulusalɛm.+ 28 Mbo tuɛi yoomoo yeela,+ sullo, vɛlɛ a bɛɛleŋ. Nduyɛ, o yuuwa fɛlɛŋ kudɛɛ malaŋ o wu. Okoŋ kɔɔli, mi Sɔlɔmɔŋ po ndɔ simnuŋ masaa o foofo ndɔɔ.+ 29 Sɔɔŋ cho a bundɛi Masaa Deeve ve okɔɔ, chɔŋ o kandɔŋndo haaa o mɛɛlulaŋ ndoŋ, ŋ cho o nyɛ Saamiɛɛ wana cha wo, Netaŋ+ wana suaa le Mɛlɛka wo a Kaadi+ wana cha yilaŋndoŋ ndo poonyiaa woŋ tɛɛŋ. 30 Ma suaa a masale ndɔleŋ kpou okɔɔ, sɔɔŋ kɔndɔfiliŋ o tosa woŋ, sɔɔŋ yɔŋnuŋ ndu o teleŋ ndɔɔ niŋndoŋ, ŋ yɔŋnuŋ o Isɔluɛi niŋ a o masɛi ndii balu ndu ve kpou niŋndoŋ.