Masaa Tasiaa

12 Mi Luihobowam kua Siɛkɛm,+ kanifuule mi Isɔluɛiya kpou chuuŋgiaŋ loŋ le ma siiŋguu ndu masaa.+ 2 Mi Chɛlobowam po Nebati wo tuɛi a ndi okɔɔ. (A teleŋ koŋ o wa wɔ Ichipi,+ kanifuule mbo nyaanuŋ Masaa Sɔlɔmɔŋ mbo kɔ chalnuŋ loŋ.) Dimioo nuaa o tuei a ndi okɔɔ, 3 ma yooŋgu le ndu. Okoŋ kɔɔli, mi Chɛlobowam a waŋnda Isɔluɛi kpou huŋ naa Luihobowam chua, ma dimul ndu aa: 4 “Finya num siiluu naa bɔɔ wolɔɔla lusulɛilaŋ.+ Kɛ te num tosa pɛ sɔɔŋ bɛɛŋ bɛɛŋ le naa, nduyɛ ma tosa wolɔɔla lusulɛila o siiluu naa laŋ fefele, ŋ cho wa buɛiyaa numnda.”

5 Le hei mbo dimul nda aa: “La kɔ, te palɛi i yaa hiou pɛ, la miiŋgu naa ya chua.” Okoŋ, mi waŋnda kuaŋnuŋ.+ 6 Mi Masaa Luihobowam koma naŋgu a bɛnduaa yuuwaa* tosa wallo a Sɔlɔmɔŋ finya ndɔ wa teleŋ o wa yoomu wo. Mbo nyuna nda aa: “La kindi wɔ ya kɔl. Vɛɛ ya mulul lɛ waŋnda haa?” 7 Ma mulul ndu aa: “Te a simnuŋ pɛ hau buɛiyo le waŋnda haa, ma tosa nyɛ nda dimul num ndo nduyɛ ma mulul nda nyɛkɛndɛi, a cho wa buɛiyaa numnda le teleŋ o teleŋ.”

8 Kɛ mbo kɛɛ sila bɛnduaa yuuwa* ke ndu wo, okoŋ mbo kɔ naŋgu a chuaa piaanduaa nda sul latulu, ma wa buɛiyaa nduaa wa.+ 9 Mbo dimul nda aa: “La kindi wɔ ya kɔl. Vɛɛ naŋ nɔ yɛ miŋ mulul wanaa dimul la haa aa, ‘Tosa wolɔɔla lusulɛila finya num siiluu naa laŋ fefele’ wa?” 10 Mi puaa feleŋguaa nda sul latulu wa dimul ndu aa: “Nyɛ ŋ nɔ ma dimul wanaa dimul num haa aa, ‘Finya num siiluu naa bɔɔ wolɔɔla lusulɛilaŋ, kɛ num tosa mi la wa fefele le naa’ wo cho hoo ni, ‘Suei nii pɔmbuɛi hiau niŋ chelul a chaaŋaa finya nuu. 11 Wolɔɔla lusulɛila ya cho nya siiluu laŋ la cho hiouwɔɔ a la finya nuu siiluu nya laŋ. A kpatoole yɔŋaaleŋ finya nuu ndoo kuaŋ nya ni. Kɛ ya I cho nya wa koŋɔɔ a kpatoole nɔ chiliŋuŋ sɛɛmbiaŋ ndeŋ.’”

12 Mi Chɛlobowam nda waŋnda kpou miiŋgu o Luihobowam ndo o paale yaa ndɔ leŋ choo. Kanifuule, mi masaa ndoo dimul nda aa: “La miiŋgu naa ya chua o paale yaa ndɔ leŋ choo.”+ 13 Kɛ mi masaa kɛɛ sila bɛnduaa yuuwa* ke ndu wo. Mbo mulul waŋnda a kaka. 14 Mbo tual sila chuaa piaanduaa ke ndu wo kɔɔli, mbo dimul waŋnda aa: “Wolɔɔla lusulɛila ya cho nya siiluu laŋ la cho hiouwɔɔ a la finya nuu siiluu nya laŋ. A kpatoole yɔŋaaleŋ finya nuu ndoo kuaŋ nya ni. Kɛ ya I cho nya wa koŋɔɔ a kpatoole nɔ chiliŋuŋ sɛɛmbiaŋ ndeŋ.” 15 Mi masaa kɛɛ le waŋnda nilaŋ yaŋɔɔ, kanifuule Chɛhowa tosa ni mi sɔɔŋ kua o nɛi koŋ choo,+ le halikpeŋ mi nyɛ Chɛhowa dimul Ahicha+ Silɔnaitiinɔɔ a Chɛlobowam, po Nebati wo okɔɔ wo peeluŋ.

16 Mɛɛ Isɔluɛiya kpou che maa masaa kɛɛ le nda nilaŋ yaŋɔɔ, ma dimul ndu aa: “Tɔnɔ yɛɛ naŋ nɔ yɛ o Deeve niŋ? Nyɛm kɛŋ po Chɛɛse woŋ cho nyɛm kɛŋ naa le. Waŋnda Isɔluɛi, wana o wana muliŋ o mɛlɛkaa nduaa lo. Lelaŋ nya yuŋgu Deeve wo, la koma chal a chiɛi nyaa!” Okoŋ, mi Isɔluɛiya miiŋguŋ o la nda lo.*+ 17 Kɛ Isɔluɛiyaa wa o chiooŋ Chuda niŋnda,+ mi Luihobowam hiau lachi a nda waa choo masa.

18 Okoŋ kɔɔli, mi Masaa Luihobowam viam Adoluam,+ wana wa wanaa ndaa hɛli le wali lechiɔɔ tosaa wa bolleŋ ndo. Kɛ mi Isɔluɛiya kpou vii vii ndu mbo wu. Mi Masaa Luihobowam lo kindi kindiŋndo mbo hel o nyɛ ndɔ nyaanaŋ suaa naŋndo choo, mbo nyaanuŋ Chulusalɛm.+ 19 Nduyɛ, mi Isɔluɛiya hiau lachi a yuŋgu Deeve wo simullo+ haaa a paale hauleŋ ndeŋ.

20 Mɛɛ Isɔluɛiya kpou tuei dɔɔ maa Chɛlobowam miiŋgu, mi nda kpou chuuŋgiaŋ ma siiŋguu ndu masaa waŋnda Isɔluɛi choo kpou.+ Wana pilɛ bɛɛ ve lɛ yuŋgu Deeve wo kɔɔli le, mɛɛ le kaale Chuda leŋ.+

21 Dimioo nuaa Luihobowam fuuluu Chulusalɛm, mbo chuuŋgiaa puaa chaa sɔŋgɔɔ nyɛkɛndɛi ya 180,000 o kaale Chuda leŋ a o kaale Bɛŋjamiŋ ndeŋ niŋ, le ma kɔ del waŋnda Isɔluɛi choo a sɔŋgɔɔ, le halikpeŋ mi masaleŋ le miiŋgu ndu Luihobowam, po Sɔlɔmɔŋ ndo o ba.+ 22 Okoŋ, mi Mɛlɛka tonyaa ke Siɛmaya,+ wana Mɛlɛka tonyaa yooŋgoo aa: 23 “Dimul Luihobowam po Sɔlɔmɔŋ ndo, masaa le Chuda a wanaa cho o kaale Chuda leŋ, a o kaale Bɛŋjamiŋ ndeŋ niŋnda, a waŋnda a tuaa kpou aa, 24 ‘Nyɛ Chɛhowa dimi wo cho hoo ni: “La kua le sɔŋgɔɔ a puaapiliaa nyaa Isɔluɛiya le. Wana o wana miiŋgu o ndu lo, kanifuule ya tosa ni mi suɛi hei yɔŋnuŋ.”’”+ Okoŋ ma tuɛi Chɛhowa diom, nduyɛ ma miiŋgu o la nda lo a mɛɛ Chɛhowa dimul nda yɛ.

25 Mi Chɛlobowam taŋgul* Siɛkɛm,+ chiee wa o lɛŋnde ŋpembuleŋ Ifiluem niŋndo, nduyɛ mbo chal loŋ. Mɛɛ o chɛŋ loŋ, mbo kɔ taŋgul* vɛlɛ Pɛnuɛɛ chiee.+ 26 Mi Chɛlobowam dimi o kɔl niŋ aa: “Masaleŋ ndeŋ le cho miiŋgu o yuŋgu Deeve wo niŋ.+ 27 Te waŋnda haa hiou pɛ lachi a kɔlaŋ salalaŋ solioo o chiɛi Chɛhowa wo Chulusalɛm,+ kɔlta ndalaŋ la cho muliŋ o masanɔ ndaa lo Luihobowam, masaa le Chuda. A cho ya diyɔɔ ma miiŋgu o Luihobowam lo, masaa le Chuda.” 28 Mɛɛ Masaa Chɛlobowam naŋgu a wanaa nduaa silaa, mbo toosiaa nauwaa fɔŋnduaa a ŋiɔɔŋ a kooliiye,+ okoŋ mbo dimul waŋnda aa: “O bɛnda mi la wa saŋgaa le kɔlaŋ Chulusalɛm te. Lelaŋ waŋnda Isɔluɛi, mi la cheŋ Mɛlɛka nyaa, o soli nya o lɛŋnde Ichipi leŋ niŋndo.”+ 29 Okoŋ, mbo chua nauwaa o toosiaa kaŋ nda o pilɛ mbo simi ndu Bɛtɛl,+ nduyɛ mbo chua o pilɔɔ mbo simi ndu Daŋ.+ 30 Mi hei tosa ma luei balaŋ o hakioo niŋ,+ nduyɛ mi waŋnda ndaa kuɛ pɔɔli Daŋ le o wa loŋ ndo sooluuwo.

31 Mbo taŋgul chiɛila lasooluulaŋ o fondaŋnda filioŋndaŋ. Nduyɛ mbo hɛli wanaa soliaa lasalaa waŋnda tɛɛŋ, a fula o kaale Livai leŋ choo le wa.+ 32 Mi Chɛlobowam hɛli vɛlɛ paale 15 o paŋgii ŋɔmaa ve niŋ le waa bɔŋaŋndo o ndɔɔ biyɔɔ, mɛɛ nda bii bɔŋaŋndo Chuda yɛ.+ Mbo soli salalaŋ o nauwaa fɔŋnduaa o toosiaa wa lo, o bandu luamaa lasala o toosiaa Bɛtɛl+ lo choo. Nduyɛ, mbo hɛli wanaa soliaa lasalaa Bɛtɛl, le waa salalaŋ solioo o fondaŋnda filioŋnda o toosiaa laŋ. 33 Mbo kandu salalaŋ solioo o bandu luamaa lasala o toosiaa Bɛtɛl lo choo, o paŋgii ŋɔmaa ve niŋ malɔ 15. Paŋgei hei ndupila hɛli ni, mbo kɛɛsiaa bɔŋaŋndo le waŋnda Isɔluɛi. Nduyɛ, mi ndoo kuɛ o bandu luamaa lasalaa hoo le salalaŋ solioo a laŋ lomɔɔ.