Chɔŋ

19 Okoŋ mi Paile yɔŋgu Chiisu ma luaa ndu.+ 2 Mi puaa chɔuwa toosiaa mɔsil lemasaa a yɔɔŋ ma wou ndu o lebol. Ma wou ndu doma yim yimndo.+ 3 Ma wa hunɔɔ naa ndu chua ma dimi aa: “Isɛ yoo, Masa Chuuwa!” Ma wa ndu vɛlɛ hɔlaa leniŋnda lɔɔ.+ 4 Mi Paile fula vɛlɛ o bɛɛ mbo dimul nda aa: “La yaŋndɔ nilaŋ! I cho nya ndu solul o bɛɛ le mi la sina maa I seeluŋ suɛi wɔɔŋ kɛ kɛ o tosa le.”+ 5 Okoŋ mi Chiisu fula o bɛɛ. Mɔsil ŋyɔɔ wa ndu o lebol a doma bɛndu yim yimndo ndu lekɔɔ. Mi Paile dimul nda aa: “La che po kalaa!” 6 Mɛɛ masaa wanaa soliaa lasalaa, a wanaa ndaa manda chiɛi Mɛlɛkaa wa che ndu, ma dimi aa: “Dii ndu o yɔmndo choo! Dii ndu o yɔmndo choo!”+ Mi Paile dimul nda aa: “Nyapila kɔ a ndu mi la kɔ dii ndu. Kɛ ya, I seeluŋ suɛi wɔɔŋ o tosa le.”+ 7 Mi Chuuwa dimul ndu aa: “Ŋ nɔ sawaa, nduyɛ a mɛɛ sawa naa dimi yɛ, o nɔ mbo sɔla piɔmndo,+ kanifuule o dimi maa po Mɛlɛkaa o cho ni.”+

8 Mɛɛ Paile tuei nyɛ nda wa dimioo wo, mi siooŋnde chɔɔlu ndu biyɔɔ. 9 Okoŋ mbo luɛi vɛlɛ o chiɛi lemasaa niŋ mbo nyuna Chiisu aa: “Kuɛɛnɛ ŋ fula yɛ?” Kɛ Chiisu mulul ndu le.+ 10 Mi Paile nyuna ndu aa: “Vɛ a mulul la le? A sina nuaa maa I nɔ kpaayaa le num malɔɔ, ɔɔ le num diyɔɔ le?” 11 Mi Chiisu mulul ndu aa: “Te o cho mi kpaayaa keŋnuŋ num fulaa o choo choo niŋ te, a nɔ ya kpaaya o kpaaya choo le. Lelaŋ wana mal la num o ba wo kɔnduŋ hakioo tau ni.”

12 Le saboo hoo, mi Paile hiau lachi a nɛilaŋ nuuviaa le ndu malɔɔ. Kɛ mi Chuuwa deŋi choo choo aa: “Te a mal pɛ poo hoo, mɛɛ a cho chaaŋ o Siisa le. Wana o wana siiŋguu pɛ ndupila masaa, mɛɛ o simul Siisa.”+ 13 Mɛɛ Paile tuei hei, mbo soli Chiisu o bɛɛ. Okoŋ, mbo chal o kpeŋgbei* lemasaa choo, o Fondaŋ Nda Toosiaa a Poutaŋ Ndo, ma veelu ndu o Hibuluiye niŋ aa Kabataa. 14 Waŋnda wa bɛɛndiaŋndo le Paale Pɛŋgiaaleŋ diimandɔɔ.+ O wa niŋ lɔɔ 12:00 ipalaa.* Mbo dimul Chuuwa aa: “La che masa nyaa!” 15 Kɛ ma deŋi choo choo aa: “Faŋa ndu naa o hɔl! Faŋa ndu naa o hɔl! Dii ndu o yɔmndo choo!” Mi Paile nyuna nda aa: “La yeema mi dii masa nyaa?” Mi masaa wanaa soliaa lasalaa muli aa: “Siisa ndupilɛ kpe cho masa naa ni.” 16 Mbo mal ndu nda o ba le ma kɔ dii ndu o yɔmndo choo.+

Okoŋ ma kua a Chiisu. 17 Mi ndupila chua yɔm imɔnɔɔ* le kɔlaŋ a ndu o Fondaŋ Lakpokpoo,+ ma veelu ndu o Hibuluiye niŋ aa Kɔlkɔta.+ 18 Loŋ nda baŋ Chiisu o yɔmndo choo ni+ a puaa a ŋiɔɔŋ ndu ikɛi. Hoo wa o ba ndɔ kɛndɔɔ choo, o pilɔɔ wa o ba ndɔ miallo choo.+ 19 Mi Paile poonyiaa diomndaŋ ma handu o yɔm nda baŋ ndu wo bolleŋ. Laŋ la cho ni: “Chiisu fula Naasaluɛi yo, Masa Chuuwa.”+ 20 Mi Chuuwaa bɔɔbɔɔ veelu diomndaŋ ndaŋ, kanifuule naa nda baŋ Chiisu o yɔmndo choo wa ve levil a chiee bɛndoo le. La wa la poonyiaa o Hibuluiye niŋ, Latiŋnde, a Kilikiiye. 21 Kɛ mi masaa wanaa soliaa lasalaa le Chuuwa dimul Paile aa: “Poonyiaa nuaa aa, ‘Masa Chuuwa’ le. Kɛ poonyiaa maa o dimi aa, ‘Ya cho Masa Chuuwa ni.’” 22 Mi Paile dimi aa: “I chii poonyiaa. Nyɛ o nyɛ feŋaŋ lɛ lechoo le.”

23 Mɛɛ puaa chɔuwa baŋ Chiisu o yɔmndo choo, ma chua doma ndɔ lechoo wo ma piɔu ndu sala hiɔɔlu, okoŋ mi wana o wana chua kumbuei i pilɛ. Ma chua vɛlɛ doma ndɔ lebɛŋgoo. Kɛ ndu ndu, a kola pulii pilɔɔ o wa o suandaa ni. 24 Ma dimulaŋ aa: “Ŋ tɛndaŋ ndu le. Ŋ wuunuŋ kooŋ le sinaa wana cho ndu sɔla wo.”+ Mi hei peelu nyɛ yau Mɛlɛkaa dimi wo aa: “A piɔuviaŋ nyɛla nilaŋ, nduyɛ ma wuu kooŋ le laŋ.”+ Lende kpeekpei puaa chɔuwa tosa ni.

25 Kalaa Chiisu,+ pɔmbɔɔ kala ndɔ, Meele lanɔɔ Kilopaa, a Meele Madaliŋ+ wa isisi o yɔm imɔnɔ* Chiisu wo ikɛi. 26 Mɛɛ Chiisu che kala ndɔ a buɛi ndoo kaala tau wo isisi ikɛi loŋ,+ mbo dimul kala ndɔ aa: “Wɛɛŋndo, a che po numndo!” 27 Mbo dimul vɛlɛ buɛi ndɔ koŋ aa: “A che kala num!” Chɔŋ a paale leŋ, mi buɛiyo hoo kua a ndu o chiɛi ndɔɔ le mbo wa loŋ.

28 Okoŋ kɔɔli, mɛɛ Chiisu sina maa nyɛ o nyɛ chuu yɔŋnɔŋ, mbo dimi aa: “Kolɔɔ bii ya.” Le mi nyɛ yau Mɛlɛkaa dimi wo peeluŋ o dimi lende ni.+ 29 Ndaa nɔ kpɛɛnɛi loŋ a muɛima waalɛiyaŋ leniŋ. Ma chua nyɛ fɔɔndiɔŋndo a muɛima waalɛima maŋ leniŋ, ma sɔɔŋa o sioŋnde hisɔpi* leŋ. Okoŋ ma heelu, ma handu ndu o sondo.+ 30 Mɛɛ Chiisu dembi muɛima waalɛima maŋ, mbo dimi aa: “Nyɛ o nyɛ chuu yɔŋnɔŋ!”+ Okoŋ mbo mal bolleŋ, mbo malnuŋ kɔl.*+

31 Waŋnda wa bɛɛndiaŋndo le Paale Pɛŋgiaaleŋ diimandɔɔ.+ Lelaŋ, ndaa yeema mi dialloŋ muŋ lo o yɔmnde choo+ tei a Paale Pɛŋgiaaleŋ te (kanifuule Paale Pɛŋgiaale bɛnduleŋ le wa ni).+ Le hei, mi Chuuwa nyuna Paile le mbo chɛl nda ma kɔ yimi nda peloŋ, okoŋ ma tusi dialloŋ lɛŋ. 32 Mi puaa chɔuwa kua ma kɔ yimi po tasoo peloŋ. Ma yimi vɛlɛ o wa Chiisu ikɛi o yɔmndo choo wo peloŋ. 33 Kɛ mɛɛ nda hiŋ o Chiisu lo, ma cha maa o vi. Le hei, a yimi lɛ ndu peloŋ te. 34 Kɛ mi puaa chɔuwa o pilɛ chuku Chiisu luŋgbuei a ballo.+ O lepilɛ niŋ kpe, mi koowaŋ a mɛŋndaŋ ma fula. 35 Wana che suɛi hei o yɔŋnɔŋndo wo dimi ndi ni, nduyɛ nyɛ o dimi wo cho tonya. O sina maa nyɛ o cho dimioo wo cho tonya, le mi nya bɛɛ laalaŋ.+ 36 Sɔɔŋ muŋ kpou yɔŋnuŋ le mi nyɛ yau Mɛlɛkaa dimi wo peeluŋ. Mbo dimi aa: “Paala ndɔlaŋ o pilɛ bɛɛ yom niŋ te.”+ 37 Mi yau Mɛlɛkaa dimi vɛlɛ o fondaŋ cheleŋ aa: “Waŋnda heelu niŋ hɔlla ma nua wana nda chuku wo.”+

38 Mɛɛ sɔɔŋ muŋ yɔŋnuŋ, mi Choosɛ, fulaa Alimatiaa chiee kɔ nyuna Paile le mbo chɛl ndu mbo tusi dialuŋ Chiisu woŋ. Mi Paile chɛl ndu. Okoŋ mbo kɔ tusi dialloŋ.+ Ndu bɛɛ buɛi Chiisu wo o wa ni. Kɛ le mɛɛ o wa siooŋnde le Chuuwa yɛ,+ o chɔɔmuŋ te. 39 Mi Nikodimɔɔ,+ o ndoo kuɛ teleŋ pilɛ naa Chiisu chua a nyumndaŋ ndo bɛɛ huŋ a nyɛm chuŋ kɛndɛŋ pum diolaŋ aa mɔɔ a aloo. Lusul nyɔɔŋ muŋ ndoo wa le paŋndaŋ kɛmɛ.*+ 40 Okoŋ ma chua dialuŋ Chiisu woŋ, ma suu muŋ nyɛm chuŋ kɛndɔŋ.+ Nduyɛ ma simbul muŋ o feŋgbɛlaŋ niŋ, a mɛɛ naamu maChuuwo wa le waŋndo kumbɔɔ yɛ. 41 Nduyɛ, kpeloo wa o fondaŋ nda dii Chiisu wo. Sɛi* sɛnɛiyo wa o kpele koŋ niŋ,+ o ndaa yembu wɔ wana o wana leniŋ te wo. 42 Kɛ le mɛɛ o wa paale Bɛɛndiaŋndeŋ le Chuuwa,+ nduyɛ mi sɛiyo wa ikɛi yɛ, ma yambu dialuŋ Chiisu woŋ leniŋ.