Sɔɔŋ Chɔɔmaŋndoŋ
1 Sɔɔŋ Chiisu Kiliti chɔm buɛiyaa nduaa woŋ cho muŋ ni. Mɛlɛka ke ndu muŋ ni,+ le mbo chɔm+ nda sɔɔŋ nɔ le yɔŋnɔŋndo o teleŋ biŋgi bɛŋgu woŋ. Mi Chiisu viam maalikɛinɔ ndɔɔ o Chɔŋ buɛi ndɔ lo, okoŋ mbo chɔm ndu sɔɔŋ muŋ o yilaŋndoŋ niŋ.+ 2 Mi Chɔŋ hoo timbi seileŋ a diom Mɛlɛkaa, nduyɛ mbo timbi vɛlɛ seileŋ a nyɛ Chiisu Kiliti dimi wo, vɛlɛ a nyɛ o nyɛ fee o che. 3 Wana o wana veelul pɛ waŋnda diomndaŋ o yauwo hoo niŋ, nduyɛ wana o wana yaŋ pɛ nilaŋ, mbo tosa nyɛ o tueiyo,+ kɔl kɛndɔɔ cho le ndu. Kanifuule, boondii Mɛlɛka hɛli ve cho niŋ kpɛɛluŋ.
4 Ya Chɔŋ, ya cho kundala ŋɔmmɛula+ cho o tanda Eesiaa wo niŋndaŋ yauwo hoo poonyiallo ni:
Maa “Mɛlɛka, o cho pɛŋgoo hoo, mbo wa kani masindɛ, nduyɛ mbo wa vɛlɛ hunɔɔ wo,”+ a nyinaa ŋɔmmɛuwaa+ cho o kpeŋgbei* ndɔ lemasaa lachi wa tosal nya kɛndɛi ndɛi bɛnduei, nduyɛ ma ke nya kɔl nyuloo fɔ! 5 Maa Chiisu Kiliti bɛɛ tosal nya kɛndɛi nduɛi bɛnduei, nduyɛ mbo ke nya kɔl nyuloo fɔ! Ndu cho “Sei Tonyaa,”+ “wana tase* miiŋgu yoomu waŋvilɛiya tɛɛŋ ndo,”+ a “Masaa le masaa kpou o lɛŋndeŋ choo” ni.+
O kaala naa.+ Nduyɛ, ndu baŋa naa a kooma nduaŋ o hakila naalaŋ niŋ ni.+ 6 Mbo siiŋguu naa masaa+ a wanaa soliaa lasalaa+ le Mɛlɛka Finya ndɔ. Maa o sɔla biiloo a kpaayaa le fɛɛŋ a fɛɛŋ. Amiina.*
7 O cho hunɔɔ o yumbu yumboo niŋ,+ mi wana o wana che ndu. Wanaa chuku ndu wa bɛɛ cho ndu chɔ. Hunɔɔ ndɔɔ tosa niŋ mi waŋnda o kaalaŋ niŋ o lɛŋndeŋ choo kpou wa viiviŋndo a chaŋndo. A tonya, i nɔ le yɔŋnɔŋndo.+ Amiina.
8 Chɛhowa* Mɛlɛka dimi aa: “Ya cho Alifa a Omeka* ni.+ Mɛlɛka cho pɛŋgoo hoo, mbo wa kani masindɛ, nduyɛ mbo wa hunɔɔ wo, Mɛlɛka Kpaaya Kpou Kpou Wo.”+
9 Ya Chɔŋ, puaapilɛnɔ nyaa, naa nyaa cho o nyɛpalaa pilɔɔ niŋ ni.+ Ŋ cho o masale pilɛ leŋ niŋ,+ miŋ wa biuwɔŋndo+ le sabu Chiisu wo.+ Le mɛɛ ya wa suɛi a Mɛlɛka okɔɔ, mi wa seileŋ timbioo a Chiisu okɔɔ yɛ ya cho o lɛŋnde ibuŋgaleŋ Patimɔɔ niŋ ni. 10 Mi nyina diandaa tosa mi cha yapila o paale Masanɔɔ niŋ. Okoŋ mi tuɛinuŋ diom bɛndoo ya kɔɔli maa bulu bɛndu. 11 Mbo dimi aa: “Poonyiaa nyɛ ŋ che wo o yau simbulaa niŋ ma yɔŋ o kundala ŋɔmmɛu laŋ niŋ. Laŋ la cho ni: Ɛfisɔɔ,+ Simana,+ Pɛkamɔm,+ Tayatilua,+ Sadisi,+ Filadɛɛfiaa,+ a Lawodiisiaa.”+
12 Mi muliŋ le wana wa suɛi o ya lo wo chɔɔ. Mɛɛ ya muliŋ, mi cha nyɛla kɛsiaala lambui ŋkooliilaŋ la ŋɔmmɛu.+ 13 Mi cha vɛlɛ waŋndo isisi o nyɛla laŋ tɛɛŋ maa po wanachiee.+ Doma wa ndu lekɔɔ wo wa ndu o tualaa o peloŋ di. Nduyɛ, kola ipɛŋgɛ nda toosiaa a kooliiyoŋ ndo wa ndu o yiyaa o takpa. 14 Bolle ndɔleŋ a yiiŋii nduɛi wa i humbu fo fo maa feŋgbɛ. Hɔlta ndɔlaŋ la wa maa yeleŋ yeleŋ leyiŋ.+ 15 Peluŋ ndɔŋ wa mɛɛ chiliŋii siaŋɛi* kɛndɛ kɛndɛi+ wa nuaa woli wolioo o yiŋnde tondoleŋ niŋ yɛ. Nduyɛ diomndo wa ndu mɛɛ bal bɛndu bɛndoo wa nuaa bɔɔluuwo yɛ. 16 Looŋ ŋɔmmɛu wa ndu o ba kɛndɔɔ choo.+ Muɛi faŋii luɛiyɛi sondola tiɔɔŋii vilɛiye wa ndu fulaa o sondo.+ Hɔlla wa ndu ŋɛlɛŋgi ŋɛlɛŋgi mɛɛ paaleŋ le kiandu nuaa ŋama ŋama yɛ.+ 17 Mɛɛ ya che ndu, mi del ndu o peloŋ bɛŋgu, mi wou kpandeŋ.
Okoŋ mbo handu ya ba ndɔ kɛndɔɔ choo, mbo dimi aa: “Yɔŋ isiooŋ te. Ya cho Wana Tasoo+ a Wana Mɛɛlaa ni.+ 18 I cho yoomu.+ Mi wu,+ kɛ I miiŋgu yoomu. Nduyɛ I cho wa yoomu le fɛɛŋ a fɛɛŋ.+ Ya nɔ kiiyuŋ piɔmndo a Sɛiyo* ni.+ 19 Lelaŋ, poonyiaa sɔɔŋ ŋ che woŋ, ŋ cho yɔŋnɔŋndo suŋ suŋ ndoŋ, a ŋ cho hunɔɔ yɔŋnɔŋ ndoŋ. 20 Looŋ ŋɔmmɛu ŋ che ya o ba kɛndɔɔ woŋ, a nyɛla kɛsiaala lambui ŋkooliila ŋɔmmɛulaŋ, suɛi viaŋnaŋnde i cho ni: Looŋ ŋɔmmɛu woŋ sim le maalikɛiya o kundala ŋɔmmɛulaŋ niŋ. Nduyɛ nyɛla kɛsiaala lambuila ŋɔmmɛulaŋ la sim le kundala ŋɔmmɛulaŋ.+