Ɛsodɔɔ

14 Mi Chɛhowa dimul Muuse aa: 2 “Dimul Isɔluɛiya ma miiŋgu amakɔɔ, ma kɔ kila dɔɔŋgɔɔ Pahahalɔti lachi, Mikidɔɔ nda pee mɛŋma ihɛllo tɛɛŋ, o fondaŋ wana lo ma che Baal-sifɔŋ ndo.+ La nɔ mi la kila dɔɔŋgɔɔ loŋ o pee mɛŋma ihɛllo ikɛi. 3 Feloo cho dimi a Isɔluɛiya okɔɔ aa, ‘A cho heeloo a tuusoo o lɛŋndeŋ niŋ, nduyɛ nɛiyo laasiaŋ nda o hɔl o pollo niŋ.’ 4 I cho chɛlɔɔ mi Feloo hiou lachi a bolle kalaleŋ tosaa,+ okoŋ mbo tisa nda kɔɔli. Nyɛ ya cho Feloo a puaa nduaa chɔuwa kpou tosallo cho tosa ni mi diola nilaŋ la fula tɔɔ,+ nduyɛ mi Ichipiaŋnda sina kɛsɛ maa ya cho Chɛhowa ni.”+ Okoŋ mi Isɔluɛiya tosa lende.

5 Okoŋ kɔɔli, ma kɔ doonuŋ masaa le Ichipi kona maa Isɔluɛiya nyaanuŋ. O lepilɛ niŋ kpe, mi Feloo nda buɛiyaa nduaa siŋga kɔltaŋ.+ Ma dimi aa: “I maavɛɛ naŋ tosa yɛ hei, miŋ mal Isɔluɛiya ma fula naa o ba o chɛleŋ niŋ?” 6 Le hei, mbo bɛɛndiaa nyɛm ndɔŋ nyaanaŋ suaa naŋndoŋ, mbo chua puaa nduaa chɔuwa, ma tisa Isɔluɛiya kɔɔli.+ 7 Mbo chua nyɛm nyaanaŋ suaa naŋndoŋ ŋ kɛndɛ kɛndɔŋ 600, a nyɛm nyaanaŋ cheleŋ o Ichipi niŋ kpou. Nduyɛ, puaa chɔuwa wa o nyɛ nyaanaŋ kɛ kɛ niŋ. 8 Mi Chɛhowa chɛl le mi Feloo, masaa le Ichipi hiou lachi a bolle kalaleŋ tosaa. Le hei, mbo tisa Isɔluɛiya kɔɔli. A boondii keŋ, Isɔluɛiya wa kɔŋndaŋ nduyɛ siooŋii ve nda le.*+ 9 Teleŋ Isɔluɛiya wa o dɔɔŋgɔɔ niŋ Pahahalɔti o pee mɛŋma ihɛllo ikɛi Baal-sifɔŋ lachi wo, Feloo, nyɛm ndɔŋ nyaanaŋ suaa naŋndoŋ, puaa nduaa kua o suaa choo wa, a puaa nduaa chɔuwaa kua a ŋpelu wa, wa tuŋ hiouwɔɔ lachi a Isɔluɛiya kiltaŋ kɔɔli+ ma sɔɔŋguu nda ikɛi kpɛɛluŋ.

10 Mɛɛ Feloo nda puaa nduaa chɔuwa sɔɔŋguu Isɔluɛiya ikɛi, mi Isɔluɛiya chua hɔlla ma cha nda. Okoŋ ma sina maa nda Ichipiaŋnda cho touwɔɔ ni. Le hei, mi siooŋii bɛnduei bii nda, okoŋ ma kandu chaŋndo naa Chɛhowa chua le malaa.+ 11 Ma dimul Muuse aa: “Yɛɛnɛ ŋ tosallɛ naa hoo? Le yɛɛnɛ ŋ soli yɛ naa Ichipi ma huŋ a naa o pollo hoo niŋ le miŋ sɔla piɔmndo?+ Baa fondaŋnda nda kumbu waŋvilɛiya laŋ la cho o Ichipi niŋ te? 12 Hei kpeekpei naŋ wa num dimullo o Ichipi niŋ ni aa, ‘Mal naa o ba naa choo miŋ hiou lachi a wallo tosaa le Ichipiaŋnda.’ O cho fisa miŋ wa wallo tosaa le Ichipiaŋnda, mbo hiau piɔmndo sɔlaa o pollo hoo niŋ.”+ 13 Okoŋ mi Muuse dimul Isɔluɛiya aa: “La yɔŋ isiooŋ te.+ La sim yi, nduyɛ mi la che mɛɛ Chɛhowa cho nya piŋi o paale hauleŋ ndeŋ choo yɛ.+ Kanifuule, Ichipiaŋaa nya cho haa chɔɔ hau wa, fɛɛŋ bɛɛ la chi lɛ niŋ nda le.+ 14 La sim yi. Chɛhowa pila cho sɔŋga le nya.”+

15 Mi Chɛhowa dimul Muuse aa: “Le yɛɛnɛ nya cho yɛ chaŋndo o ya lo? Dimul Isɔluɛiya le ma hiou lachi a kɔlaŋ. 16 Siɛndi tinda numndo o pee mɛŋma ihɛllo choo le mi ma piɔunuŋ tɛɛŋ, okoŋ mi Isɔluɛiya keeku o pee mɛŋma ihɛllo tɛɛŋ o lɛŋnde vesɛileŋ choo. 17 Kɛ, I cho chɛlɔɔ mi Ichipiaŋnda tosa bolle kalaleŋ, okoŋ ma tol nya kɔɔli. Nyɛ ya cho Feloo, nyɛm ndɔŋ nyaanaŋ suaa naŋndoŋ, puaa nduaa kua o suaa choo wa, a puaa nduaa chɔuwa kpou tosallo cho tosa ni mi sɔla saŋgalaa.+ 18 Nduyɛ nyɛ ya cho Feloo, nyɛm ndɔŋ nyaanaŋ suaa naŋndoŋ, a puaa nduaa kua o suaa choo wa tosallo cho tosa ni, mi Ichipiaŋnda sina kɛsɛ maa ya cho Chɛhowa ni, okoŋ mi sɔla saŋgalaa.”+

19 Okoŋ kɔɔli, mi maalikɛinɔ Mɛlɛka tonya+ wa kɔlaŋ Isɔluɛiya lachi wo miiŋgu nda amakɔɔ. Nduyɛ, mi yumbu yumbu ikpuŋgba wa nda lachi wo faŋaŋ mbo miiŋgu nda amakɔɔ,+ 20 mbo sim Ichipiaŋnda a Isɔluɛiya tɛɛŋ.+ Nduyɛ nyumndaŋ ma wa kpeŋgei i pilɛ, mi nyɛ teŋgaa wa kpeŋgei i pilɛi.+ Ichɔl koŋ pii, kunda kɛ kɛ sɔɔŋguu chaaŋ ndɔ ikɛi le.

21 Okoŋ mi Muuse siɛndi ba ndɔɔ o pee mɛŋma ihɛllo choo.+ Nduyɛ, mi Chɛhowa tosa mi hueiyii kpaaya bɛnduii fula ba paaleŋ le chaŋ ndo ve lɔl hɔŋndo pii, mi i piɔu mɛŋndaŋ tɛɛŋ,+ okoŋ mi lɛŋnde vesɛileŋ le fula o pee kɔllo.+ 22 Mɛŋndaŋ ma wa isisi o ba kɛndɔɔ choo a o ba miallo choo maa lakpaki,+ mi Isɔluɛiya keeku tɛɛŋ o lɛŋnde vesɛileŋ choo.+ 23 Mi Ichipiaŋnda tual nda kɔɔli. Mi suaa Feloo wa kpou, nyɛm ndɔŋ nyaanaŋ suaa naŋndoŋ, a puaa nduaa kua o suaa choo wa tual Isɔluɛiya kɔɔli o peelo.+ 24 A ditɛɛŋ paale siaa* kinɛi, mi Chɛhowa tofa Ichipiaŋnda o suŋgbule leyiŋndeŋ a yumbu yumbu ikpuŋgbaa tɛɛŋ,+ okoŋ mbo tosa mi Ichipiaŋnda yɔŋnuŋ pulaŋ pulaŋ. 25 Mbo tosa mi peluŋ nyɛm ndaŋ nyaanaŋ suaa naŋndoŋ kandu fuuliaa. Le hei, i wa niŋ ikala le kɔlaŋ a laŋ. Okoŋ mi Ichipiaŋnda dimi aa: “Ŋ faŋaŋ waŋnda haa kɔɔli miŋ miiŋguŋ. Kanifuule, Chɛhowa pila cho sɔŋgaa le waŋnda haa ni.”+

26 Mi Chɛhowa dimul Muuse aa: “Siɛndi ba numndo o pee mɛŋma ihɛllo choo, le mi mɛŋndaŋ ma miiŋgu Ichipiaŋnda choo, nyɛm ndaŋ nyaanaŋ suaa naŋndoŋ, a puaa ndaa kua o suaa choo wa.” 27 O lepilɛ niŋ kpe, mi Muuse siɛndi ba ndɔɔ o pee mɛŋma ihɛllo choo. A teleŋ paaleŋ le wa siɔɔ wo kinɛi, mi mɛŋndaŋ ma kandu miiŋgoo mɛɛ ma wa yɛ. Mɛɛ Ichipiaŋnda wa nyaanɔŋndo, mi Chɛhowa miisuu nda o pee mɛŋma ihɛllo niŋ.+ 28 Mi mɛŋndaŋ ma miiŋgu, mi ma kumbu nyɛm nyaanaŋ suaa naŋndoŋ, wanaa nyaanuŋ suaa wa, a puaa chɔuwaa Feloo wa kpou, a tol Isɔluɛiya kɔɔli o pee mɛŋma ihɛllo niŋnda.+ Wana pilɛ bɛɛ chinda le.+

29 Kɛ mi Isɔluɛiya keeku o lɛŋnde vesɛileŋ choo o pee mɛŋma ihɛllo tɛɛŋ.+ Nduyɛ, mɛŋndaŋ ma wa nda isisi o ba kɛndɔɔ choo a o ba miallo choo maa lakpaki.+ 30 Mɛɛ nuaa Chɛhowa piŋi Isɔluɛiya Ichipiaŋnda o ba ni o paale leŋ choo.+ Nduyɛ, mi Isɔluɛiya cha Ichipiaŋnda a vilɛiya o pioo kɔŋgɔ. 31 Mi Isɔluɛiya cha vɛlɛ mɛɛ Chɛhowa tusi Ichipiaŋnda nyɛpalaa choo a kpaaya ndɔ bɛndoo* yɛ. Le hei, mi Isɔluɛiya kandu siooŋnde nɔɔ le Chɛhowa, nduyɛ ma duau laalaŋndo o Chɛhowa niŋ a o Muuse buɛi ndɔɔ niŋ.+