Pitɛ Tasoo
2 Lelaŋ, nyɛ o nyɛ cho nyɛ dɛnɛ wɔɔŋ,+ a choolaŋ, a mulu mulɔŋndaŋ, a nɛyɔŋndaŋ, a yiouwaŋndaŋ, la soli niko balaŋ leniŋ po. 2 Mɛɛ chɛlɛkpiaa lendiaa+ landuŋ kɔl le mɛɛyaŋ yɛ, nya bɛɛ la landuŋ kɔl le mɛɛma kpeekpeiyaŋ o diom Mɛlɛkaa niŋ, le halikpeŋ mi la hindu, nduyɛ mi la sɔla chindaa.+ 3 Kanifuule, la sina* niŋ maa Masanɔɔ cho wana kɛndɛ.
4 Waŋnda chieeya kɛɛ pou cho yoomu wo,+ kɛ ndu Mɛlɛka hɛli ni. Nduyɛ o che ndu o sɔvɛ.+ La huŋ naa ndu chua. 5 Nya bɛɛ la cho ko maa pouta cho yoomu laŋ. Nya cho chiɛi nyina Mɛlɛkaa taŋgul lo ni.+ Sabu chiɛiyo hoo taŋguluŋ ndo cho ni maa le mi la simnuŋ wanaa soliaa lasalaa, nduyɛ mi la wa salalaŋ solioo+ o Mɛlɛka lo. O Chiisu Kiliti niŋ sanaa Mɛlɛka chɛl salalaŋ ndaŋ ni.+ 6 I cho i poonyiaa o Yau Mɛlɛkaa niŋ aa: “I cho pou ya hɛli wo, pou sɔvɛ sɔvɛ saa chiiye wo kɛsi Saayɔŋ. Nduyɛ wana o wana dɔu pɛ laalaŋndo o ndu niŋ, o tulnuŋ lasiɔmbu le.”+
7 Lelaŋ, le nya o cho wana sɔviɔɔ ni, kanifuule wanaa laalaŋ nda nya cho ni. Kɛ wanaa laalaŋ te wa, “pou wanaa taŋgulaa kɛɛ wo,+ ndu simnuŋ pou kpeekpei saa taŋgullo wo ni.”+ 8 Ndu cho vɛlɛ “pou mal wana wo, a pou tosa mi waŋnda dɔɔnuŋ tumbe wo”+ ni. Le mɛɛ nda kɛɛ le diom Mɛlɛkaa diikɔŋndo yɛ nda cho delɔɔ ni. Nduyɛ hei ndii nɔ le nda yɔŋnɔŋndo ni. 9 Kɛ nya cho “kaale Mɛlɛka hɛli leŋ ni, kunda wanaa soliaa lasala lemasaa, kaale diandaa leŋ,+ a wanaa Mɛlɛka hɛli wa,+ le mi la dimul waŋnda ba o ba fee a mɛɛ o cho wana kɛndɛ yɛ.”+ O veelu nya mbo soli nya o nyumndaŋ niŋ, okoŋ mbo huŋ a nya o nyɛ ndɔ teŋgaa niŋ.+ 10 La ve paandu wanaa ndɔ le, kɛ wanaa Mɛlɛkaa nya cho niŋ ni.+ Ndoo tuiinuŋ nya paandu inyiɛɛ le, kɛ suŋ suŋ niŋ o tuiinuŋ nya inyiɛɛ.+
11 Chaaŋaa niaa kaalaa, nya cho haa mialla o chieeŋndo hoo niŋnda,+ I cho nya nyɔɔloo maa la fafaŋ yeemaŋ ŋdialloŋ,+ ŋ cho chɔulabaa a nya woŋ.+ 12 Kaala nyalaŋ la wa la kɛndɛ o chieeŋndo hoo niŋ.+ O hei niŋ, o yɔŋ bɛɛ mi waŋnda baalaŋ nya maa wanaa wɔɔŋnda nya cho ni, a nɔla ma che sɔɔŋ kɛndɛŋ nya tosa woŋ,+ okoŋ ma saŋgala Mɛlɛka o paale o cho waŋnda tofa leŋ choo.
13 Le sabu Masanɔɔ, la tusiŋ simlachiaa waŋnda chieeya kpou o ba bɛŋgu,+ o wa masa bɛndoo,+ 14 ɔɔ masaa ŋbuŋgaa. Kanifuule, nda masa bɛndoo viam ni le wanaa dɛnɛ wɔɔŋnda nyɛpalaa tusioo choo, a wanaa tosa sɔɔŋ kɛndɔŋ nda chandɔɔ.+ 15 Kanifuule, hɛnaŋ Mɛlɛkaa i cho ni le mi la tosa sɔɔŋ kɛndɔŋ, le halikpeŋ mi diɔmnda haa pɛŋgi sɔɔŋ ŋdiɔmndoŋ dimioo a nya okɔɔ.+ 16 La wa maa wanaa cho ŋchɛ le wa.+ Kɛ la puuluŋ keŋ mi la wou balaŋ o sɔɔŋ wɔɔŋndoŋ tosaa niŋ te.+ La tosa sɔɔŋ maa buɛiyaa* Mɛlɛkaa.+ 17 La ke waŋnda kpede bɛɛleŋ.+ La kaala puaapiliaa nyaa kpou.+ La nɔ siooŋii Mɛlɛkɛi,+ nduyɛ mi la nɔ bɛɛleŋ le masaa.+
18 Chiaa nɔ ma tusiŋ wanaa ndaa banaa o ba bɛŋgu, nduyɛ ma nɔ siooŋii ndɛi.+ O cho ko a nɔ kaa kɛndɔɔ, nduyɛ ma bii nya biyɔɔ kɛndɔɔ wa le, kɛ a bii nya biyɔɔ wɔɔŋndo wa bɛɛ. 19 I cho suɛi kɛndɛ te waŋndo wa pɛ nyɛ nɛiyaa a saŋgaa biuwɔŋndo, le mɛɛ o nɔ kɔl iyama walaŋndo Mɛlɛka o hɔl lɛ.+ 20 Te a lɔɔ nya pɛ le suɛi wɔɔŋii nya tosa ve mi la biunuŋ, tɔnɔ yɛɛnɛ wa yɛ o keŋ niŋ?+ Kɛ te la biunuŋ pɛ nyɛpalaa le mɛɛ nya tosa sɔɔŋ kɛndɔŋ yɛ, keŋ wa suɛi kɛndɛ Mɛlɛka o hɔl.+
21 Lelaŋ pɛŋ nya sɔla veeloo ni, kanifuule mi Kiliti bɛɛ saŋga le nya.+ Mbo kɛsul nya tamaseliiyo le mi la tol peluŋ ndɔŋ kɔɔli nyɛkɛndɛi.+ 22 O tosa haki o haki le,+ kɛlɛŋgaa niŋ te mbo dimi choolaŋ.+ 23 Mɛɛ nda wa ndu yiou yioulaŋ,+ o miŋgi maa le.+ Mɛɛ o wa saŋgaa,+ o kɔŋgɔlaŋ wana le. Kɛ mbo mal wana kialu yamaŋ+ o nɛi sakpoo choo wo nyɛ o nyɛ o ba. 24 Mbo chua hakila naalaŋ+ a dialuŋ ndɔŋ, ma baŋ ndu o yɔmndo choo,+ le halikpeŋ miŋ sɔla baŋaŋndo o hakioo niŋ, okoŋ miŋ wa nyɛ cho sakpo wo tosaa. Nduyɛ, “boolɔŋnda ndɔlaŋ la tosa ni mi la sɔla sioŋgɔɔ.”+ 25 La wa ko mɛɛ saa laasiaŋ nuaa yɛ.+ Kɛ suŋ suŋ niŋ, la miiŋgu wana manda nya wo,+ a wana nɔ yoomula nyalaŋ ndo o ibuŋ.