Maatiu

27 Mɛɛ paaleŋ le sɛ, mi masaa wanaa soliaa lasalaa a laŋgbaa kalla chuuŋgiaŋ, ma kɛɛsiaa le mɛɛ nda looku ma dii Chiisu yɛ.+ 2 Mɛɛ nda yii ndu, ma kua a ndu ma kɔ mal ndu masaa Paile o ba.+

3 Okoŋ mɛɛ Chuda, o pisi Chiisu wo che maa a kilul Chiisu yamɛi le piɔmndo sɔlaa, mi mɔnɛi bii ndu. Okoŋ mbo chua kaniŋ* humbuŋ 30 woŋ mbo miŋgul masaa wanaa soliaa lasalaa a laŋgbaa kalla.+ 4 Mbo dimi aa: “I tosa hakioo. I pisi wana tɛɛmbuu isɔɔ o isɔɔ le wo.” Ma dimul ndu aa: “O cho suɛi naa le cho keŋ te. Bahawɛi numndo cho koŋ ni!” 5 Okoŋ kɔɔli, mbo viau kaniŋ humbuŋ muŋ o chiɛi Mɛlɛkaa niŋ mbo fulaŋ, mbo kɔ landuŋ.+ 6 Kɛ mi masaa wanaa soliaa lasalaa chua kaniŋ humbuŋ muŋ ma dimi aa: “O bɛnda miŋ wou muŋ o nyɛsɔlaa cho le chiɛi Mɛlɛkaa wo choo le, kanifuule nyɛsɔlaa yɔŋguŋ le wanachioo diyɔɔ* wo o cho ni.” 7 Mɛɛ nda suukaŋ, ma soliŋ nyɛsɔlaa koŋ kpeku ma piandu yondoo wana chuauwaa ŋkpɛɛnɔɔ o ba le mialla kumbɔɔ. 8 Lelaŋ, paale hauleŋ bɛɛ, a veelu fondaŋ koŋ aa Yondo maKoŋgoo.+ 9 O hei niŋ, mi nyɛ Chɛluimaya, wana ndoo suaa le Mɛlɛka wo dimi wo peeluŋ. Mbo dimi aa: “Ma chua kaniŋ humbuŋ 30 woŋ, nyɛsɔlaa Isɔluɛiya apum chɛlaŋ choo le waŋndo piondɔɔ wo, 10 ma piandu yondoo wana chuauwaa ŋkpɛɛnɔɔ o ba, a mɛɛ Chɛhowa* dimul la yɛ.”+

11 Mi Chiisu sim Paile o hɔl, okoŋ mi Paile nyuna ndu aa: “Num cho Masa Chuuwa ni?” Mi Chiisu muli aa: “Numpila chii dimi.”+ 12 Kɛ mɛɛ masaa wanaa soliaa lasalaa a laŋgbaa kalla wa ndu sɔɔŋ hɛɛnduuwo choo, o suu nyɛ o nyɛ le.+ 13 Mi Paile nyuna ndu aa: “Mɛɛ a cho tueiyɔɔ sɔɔŋ nda cho muŋ dimioo a num okɔɔ woŋ te?” 14 Kɛ Chiisu mulul ndu le, kuŋndo bɛɛ o kuŋ te. Le hei, mi kɔndɔfillo bii Paile tau.

15 O bɔŋaŋ hiouwɔɔ choo kɛ kɛ choo, naamu Paile wo i wa ni le mbo soli wana waŋnda yeema wo o chiɛi manyumndo niŋ.+ 16 Nduyɛ a teleŋ koŋ kinɛi, ndaa nɔ po dɛnɛ wɔɔŋ wɔɔŋ bɛndoo o chiɛi manyumndo niŋ diolaŋ aa Baluabaa. 17 Mɛɛ nda chuuŋgiaŋ naapilɛ, mi Paile nyuna nda aa: “Nɛɛnɛ nya yeema yɛ mi mel nya, Baluabaa ɔɔ Chiisu nda veelu aa Kiliti wo?” 18 Paile ndoo sina maa nɛyɔŋndo tosa ni ma mal Chiisu ndu o ba. 19 Mɛɛ Paile wa ichali o kpeŋgbei* ndɔ lemasaa choo, mi laa ndɔ yɔŋ ndu yooŋgoo aa: “Wou laba o suɛi laŋunɔ cho koŋ sakpo wo niŋ te, kanifuule I saŋga bɔɔ chɔchɔl o lɔma sɔlaŋ niŋ le ndu.” 20 Mi masaa wanaa soliaa lasalaa, a laŋgbaa kalla suaa faŋgaa o lani le mi masaa mal Baluabaa,+ kɛ ma dii Chiisu.+ 21 Okoŋ mi Paile nyuna nda aa: “O nɛɛnɛ nya yeema yɛ mi mel nya?” Ma muli aa: “Baluabaa.” 22 Mi Paile nyuna nda aa: “Yɛɛnɛ ya tosa yɛ niko a Chiisu nda veelu aa Kiliti wo?” Ma muli aa: “Dii ndu o yɔmndo choo!”+ 23 Mbo nyuna nda aa: “Le yɛɛ? Suɛi wɔɔŋ kuɛɛ o tosa yɛ?” A koŋ kpou ma chɔɔlu deŋi choo choo aa: “Dii ndu o yɔmndo choo!”+

24 Mɛɛ Paile che maa o nɔla nda le, nduyɛ mi wooluŋ wooluŋndo wa hiouwɔɔ lachi, mbo kuandu mɛŋndaŋ mbo pulu bala ndɔlaŋ faŋgaa o hɔl. Mbo dimi aa: “Bala ni cho kposoŋ o piɔm po tɛɛmbuu hoo isɔɔ o isɔɔ le wo niŋ te. Nyapila tɔɔyaŋ piɔm ndɔɔ cho choo ni.” 25 Okoŋ mi waŋnda kpou dimi aa: “Tɔɔyaŋ piɔm ndɔɔ wa naa choo vɛlɛ a chuauwaa naa.”+ 26 Okoŋ mbo mel nda Baluabaa. Mbo tosa ma luaa Chiisu,+ nduyɛ mbo mal ndu nda o ba le ma kɔ dii ndu o yɔmndo choo.+

27 Okoŋ kɔɔli, mi puaa chɔuwa kua a Chiisu o bɛɛ Paile wo, nduyɛ ma chuuŋgiaa puaa chɔuwa kpou naapilɛ ma balu ndu.+ 28 Mɛɛ nda soli ndu nyɛla wa ndu lekɔɔ laŋ, ma wou ndu doma bɛndu siaŋa pum.+ 29 Ma toosiaa mɔsil lemasaa a yɔɔŋ ma wou ndu o lebol. Okoŋ, ma chua yɔmndo ma suaa ndu o ba kɛndɔɔ maa tinda lemasa. Ma beŋ ndu wulaŋ, ma mam ndu aa: “Isɛ yoo, Masa Chuuwa!” 30 Ma tufu ndu lɔluaŋ choo,+ nduyɛ ma chua yɔmndo ma wa ndu bolleŋ lɔɔ a ndu. 31 Mɛɛ nda chii ndu mamɔɔ, ma soli ndu doma bɛndu siaŋa koŋ lekɔɔ, ma miŋgi ndu nyɛla ndɔlaŋ lekɔɔ. Okoŋ, ma kua a ndu le ma kɔ baŋ ndu o yɔmndo choo.+

32 Mɛɛ nda wa kɔlaŋ a ndu, ma cha po waa Sailuini diolaŋ aa Saimɔŋ. Nduyɛ ma baŋ poo hoo le mbo kuɛ a yɔm imɔnɔ* Chiisu wo.+ 33 Mɛɛ nda fuuluu o fondaŋ pilɛ diolaŋ aa Kɔlkɔta, koŋ cho ni, Fondaŋ Lakpokpoo,+ 34 ma ke ndu muɛima nda muuliaŋ a nyɛ lolɛi pum ndo le kolɔɔ.+ Kɛ mɛɛ o dembi, mbo kɛɛ le maŋ kolɔɔ. 35 Mɛɛ nda baŋ ndu o yɔmndo choo, ma wuu kooŋ le ma piɔuviaŋ nyɛla ndɔlaŋ.+ 36 Okoŋ ma chal loŋ le ndu waa hɔlteŋ choo. 37 Ma poonyiaa vɛlɛ diomndaŋ o pɛŋgɛi choo ma handu o yɔm nda baŋ ndu wo bolleŋ, le chɔmndo sabu nda cho ndu diyɔɔ wo. Diomnda laŋ la cho ni, “Chiisu Cho hoo ni, Masa Chuuwa.”+

38 Ma baŋ vɛlɛ viiya a ŋiɔɔŋ ndu ikɛi o yɔmnde choo. Hoo wa o ba ndɔ kɛndɔɔ choo, o pilɔɔ wa o ba ndɔ miallo choo.+ 39 Wanaa wa hiouwɔɔ wa wa ndu yioulaŋ,+ ma hiiluu bolle,+ 40 ma dimi aa: “Num te dimi maa a cho chiɛi Mɛlɛkaa piɔlɔɔ ma miŋgi ndu taŋgul o palɛi yaa bɛŋgu le?+ Piŋi niko numpila! Te po Mɛlɛkaa ŋ cho ni, mɛɛ tollɔ o yɔm imɔnɔɔ* choo!”+ 41 Mi masaa wanaa soliaa lasalaa, a wanaa pɛɛku waŋnda sawala Mɛlɛkalaŋ nda bɛɛ kandu ndu mamɔɔ aa:+ 42 “Chaanda o nɔla piŋioo ni, kɛ o nɔla mbo piŋi ndupila le! Ndu cho Masaa le Isɔluɛi ni,+ mɛɛ o tollɔ niko o yɔm imɔnɔɔ* choo. Te o tol pɛ, ŋ laalaŋ a ndu. 43 O dɔu tiindaŋ ndɔɔ o Mɛlɛka niŋ. Te Mɛlɛka hini kɔl a ndu pɛ, mɛɛ o piŋi wɔ ndu.+ Kanifuule o dimi aa, ‘Po Mɛlɛkaa ya cho ni.’”+ 44 Viyaa nda baŋ o yɔmnde choo ndu ikɛi ya bɛɛ wa ndu mamɔɔ.+

45 Mi nyumndaŋ ma tual kpiŋgbi o lɛŋnde leŋ niŋ kpou, chɔŋ a lɔɔ 12:00 ipalaa,* haaa a lɔɔ 3:00 ipalaa.*+ 46 A lɔɔ 3:00 ipalaa, mi Chiisu deŋi choo choo kpeleŋ aa: “Ilai, Ilai, lama sabatani?” Koŋ cho ni, “Mɛlɛka nuu, Mɛlɛka nuu, le yɛɛnɛ ŋ mallɛ ya?”+ 47 Mɛɛ wanaa wa isisi loŋ nda apum tuei hei, ma dimi aa: “Poo hoo cho Ilaicha veeloo.”+ 48 O lepilɛ niŋ kpe, mi wana pilɛ nda tɛɛŋ nyaanuŋ mbo kɔ chua nyɛ fɔɔndiɔŋndo mbo pɔɔla ndu o muɛima waalɛiyaŋ niŋ. Okoŋ, mbo sɔɔŋa o sioŋndeŋ mbo ke Chiisu le mbo kol.+ 49 Kɛ mi a tuaa dimi aa: “Mallɔ ndu! Ŋ tofaŋndɔ te Ilaicha cho ndu hunɔɔ piŋi!” 50 Mi Chiisu deŋi vɛlɛ choo choo kpeleŋ, okoŋ mbo malnuŋ kɔl.*+

51 Okoŋ, mi kola bɛndu wa o landaa o chiɛi Mɛlɛkaa niŋndo+ tɛnda kpala,+ chɔŋ amaluaŋ haaa mbo fuuluu lebɛŋgu di.+ Mi lɛŋndeŋ le nyiiya, nduyɛ mi poutaŋ la tɛɛndiaa. 52 Mi sɛilaŋ* la kuumbuŋ, nduyɛ mi dialuŋ vilɛi wanaa Mɛlɛkaa bɔɔbɔɔ wa o lɔma piɔmndaŋ niŋnda fula chieeŋ kpendekele 53 (mɛɛ Chiisu miiŋgu yoomu, mi wanaa wa o fondaŋ lasɛiyo wa kua o chiee diandaa niŋ), nduyɛ mi wanaa bɔɔbɔɔ cha muŋ a lehɔl pɛɛŋ. 54 Kɛ mɛɛ wana bɛndu puaa chɔuwa a wanaa wa latulu a ndu ma wa Chiisu hɔlteŋ nda che lɛŋnde nyiiyaaleŋ a sɔɔŋ yɔŋnuŋ ndoŋ, mi siooŋnde bii nda tau tau ma dimi aa: “A tonya, Po Mɛlɛkaa kpeekpei o wa ni.”+

55 Waŋ laanduaa bɔɔbɔɔ wa loŋ. A wa tofaa kɔɔli kɔɔli. Kalili ndaa chɛŋ ni ma tual Chiisu kɔɔli le ndu malaa.+ 56 Meele Madaliŋ a Meele kalaa Chemisi nda Chosɛsi, a kalaa puaa Sɛbidi wa wa waŋ laanduaa haa tɛɛŋ.+

57 Mɛɛ paaleŋ le yɔŋguŋ, mi po sulaa pilɛ diolaŋ aa Choosɛ, fulaa Alimatiaa chiee huŋ. Ndu bɛɛ buɛi Chiisu wo o wa ni.+ 58 Mbo kɔ nyuna Paile le dialuŋ Chiisu woŋ.+ Okoŋ mi Paile dimi maa a ke ndu muŋ.+ 59 Mi Choosɛ chua dialloŋ muŋ, mbo simbul muŋ o feŋgbɛ diandaa kɛndɛ kɛndɔɔ niŋ.+ 60 Mbo kɔ yambu muŋ o sɛi* sɛnɛi+ buulu o tou o pouwo niŋndo. Mɛɛ o pimbul pou bɛndoo o sɛi* koŋ sondoo, mbo kuaŋnuŋ. 61 Kɛ mi Meele Madaliŋ nda Meele wo o pilɔɔ lo ichali o sɛiyo hɔlndɔ loŋ.+

62 Diimandɔɔ, o paale ndaa bɛɛndiaŋ le Paale Pɛŋgiaaleŋ ndo choo,+ mi masaa wanaa soliaa lasalaa a Falisiiya chuuŋgiaŋ ma kua o Paile lo. 63 Ma dimul ndu aa: “Fallo, ŋ loonuŋ a nyɛ laŋunɔ lachoowa koŋ dimi teleŋ o wa wɔ yoomu wo aa, ‘Te palɛi hiou pɛ i yaa, I cho miiŋgu yoomu.’+ 64 Lelaŋ, viom puaa chɔuwa ma kɔ manda sɛiyo haaa mi palɛi yaa ve hiou, yɔŋii buɛiyaa nduaa kɔ ma chiimbuu dialuŋ ndɔŋ,+ okoŋ ma dimul waŋnda choolaŋ aa, ‘O miiŋgu yoomu!’ O hei niŋ, choola laŋ la hiau niŋ bɛɛ lewɔu a la tase laŋ.” 65 Okoŋ, mi Paile dimul nda aa: “La chua puaa chɔuwa ma kɔ manda sɛiyo a mɛɛ o bɛnda a nya yɛ.” 66 Okoŋ, ma kɔ handu pouwo o sɛiyo sondoo, ma kinda ndu nyɛkɛndɛi. Nduyɛ ma mɛi puaa chɔuwa loŋ le ndu mandaa.