Polowaa
8 Taasioo cho veeloo choo choo,
Nduyɛ mi sinapɛŋgoo wa yondaa.+
2 O cho diomndo heeloo o pemboŋ choo+ o nɛilaŋ daŋgala,
Vɛlɛ a o nɛila bandulaŋ.
3 O diola kpaki chioo,
A o nɛilaŋ le helɔɔ chiee,
Taasioo cho yondaa choo choo kpeleŋ, mbo wa dimioo aa:+
4 “I cho nya kpou veeloo,
Mi wa suɛi choo choo o wana o wana lo.*
5 Nya kindu haa kɔl te wa, la kindiŋ le kɔl kaloo sɔlaa.+
Nya diɔmnda haa, la kindiŋ mi la nɔ sinapɛŋgoo o kɔlta nyalaŋ niŋ.
6 La yaŋ nilaŋ, kanifuule nyɛ ya cho dimioo wo cho o sɔvɛ.
Tonyaa sɔɔŋ ya dimi woŋ cho ni.
7 Tonyaa nyɛ ya dimi wo cho ni,
Nduyɛ I tul sɔɔŋ dɛnɛ wɔɔŋndoŋ leyɛ.
8 Sɔɔŋ ya dimi woŋ kpou cho sakpo.
Kafala kɛ kɛ cho o nyɛ ya dimi wo niŋ te.
9 Sɔɔŋ nuŋ kpou cho sakpo le wanaa nɔ sinapɛŋgoo wa,
Nduyɛ wanaa saaluŋ kɔl kaloo wa sina maa tonyaa ŋ cho ni.
10 Chua sila nuu, kɛ o cho kanii humbuei le.
Nduyɛ ma nuuviaa kɔl kaloo, kɛ o cho koolii kɛndɛ kɛndɛi le.+
11 Taasioo cho o sɔvɛ mbo hiau pouta baa kalalaŋ o peelo.*
Nyɛ o nyɛ cho nyɛ sɔvɛ, a tuu ndu a taasioo le.
12 Ya cho taasioo ni, nduyɛ naa kɔl kaloo cho latulu ni.
I nɔ kɔl kaloo a sinapɛŋgoo.+
13 Siooŋnde nɔɔ le Chɛhowa sim ni, sɔɔŋ wɔɔŋndoŋ tullo leyɛ.+
I tul saŋgalaŋndo a heelɔŋndo leyɛ,+ nduyɛ I tul bɔɔ vɛlɛ dɛnɛ wɔɔŋndo a sɔɔŋ wɔɔŋndoŋ dimioo leyɛ.+
14 Ya yɔŋgu sila kɛndɔɔ a taasi kpeekpeiyo ni.+
Ya nɔ sinapɛŋgoo+ a kpaayaa+ ni.
15 Ya tosa ni mi waŋnda wa masaa kɛndɛ,
Nduyɛ mi wanaa bɛnduaa kɛsi sawalaŋ o nɛi sakpoo choo.+
16 Ya tosa ni mi puaa masaa velu wa bɛɛ wa masaa kɛndɛ,
Nduyɛ mi laŋgbaa kalla kelu yamaŋ o nɛi sakpoo choo.
17 I kaala wanaa kaala ya wa,
Nduyɛ wanaa cho ya nuuviaa wa cho ya saalɔŋ.+
18 Ya nɔ sullo a tɔɔ ni.
Nduyɛ, ya nɔ sul cho lefafɛɛŋ ndo* a sakpoyɛi ni.
19 Kɔmnde nileŋ le bɛnda mi le hiau kooliiye, o yɔŋ bɛɛ aa koolii kɛndɛ kɛndɛi.
Nduyɛ, nyɛ wana sɔla ya o ba wo bɛnda mbo hiau kanii humbuii kɛndɛ kɛndɛi.+
20 O nɛi sakpoo choo ya kua ni.
O sandei choo ya tosa sɔɔŋ lɔɔlɔɔ ni.
21 Mi ke wanaa kaala ya wa nyɛm kɛŋ sɔviɔŋ,
Nduyɛ mi pei kondala ndalaŋ cha cha.
22 Ya fɛŋ Chɛhowa toosiaa o kandɔŋndo.+
Lɔɔpa mbo toosiaa nyɛ o nyɛ sindɛ, ya fɛŋ o toosiaa.+
24 Teleŋ mɛŋma yiŋgilɛima ve le wo,+ I wa niŋ.
Nduyɛ teleŋ peela pɔmbɔlaŋ bɛɛ la ve le wo, I wa niŋ.
25 Tuupa mi pembuŋ bɛndoŋ wa o fondaŋnda ndalaŋ,
Nduyɛ mi pembuŋ pɔmbɔŋ bɛɛ wa, I wa niŋ.
26 Boondii keŋ ndoo toosiaa wɔ lɛŋndeŋ a yondola cho lechoo laŋ te,
Kɛlɛŋgaa niŋ te puulu tasoo o lɛŋndeŋ choo.
27 Teleŋ o wa choo choo toosiaa a nyɛ o nyɛ cho leniŋ ndo,+
Nduyɛ mbo wa pɛŋgulaŋ* handɔɔ halaa tɛɛŋ a mɛŋndaŋ ndo,+ I wa loŋ.
28 Boondii o toosiaa yumbu yumboo choo choo ve,
Nduyɛ mbo tosa mi mɛŋndaŋ ma pia o fondaŋnda yiŋgilɛilaŋ ndo, I wa loŋ.
29 Mɛɛ o kɛsul pee mɛŋma ihɛllo sawaa,
Maa o huulu kpeleŋ o kɛsul ndu wo le,+
Nduyɛ mbo wa chiyii chieeŋndo hoo sim choo ve kilaa, I wa loŋ.
30 I wa ndu ikɛi maa wana chaa wallo nyɛkɛndɛiyo.+
Mi ndoo naŋ kɔl a ya+ lepaa o lepaa.
Nduyɛ teleŋ o teleŋ, mi yaa dɔɔnuŋ nyaale ndu lachi.+
31 Mi naŋ kɔl a nyɛm cho o lɛŋndeŋ choo woŋ,
Taama taama waŋnda chieeya.
32 Lelaŋ po nuu, yaŋ ya nilaŋ.
Wana o wana tol pɛ nɛila nilaŋ kɔɔli, kɔl kɛndɔɔ cho le ndu.
33 Yaŋ nilaŋ o silaa+ ma simnuŋ wana taasi.
Nduyɛ, fɛɛŋ bɛɛ kɛɛ ndu le.
34 Wana o wana wa pɛ hunɔɔ lepaa o lepaa idii puŋ* o ya lo dio,
Mbo chum o dio nuu sondoo nduyɛ mbo yaŋ ya nilaŋ,
O cho wa a kɔl kɛndɛ.
35 Kanifuule, wana saaluŋ ya pɛ mɛɛ o saaluŋ yoomoo.+
Nduyɛ, mi Chɛhowa hini kɔl a ndu.
36 Kɛ wana kɛɛ ya pɛ, kpundɔɔ cho le ndu ni.
Nduyɛ wana o wana tul la leyɛ pɛ, mɛɛ piɔmndo o kaala ni.”+