Chɔŋ

13 Tuupa mi Bɔŋaŋ Hiouwɔɔ Choo Wo fuuluu, Chiisu ndoo sina niŋ maa teleŋ ndɔɔ fuuluu+ le mbo faŋaŋ o chieeŋndo choo, mbo kuɛŋnuŋ naa Finya ndɔ chua.+ Ndoo kaala buɛiyaa nduaa wa o chieeŋndo choo wa. Nduyɛ mbo lo nda kaalaa haaa o mɛɛlulaŋ.+ 2 Teleŋ Chiisu nda buɛiyaa nduaa wa nyɛdiaa ichɔllo dioo wo, Setana* ndoo chii niŋ Chuda Isikaliɔɔ,+ po Saimɔŋ ndo dɔwɔɔ o kɔl le Chiisu pisioo.+ 3 Chiisu ndoo sina maa Finya ndɔ chii ndu nyɛ o nyɛ fee ke. Ndoo sina maa o Mɛlɛka lo o fula ni, nduyɛ maa loŋ o wa vɛlɛ miiŋgoo ni.+ 4 Le hei, mɛɛ nda wa nyɛdiaa ichɔllo dioo, mbo chaŋ mbo soliŋ doma ndɔ lechoo wo lekɔɔ mbo kɛsi. Mbo chua tawɛiyo mbo yiinuŋ o chaŋ.+ 5 Okoŋ kɔɔli, mbo wou mɛŋndaŋ o hɛŋgɛiyo niŋ, mbo kandu buɛiyaa nduaa peloŋ pulɔɔ, nduyɛ mbo wɔɔsuu muŋ a tawɛi wa ndu o yiyaa o chaŋ ndo. 6 Mbo fuuluu o Saimɔŋ Pitɛ lo. Mi Pitɛ nyuna ndu aa: “Masanɔɔ, ya ŋ pulu peloŋ ni?” 7 Mi Chiisu mulul ndu aa: “Nyɛ ya cho hoo tosaa wo, a bii niŋ ndu bila suŋ suŋ te. Kɛ a cho ndu hunɔɔ biyɔɔ bila o chilaŋ niŋ.” 8 Mi Pitɛ dimul ndu aa: “I cho chɛlɔɔ ma pulu ya peloŋ te.” Mi Chiisu dimul ndu aa: “Te a chɛl mi pulu num peloŋ te,+ mɛɛ ŋ ve niŋ diompilɛ naa num te.” 9 Mi Saimɔŋ Pitɛ dimul ndu aa: “Masanɔɔ, mɛɛ o cho ko peloŋ te ŋ pulu ya le, kɛ pulu ya vɛlɛ balaŋ a bolleŋ.” 10 Mi Chiisu dimul ndu aa: “Wana puluŋ niŋndo cho niŋ o diandaa fo. Peloŋ kinɛi o nɔ niŋ ni mbo pulu. Nduyɛ la cho a diandaa, kɛ o cho nya kpou le dendu le.” 11 Ndoo sina niŋ wana wa ndu hunɔɔ pisi wo.+ Le sabu koŋ o dimi ni aa: “O cho nya kpou le dendu le.”

12 Mɛɛ o chii nda peloŋ pulɔɔ, nduyɛ mbo miŋgi doma ndɔ lechoo wo wounɔŋ, mbo chal vɛlɛ o tibiiyo.* Mbo nyuna nda aa: “La bii pa nyɛ ya tosal nya hoo wo bila? 13 La cho ya veeloo aa, ‘Wana Pɛɛkaa’ a ‘Masanɔɔ,’ nduyɛ lende i cho ni, kanifuule wana waa lende ya cho ni.+ 14 Lelaŋ, te ya cho Masanɔɔ a Wana Pɛɛkaa wo pulu nya peloŋ pɛ,+ mɛɛ nya bɛɛ nɔ mi la pulaŋ peloŋ vellaa velle.+ 15 I kɛsul nya tamaseliiyo. Mɛɛ ya tosal nya yɛ, nya bɛɛ la tosa lende.+ 16 A tonya mi dimul nya, buɛiyo cho o bɛndu mbo hiou masanɔ ndɔɔ le, kɛlɛŋgaa mi wana nda vem ndo wa o bɛndu mbo hiou wana vem ndu wo. 17 Te la sina pɛ sɔɔŋ muŋ, nduyɛ mi la tosa muŋ, la cho wa a kɔl kɛndɛ.+ 18 O cho a nya okɔɔ kpou le ya cho suɛi le. I sina wanaa ya hɛli wa. Kɛ le mi nyɛ yau Mɛlɛkaa dimi wo peeluŋ.+ Mbo dimi aa: ‘Wana wa nyɛdiaa nuu dioo wo heelu pelei le ya nɛiyo.’*+ 19 I cho nya pɔɔ sɔɔŋ muŋ dimullo tuupa miŋ huŋ yɔŋnuŋ. Okoŋ te ŋ yɔŋnuŋ pɛ, la laalaŋ dɔɔ maa ya cho wana koŋ ni.+ 20 A tonya mi dimul nya, wana o wana chɛl pɛ wana ya vem ndo, mɛɛ ya o chɛl koŋ ni.+ Nduyɛ wana o wana chɛl la pɛ, mɛɛ wana vem ya wo o chɛl koŋ ni.”+

21 Mɛɛ Chiisu chii sɔɔŋ muŋ dimi, mi mɔnɛi pia ndu o kɔllo niŋ cha. Okoŋ mbo dimi aa: “A tonya mi dimul nya, wana pilɛ o nya tɛɛŋ cho ya hunɔɔ pisi.”+ 22 Mi buɛiyaa nduaa kandu nuaŋnaŋndo, kanifuule ndaa sina wana Chiisu wa dimioo wo le.+ 23 Buɛi Chiisu ndoo kaala tau wo+ wa ichali Chiisu ikɛi. 24 Mi Saimɔŋ Pitɛ tuulial buɛi koŋ, mbo nyuna ndu aa: “A nɛɛnɛ okɔɔ o cho yɛ suɛi?” 25 Okoŋ mi buɛi koŋ yɛŋgbaŋ Chiisu o ibuŋ mbo nyuna ndu aa: “Masanɔɔ, nɛɛnɛ cho yɛ wana koŋ?”+ 26 Mi Chiisu muli aa: “Wana ya cho kpuŋgbɛi beediiyo* pɔɔla mi ke ndu wo.”+ Mɛɛ o pɔɔla kpuŋgbɛi beediiyo, mbo chua mbo ke Chuda, po Saimɔŋ Isikaliɔɔ wo. 27 Mɛɛ Chuda bii kpuŋgbɛi beediiyo, mi Setana luɛi ndu niŋ.+ Okoŋ mi Chiisu dimul ndu aa: “Nyɛ ŋ kandu tosaa wo, keleŋa ndu tosa chɔ chɔ.” 28 Kɛ wanaa wa ichali o tibiiyo wa kpou bii bila le sabu Chiisu wa ndu hei dimullo wo le. 29 Apum wa pɛŋ yiyaŋndo maa le mɛɛ Chuda ndoo kɛsi kɔfu ŋkanioo yɛ,+ dimullo Chiisu wa ndu ni aa, “Kɔ piondu nyɛm naŋ hau ba le bɔŋaŋndo woŋ,” ɔɔ le mbo ke wanaa bala fonduaa kanioŋ ŋ tiŋ. 30 Mɛɛ o bii Chiisu beedii ikpuŋgba koŋ o ba, mbo fulaŋ chɔ chɔ. Nduyɛ nyumndaŋ maa tol niŋ.+

31 Mɛɛ o fula, mi Chiisu dimi aa: “Teleŋndo fuuluu le mi Po wanachioo sɔla saŋgalaa,+ nduyɛ mi Mɛlɛka bɛɛ sɔla saŋgalaa o ndu niŋ. 32 Mɛlɛka pila cho ndu saŋgala,+ nduyɛ o cho ndi tosa suŋ suŋ. 33 Chuauwaa niaa kaalaa, le teleŋ biŋgi koni ya cho niŋ a nya ni. La cho ya nuuviaa. Nyɛ ya dimul Chuuwa wo, ndu ko ya cho nya dimul ni, ‘Naa ya cho kɔlaŋ nda, la nɔla mi la kuɛ loŋ te.’+ 34 I cho nya sawa sɛnɛiyo ke. Ndu cho ni maa, la kaaliaŋ vellaa velle. Mɛɛ ya kaala nya yɛ,+ nya bɛɛ la kaaliaŋ lende vellaa velle.+ 35 Te la kaaliaŋ pɛ vellaa velle, waŋnda kpou cho sina maa buɛiyaa niaa nya cho ni.”+

36 Mi Saimɔŋ Pitɛ nyuna ndu aa: “Masanɔɔ, kuɛɛnɛ ŋ cho yɛ kɔlaŋ?” Mi Chiisu muli aa: “Naa ya cho kɔlaŋ nda, a nɔla ma tol la kɔɔli suŋ suŋ te. Kɛ teleŋ cho fuuluu ma tol la kɔɔli.”+ 37 Mi Pitɛ dimul ndu aa: “Masanɔɔ, le yɛɛnɛ I nɔla mi tol num kɔɔli suŋ suŋ te? I cho o bɛɛndiaŋ le mi vi le num.”+ 38 Mi Chiisu nyuna ndu aa: “Lekɛndɛi a cho o bɛɛndiaŋ le ma vi le ya? A tonya mi dimul num, tuupa mi sɔɔ koowa, a cho viinɔŋ bɛmbɔɔ le yaa maa a sina ya le.”+