Maki

13 Mɛɛ o wa fulaa o chiɛi Mɛlɛkaa niŋ, mi buɛiyaa nduaa o pilɛ dimul ndu aa: “Wana Pɛɛkaa, nuawɔ se pouta kɛndɛlaŋ a taŋgultaŋ!”+ 2 Kɛ mi Chiisu dimul ndu aa: “A che taŋgulta tɔɔmalaŋ ndaŋ? Pouwo o pilɛ bɛɛ lo niŋ o chaaŋ ndɔ choo le. Laŋ kpou la cho koombiaa.”+

3 Mɛɛ o wa ichali o Pembii Ɔlifii Ve choo, o fondaŋ o cha chiɛi Mɛlɛkaa wo, mi Pitɛ, Chemisi, Chɔŋ, a Andulu nyuna ndu nda kpeele aa: 4 “Dimullɔ naa, boondii kuɛɛnɛ sɔɔŋ muŋ cho yɛ yɔŋnɔŋ? Nduyɛ, tamasi yɛɛ yɔŋnuŋ yɛ niŋ le chɔmndo teleŋ sɔɔŋ muŋ kpou cho yɔŋnɔŋ ndo?”+ 5 Okoŋ, mi Chiisu kandu nda dimullo aa: “La mandaŋ yɔŋii wana hui nya.+ 6 Wanaa bɔɔbɔɔ cho hunɔɔ o diola nilaŋ niŋ ma dimi aa, ‘Ya cho ndu ni,’ okoŋ ma hui wanaa bɔɔbɔɔ. 7 Te la tuei pɛ a chɔulaŋ okɔɔ, vɛlɛ a konala chɔulaŋ, siooŋii bii nya le. Sɔɔŋ muŋ nɔ le yɔŋnɔŋndo fɛlɛŋ, kɛ koŋ cho wɔ lamɛɛlu le.+

8 “Lɛŋndeŋ le cho sɔŋga a lɛŋndeŋ, mi masaleŋ le sɔŋga a masaleŋ.+ Lɛŋnde nyiiyaaleŋ le wa niŋ o fondaŋnda bɔɔbɔɔ, nduyɛ mi yima bɛnduaŋ ma del.+ Sɔɔŋ muŋ kpou wa niŋ ko mɛɛ pulii vialɛi kandu nuaa wana lanɔɔ nɛiyo yɛ.+

9 “La mandaŋ. Kanifuule, waŋnda cho lakɔ a nya o toŋgola kɔɔsɔlaŋ niŋ,+ nduyɛ ma lɔɔ nya o chiɛila Chuuwa piɛi Mɛlɛka laŋ niŋ.+ A kua niŋ a nya o wanaa bɛnduaa lo a o masaa waa lo le sabu nuu. Hei cho wa maa lesei le nda.+ 10 Nduyɛ, yooŋgu kɛndɔɔ nɔ fɛlɛŋ mbo dimiŋ ba o ba fee o lɛŋndeŋ choo.+ 11 Te a kuɛ pɛ a nya o wanaa bɛnduaa lo, la buulaŋ le nyɛ nya nɔ le dimioo wo le. Kɛ nyɛ nyina Mɛlɛkaa cho nya ke a teleŋ koŋ ndo, la dimi ndu. Kanifuule, o cho nya le cho isɔɔ le, kɛ nyina Mɛlɛkaa.+ 12 Okoŋ kɔɔli, waŋndo mal niŋ bɛ ndɔ ɔɔ pɔmbɔ ndɔ waŋnda o ba ma dii ndu. Finyaa mal niŋ chuauwaa nduaa waŋnda o ba ma dii nda. Chuauwa simul niŋ wanaa velu nda wa, nduyɛ ma mal wanaa velu nda wa waŋnda o ba ma dii nda.+ 13 Waŋnda kpou a cho nya yɛleŋ tul le diola nilaŋ.+ Kɛ wana o wana biunuŋ pɛ haaa o mɛɛlulaŋ,+ o cho pioŋɔɔ sɔla.+

14 “Lelaŋ, te la che pɛ mi nyɛ nɔɔlɛi tɛɛmbuu nyɔɔŋ ndo+ sim o fondaŋ o nɔ le lasisi le wo (wana cho diomndaŋ veeloo wo soliŋ sinapɛŋgoo kpeku), mɛɛ wanaa cho Chudiaa wa kandu nyaanɔŋndo o pemboŋ choo.+ 15 Wana cho o chiɛiyo choo wo tual lɛ lɛŋ, mbo luɛi chiɛiniŋ le nyɛ o nyɛ chua le. 16 Nduyɛ wana cho o chiɛi nduɛi niŋndo miiŋgu lɛ le doma ndɔɔ chuaa le. 17 Kpundɔɔ wa niŋ bɔɔ le wanaa lafoliaa* a komsaa o palɛi keŋ niŋ!+ 18 La hiou lachi a piɛileŋ yɔŋii kilta laŋ la komal nya a sialteŋ. 19 Kanifuule, palɛi nyɛpalaa wa niŋ keŋ ni.+ Kani mi chieeŋndo kanduŋ mbo huŋ bii a hau, nyɛpalaa waa lende yɔŋnuŋndɔ le, nduyɛ fɛɛŋ bɛɛ o yɔŋnuŋ lɛ niŋ vɛlɛ le.+ 20 Te o cho mi Chɛhowa* faŋa palɛi keŋ i tiŋ lechoo le, wana o wana sɔla niŋ pioŋɔɔ le. Kɛ le sabu wanaa o hɛli wa, o cho palɛi keŋ faŋa i tiŋ lechoo.+

21 “Te waŋndo dimul nya vɛlɛ pɛ aa, ‘Mi cheŋ Kiliti nanuŋ,’ ɔɔ ‘O cho nda,’ la laalaŋ ndu le.+ 22 Kanifuule, wanaa lachoowaa dimi maa nda cho Kiliti ni wa, a wanaa lachoowaa dimi maa le Mɛlɛka nda suaa ni wa, a cho chɔnɔŋ+ ma wa walta kaamaala suu o suu tosaa le waŋnda huiyo, hali wanaa sɔla hɛlioo wa bɛɛ. 23 Lelaŋ, la wa a bɛɛndiaŋ.+ I cho nya pɔɔ sɔɔŋ muŋ kpou dimullo.

24 “Kɛ te palɛi nyɛpalaa koŋ i hiou pɛ, nyumndaŋ ma kumbu niŋ paaleŋ kpu, mi paŋgei bɛɛ i pɛŋgi diondɔɔ.+ 25 Nduyɛ, mi looŋ fula o choo choo niŋ miŋ deli. Kpaayalaŋ o choo choo niŋ la cho hiilɔŋ woku woku. 26 Okoŋ, ma che Po wanachioo+ hunɔɔ o yumbu yumboo niŋ a kpaayaa vɛlɛ a naŋɔɔ bɛndoo.+ 27 O cho maalikɛiyaa nduaa viomɔɔ o kpeŋguŋ hiɔɔloŋ kpou o lɛŋndeŋ choo, vɛlɛ a ba o ba fee o choo choo niŋ, le wanaa nduaa o hɛli wa chuuŋgiaa.+

28 “La chua wɔ tamaseliiyo a yɔm mafikiiyo okɔɔ. Te lɛuwuŋ ndɔŋ kandu dɔɔ pɛ pei sɛnɛiye solioo, la sina dɔɔ maa teleŋ tualaa fuuluu.+ 29 Nya bɛɛ, te la che pɛ sɔɔŋ muŋ yɔŋnɔŋndo, la sina maa o cho niŋ o dio.+ 30 A tonya mi dimul nya, waŋnda teleŋndo hoo chuu niŋ wu le mi sɔɔŋ muŋ kpou ŋ yɔŋnuŋ.+ 31 Choo choo a lɛŋndeŋ cho faŋaŋ,+ kɛ diomnda nilaŋ la feŋaŋ te.+

32 “Wana o wana sina paale leŋ ɔɔ hawɛi* koŋ te. Maalikɛiya o choo choo niŋ a Po wanachioo bɛɛ sina le, mɛɛ Finyaa ndupilɛ kpe.+ 33 La wa lahɔl. La wa o puɛɛnɔŋ niŋ te,+ kanifuule la sina teleŋ kpeekpeiyo le.+ 34 O cho ko maa po pilɛ. Mɛɛ o wa kɔlaŋ kelaa o lɛŋnde cheleŋ niŋ, mbo mɛi chiɛi ndɔɔ buɛiyaa nduaa o ba,+ nduyɛ mbo mel o kɛ kɛ wali o nɔ le tosaa wo. Okoŋ mbo dimul wana mɛŋgɛlaa le mbo wa lahɔl.+ 35 Lelaŋ, la wa lahɔl, kanifuule la sina paale Masanɔ chiɛiyo cho hunɔɔ leŋ te.+ Ko a paale kala ni, ko a ditɛɛŋndo ni, ko a teleŋ sɔɔ koowa wo ni, ɔɔ idiiyo puŋ ni.+ 36 Yɔŋii o huŋ a teleŋ nya ve niŋ ndu kɔl te wo mbo komal nya o luaŋ.+ 37 Nyɛ ya cho nya dimullo wo, le wana o wana ya cho ndu dimioo ni: La wa lahɔl.”+