Sam
א [Alɛfi]
119 Kɔl kɛndɔɔ cho le wanaa nɔ tɔɔyaŋ o yoomula ndalaŋ niŋ te wa,*
A cho kɔlaŋ o sawala Chɛhowa laŋ choo wa.+
2 Kɔl kɛndɔɔ cho le wanaa tual loonɔŋnda ndɔlaŋ kɔɔli,+
Nduyɛ ma nuuviaa ndu a kɔlta ndalaŋ kpou wa.+
3 A tosa isɔɔ o isɔɔ wɔɔŋ te,
Nduyɛ ma kuɛ o nɛila ndɔlaŋ choo.+
4 A dimi
Le mi waŋnda bii sawala numndaŋ nyɛkɛndɛi.+
5 I nɔ bɔɔ yeemɛi le mi simul kɔl yi,+
Le halikpeŋ mi bii sawala numndaŋ.
6 Te I tol pɛ sawala numndaŋ kpou kɔɔli,
Koŋ tosa siɔmbula bii ya le.+
7 I cho num saŋgala a kɔl sakpoo,
Te I pɛɛku pɛ a mɛɛ ŋ kialu yamaŋ o nɛi sakpoo choo yɛ.
8 I cho tosa nyɛ sawala numndaŋ la dimi wo.
Maa fɛɛŋ bɛɛ kɛɛ ya le.
ב [Bɛti]
9 Vɛɛ chua piaandoo nɔla yɛ mbo kɛsi nɛi ndɔɔ o diandaa?
O tosa hei te o wa pɛ yekeŋ le nyɛ diom numndo dimi wo tolɔɔ kɔɔli.+
10 I cho num nuuviaa a kɔl nuu kpou.
Chɛl la mi faŋaŋ o sawala numndaŋ choo le.+
12 Oo Chɛhowa, maa sɔla saŋgalaa.
Yandii pɛɛku ya sawala numndaŋ.
13 I dimul waŋnda,
A sawala numndaŋ kpou okɔɔ.
16 I kaala bɔɔ sawala numndaŋ,
I cho puɛɛnɔŋ a nyɛ ŋ dimi wo le.+
ג [Kimɛɛ]
17 Bii ya buɛi numndo nyɛkɛndɛi,
Le halikpeŋ mi wa yoomu le nyɛ ŋ dimi wo tosaa.+
18 Kumbi ya hɔltaŋ, le mi che sɔɔŋ kɔndɔfiliŋ cho
A sawala numndaŋ okɔɔ woŋ nyɛkɛndɛi.
19 Miallo ya cho o lɛŋndeŋ niŋ ni.+
Viŋ ya sawala numndaŋ te.
20 Yeemɛi cho ya le tosaa
Nyɛ sawala numndaŋ la dimi wo teleŋ o teleŋ.
21 A miŋgi wanaa heelaŋnda o nɛi,
Wanaa sendioo cho choo ma kɛɛ sawala numndaŋ nda.+
22 Kpaa waŋnda le ma pɛŋgi ya tɛɛŋndaŋndo a ya yɛleŋ tullo,
Kanifuule I diikuŋ sawala numndaŋ.
23 O yɔŋ bɛɛ mi laŋgbaa kalla chal naapilɛ le suɛi a ya,
Ya buɛi numndo I cho wa yiyaŋndo o sawala numndaŋ choo.
24 I kaala bɔɔ loonɔŋnda numndaŋ.+
Laŋ la sila ya ni.+
ד [Dalɛti]
25 I hini lɛŋ sakpo o chundoo niŋ.+
Manda yoomu nuu a mɛɛ diom numndo dimi yɛ.+
26 I dimul num a sɔɔŋ ya tosa woŋ okɔɔ, nduyɛ ma muli ya diom.
Pɛɛku ya sawala numndaŋ.+
27 Mala ya mi bii sɔɔŋ ŋ dimi woŋ bila,
Le halikpeŋ mi yiyaŋ nyɛkɛndɛi o walta numnda kɔndɔfiltaŋ choo.+
28 Nyɛ nɛiyaa tosa I hini bɛɛ I lɔl te.
Luei ya yoomuaŋ a mɛɛ diom numndo dimi yɛ.
29 Mala ya I wa wana lachoowa le.+
Tuiinuŋ ya inyiɛɛ ma ke ya sawala numndaŋ.
30 I kɛɛsiaa le mi wa sakpo.+
I sina maa yamaŋ ŋ kialu woŋ cho sakpo.
31 I bii loonɔŋnda numndaŋ kpiŋ.+
Oo Chɛhowa, tosa mi siɔmbulaŋ la bii ya le.+
32 I cho nyaanɔŋ o nɛi yaa ya o sawala numndaŋ ndo choo,
Kanifuule a bɛɛndiaa fondaŋndo ya o kɔl le mi la wa loŋ.*
ה [Hee]
33 Oo Chɛhowa, pɛɛku ya+ mɛɛ ya looku mi bii sawala numndaŋ yɛ,
Okoŋ mi tol nyɛ ŋ pɛɛku ya wo kɔɔli haaa o mɛɛlulaŋ.+
34 Ke ya sinapɛŋgoo,
Le halikpeŋ mi bii sawala numndaŋ,
Nduyɛ mi tosa nyɛ la dimi wo a kɔl nuu kpou.
35 Mala ya mi kuɛ o nɛi yaa wana o sawala numndaŋ ndo choo,+
Kanifuule I hɛnaŋ bɔɔ kɔlaŋ lechoo.
36 Mala ya mi handu kɔllo o loonɔŋnda numndaŋ choo,
Kɛ o wa o yeemaŋ nuŋ choo kinɛi le.+
37 Faŋa ya hɔlla o sɔɔŋ fondoŋ choo.+
Manda ya mi wa yoomu o nɛi numndo choo.
38 Peelu buŋgɛi ŋ chuel buɛi numndo ve,
Le halikpeŋ mi waŋnda nɔ siooŋii numnde.
39 Faŋa ya kɔllo o siɔmbula bii ya laŋ choo,
Kanifuule yamaŋ numndoŋ naŋ bɔɔ.+
40 Yeemɛi cho ya bɔɔ le sawala numndaŋ.
Manda ya mi wa yoomu a mɛɛ sakpoyɛi numnde cho yɛ.
ו [Wau]
42 Okoŋ mi mulul wana cho ya mamɔɔ wo,
Kanifuule I dɔu tiindaŋndo o nyɛ ŋ dimi wo niŋ.
43 Faŋa ya diomnda tonya laŋ o sondo le,
Kanifuule I tiindaŋ o yamaŋ ŋ kialu woŋ niŋ.
44 I cho wa sawala numndaŋ biyɔɔ,
Le fɛɛŋ a fɛɛŋ.+
45 I cho wa balɔɔ o fondaŋ nyɛ o nyɛ yɔŋnuŋ ya le wo,+
Kanifuule I cho sɔɔŋ ŋ dimi woŋ tosaa.
46 I cho isɔɔ a loonɔŋnda numndaŋ okɔɔ masaa waa o hɔl,
Siɔmbula bii ya le.+
47 I nɔ bɔɔ yeemɛi le sawala numndaŋ.
A tonya, I kaala laŋ.+
ז [Sayiŋ]
49 Loonuŋ a diomnda ŋ dimul ya buɛi numndo laŋ,
Diomnda ŋ ke ya tiindaŋndo laŋ.
50 Hei ke ya kɔl dɛɛniaa o nyɛ ni palaa niŋ ni,+
Kanifuule nyɛ ŋ dimi wo tosa mi wa yoomu.
51 Wanaa heelaŋnda cho ya mamɔɔ kpeekpei,
Kɛ I feŋaŋ o sawala numndaŋ choo le.+
53 Kɔllo tuulu ya ŋama ŋama a wanaa dɛnɛ wɔɔŋaa
Cho sawala numndaŋ kiɔɔ wa.+
54 Sawala numndaŋ la cho ko maa ŋchondu le ya,
Ba o ba ya wa pɛ.*
55 Oo Chɛhowa, ichɔl mi loonuŋ a diola numndaŋ,+
Le halikpeŋ mi tosa nyɛ sawala numndaŋ la dimi wo.
56 Hei ya tosa teleŋ o teleŋ ni,
Kanifuule I cho sɔɔŋ ŋ dimi woŋ tosaa.
ח [Hɛti]
57 Chɛhowa cho buŋgɛi nii ni.+
I chua buŋgɛi le nyɛ ŋ dimul la wo tosaa.+
58 I nyɔɔlu num a kɔl nuu kpou.+
Tuiinuŋ ya inyiɛɛ+ a mɛɛ ŋ chua buŋgɛi yɛ.
59 I mɛɛndaŋ nɛila nilaŋ,
Le halikpeŋ mi miiŋgu amakɔɔ mi kuɛ o loonɔŋnda numndaŋ choo.+
60 I doonuŋ tamala
Le tosaa nyɛ sawala numndaŋ la dimi wo le.+
61 Yuei wanaa dɛnɛ wɔɔŋnda pinda pindaŋ ya,
Kɛ I puɛɛnuŋ a sawala numndaŋ te.+
62 Mi chɛŋ a ditɛɛŋndo le num balikaa mello,+
Le mɛɛ ŋ kialu yamaŋ o nɛi sakpoo choo yɛ.
64 Oo Chɛhowa, kaala lo lechoo numndo cho o piaa cha o lɛŋndeŋ choo.+
Pɛɛku ya sawala numndaŋ.
ט [Tɛti]
65 Oo Chɛhowa, a bii ya buɛi numndo nyɛkɛndɛi,
A mɛɛ diom numndo dimi yɛ.
66 Pɛɛku ya mi nɔ kɔl kaloo a sinapɛŋgoo,+
Kanifuule I dɔu tiindaŋ nuu o sawala numndaŋ niŋ.
67 Tuupa mi saŋgaa tual la choo, yaa mal niŋ nɛi numndo.
Kɛ suŋ suŋ, I cho tosaa nyɛ ŋ dimi wo.+
68 A cho wana kɛndɛ+ nduyɛ walta numndaŋ la naŋ bɔɔ.
Pɛɛku ya sawala numndaŋ.+
69 Wanaa heelaŋnda cho choolaŋ dimioo a ya okɔɔ le ya tɔɔ tɛɛmbuuwo.
Kɛ I cho tosa nyɛ ŋ dimul la wo a kɔl nuu kpou.
71 I naŋ bɔɔ kɔl mi kei o nyɛkindilaa bɛŋgu,+
Le halikpeŋ mi pɛɛku a sawala numndaŋ okɔɔ.
י [Yodi]
73 A bala numndaŋ ŋ toosiaa ya ni.
Ke ya sinapɛŋgoo,
Le halikpeŋ mi pɛɛku a sawala numndaŋ okɔɔ.+
74 Mɛɛ wanaa nɔ siooŋii numnde wa che ya ma duaunuŋ nyaale,
Kanifuule diom numndo ya tiindaŋ ni.+
75 Oo Chɛhowa, I sina maa o nɛi sakpoo choo ŋ kialu yamaŋ ni,+
Nduyɛ o nɛi tonyaa choo ŋ tusi ya nyɛpalaa choo ni.+
76 Maa kaala lo lechoo numndo+ dɛɛniaa ya kɔllo,
A mɛɛ ŋ chuel ya buɛi numndo buŋgɛi yɛ.
78 Maa siɔmbulaŋ la bii wanaa heelaŋnda,
Kanifuule a cho ya sɔɔŋ wɔɔŋndoŋ tosallo o fondo fuuwo choo.
Kɛ ya, I cho wa yiyaŋndo o sɔɔŋ ŋ dimi woŋ choo.+
79 Maa wanaa nɔ siooŋii numnde wa miiŋgu ya o ibuŋ,
Wanaa sina loonɔŋnda numndaŋ nda.
כ [Kafi]
81 Yeemɛi cho ya bɔɔ le mi sɔla pioŋɔɔ num o ba,+
Kanifuule diom numndo ya tiindaŋ ni.
82 I cho lehɔl o nɛi le mi nyɛ ŋ dimi wo peeluŋ,+
Mi wa nyunaŋndo aa: “Teleŋ kuɛɛ ŋ cho yɛ ya kɔllo dɛɛniaa?”+
83 I cho ko maa bɔlɔ yau visi kumnde veesiaa wo,
Kɛ I puɛɛnuŋ a sawala numndaŋ te.+
84 Le vɛɛ kpɛ ya buɛi numndo cho yɛ num chum?
Teleŋ kuɛɛ ŋ cho yɛ wanaa cho ya nyɛpalaa tusioo choo wa yamɛi kilul?+
85 Wanaa heelaŋnda, a kɛɛ sawala numndaŋ nda
Cho ya sooŋndaŋ tuuwo.
86 Sawala numndaŋ kpou wana nɔla ma tiindaŋ ndaŋ.
Waŋnda cho ya nyɛpalaa tusioo choo o fondo fuuwo choo. Yandii, mala ya!+
87 Ndoo lo niŋ chobe mi ndaa faŋa ya o lɛŋndeŋ choo bau,
Kɛ I mel nyɛ ŋ dimi wo tosaa le.
88 Le sabu kaala lo lechoo numndo, manda ya mi wa yoomu,
Le halikpeŋ mi tosa nyɛ loonɔŋnda numndaŋ la dimi wo.
ל [Lamɛdi]
89 Oo Chɛhowa, le fɛɛŋ a fɛɛŋ,
Nyɛ ŋ dimi wo cho hiouwɔɔ lachi a waa o choo choo niŋ.+
90 Sakpoyɛi numnde cho wa le fɛɛŋ a fɛɛŋ.+
A toosiaa lɛŋndeŋ mi le sim yi, le halikpeŋ mi le hiou lachi a waa.+
91 Num kɛɛsiaa ni le miŋ* wa haaa a paale hauleŋ ndeŋ,
Kanifuule nyɔɔŋ muŋ kpou, buɛiyaa numnda ŋ cho ni.
92 Te yaa kaala sawala numndaŋ te,
I wa piɔmndo sɔla teleŋ ya wa o saŋgaa niŋndo.+
93 Fɛɛŋ bɛɛ I puɛɛnuŋ a sɔɔŋ ŋ dimi woŋ okɔɔ le,
Kanifuule muŋ tosa ni mi wa yoomu.+
95 Wanaa dɛnɛ wɔɔŋnda cho chumndo le ya tɛɛmbuuwo.
Kɛ I kɛsi kɔl nuu kpou o loonɔŋnda numndaŋ choo.
96 I che niŋ nyɔɔŋ tau ŋ cho walaŋ ndoŋ,
Kɛ sawala numndaŋ la bɛnda mi la hiau nyɛm muŋ poloŋ.
מ [Mɛmi]
97 I kaala bɔɔ sawala numndaŋ!+
Lepaa o lepaa, mi yiyaŋ o laŋ choo.+
98 Sawala numndaŋ la tosa mi nɔ taasioo mbo hiau yaamɔɔwaa niaa,+
Kanifuule le teleŋ o teleŋ la cho ya o ba.
99 I nɔ sinapɛŋgoo mbo hiau wanaa niaa pɛɛkaa kpou,+
Kanifuule mi yiyaŋ o loonɔŋnda numndaŋ choo.
100 I cho sɔɔŋ tosaa a taasi mbo hiau waŋ banaa,
Kanifuule I cho sɔɔŋ ŋ dimi woŋ tosaa.
101 I yeema mi kuɛ o nɛi dɛnɛ wɔɔŋ kɛ kɛ choo le,+
Le halikpeŋ mi tosa nyɛ diom numndo dimi wo.
102 I feŋaŋ o kɛɛsiaala numndaŋ choo le,
Kanifuule a pɛɛku ya nyɛ ya nɔ mi tosa wo.
103 Sɔɔŋ ŋ dimi woŋ ŋ yeela bɔɔ ya o lediɔɔmu.
Ŋ yeela ya o sondo mbo hiau liaaŋ!+
104 Sɔɔŋ ŋ dimi woŋ tosa ni mi tosa sɔɔŋ a taasi.+
Lelaŋ ya tul nɛi lachoowa kɛ kɛ leyɛ ni.+
נ [Nuŋ]
106 I chua buŋgɛi mi mɛnaŋ po, nduyɛ I cho tosa nyɛ ya dimi wo,
Le sawala numnda cho sakpo laŋ diikɔŋndo.
107 I cho bɔɔ o nyɛ nɛiyaa niŋ.+
Oo Chɛhowa, manda yoomu nuu a mɛɛ diom numndo dimi yɛ.+
108 Oo Chɛhowa, yandii chɛl sala ya cho solioo o numndo a kɔllo kpou le num saŋgalaa wo,+
Nduyɛ ma pɛɛku ya sawala numndaŋ.+
109 Le teleŋ o teleŋ yoomu nuu cho o kpundɔɔ niŋ,
Kɛ I puɛɛnuŋ a sawala numndaŋ okɔɔ le.+
110 Mi wanaa dɛnɛ wɔɔŋnda hendul la yaŋɔɔleŋ,
Kɛ I feŋaŋ o sɔɔŋ ŋ dimul la woŋ choo le.+
111 I chua loonɔŋnda numndaŋ maa nyɛm kɛŋ nuŋ lefafɛɛŋ,
Kanifuule laŋ la tosa ni mi dɔɔnuŋ nyaale.+
112 I kɛɛsiaŋ o kɔl le mi diikuŋ sawala numndaŋ
Le teleŋ o teleŋ, haaa o mɛɛlulaŋ.
ס [Samɛki]
113 I tul wanaa kɔlta ndalaŋ la cho la piɔuwaŋ tɛɛŋ nda leyɛ.+
Kɛ ya, I kaala sawala numndaŋ.+
115 Nya wanaa dɛnɛ wɔɔŋnda, la faŋaŋ ya ikɛi,+
Le halikpeŋ mi diikuŋ sawala Mɛlɛka nuu.
Tosa mi tiindaŋ nuu simnuŋ nyɛ fondoo le.*+
118 A kɛɛ wanaa mulul sawala numndaŋ kɔɔ wa kpou,+
Kanifuule wanaa lachoowaa a wanaa huiyaa nda cho ni.
119 A viou wanaa dɛnɛ wɔɔŋaa cho o lɛŋndeŋ choo wa kpou, mɛɛ nda viau nuaa billo o sallo choo yɛ.+
Lelaŋ ya kaala loonɔŋnda numndaŋ ni.
120 Siooŋii numnde tosa mi nyiiya kpa kpa.
Siooŋnde cho ya le yamaŋ ŋ kialu woŋ.
ע [Ayiŋ]
121 I tosa nyɛ cho sakpo wo.
Mal la wanaa handu ya nyɛkindilaa choo wa o ba le!
122 Chua buŋgɛi maa a cho ya buɛi numndo mala.
Maa wanaa heelaŋnda tusi ya nyɛpalaa choo le.
123 Hɔltaŋ la yɔŋnuŋ ya yifidii a nuaa o nɛi le ma piŋi ya,+
Vɛlɛ a chumndo le diomnde numnde mɛyaale sakpo leŋ peeloo.+
125 Buɛi numndo ya cho ni. Ke ya sinapɛŋgoo,+
Le halikpeŋ mi sina loonɔŋnda numndaŋ.
126 Oo Chɛhowa, teleŋndo fuuluu le ma tosa isɔɔ,+
Kanifuule waŋnda tɛɛmbuu sawala numndaŋ.
127 Le saboo hoo ya kaala sawala numndaŋ ni
Mbo hiau kooliiyoŋ, hali kooliŋ kɛndɔŋ bɛɛ.+
128 Lelaŋ, I che pɛɛkula numndaŋ kpou maa sɔɔŋ tonya.+
I tul nɛi lachoowaa kɛ kɛ leyɛ.+
פ [Pe]
129 Loonɔŋnda numndaŋ la cho bɔɔ la sɔvɛ.
Lelaŋ ya diikuŋ ndaŋ ni.
130 Mi diomnda numndaŋ la yɔŋgu nyɛ teŋgaa te la tɛɛsiaŋ pɛ nyɛkɛndɛi,+
Nduyɛ mi la ke wanaa nɔ sinapɛŋgu le wa taasioo.+
131 I kumbi sondo nuu wakpa mi yoomu fuu,
Kanifuule I kaala bɔɔ sawala numndaŋ.+
132 Muliŋ o ya lo ma tuiinuŋ ya inyiɛɛ,+
A mɛɛ ŋ tosal wanaa kaala diola numndaŋ nda le teleŋ o teleŋ yɛ.+
133 Maa nyɛ ŋ dimi wo manda kelala nilaŋ.
Maa suɛi wɔɔŋnde nɔ ya kpaayaa choo le.+
134 Piŋi ya wanaa tusi ya nyɛpalaa choo wa o ba,
Nduyɛ I cho tosa sɔɔŋ ŋ dimul la woŋ.
135 Naŋ kɔl a buɛi numndo,+
Nduyɛ ma pɛɛku ya sawala numndaŋ.
136 Mɛmiaŋ ma tol la kpasu kpasu,
Kanifuule waŋnda cho sawala numndaŋ diikɔŋ te.+
צ [Sadi]
137 Oo Chɛhowa, a cho sakpo.+
Nduyɛ, o nɛi tonyaa choo ŋ kialu yamaŋ ni.+
138 Loonɔŋnda ŋ yɔŋgu laŋ la cho sakpo,
Nduyɛ wana nɔla ma tiindaŋ ndaŋ a kɔllo kpou.
139 Sɛmbɛ ya nɔ le num ndo cho ya lomɔɔ maa leyiŋ,+
Kanifuule yaamɔɔwaa niaa puɛɛnuŋ a diomnda numndaŋ okɔɔ.
141 I cho wana sɔvɛ le nduyɛ waŋnda chua ya chɔdɔ.+
Kɛ I puɛɛnuŋ a sɔɔŋ ŋ dimi woŋ okɔɔ le.
143 Mi che bɛɛ mi nyɛkindilaa a tɔɔndaŋndaŋ la komal la,
Kɛ I kaala wɔ sawala numndaŋ kɛ.
144 Loonɔŋnda numnda sakpo laŋ la cho le fɛɛŋ a fɛɛŋ.
Ke ya sinapɛŋgoo+ le mi hiou lachi a waa yoomu.
ק [Kilofi]
145 Oo Chɛhowa, I veelu num a kɔl nuu kpou. Yandii, mulul la.
I cho nyɛ sawala numndaŋ la dimi wo tosa.
146 I veelu num le malaa. Yandii, piŋi ya!
I cho nyɛ loonɔŋnda numndaŋ la dimi wo tosa.
147 Mi tiandu a ditɛɛŋ paale siaa le mi chaŋ naa num chua le malaa,+
Kanifuule diomnda numndaŋ ya tiindaŋ ni.
148 Mi wa lahɔl tuupa ditɛɛŋndo,
Le halikpeŋ mi yiyaŋ o diomnda numndaŋ choo.+
149 Yaŋ ya nilaŋ le sabu kaala lo lechoo numndo.+
Oo Chɛhowa, manda yoomu nuu a mɛɛ tonya numndo cho yɛ.
150 Wanaa yɔŋguŋ o sɔɔŋ lasiɔmboŋ tosaa niŋnda sɔɔŋguu ya ikɛi.
A cho levil a sawala numndaŋ.
152 Paandu niŋ pa ya pɛɛku a loonɔŋnda numndaŋ okɔɔ ni.
Nduyɛ, a kɛsi laŋ le mi la wa lefafɛɛŋ.+
ר [Luɛsi]
153 Chɔ nyɛkindilaa cho ya choo wo nduyɛ ma piŋi ya,+
Kanifuule I puɛɛnuŋ a sawala numndaŋ te.
154 Manda ya nduyɛ ma piŋi ya.+
Manda yoomu nuu a mɛɛ ŋ chua buŋgɛi* yɛ.
155 Wanaa dɛnɛ wɔɔŋnda sɔla niŋ pioŋɔɔ le,
Kanifuule a kindiŋ le ma bii sawala numndaŋ te.+
156 Oo Chɛhowa, nyiɛɛyii numnde cho bɔɔ,+
Manda yoomu nuu a mɛɛ sakpoyɛi numnde cho yɛ.
157 Yaamɔɔwaa niaa, a wanaa tusi ya nyɛpalaa choo wa cho bɔɔ.+
Kɛ I feŋaŋ o loonɔŋnda numndaŋ choo le.
158 I che wanaa mulu muluaŋnda maa nyɛ wɔɔŋ wɔɔŋndo,
Kanifuule a tosa nyɛ ŋ dimi wo le.+
159 Oo Chɛhowa, nuawɔ se mɛɛ ya kaala sɔɔŋ ŋ dimi woŋ yɛ!
Manda yoomu nuu a mɛɛ kaala lo lechoo numndo cho yɛ.+
160 Nyɛ o nyɛ cho a diom numndo okɔɔ, tonyaa o cho ni.+
Nduyɛ yamaŋ ŋ kialu o nɛi sakpoo choo woŋ kpou cho le fɛɛŋ a fɛɛŋ.
ש [Siŋ] ɔɔ [Shiŋ]
161 Laŋgbaa kalla cho ya nyɛpalaa tusioo choo+ o fondo fuuwo choo,
Kɛ I nɔ bɔɔ bɛɛleŋ le nyɛ ŋ dimi wo.+
162 I dɔɔnuŋ nyaale le nyɛ ŋ dimi wo,+
Mɛɛ waŋndo saaluŋ nuaa nyɛm baa kalaŋ tau tau yɛ.
163 I tul choolaŋ leyɛ. I tul laŋ bɔɔ leyɛ.+
I kaala sawala numndaŋ.+
164 Mi saŋgala num bɛmbɔɔ le ŋɔmmɛu o paaleŋ niŋ,
Kanifuule o nɛi sakpoo choo ŋ kialu yamaŋ ni.
165 Kɔl nyulu bɛndoo pila wa le wanaa kaala sawala numndaŋ nda ni.+
Nyɛ o nyɛ tosa ma boŋ te.
166 Oo Chɛhowa, I tiindaŋ o walta numnda piŋiaa laŋ niŋ,
Nduyɛ I cho sawala numndaŋ diikɔŋndo.
167 I cho nyɛ loonɔŋnda numndaŋ la dimi wo tosaa,
Nduyɛ I kaala laŋ bɔɔ.+
168 I cho sɔɔŋ ŋ dimi woŋ tosa vɛlɛ a loonɔŋnda numndaŋ,
Kanifuule nyɛ o nyɛ ya cho tosaa a sina.+
ת [Tau]
169 Oo Chɛhowa, maa tuei chaŋ ya cho naa num chua le malaa wo,+
Ke ya sinapɛŋgu cho o diom numndo niŋndo.+
170 Maa nyuna ya cho num le ya malaa wo fuuluu naa num chua.
Yandii piŋi ya, a mɛɛ ŋ chua buŋgɛi* yɛ.
171 Maa I wa num saŋgalaa le teleŋ o teleŋ,+
Kanifuule a pɛɛku ya sawala numndaŋ.
172 I cho chondei soli a nyɛ ŋ dimi wo,+
Kanifuule sawala numndaŋ kpou la cho sakpo.
174 Oo Chɛhowa, yeemɛi cho ya bɔɔ le mi sɔla pioŋɔɔ num o ba,
Kanifuule I kaala sawala numndaŋ.+
175 Tosa mi wa yoomu le halikpeŋ mi saŋgala num.+
Maa nyɛ ŋ kɛɛsiaa le tosaa wo manda ya.