Ditɔnɔmii
32 “Nya cho o choo choo niŋnda kpou, la yaŋ ya nilaŋ mi soo,
Nduyɛ mi nya cho o lɛŋndeŋ choo wa tuei nyɛ ya cho dimioo wo.
2 Pɛɛkula nilaŋ la cho wa chuchɔŋndo mɛɛ piɔɔ chuchu nuaa yɛ,
Mi diomnda nilaŋ la luɛi nya o lani mɛɛ mɔmndo chuchuŋ nuaa yɛ.
La wa niŋ mɛɛ piɔɔ yuuyuu wo chuchuŋ nuaa o bil puiyaa choo yɛ,
Nduyɛ, mi la wa mɛɛ piɔɔ bɛndoo sia o yɔmnde choo yɛ.
3 I cho waŋnda dimul a diola Chɛhowa laŋ okɔɔ.+
La dimul waŋnda a tɔɔmayɛi Mɛlɛka naa okɔɔ.+
4 Pou Kpoowa Bɛndoo Mɛlɛka cho ni, nduyɛ sɔɔŋ o tosa woŋ cho walaŋ,+
Kanifuule, nɛila ndɔlaŋ kpou la cho sakpo.+
Mɛlɛka lo o lediom ndo o cho ni,+ nduyɛ fɛɛŋ bɛɛ o tosa lakafa le.+
Mɛlɛka nɔ tonyaa nduyɛ mbo wa sakpo wo o cho ni.+
5 Nda tosa yɔŋ wɔɔŋndo ni.+
A cho chuauwaa ndɔ le, nda tosa biondɔŋndo ni.+
Wanaa tuunduɛiya a wanaa dɛnɛ wɔɔŋnda nda cho ni.+
Baa o cho ndu le cho Finya nya tosa mi la wa yoomu wo le?+
O cho ndu le toosiaa nya mbo tosa mi la sim yi le?
7 La loonuŋndɔ a palɛi paanduei okɔɔ,
Mi la loonuŋ a waŋnda o wɔsila hiou laŋ niŋ.
La nyuna wɔ finyaa nyaa, a cho nya dimul a ndi okɔɔ.+
Nduyɛ mi la nyuna waŋ bɛnduaa, a cho nya tɛɛsial a ndi okɔɔ.
Mbo balu ndu silɔ le ndu mandaa, nduyɛ mbo bii ndu nyɛkɛndɛi.+
Mbo manda ndu, mɛɛ o manda hɔlte ndɔle kulteŋ yɛ.+
11 Mɛɛ kowɔɔ taŋgul nuaa waaŋnde ndɔleŋ choo choo pɔ,
Mbo wa balɔɔ chuauwaa nduaa choo,
Mbo pɛŋgɛla kumbaŋnda ndɔlaŋ,
Mbo chua chuauwaa nduaa nduyɛ mbo kuɛ a nda yɛ,+
Mɛlɛka o mɛlɛka cheleŋ ve a ndu latulu le.+
13 Mi Mɛlɛka tosa mbo kua o fondaŋnda filioŋndaŋ o lɛŋndeŋ choo,+
Le halikpeŋ mbo de nyɛm kuamaŋ cho yondoo niŋndoŋ.+
Mbo ke ndu lɛma wa fulaa o pouwo niŋndaŋ,
A chuɛima wa fulaa o pou kala kalaa niŋndaŋ.
14 Mbo ke ndu bɔtɛiyaŋ* a milikiima* chɔluaa,
Latulu a saa chelulɛiyaa* kɛndɛ kɛndiaa,
Saa konduaa Baasiaŋ, chuiŋaa tooyiaa,
A witiiŋ kɛndɛ kɛndɔŋ latulu,+
Nduyɛ mbo kol muɛima makilepiiyaŋ.
15 Mɛɛ Chɛsulɔŋ* sɔla kpaayaa, mbo luɛi nilakalulaŋ.
Ma sɔla kpaayaa a nyɛdiaa tau tau, nduyɛ ma chelul chelullo pila.+
Le hei, mbo kɛɛ Mɛlɛka, wana toosiaa ndu wo,+
Nduyɛ mbo pɛɛsa Pou Kpoowa piŋi ndu wo.
16 Ma tosa mbo tuulu kɔl mɛɛ nda muliŋ mɛlɛkaa cheleŋnda sooluuwo.+
Ma tɛɛmbuu ndu kɔl a nyɛm nɔɔlɛiyoŋ.+
17 O cho Mɛlɛka le ndaa solul salalaŋ te, kɛ nyinaa wɔɔŋnda,+
Mɛlɛkaa ndaa sina le wa.
A sɛnɛiyaa nda saaluŋ nda,
Mɛlɛkaa finyaa ndaa mamaa ndaa sina le wa.
18 A puɛɛnuŋ a Pou Kpoowaa,+ o cho finya numndo.
Nduyɛ, a loonuŋ a Mɛlɛka toosiaa numndo le.+
19 Mɛɛ Chɛhowa che hei, mbo kɛɛ nda.+
Kanifuule, puaa nduaa a chuaa nduaa laanduaa tɛɛmbuu ndu kɔl.
20 Lelaŋ mbo dimi aa, ‘I cho nda hɔlte nileŋ faŋa kɔɔli,+
Okoŋ mi che nyɛ cho yɔŋnɔŋ a nda wo.
21 Ma tosa mi tuulu kɔl mɛɛ nda muliŋ mɛlɛkaa lachoowaa sooluuwo.+
Ma tɛɛmbuu ya kɔl a piɔmaa ndaa nɔɔlɛiya.+
Lelaŋ, I cho tosa ma paŋala wanaa cho a sɔvɛ le wa.+
Nduyɛ, mi tosa ma dɔɔnuŋ tumbe a kaale cho nyɛ o nyɛ le leŋ.+
22 Kanifuule, kɔl ni tuuwo cho ko mɛɛ yiŋndeŋ le wa nuaa biyɔɔ wule wule yɛ,+
Le cho lɛŋndeŋ lomɔɔ a nyɛ o nyɛ cho lechoo,
Nduyɛ mi le lom fondaŋnda pemboŋ sim choo laŋ.
23 I cho tosa mi nyɛ nda palaa chɔɔluŋ,
Nduyɛ, mi vii vii nda a chiŋɔma niaŋ.
I cho visiaa biyaa yɔŋ nda tɛɛŋ,+
A kɛuwaa wɔɔŋ wɔɔŋaa sasuŋ o chundoo niŋnda.
25 Te a fula pɛ o bɛɛ, muɛi faŋnde cho nda chii.+
Nduyɛ te a wa pɛ chiɛiniŋ, chua piaandu ni, yufuaanɔ ni,
Chuaambɔ ni, bɛndu yuu ni,+
Nda kpou sioŋnde+ cho nda biyɔɔ.
26 Yaa nɔla mi dimi aa: “I cho nda saŋɔɔ.
I cho tosa mi diola ndalaŋ la nyum waŋnda chieeya tɛɛŋ pɔli.”
27 Kɛ I wa yiyaŋndo a nyɛ yaamɔɔwaa ndaa ndaa dimi niŋndo.+
Kanifuule, a wa ndi chua o nɛi cheleŋndo choo.+
A wa dimi aa: “Ŋ yem nda a kpaaya naa.+
O cho Chɛhowa le tosa sɔɔŋ muŋ kpou le.”
28 Kanifuule, Isɔluɛiya cho kaale nɔ sinapɛŋgu le.*
Nduyɛ wana o wana nɔ kɔl kalu nda tɛɛŋ te.+
29 Te ndoo yɔŋ pɛ mi ndaa wa wanaa taasi,+ a wa yiyaŋ a hei okɔɔ!+
A wa yiyaŋ a fulamakɔɔlila ndalaŋ okɔɔ.+
30 Vɛɛ wana pilɛ nɔla yɛ mbo tisa ŋwaŋ 1,000 kɔɔli,
nduyɛ mi wanaa ŋiɔɔŋ tou waŋnda 10,000?+
Mɛɛ dɔɔ mi Pou Kpoowa ndaa pisi nda,+
Nduyɛ mi Chɛhowa mal nda yaamɔɔwaa ndaa o ba.
31 Pou kpoowa ndaa cho maa Pou Kpoowa naa le.+
Nduyɛ, yaamɔɔwaa naa bɛɛ sina niŋ a ndi okɔɔ.+
32 Kilepiima ndaŋ ma cho ko maa kilepiima fula Sodɔm ndaŋ,
Nduyɛ maa kilepiima fula o kpelelaŋ Komoolua niŋ ndaŋ.+
Kilepiima ndaŋ ma nɔ pɔsɔnioo leniŋ.
Kilepiima nda cho a kpɔŋjɔlaŋ ndaŋ, lollo pila ma lol ni.+
33 Muɛima ndaŋ ma cho ko maa lolo kɛuwa.
Lolo yɛlɔɔ ma cho ni.
34 Sɔɔŋ nda cho tosaa woŋ kpou, I sina a muŋ okɔɔ.
Nduyɛ ŋ cho ŋ kɛsiaa o chiɛi ya kɛsi wolɔɔlaŋ ndo niŋ.+
35 Ya cho wana miŋgi maa wo ni, nduyɛ I cho nda tusi nyɛpalaa nda nɔ le sɔlaa wo choo.+
Te teleŋndo fuuluu pɛ, a cho siɛɛla.+
Paale kpundɔɔ cho nda komal teŋ le cho niŋ kpɛɛluŋ.
Nduyɛ nyɛ nda nɔ le sɔlaa wo cho nda komal o lepilɛ niŋ kpe.
36 Kanifuule, Chɛhowa cho wanaa nduaa yamɛi kilul.+
Nduyɛ o cho buɛiyaa nduaa inyiɛɛ tuiinɔŋ,+
Te o che pɛ maa a nɔ lɛ mayoomu le,
Nduyɛ maa wanaa nɔla nyɛ tosa a ba nda le wa, a wanaa nɔ kpaaya le wa kinɛi lo ni.’
37 Okoŋ o cho dimi aa, ‘Kuɛɛnɛ mɛlɛkaa ndaa cho yɛ,+
Pou kpoowa nda kua vioŋnɔŋndo wo?
38 Mɛlɛkaa haa ndaa dia chuɛima salala ndalaŋ* ni.
Nda ndaa kol muɛima salala ndala mamuɛilaŋ ni.+
A chɔŋ niko ma mala nya.
A simnuŋ niko naa nyaa viaŋnaŋnda.
I nɔla mi dii, nduyɛ mi miŋgi yoomu.+
I nɔla mi boli,+ nduyɛ mi siŋgi.+
Wana o wana nɔla waŋndo piŋi ya o ba le.+
40 I heelu ba nuu choo choo,
Mi mɛnaŋ po aa: “Ya cho yoomu le fɛɛŋ a fɛɛŋ ndo,”+
41 Te I chiɛɛŋa pɛ muɛi nii cho ŋɛlɛŋgi ŋɛlɛŋgi ve,
Nduyɛ mi bɛɛndiaŋ le yamɛi kiolɔɔ,+
I cho yaamɔɔwaa niaa maa miŋgul,+
Nduyɛ mi tusi wanaa tul la leyɛ wa nyɛpalaa choo.
42 Chiŋɔma niaŋ ma cho diuwɔɔ waŋ a kooma ndaŋ,
Kooma wanaa ma cho diyɔɔ wa, a wanaa cho o biyɔɔ niŋnda.
Nduyɛ muɛi nii faŋnde cho visiŋ ndaŋ dio,
Visiŋ wanaa cho yaamɔɔwaa niaa bolleŋ nda.’
43 Nya wanaa lekaawa, la dɔɔnuŋ nyaale a wanaa nduaa latulu+
Kanifuule, o cho maa miŋgi le kooma buɛiyaa nduaa.+
44 Okoŋ mi Muuse nda Hoosiya*+ po Nuŋ ndo, miŋgi sondoo o diomnda chondei hei choo kpou, mi waŋnda tuɛi.+ 45 Mɛɛ Muuse chii waŋnda Isɔluɛi sɔɔŋ muŋ kpou dimul, 46 mbo dimul nda aa: “La kɛsiŋ sila ya cho nya hoo hau kioo wo o lakɔl,+ le halikpeŋ mi la dimul chuauwaa nyaa ma tosa nyɛ o nyɛ cho o yau laSawaa hoo niŋ.+ 47 La nɔ mi la pɛɛsa nyɛ dimiŋ hoo wo le, kanifuule o sim le yoomu nyaa.+ Nduyɛ, ndu cho tosa ni mi la viou achal o lɛŋnde nya cho Chɔɔdaŋ ndaŋ taŋɔɔ le kɔlaŋ challe leŋ niŋ.”
48 Mi Chɛhowa suaa vɛlɛ o Muuse lo o paale pilɛ le leŋ choo. Mbo dimul ndu aa: 49 “Kɔ o pembuŋ Abaluim ndoŋ,+ ŋ cho o lɛŋnde Mowaabi leŋ niŋ ndoŋ, ba Chɛluiko wo, ma kɔ hel o Pembii Nibo Ve choo,+ ma mɛɛndaŋ lɛŋnde Kenaŋ ndeŋ, le ya cho Isɔluɛiya kioo le ma chal leniŋ ndeŋ.+ 50 Nduyɛ, o pembii ŋ cho keŋ helɔɔ choo ve ŋ cho wu ni, mɛɛ Elɔŋ bɛ num vi o Pembii Hɔ Ve choo yɛ.+ 51 Nya ŋiɔɔŋ kpou, mi la kɛɛ le ya diikɔŋndo teleŋ mɛŋndaŋ ma fula Mɛluiba+ o Kedɛsi niŋ o pollo niŋ Siŋ ndo. Kanifuule, mi la kɛɛ le ya bɛɛleŋ kioo* waŋnda Isɔluɛi o hɔl.+ 52 A cho lɛŋnde ya cho waŋnda Isɔluɛi kioo leŋ chɔ kɔɔli kɔɔli, kɛ a cho luɛiyɔɔ leniŋ te.”+