Timoti Tasoo

2 I tasei peŋ, I cho nya dɛɛniaa maa la wa Mɛlɛka nyɔɔloo o piɛileŋ niŋ le wana o wana. La wa ndu nyunaa le malaa, nduyɛ mi la wa ndu balikaa mello o piɛileŋ niŋ. 2 La piɛi le masaa waa a wanaa nɔ foofola bɛndulaŋ nda,+ le halikpeŋ miŋ wa o kɔl nyulu niŋ, buulaŋ ve naa le. Okoŋ, miŋ yɔŋguŋ o Mɛlɛka lo a kɔllo kpou le nyɛ o nyɛ tosaa nyɛkɛndɛi.+ 3 Nyɛ nɛŋi Mɛlɛka, wana naa Piŋiaa kɔllo wo cho hoo ni.+ 4 O hɛnaŋ mi waŋnda kpou sina kɔl kalu kpeekpei cho a tonyaa okɔɔ wo, nduyɛ ma sɔla pioŋɔɔ.+ 5 Mɛlɛka ndupilɛ kpe cho ni,+ nduyɛ wana cho Mɛlɛka nda waŋnda chieeya tɛɛŋndo,+ ndupilɛ kpe cho ni. Wana koŋ cho yɛ Chiisu Kiliti ni.+ 6 Ndupila yɔŋguŋ ni le mbo baŋa waŋnda chieeya kpou.+ Waŋnda cho isɔɔ a hei okɔɔ a teleŋ bɛnda wo. 7 Le hei Mɛlɛka hɛli ya ni+ le mi simnuŋ wana dimiaa yooŋgu kɛndɔɔ a kiilanɔɔ,+ le halikpeŋ mi pɛɛku wanaa cho ŋChuu le wa+ a laalaŋndo okɔɔ, nduyɛ mi pɛɛku nda tonyaa. Tonyaa ya cho dimioo ni. O cho lachoo le.

8 Lelaŋ, nyɛ ya yeema wo cho ni maa, ba o ba fee, puaa hiou lachi a piɛileŋ. A wa a yɔŋgaŋ o Mɛlɛka lo, nduyɛ ma heelu balaŋ choo choo o piɛileŋ niŋ.+ Kɛ o wa a kɔl tuu+ ɔɔ a lasɛɛŋgiaŋ te.+ 9 I yeema mi waŋ laanduaa bɛɛ chuɛɛnuŋ chuɛɛnɔŋ lebiɔɔ. A nɔ ma chuɛɛnuŋ mɛɛ o bɛnda yɛ, nduyɛ mbo wa tuuleŋ. O cho lawɔɔla kɛvɛlɛlaŋ, a kelaŋ ŋkooliiyoŋ, ɔɔ yɔɔwalaŋ, ɔɔ nyɛla baa kalalaŋ wounɔŋndo le chɔmnɔŋndo le.+ 10 Kɛ a nɔ ma chuɛɛnuŋ mɛɛ waŋ laanduaa nɔ siooŋii Mɛlɛkɛi ya bɛnda ma chuɛɛnuŋ yɛ.+ Koŋ cho ni, sɔɔŋ kɛndɔŋ tosaa.

11 Te wana lanɔɔ wa pɛ pɛɛkoo sɔlaa, o nɔ mbo mei, nduyɛ mbo tusiŋ puaa o ba bɛŋgu.+ 12 I chɛl mi wana lanɔɔ pɛɛku wana pɔnɔɔ, ɔɔ mbo nɔ ndu kpaayaa choo le. Kɛ o nɔ mbo wa o meiyaa doŋ.+ 13 Kanifuule, Adam fɛlɛŋ Mɛlɛka toosiaa. Okoŋ kɔɔli, mbo toosiaa Ifi.+ 14 Nduyɛ o cho Adam te Setana hui le. Kɛ wana lanɔɔ o hui ni,+ okoŋ mbo tɛɛmbuu sawaa. 15 Wana lanɔɔ nɔla mbo sɔla chindaa o violɔɔ niŋ,+ te o yɔŋ pɛ mbo hiou lachi a laalaŋndo nɔɔ, mbo nɔ kaalaa, mbo wa o diandaa Mɛlɛka o hɔl, nduyɛ mbo nɔ taasioo.+