Kaleesiaŋnda

1 Ya kiilanɔɔ Pɔɔl cho nya yauwo hoo poonyiallo ni. O cho wanachiee le hɛli ya le waa kiilanɔɔ le, kɛ Chiisu Kiliti+ a Mɛlɛka Finya naa,+ o miŋgi Chiisu yoomu wo, nda hɛli ya ni. 2 Ya a puaapiliaa naŋ cho nanuŋ nda kpou cho kundalaŋ o Kaleesiaa niŋ yauwo hoo poonyiallo ni:

3 Maa Mɛlɛka Finya naa a Masanɔɔ Chiisu Kiliti tosal nya kɛndɛi ndɛi bɛnduei, okoŋ ma ke nya kɔl nyuloo fɔ! 4 Mbo wu le hakila naalaŋ,+ le halikpeŋ mbo piŋi naa o chieeŋ dɛnɛ wɔɔŋndo hoo niŋ.+ Nduyɛ hɛnaŋ Mɛlɛka Finya naa o tosa koŋ ni.+ 5 Saŋgalaa cho le Mɛlɛka le fɛɛŋ a fɛɛŋ. Amiina.*

6 Kɔndɔfillo bii ya le mɛɛ nya keleŋa Mɛlɛka veelu nya wo kɔɔ mulul lɛ. Mɛlɛka tosal nya kɛndɛi nduɛi bɛnduei o Kiliti niŋndo, ndu nya cho kɔɔ mulullo le yooŋgu kɛndɛ cheleŋ ni.+ 7 O cho nuaa maa yooŋgu kɛndɛ cheleŋ cho le. Kɛ waŋnda apum cho nya bolle hiŋndo,+ ma yeema yooŋgu kɛndɛ cho a Kiliti okɔɔ wo miŋgioo o hɔlaa wɔɔŋnda. 8 Te naapila, ɔɔ maalikɛinɔɔ fula pɛ choo choo mbo huŋ dimul nya yooŋgu kɛndɛ cheleŋ, o yooŋgu naŋ dimul nya wo kɔɔli, sendioo cho ndu choo. 9 I miŋgi wɔ vɛlɛ sondo o nyɛ naŋ dimi wo choo. Te wana o wana huŋ dimul nya pɛ yooŋgu kɛndɛ cheleŋ o yooŋgu nya chɛllo kɔɔli, sendioo cho ndu choo.

10 Baa waŋnda chieeya ya cho kindiŋndo le kɔllo nɛŋioo ni ɔɔ Mɛlɛka? Te o yɔŋ pɛ aa waŋnda chieeya, mɛɛ I ve wa buɛi Kiliti le. 11 Puaapiliaa, I yeema mi la sina maa o cho wanachiee le kɛɛsiaa yooŋgu kɛndɛ ya cho nya hoo dimullo wo le.+ 12 O cho wanachiee le ke ya ndu le. Nduyɛ wanachiee pɛɛku ya ndu le. Kɛ Chiisu Kiliti pila chɔm ya ndu ni.

13 Teleŋ ya wa paandu o Piɛile Chuuwa niŋndo,+ mi la tuɛi mɛɛ yaa tosa a kundala wanaa laalaŋaa Mɛlɛkaa yɛ. I wa hiouwɔɔ lachi a nda nyɛpalaa tusioo choo vɛlɛ a nda tɛɛmbuuwo.+ 14 I wa hiouwɔɔ lachioo tosaa kpeekpei o Piɛile Chuuwa niŋ. I wa naamula finyaa naa mamaa pɛɛku naa laŋ tolɔɔ kɔɔli, mbo hiau wanaa bɔɔbɔɔ naŋ wa lambila pilɛ laŋ, nduyɛ miŋ wa kaale pilɛ leŋ nda.+ 15 Kɛ Mɛlɛka tosa mi kala nuu vialu ya wo, ndu tosal la kɛndɛi nduɛi bɛnduei ni.+ Mɛɛ o yiyaŋ a ya okɔɔ, mbo veelu ya. 16 Mbo chɔm ya Po ndɔɔ le mi dimul wanaa cho ŋChuu le wa yooŋgu kɛndɔɔ a ndu okɔɔ.+ A boondii keŋ, I nyuna wanachiee le sila le. 17 Wanaa wa Chulusalɛm ma simnuŋ kiilaa ya tase wa bɛɛ, I kue naa nda chua le ya sila le. Kɛ mi kua Alueebiaa sakpo. Okoŋ kɔɔli, mi miiŋgu Damasikɔɔ.+

18 Wɔsilaŋ la yaa okoŋ kɔɔli, mi kua Sifaasi*+ yilɔɔ Chulusalɛm.+ I wa ndu o bɛŋgu choo le palɛi 15. 19 Kɛ kiilaa apiliaa o pilɛ bɛɛ I chi le, mɛɛ Chemisi,+ pɔmbɔɔ Masanɔɔ. 20 Sɔɔŋ ya cho nya muŋ poonyiallo woŋ, Mɛlɛka cho lesei maa tonya kpeekpei ŋ cho ni.

21 Okoŋ kɔɔli, mi kua o tanda Siiliaa wo niŋ, a tanda Siliisiaa wo.+ 22 Kɛ kundala wa o Chudiaa niŋ mi la wa o diompilɔɔ niŋ a Kiliti laŋ, laa sina ya le. 23 Tɔɔ koni ndaa tuɛi a ya okɔɔ ni aa: “Laŋunɔ ndoo simul piɛile naaleŋ,+ nduyɛ mbo wa naa nyɛpalaa tusioo choo wo bɛɛ cho niŋ yooŋgu kɛndɔɔ dimioo.”+ 24 Okoŋ ma kandu Mɛlɛka saŋgalaa le nyɛ yɔŋnuŋ ya wo.