Luku

13 A boondii keŋ, mi wanaa wa loŋ nda apum dimul Chiisu maa mi Paile dii Kaliliaŋaa wa salalaŋ solioo wa. 2 Okoŋ mi Chiisu nyuna nda aa: “La yiyaŋ pa maa Kaliliaŋaa sɔɔŋ muŋ yɔŋnuŋ nda ndaa hiou wa wanaa lahaki a Kaliliaŋnda apiliaa kpou? 3 Sako. Mi dimul nya, te la wookuŋ te, nya kpou la cho tambei sɔla.+ 4 Ŋwaŋ 18 chiɛi vilɛiyo del choo Sɛlowam mbo dii nda wa yɛ, la yiyaŋ pa maa nda ndaa hiou wa wanaa yɔŋ wɔɔŋ a wanaa cho ichali Chulusalɛm nda? 5 Sako bɛɛ. Mi dimul nya, te la wookuŋ te, nya kpou la cho tambei sɔla maa nda.”

6 Okoŋ mbo dimul nda taloo hoo: “Po pilɛ wa ni mbo tual yɔm mafikiiyo o kpele ndɔɔ niŋ. Paale pilɛ, mbo huŋ tofa lechoo le fikiiyaŋ, kɛ o seeluŋ nyɛ o nyɛ le.+ 7 Okoŋ mbo dimul wana wa kpeloo mandaa wo aa, ‘Wɔsilaŋ niŋ la yaa I cho hunɔɔ yɔmndo hoo tofaa le fikiiyaŋ, kɛ I seeluŋ nyɛ o nyɛ lechoo le. Kioŋ ndu! Le sabu yɛɛ o hau yɛ lɛŋndeŋ fondo fuu?’ 8 Mi wana wa kpeloo mandaa wo dimul ndu aa: ‘Masanɔɔ, mallɔ ndu vɛlɛ le wɔsioo o pilɛ. I cho lɛŋndeŋ balɔɔ wuŋchulaa chɛ chɛ mi dɔu nyɛ tosa mi tɔlɔɔlaŋ la naŋndo. 9 Te o kom yɛ pɛ o chilaŋ niŋ, mɛɛ o bɛnda bɔɔ. Kɛ te o kum te, a keŋ ndu.’”+

10 Chiisu wa waŋnda pɛɛkoo o Paale Pɛŋgiaaleŋ choo o chiɛi Chuuwa piɛi Mɛlɛka wo niŋ. 11 Chua pilɛ wa loŋ nyinaa wa ndu paaliaŋndo le wɔsilaŋ 18. O wa o tundaŋ, ndoo nɔla simndaŋ sakpo le. 12 Mɛɛ Chiisu che ndu, mbo dimul ndu aa: “Chuaa, a seŋgu a naa numndo.”+ 13 Mbo handu ndu balaŋ choo. O lepilɛ niŋ kpe, mbo sim sakpo, okoŋ mbo kandu Mɛlɛka saŋgalaa. 14 Kɛ mi wana bɛndoo o chiɛi Chuuwa piɛi Mɛlɛka wo niŋ duaunuŋ tumbe le mɛɛ Chiisu siŋgi waŋndo o Paale Pɛŋgiaaleŋ choo yɛ. Mbo dimul faŋgaa aa: “Ŋ nɔ palɛi i ŋɔmpum le wallo tosaa.+ Lelaŋ, la huŋ o palɛi keŋ choo le nya siŋgioo, kɛ o wa o Paale Pɛŋgiaaleŋ choo le.”+ 15 Kɛ mi Masanɔɔ mulul ndu aa: “La cho wanaa mulu muluaŋ!+ Nɛɛnɛ cho yɛ nya tɛɛŋ o timbi nau ndɔɔ ɔɔ sofɛlɛ ndɔɔ o Paale Pɛŋgiaaleŋ choo, mbo kuɛ a ndu mbo kɔ kol te?+ 16 Chua mama Ebilaham ndo cho hoo ni. Nduyɛ Setana nɛɛkuu ndu niŋ le wɔsilaŋ 18. Baa o bɛnda mbo sɔla siŋgioo o Paale Pɛŋgiaaleŋ choo le?” 17 Mɛɛ Chiisu dimi sɔɔŋ muŋ, mi siɔmbulaŋ la kandu wanaa simul ndu wa kpou biyɔɔ. Kɛ mi faŋgaa kpou kandu nyaaloo dɔɔnɔŋndo le sɔɔŋ kɔndɔfiliŋ o tosa woŋ.+

18 Okoŋ mbo hiau lachi a dimioo aa: “A yɛɛnɛ Masale Mɛlɛkaleŋ le velaŋ yɛ? Nduyɛ a yɛɛnɛ ya tuu yɛ leŋ? 19 Le cho ko maa kulii mɔsitaa waŋndo chua mbo kɔ tɔl o kpele ndɔɔ niŋnde. Mi kulle hei i wul, mi i hindu, mi i simnuŋ yɔm bɛndoo, okoŋ mi youwa huŋ taŋgul waaŋnde o lɛuwuŋ ndɔŋ.”+

20 Okoŋ mbo dimi vɛlɛ aa: “A yɛɛnɛ ya tuu yɛ Masale Mɛlɛkaleŋ? 21 Le cho ko maa yiisiiyo,* o wana lanɔɔ chua mbo muuliaŋ a kpeyaŋndo kiloo 10 wo. Okoŋ, mi yiisii koŋ o tosa mi kpeyaŋ koŋ hindu pɔfuu.”+

22 Mɛɛ Chiisu wa kɔlaŋ Chulusalɛm, mbo balu o chieeŋ bɛndoŋ a o sɔndɔkɔltaŋ kpou le waŋnda pɛɛkoo. 23 Okoŋ mi po pilɛ nyuna ndu aa: “Masanɔɔ, baa waŋnda nyɛɛmbɔ koni sɔla niŋ pioŋɔɔ ni?” Mbo mulul nda aa: 24 “La kindi kindiŋ kpoke le luɛiyɔɔ o dio sɔɔkɛnyɛɛ wo,+ kanifuule mi dimul nya, wanaa bɔɔbɔɔ yeema niŋ ma luɛi kɛ a tiu niŋ ba le. 25 Te wana chiɛiyo chɛŋ pɛ mbo kinda dioo, la cho lasisi o bɛɛ mi la wa dioo lɔɔ mi la dimi aa: ‘Masanɔɔ, kumbul naa dioo fɔ!’+ Kɛ mbo dimul nya aa: ‘I sina naa nya fula wa le.’ 26 Okoŋ la cho kandɔɔ dimioo aa: ‘Ŋ wa diolaŋ a kolɔɔ num o hɔl, nduyɛ a wa waŋnda pɛɛkoo o nɛila bɛndula naalaŋ choo.’+ 27 Kɛ o cho nya dimul aa: ‘I sina naa nya fula wa le.’ La faŋaŋ ya nanuŋ, nya wanaa dɛnɛ wɔɔŋnda haa!’ 28 Loŋ nya wa niŋ koŋullo a chiŋndoŋ sɔmndo ni, te la che pɛ Ebilaham, Aase, Chekɔpu a wanaa ndaa suaa le Mɛlɛka wa kpou o Masale Mɛlɛkaleŋ niŋ, kɛ mi nya wa o bɛɛ.+ 29 Okoŋ kɔɔli, waŋnda cho fula ba paaleŋ le chaŋ ndo, ba le del lo, ba luaŋ ndo, a ba tou wo ma huŋ chal o tibiiyo* choo o Masale Mɛlɛkaleŋ niŋ. 30 Wanaa mɛɛlaa cho hunɔɔ simnɔŋ wanaa tasiaa, nduyɛ mi wanaa tasiaa simnuŋ wanaa mɛɛlaa.”+

31 A boondii keŋ, mi Falisiiya apum huŋ ma dimul ndu aa: “Chɔŋ ma faŋaŋ nanuŋ, kanifuule Hɛlɔɔ yeema mbo dii num.” 32 Mbo dimul nda aa: ‘La kɔ dimul yalanɔ* koŋ aa, ‘I cho nyinaa wɔɔŋnda touwɔɔ, mi wa waŋnda siŋgioo hau a siɔdii, nduyɛ o paale yaa ndɔleŋ choo ya cho chii ni.’ 33 Kɛ mɛɛ mi hiou lachi a nda siŋgioo hau, siɔdii, a diɛŋ, kanifuule a dii wana suaa le Mɛlɛka wo naa cheleŋ te, fɔ Chulusalɛm.+ 34 “Ee nya waŋnda Chulusalɛm! La diu diu wanaa ndaa suaa le Mɛlɛka wa, nduyɛ mi la vii vii wanaa nda vem o nya lo wa a poutaŋ.+ Teleŋ o teleŋ I wa kindiŋndo le nya chuuŋgiaa naapilɛ mɛɛ sɔɔ komsaa chuuŋgiaa nuaa chuauwaa nduaa o kumbaŋnda ndɔlaŋ bɛŋgu yɛ. Kɛ la chɛl te.+ 35 Le saboo hoo, Mɛlɛka chii chiɛi nyaa baa faŋa choo.+ Mi dimul nya, la chi lɛ niŋ ya le haaa mi la huŋ dimi aa, ‘Salaa cho le wana hiŋ hoo o diola Chɛhowa* laŋ niŋndo!’”+