Ɛsodɔɔ

23 “La nɔ mi la keeliaa* yooŋgu lachoowaa le.+ La sim wana dɛnɛ wɔɔŋndo kɔɔli mi la timbi seile lakafaleŋ te.+ 2 La tual faŋgaa kɔɔli le dɛnɛ wɔɔŋndo tosaa le. Nduyɛ la nɔ mi la veŋ tonyaa, okoŋ mi la timbi seile lakafaleŋ le faŋgaa tooloo le.* 3 Te a wa pɛ kɔɔsɔɔ a wana bala fondoo, a nɔ ma chɔm kaa hɛliaa le.+

4 “Te a saaluŋ pɛ nau ɔɔ sofɛlɛ luusiaŋ yaamɔɔnɔ numndo o ba wo, a nɔ ma kuɛ a ndu o ndu lo.+ 5 Te a saaluŋ pɛ sofɛlɛ wana tul num leyɛ wo o bɛvɛi o wolɔɔlaŋ bɛŋgu, a nɔ ma mɛi ndu loŋ ma kuɛŋnuŋ te. Kɛ, a nɔ ma mala yaamɔɔnɔ num koŋ mbo faŋa wolɔɔlaŋ chɔloo choo.+

6 “La tosa lakafa o yamaŋ kiolɔɔ niŋ, okoŋ mi la kɛɛ wana bala fondo cho nya tɛɛŋ ndo di ndɔɔ kioo le.+

7 “Te waŋndo wa pɛ chaaŋ ndɔ choolaŋ nyiinduuwo, la wou laba leniŋ te. Nduyɛ, la dii wana sandaa ɔɔ wana tɛɛmbuu hoo isɔɔ o isɔɔ wo le, kanifuule fɛɛŋ bɛɛ I sim wana dɛnɛ wɔɔŋndo kɔɔli le.+

8 “La bii luɛiyɔɔ niŋndo le, kanifuule luɛiyɔɔ niŋndo suumiaa wanaa kialaa ŋyamaa sandu wa, ma miŋgi tonyaa balaŋ amakɔɔ.+

9 “La nɔ mi la luei miallo mɔnɛi le. Nyapila sina nyɛ i sim le waa miallo o lɛŋnde isumialteŋ niŋndo, kanifuule nya bɛɛ, mialla nya wa o lɛŋnde Ichipi leŋ niŋ ni.+

10 “La nɔ mi la wa waltaŋ tosaa o yondola nyalaŋ niŋ le wɔsilaŋ la ŋɔmpum, mi la chuuŋgiaa tɔlɔɔla nyalaŋ.+ 11 Kɛ o wɔsi ŋɔmmɛu wo niŋ, la nɔ mi la mal yondoo mbo pɛŋgi. La nɔ mi la tosa wali kɛ kɛ lechoo le. Nyɛ o nyɛ vil o yondo koŋ niŋ pɛ, o cho wa nyɛdiaa le wanaa bala fonduaa, a visiaa yonduaa. Nyɛ pilɛ koŋ kpe nya nɔ vɛlɛ ni mi la tosa a kpelela nyala makilepiilaŋ vɛlɛ a kpelela nyala ma ɔlifiilaŋ.

12 “La nɔ mi la tosa wallo le palɛi i ŋɔmpum. Kɛ o paale ŋɔmmɛu leŋ choo, la nɔ mi la pɛŋgi, le halikpeŋ mi nauwaa nyaa a sofɛliaa nyaa bɛɛ pɛŋgi. Nduyɛ, mi puaa buɛiyaa nyaa laanduaa, a mialaa cho nya tɛɛŋ nda bɛɛ pɛŋgi, ma sɔla yoomuma sɛnɛiyaŋ.+

13 “La nɔ mi la tosa nyɛ o nyɛ ya dimul nya le tosaa.+ Nduyɛ, la nɔ mi la veelu diola mɛlɛkaa cheleŋ te. Waŋnda nɔ ma tuei nya diola laŋ o sondo le.+

14 “Iwɔsi o iwɔsi, la nɔ mi la chuuŋgiaŋ bɛmbɔɔ le yaa le bɔŋaŋndo biyɔɔ le ya saŋgalaa.+ 15 La nɔ mi la bii Bɔŋaŋ Beedii Nɔ Yiisii* Leniŋ Te Wo.+ Le palɛi i ŋɔmmɛu, la nɔ mi la wa beedii nɔ yiisii leniŋ te wo dioo a teleŋ kpeekpeiyo o paŋgii Abibi* ve niŋ,+ a mɛɛ ya dimul nya yɛ. Kanifuule, a teleŋ koŋ nya fula o lɛŋnde Ichipi leŋ niŋ ni. Wana o wana nɔ mbo hiŋ ya lachi bala fondo le.+ 16 Te la wa pɛ kuluŋ tasoŋ kouwɔɔ o chiɔɔŋ nyaŋ niŋ, la nɔ mi la bii Bɔŋaŋ Chiɔɔŋ Kuauwaa.*+ Nduyɛ te la chii pɛ nyɛm nya kou o chiɔɔŋ nyaŋ niŋndoŋ chuuŋgiaa naapilɛ o wɔsioo mɛɛlulaŋ, la nɔ mi la bii Bɔŋaŋ laBafɛiyo.*+ 17 Bɛmbɔɔ le yaa o wɔsioo niŋ, puaa nyaa kpou nɔ ma chuuŋgiaŋ ya Chɛhowa, masanɔ tonyaa lachi.+

18 “Kooma nya soli salaa o ya lo waŋ, la muuliaŋ maŋ a nyɛ o nyɛ nɔ yiisiiyo leniŋ te. Chuɛima nya soli salalaŋ o ya lo o bɔŋaŋnda nilaŋ choo waŋ, la nɔ mi la kɛsi maŋ haaa diimandɔɔ le.

19 “Tɔlɔɔla tasela kɛndɛ kɛndɛla nya kuau o chiɔɔŋ nyaŋ niŋ ndaŋ, la nɔ mi la hiŋ a laŋ o chiɛi ya Chɛhowa Mɛlɛka nyaa niŋ.+

“La yau chuiŋ chuaa o mɛɛma kala ndɔ waŋ niŋ te.+

20 “I cho maalikɛinɔɔ yɔŋ nya lachi,+ mbo manda nya o nɛi, nduyɛ mbo hiŋ a nya o fondaŋ ya bɛɛndiaa wo.+ 21 La tuei ndu diom, nduyɛ mi la diikuŋ ndu. La nɔ mi la simul ndu le. Te la simul ndu pɛ, o mel niŋ nya haki le hakila nyalaŋ te,+ kanifuule diola nilaŋ la cho ndu choo. 22 Kɛ te la diikuŋ ndu pɛ, nduyɛ mi la tosa nyɛ o nyɛ ya dimul nya, I cho wa yaamɔɔnɔɔ le yaamɔɔwaa nyaa, nduyɛ mi simul wanaa simul nya wa. 23 Maalikɛinɔ nuu cho nya isisi lachi, mbo kuɛ a nya o lɛŋnde Amɔluaitiiya, Hitaitiiya, Pɛluisaitiiya, Kenanaitiiya, Hivaitiiya, a o lɛŋnde Chɛbusaitiiya niŋ, nduyɛ mi tɛɛmbuu nda.+ 24 La nɔ mi la beŋ mɛlɛkaa ndaa wulaŋ, ɔɔ ma vɛɛlu nya le nda sooluuwo le. Nduyɛ, la tual kaala ndalaŋ kɔɔli le.+ La nɔ mi la tɛɛmbuu mɛlɛkaa ndaa, nduyɛ mi la pesi pesi suŋgbuma nda sooluu waŋ.+ 25 Ya Chɛhowa Mɛlɛka nyaa nya nɔ ni mi la piɛi.+ Nduyɛ o cho nya salaa dɔwɔɔ mi la sɔla nyɛdiaa* a mɛŋndaŋ.+ I cho nya naalaŋ soli tɛɛŋ po.+ 26 Waŋ laanduaa cho o lɛŋnde nyaleŋ niŋnda, I cho tosa o pilɛ bɛɛ viikuu niŋ ɔɔ mbo wa wana lanɔ vilu le wo le.+ I cho tosa mi la viou achal.

27 “I cho tosa mi siooŋii nii bii wanaa cho nya lachi wa,+ nduyɛ mi nda kpou laasiaŋ kɔltaŋ. I cho tosa mi la yem yaamɔɔwa nyaa, ma nyaanuŋ nya.+ 28 Hivaitiiya, Kenanaitiiya, a Hitaitiiyaa cho nya lachi wa,+ I cho tosa mi kɔltaŋ la yɔŋnuŋ nda pulaŋ pulaŋ a siooŋnde, nduyɛ ma nyaanuŋ nya.+ 29 I cho nda touwɔɔ nya lachi o wɔsi pilɛ bɛŋgu le, yɔŋii lɛŋndeŋ le lo fondo, okoŋ mi visiaa yonduaa kui, ma mululaŋ nya.+ 30 Kɛ o pɔmpɔmbɔ ya cho nda wa touwɔɔ nya lachi ni haaa mi la kui tau, okoŋ mi la hɛlu lɛŋndeŋ.+

31 “Pɛŋgula nyalaŋ la cho wa chɔŋ o Pee Siaŋa Mɛŋma Ihɛllo, kɔ o pee mɛŋma ihɛl Filitiaŋnda. Nduyɛ, mi la chɛŋ o pollo haaa o Pee Bɛndoo.*+ I cho wanaa cho o lɛŋnde leŋ niŋnda malɔɔ nya o ba, nduyɛ mi la tou nda nya lachi.+ 32 La nɔ mi la yii kpemaa a nda ɔɔ a mɛlɛkaa ndaa le.+ 33 La chɛl ma wa nya tɛɛŋ o lɛŋnde nyaleŋ niŋ te, yɔŋii nda tosa mi la tosa hakioo a ya. Te la sooluu mɛlɛkaa ndaa pɛ, keŋ cho wa yaŋɔɔleŋ le nya.”+