Chɔɔchiaa
7 Okoŋ mi Chɛlubaal, koŋ cho ni, Kidiɔŋ,+ a wanaa wa latulu a ndu wa kpou chaŋ idiiyo puŋ, ma kɔ kila dɔɔŋgɔɔ o Pioo Halɔdi. Nduyɛ dɔɔŋgɔ waŋnda Midiaŋ wa ba luaŋ ndo o dɛŋgbɔɔ niŋ o pembii Moluɛɛ ve ikɛi. 2 Okoŋ mi Chɛhowa dimul Kidiɔŋ aa: “Puaa chɔuwaa ŋ nɔ wa cho bɔɔ kunda le mi mal nda waŋnda Midiaŋ o ba.+ Kanifuule te waŋnda Isɔluɛi hiu waa kunda pɛ, a cho yoŋgaa kiolɔɔ ma dimi aa, ‘Naapila yem chɔuwo ni.’+ 3 Lelaŋ a yandii, dimul waŋnda aa: ‘Wana o wana nɔ pɛ siooŋnde nduyɛ mbo wa nyiiyaa, mɛɛ o miiŋgu chiee.’”+ Mɛɛ Kidiɔŋ dimi hei le nda tofaa, mi puaa chɔuwa 22,000 miiŋguŋ. Nduyɛ, ma lo 10,000.
4 Kɛ mi Chɛhowa dimul vɛlɛ Kidiɔŋ aa: “A koŋ kpou waŋnda cho wɔ bɔɔ. Tusi nda o peelo, okoŋ mi dɔu nda o tofaa bɛŋgu loŋ le num. Te I dimul num pɛ aa, ‘Hoo cho lakɔ a num latulu,’ mɛɛ o cho lakɔ a num latulu. Kɛ te I dimul num pɛ aa, ‘Hoo cho lakɔ a num latulu le,’ mɛɛ o cho lakɔ a num latulu le.” 5 Mbo kua a nda o peelo.
Okoŋ mi Chɛhowa dimul Kidiɔŋ aa: “Wanaa cho mɛŋndaŋ kɔndɔɔ a ba ma deembuu maŋ maa tuŋ nda, dii nda naapilɛ. Nduyɛ, ma dii vɛlɛ wanaa cho wulaŋ baŋɔɔ le mɛŋndaŋ kolɔɔ wa naapilɛ.” 6 Wanaa kɔndu mɛŋndaŋ a ba ma handuŋ o sondo le kolɔɔ wa, a wa 300. Kɛ a tuaa kpou ma baŋ wulaŋ le kolɔɔ.
7 Mi Chɛhowa dimul Kidiɔŋ aa: “Puaa chɔuwaa 300 wa haa ya cho soliŋ kpeku ni le num piŋioo, nduyɛ mi mal num waŋnda Midiaŋ o ba.+ Kɛ a tuaa kpou, dimul nda ma miiŋgu o la nda lo.” 8 Mɛɛ nda bii waŋnda nyɛm nda chua le dioo woŋ a bululaŋ o ba, mi Kidiɔŋ miŋgi a tuaa o la nda lo. Okoŋ mbo lo a puaa chɔuwaa 300 wa. Nduyɛ, dɔɔŋgɔ waŋnda Midiaŋ wa o dɛŋgbɔɔ niŋ amatou.+
9 Ichɔl koŋ, mi Chɛhowa dimul Kidiɔŋ aa: “Chɔŋ ma kɔ chiŋalaŋ dɔɔŋgɔ waŋnda Midiaŋ, kanifuule I chii num ndu malɔɔ o ba.+ 10 Kɛ te siooŋnde wa num pɛ, mɛɛ la kɔ o dɔɔŋgɔ ndaa nya Pulua, buɛi numndo. 11 La yaŋ nilaŋ o nyɛ nda cho wa dimioo wo. Okoŋ kɔɔli, la cho kɔl simulaa sɔla le dɔɔŋgɔ ndaa chiŋalaŋndo.” Okoŋ, mi Kidiɔŋ nda Pulua buɛi ndɔ tual o dɔɔŋgɔ ndaa holnɔŋndo.
12 Nduyɛ waŋnda Midiaŋ, Amalɛki, a haa ba paaleŋ le chaŋ ndo wa kpou+ wa a tiuwaa lɛtɛu o dɛŋgbɔɔ niŋ, mɛɛ soonuaa kundaa wa nuaa yɛ. Nyɔɔmiaa ndaa ndaa chuu chɔm te.+ A wa a hɔbɛi mɛɛ siooŋnde wa nuaa o pee mɛŋma ihɛllo kɔŋgɔ yɛ. 13 Mɛɛ Kidiɔŋ kuɛ, mbo tuɛi po Midianaitiinɔɔ chaaŋ ndɔ lɔma o sɔl laŋ dimullo. Mbo dimul ndu aa: “Lɔma ya sɔl laŋ ma cho maŋ ni. Mi cha beedii* ŋbalii tiu tiuwo mulu mulɔŋndo o dɔɔŋgɔ naa niŋ. Mi cha mi beediiyo huŋ lɔɔ tɛndiiyo lɔɔ pila. Okoŋ mi tɛndiiyo del.+ A tonya, mbo del mbo muliŋ machali.” 14 Mi chaaŋ ndɔ dimul ndu aa: “Hei sim le muɛi faŋii Kidiɔŋ nde+ Isɔluɛinɔɔ, po Chowaasi wo. Mɛlɛka mal waŋnda Midiaŋ a dɔɔŋgɔ ndaa kpou ndu o ba.”+
15 Dimioo nuaa mi Kidiɔŋ tuɛi lɔma sɔlaŋ maŋ a tɛɛsiaa ndɔɔ,+ mbo baŋ wulaŋ, mbo piɛi. Okoŋ, mbo miiŋgu o dɔɔŋgɔ Isɔluɛiya mbo dimi aa: “La chɔŋ, kanifuule Chɛhowa chii nya dɔɔŋgɔ waŋnda Midiaŋ malɔɔ o ba.” 16 Okoŋ, mbo piɔu puaa chɔuwaa 300 wa kundalaŋ la yaa, mbo ke nda kpou bululaŋ+ a kpɛɛnɛŋ puuloŋ vɛlɛ a tɛŋgɛla leyiŋndaŋ leniŋ. 17 Okoŋ mi Kidiɔŋ dimul nda aa: “La tofa ya, mi la tosa mɛɛ ya cho tosa yɛ. Te I sɔɔŋguu pɛ o dɔɔŋgɔɔ holnɔŋndo, nya bɛɛ la tosa mɛɛ ya cho tosa yɛ. 18 Te ya a wanaa cho a ya latulu wa kpou hɔŋ pɛ bululaŋ, nya bɛɛ la hɔŋ bululaŋ o dɔɔŋgɔɔ balɔɔ silɔ, nduyɛ mi la deŋi choo choo aa, ‘Le Chɛhowa, a le Kidiɔŋ!’”
19 Dimioo nuaa mi waŋnda Midiaŋ siŋga kunda wanaa mɛŋgɛlaa, mi Kidiɔŋ a puaa chɔuwaa 100 wa a ndu latulu wa kua o dɔɔŋgɔ ndaa holnɔŋndo a ditɛɛŋndo.* Ma hɔŋ bululaŋ,+ okoŋ ma pesi kpɛɛnɛŋ puuluŋ wa nda o laba woŋ.+ 20 Mi puaa chɔuwaa kundala yaa wa hɔŋ bululaŋ, okoŋ ma pesi pesi kpɛɛnɛŋ puuloŋ. Ma bii tɛŋgɛla leyiŋndaŋ o bala mial taŋ, nduyɛ ma bii bululaŋ o bala kɛndɛ laŋ ma hɔŋ. Ma deŋi choo choo aa: “Muɛi faŋii Chɛhowa nda Kidiɔŋ nde!” 21 A teleŋ koŋ, wana o wana wa isisi o fonda ndɔɔ o dɔɔŋgɔɔ balɔɔ silɔ, mi puaa chɔuwa Midiaŋ kpou yom a kiltaŋ. Nduyɛ a wa kɔlaŋ a deŋioo.+ 22 Mi puaa chɔuwaa 300 wa hiau lachi a bulula ndalaŋ hɔŋndo, okoŋ mi Chɛhowa tosa mi wanaa wa o dɔɔŋgɔɔ niŋ nda+ kpou mululaŋ ndapila a mɔɔŋ faŋndoŋ. A lo kiltaŋ haaa ma fuuluu Bɛti-sita, ba Sɛluɛla wo. Nduyɛ a lo kiltaŋ haaa ma fuuluu Ebɛl-mɛhola+ chiee lekɔɔ ba Tabibati wo.
23 Okoŋ, mi Kidiɔŋ veelu puaa Isɔluɛiya o kaale Nafitalii, Asia, a Manaasɛ leŋ choo kpou,+ ma tisa waŋnda Midiaŋ kɔɔli. 24 Mbo viam vɛlɛ waŋnda o fondaŋnda ŋpembulaŋ kpou o tanda Ifiluem ndo niŋ. Mbo dimul nda aa: “La tol mi la kɔ sɔŋga a waŋnda Midiaŋ, nduyɛ mi la biu biu fondaŋnda waŋnda taŋ ndaŋ haaa Bɛti-balua a Chɔɔdaŋ.” Le hei, mi waŋnda Ifiluem kpou chuuŋgiaŋ naapilɛ, okoŋ ma biu biu fondaŋnda waŋnda taŋ ndaŋ haaa Bɛti-balua a Chɔɔdaŋ. 25 Nduyɛ ma bii laŋgbaa kalaa Midiaŋ nda a ŋiɔɔŋ, Oluɛbi a Siɛɛbi. Ma dii Oluɛbi o pouwo Oluɛbi choo,+ nduyɛ ma dii Siɛɛbi o doola mamuɛiyo Siɛɛbi. Ma hiau lachi a waŋnda Midiaŋ tolɔɔ kɔɔli,+ nduyɛ ma huŋ a bolle Oluɛbi leŋ vɛlɛ a bolle Siɛɛbi leŋ o Kidiɔŋ ndo o tanda Chɔɔdaŋ ndo niŋ.