Habakuku
1 Yooŋgu Habakuku,* wana suaa le Mɛlɛka wo sɔla o yilaŋnde niŋndo cho hoo ni:
2 Oo Chɛhowa, vɛɛ kpɛ ya cho yɛ niŋ chaŋndo naa num chua le malaa, kɛ a muli le?+
Vɛɛ kpɛ ya bii yɛ num niŋ nyunaa le ma piŋi ya wanaa kaala sɔŋgɔlaŋ nda o ba, kɛ a tosa nyɛ o nyɛ le?+
3 Le yɛɛnɛ ŋ tosa yɛ mi wa sɔɔŋ wɔɔŋndoŋ chɔɔ o yɔŋnɔŋndo?
Vɛ ma chɛl mi waŋnda wa chaaŋaa ndaa nyɛkindilaa handɔɔ choo?
Le yɛɛnɛ mi wa dɛnɛ tambɛiyo a sɔŋgɔlaŋ chɔɔ?
Le yɛɛnɛ mi sɛɛŋgiaŋndaŋ a wooluŋ wooluŋndaŋ la wa ba o ba fee?
4 Wana o wana cho lɛ sawa biyɔɔ le.*
Nduyɛ, sandii bɛɛ cho lɛ le.
Wanaa dɛnɛ wɔɔŋnda hiou a wanaa cho sakpo wa.
Le saboo hoo sandii lepɛŋnde cho ni.+
5 “La tofawɔ nyɛ cho yɔŋnɔŋndo o lɛŋnde niŋndo!
La kumbi hɔltaŋ mi la che, okoŋ mi kɔndɔfillo bii nya.
Kanifuule, suɛi pum nɔ le hunɔɔ yɔŋnɔŋndo o teleŋ nyaa niŋ.
O yɔŋ bɛɛ ma dimul nya a ndi okɔɔ, la laalaŋ niŋ te.+
6 I cho hunɔɔ Kaadiaŋnda* viomɔɔ.+
Waŋnda haa nɔ inyiɛɛ le, nduyɛ keleŋaa pila nda keleŋa ni.
Ma kuɛ o fondaŋnda leviltaŋ o lɛŋndeŋ choo,
Le ma biu biu chalta pila laŋ.+
7 Waŋnda haa wueenuŋ bɔɔ. Wana che nda dɔɔ pɛ siooŋnde bii num.
Ma kɛsi sawalaŋ a ba nda, nduyɛ nyɛ nda yeema wo nda tosa ni.+
8 Suaa ndaa nyaanuŋ a hiou tambilla,
Nduyɛ a nɔ yolɛi ma hiau tiwolla o nyumndaŋ niŋ.+
Te suaa ndaa chɔuwa huulu pɛ, lachi pɔ nda kua delɔɔ ni.
O fondaŋ levillo pɔɔli suaa ndaa fula ni le hunɔɔ.
Mɛɛ kowɔɔ tual nuaa sululu le nyɔɔ biyɔɔ yɛ, lende nda kua ni.+
9 Nda kpou cho hunɔɔ a miaa kuu le sɔŋgɔɔ.+
Mɛɛ nda cho fau, wana che nda hɔlla pɛ naŋ chaa hueiyii fula ba paaleŋ le chaŋ ndo ve ni.+
Nduyɛ ma bii chiaa o chɔuwo a hɔbɛi maa isiooŋ.
10 Ma kpɔka masaa waa.
Nduyɛ ma mam wanaa bɛnduaa.+
Fondaŋnda kala kala nda komal pɛ la taŋgulaa, mamɔɔ nda mam ni.+
Ma dii puuloo bemboo le ma hel, nduyɛ ma bii laŋ.
11 Okoŋ, ma kei o lɛŋndeŋ niŋ mɛɛ hueiyii bɛnduei hɔŋ nuaa yɛ.
12 Oo Chɛhowa, Mɛlɛka nɔ kandɔŋ te wo ŋ cho ni.+
Oo Mɛlɛka nuu, num Wana ni Diandaa, a cho Mɛlɛka vi le.+
Oo Chɛhowa, num hɛli waŋnda haa ni le yamɛi kiolɔɔ.
Num cho Pou Kpoowa nuu ni,+ nduyɛ num kɛsi nda ni le hunɔɔ a nyɛpalaa.*+
13 A chɛl ma che sɔɔŋ wɔɔŋndoŋ o yɔŋnɔŋndo le, kanifuule hɔlta numndaŋ la dendu bɔɔ.
Nduyɛ, a chɛl dɛnɛ wɔɔŋndo kposoŋ te.+
Mɛɛ le yɛɛ ŋ chɛl lɛ niko mi wanaa kaŋgalaa wa,+
Nduyɛ mi wana dɛnɛ wɔɔŋndo saaŋgiaa wana cho sakpo mbo hiau ndu wo, a suu nyɛ o nyɛ le?+
14 Vɛ ma tosa mi wanachioo wa maa suuwa o pee mɛŋma ihɛllo niŋ,
Nduyɛ maa nyaa yoomaa sasuŋ o demboo choo, a nɔ masa o masa le wa?
15 Nda kpou mbo* bii nda a doŋnde.
Mbo bii nda o yala ndɔ bɛndu bɛndoo niŋ.
Nduyɛ, mbo chuuŋgiaa nda kpou o yala ndɔ yɔɔyaa niŋ.
Lelaŋ o duaunuŋ nyaale tau tau ni.+
16 Le sabu koŋ o soli salalaŋ o yala ndɔ bɛndu bɛndoo lo ni.
Nduyɛ, mbo soli salalaŋ* o yala ndɔ yɔɔyaa lo.
Kanifuule, laŋ la tosa ni mbo wa nyɛdiaa kɛndɛ kɛndɔɔ sɔlaa,
Nduyɛ nyɛdiaa ndɔɔ cho bɔɔ o sɔvɛ.
17 Baa o cho wa pa hiouwɔɔ lachi a suuwa biyɔɔ o yala ndɔ bɛndoo niŋ mbo huŋ hulɔɔ?*
Baa lende ndu cho wa keiyo lɛŋnde delɔɔ choo, mbo diu waŋnda a hɔlaa vesɛi sɛɛŋ ni?+