Sam
Chondii Asafi+ ve.
79 Oo Mɛlɛka, kaalaŋ la huŋ del nyɛm kɛŋ numndoŋ choo.+
2 A chua dialuŋ vilɛi buɛiyaa numnda, ma ke youwa o choo choo niŋ le ma de,
Nduyɛ ma chua dialuŋ wanaa chɔm num lo lechoo wo wa ma ke visiaa yonduaa o lɛŋndeŋ choo.+
3 A taaliaa kooma ndaŋ lɛŋ Chulusalɛm balɔɔ silɔ maa mamɛŋ,
Wana bɛɛ lo yoomu le nda kumbɔɔ le.+
4 Wanaa naŋ chiɛɛliaŋ nda cho naa bɛɛlaŋ tɛɛmbuuwo.+
Wanaa balu naa wa cho naa mamɔɔ chiki chiki.
5 Oo Chɛhowa, le vɛɛ kpɛ ŋ cho yɛ wa a tumboo? Baa lefafɛɛŋ?+
Le vɛɛ kpɛ ŋ cho yɛ wa a kɔl tuu bɛndoo nuaa maa leyiŋ?+
6 Hulu kɔl num tuuwo o lɛŋii sina num te ve choo,
Vɛlɛ a masɛi veelu diola numndaŋ te ve.+
7 Kanifuule a tɛɛmbuu Chekɔpu,
Nduyɛ ma tosa mi lɛŋnde ndɔleŋ le simnuŋ pɔmndo.+
8 Tusi naa nyɛpalaa choo le yɔŋ wɔɔŋ finyaa naa mamaa le.+
Keleŋa naa nyiɛɛye tuiinɔŋ,+
Kanifuule ŋ del bɔ.
9 Oo Mɛlɛka piŋi naa wo, yandii mala naa,+
Le sabu diola numnda tɔɔmalaŋ.
Piŋi naa, nduyɛ ma mal naa haki* le diola numndaŋ.+
10 Le yɛɛnɛ ma chɛl mi waŋnda o lɛŋnde niŋ dimi aa: “Kuɛɛnɛ Mɛlɛka ndaa cho yɛ?”+
Tosa mi lɛŋnde sina maa a miŋgi maa,+
Le kooma buɛiyaa num aa nda tɛɛmbuu waŋ, nduyɛ miŋ che ndi a lehɔl pɛɛŋ.
11 Maa yaŋ nilaŋ o koŋul wana cho o chiɛi manyumndo niŋndo.+
Soliŋ kpaaya num bɛndoo* kpeku, le ma manda wanaa nda kilul yamɛi le piɔmndo sɔlaa wa.*+